জ্যেষ্ঠ সাংবাদিক পদ্মেশ্বৰ চিত্ৰকৰৰ মৃত্যু : দৈনন্দিন বাৰ্তা’ কাকতৰ কাৰ্যালয়ত বন্তি প্ৰজ্বলন

গুৱাহাটী

অসমৰ এজন জ্যেষ্ঠ সাংবাদিক পদ্মেশ্বৰ চিত্ৰকৰৰ বুধবাৰে নিশা ১০ বজাত মৃত্যু হয়৷ যোৱা চাৰি দশক ধৰি গুৱাহাটীত সাংবাদিকতা কৰা জ্যেষ্ঠ সাংবাদিকজন প্ৰায় ডেৰ মাহ ধৰি চিকিৎসালয়তে আছিল৷ মৃত্যুৰ পূৰ্বে দুদিন ধৰি সাংবাদিকজনক আইচিইউত ৰখা হৈছিল৷ বিগত বৰ্ষত সাংবাদিক পেঞ্চন লাভ কৰা পদ্মেশ্বৰ চিত্ৰকৰে ৬২ বছৰ বয়সত শেষ নিশ্বাস ত্যাগ কৰে৷ এজন নিৰ্ভিক সাংবাদিক হিচাপে ৰাজ্যখনত বিশেষ স্থান লাভ কৰা সাংবাদিক চিত্ৰকৰৰ মৃত্যুত শোকৰ ছাঁ পৰিছে৷ সংবাদিকজনৰ মৃত্যুত গভীৰ শোক প্ৰকাশ কৰি বৃহস্পতিবাৰে ‘দৈনন্দিন বাৰ্তা’ কাৰ্যালয়ত বন্তি প্ৰজ্বলন কৰে৷ ‘দৈনন্দিন বাৰ্তা’ কাকতৰ সম্পাদক শংকৰ গোহাঞিৰ লগতে কাকতখনৰ সাংবাদিক আৰু কৰ্মচাৰীসকলে পদ্মেশ্বৰ চিত্ৰকৰৰ মৃত্যুত শোক প্ৰকাশ কৰি বন্তি প্ৰজ্বলন কৰে৷