থাওৰাত কংগ্ৰেছৰ ব্যাপক গৰাখহনীয়া : বিজেপিত যোগ দিলে প্ৰাক্তন কাউঞ্চিলাৰ, জেষ্ঠ্য কংগ্ৰেছ নেতাই

আগন্তুক বিধানসভা নিৰ্বাচন এপ্ৰিলত অনুষ্ঠিত হ’ব বুলি চৰ্চা চলি থকাৰ পৰিপ্ৰেক্ষিতত ৰাজ্যত নিৰ্বাচনী কুজ কাৱাজ আৰম্ভ হৈছে। থাওৰাত বিজেপি দলে ইতিমধ্যে বিধায়ক কুশল দুৱৰীৰ নেতৃত্বত নিৰ্বাচনী কামকাজ ক্ষীপ্ৰ কৰিছে। ইফালে বিৰোধী দল কংগ্ৰেছত আৰম্ভ হৈছে ব্যাপক গৰাখহনীয়া । আজি থাওৰা কংগ্ৰেছৰ নজন নেতাই আনুষ্ঠানিকভাৱে বিজেপি দলত যোগদান কৰে। থাওৰা সমষ্টিৰ বিজেপি দলৰ বকতাস্থিত  মুখ্য কাৰ্য্যালয়ত পালেঙীৰ জেষ্ঠ্য কংগ্ৰেছ নেতা দেবেন ফুকন, অবিচি কোষৰ শিৱসাগৰ জিলাৰ সাধাৰণ সম্পাদক বিকাশ গগৈ, প্ৰাক্তন কাউন্সিলাৰ বসন্ত গোহাঁই, ৰাজু গোৱালা, পালেঙী মণ্ডল কংগ্ৰেছৰ নেতা যাদৱ চন্দ্ৰ গগৈ, জিতু কোঁৱৰ, প্ৰদীপ দুৱৰা, ইন্দ্ৰজিৎ গগৈ, অনিপ মেচে বিজেপিত যোগদান কৰে। সকলোকে বিধায়ক কুশল দুৱৰীয়ে দললৈ আদৰণি জনায় আৰু সমষ্টিৰ উন্নয়নত আগভাগ ল’বলৈ আহ্বান জনায়। পাৰিজাত গাওঁ পঞ্চায়তৰ সভাপতি নৱৰঞ্জন মহনে আঁতধৰা সভাত বিজেপি বকতা মণ্ডলৰ সভাপতি, অমিয় কোঁৱৰ, নিতাই পানীদিহিং মণ্ডলৰ সভাপতি নবীন গগৈকে ধৰি ভালেসংখ্যক বিজেপি দলীয় কৰ্মকৰ্তা উপস্থিত থাকে।