টীয়কত ঘৰে ঘৰে কৰ’না মহামাৰীৰ ওপৰত সজাগতা শিক্ষা কর্মীৰ

সমগ্ৰ ৰাজ্যৰ  লগতে যোৰহাট জিলাত ভয়ানক ধৰণে কৰ’না মহামাৰীৰ সংক্ৰমণ বৃদ্ধি পাইছে। যোৰহাট জিলাত কভিড সংক্ৰমণ ৰোধ কৰিবৰ বাবে তৎপৰ হৈ পৰিছে জিলা প্ৰশাসন। জিলা খনৰ বিভিন্ন ঠাইত শিক্ষা কৰ্মী সকলৰ দ্বাৰা জনগণৰ মাজত সজাগতা আনিবৰ বাবে এইবাৰ এক নতুন প্ৰদক্ষেপ হাতত লৈছে যোৰহাট জিলা প্ৰশাসনে। যোৰহাট জিলা প্ৰশাসনৰ আদেশ মৰ্মে আজি পূব যোৰহাট শিক্ষাখণ্ডৰ অন্তৰ্গত বলমা মণ্ডলৰ  সমলকেন্দ্ৰৰ সমন্বয়ক উজ্জ্বল জ্যোতি গগৈৰ উদ্যোগত মণ্ডল তোৰ শিক্ষক শিক্ষয়িত্ৰী,সমাজ কল্যাণ বিভাগৰ মুখ্য সেৱিকা ৰীতা গগৈ, আশা কৰ্মী আদিৰ সহযোগত ঘৰে ঘৰে গৈ কভিড মহামাৰীৰ ওপৰত সজাগতা আৰু কেনেদৰে ক’ভিড মহামাৰীৰ প্ৰতিৰোধ কৰিব পাৰি তাৰ ওপৰত এক কাৰ্যসূচী হাতত লয়। জগদুৱাৰ অঞ্চলৰ পৰা আৰম্ভ কৰি টীয়ক বাগান, বাঁহবাৰী,নগাদেৰা,শ্যাম মিচিং গাওঁ,চাকলিবৰ, নামচেচুকে ধৰি বহু কেইটা অঞ্চলত জন সাধাৰণক সজাগ কৰাৰ উদ্দেশ্য ঘৰে ঘৰে যায়। শিক্ষা কৰ্মী সকলৰ এই প্ৰচেষ্টাক স্থানীয় সচেতন মহলে যথেষ্ট শলাগ লৈছে।