বুঢ়াশেনচোৱাৰ পৰা আমগুৰি ৰংদৈ নতুন কঢ়ালগাওঁ, কাঠনিআটী, ডেকাশেনচোৱা সংযোগী পকী পথত কালভাৰ্ট নিৰ্মাণত বেমেজালি

উজনি-মাজুলী, ১৯ নৱেম্বৰঃ  মাজুলীৰ স্থানীয় বিধায়ক তথা মুখ্যমন্ত্ৰী সৰ্বানন্দ সোণোৱালৰ সদিচ্ছাৰ বাবে মাজুলীৰ এটা পিছ পৰা অঞ্চলৰ ৰাইজে পকী পথ লাভ কৰি সন্তোষ লাভ কৰিছিল ৷ অসম চৰকাৰে দিয়া এই উপহাৰৰ বাবে চৰকাৰক জনসাধাৰণে অভিনন্দন ও ধন্যবাদ জনাইছিল । স্বাধীনতাৰ সত্তৰ বছৰৰ পিছত অৱশেষত বুঢ়াশেনচোৱাৰ পৰা আমগুৰি ৰংদৈ গাঁৱৰ মাজেদি নতুন কঢ়ালগাওঁ, কাঠনিআটী, ডেকাশেনচোৱা সংযোগী পথটো পকীকৰনৰ কাম সুকলমে চলি থকাৰ মাজতে টুনি নদীৰ পাৰত নিৰ্মাণ হব লগা এটা কালভাৰ্ট নিৰ্মাণত স্থানীয় শিক্ষক এজনে নিজৰ স্বাৰ্থৰ বাবে কালৰ্ভাট নিৰ্মাণত বাধা প্ৰদান কৰি অহাৰ অভিযোগ তুলিছে স্থানীয় ৰাইজে ৷ এই বিষয় সম্পৰ্কে  জিলাৰ অতিৰিক্ত উপায়ুক্ত গৰাকীক অৱগত কৰাৰ পিছতো কোনো ধৰণৰ ব্যৱস্থা গ্ৰহণ  নকৰাৰ অভিযোগ আন একাংশ স্থানীয় সচেতন লোকৰ । যিহেতু এই কালভাৰ্টটো নিৰ্মাণ নহলে বাৰিষাৰ সময়ত কোনো ফালৰপৰা পানীৰ হেঁচা বৃদ্ধি হলে পথটো  ছিঙি যোৱাৰ পূৰ্ণ সম্ভাৱনা থকা বুলি এই প্ৰতিবেদকক বিভিন্নজনে জানিবলৈ দিয়ে । উল্লেখযোগ্য যে, এই পথেৰে পূৱ মাজুলী মহাবিদ্যালয়, মেৰাগড় না: দে: উ:মা: বিদ্যালয়, চামগুৰি সত্ৰ ৰাৱনাপাৰ আদৰ্শ উ:মা: বিদ্যালয়, কেশৱৰাম বৰা হাইস্কুল, শেনছোৱা হাইস্কুল, মাজুলী মহাবিদ্যালয়কে ধৰি বহুসংখ্যক  বিদ্যালয়ৰ শতাধিক ছাত্ৰ-ছাত্ৰী আৰু পূৱ মাজুলী অঞ্চলৰ পৰা সদৰমুখী বহু চৰকাৰী কৰ্মচাৰীৰ লগতে যথেষ্ট সংখ্যক বেচৰকাৰী লোকৰ যাতায়তৰ সুবিধাজনক পথ । সেয়েহে এই গাঁও সমূহৰ ৰাইজৰ  অনতিপলমে কালভাৰ্টটো নিৰ্মাণ কৰিবৰ বাবে  জিলা উপায়ুক্তৰ হস্তক্ষেপেৰে বিহিত ব্যৱস্থা গ্ৰহন কৰিবলৈ সজোৰে দাবী উত্থাপন কৰিছে ৷ এজন লোকৰ স্বাৰ্থপৰতা মানসিকতাক স্থানীয় লোকে তীক্ষ্ণ প্ৰতিক্ৰিয়া প্ৰকাশ কৰাৰ লগতে জিলা প্ৰশাসনে যথোচিত ব্যৱস্থা গ্ৰহণ নকৰিলে  স্থানীয় গাঁওবাসী , অঞ্চলৰ ৰাইজে তীব্ৰ আন্দোলন গঢ়ি তোলাৰ হুংকাৰ দিছে ৷