দৈনন্দিন বাৰ্তা ডেস্ক :
বিশাল অংক বিনিয়োগ কৰিব গুগলে৷ সোমবাৰে টুইট কৰি এই কথা জনাইছে গুগলৰ চিইঅ’ সুন্দৰ পিচাই ৷ ভাৰতৰ ডিজিটেল অৰ্থনীতিৰ উন্নয়নৰ বাবে এই অৰ্থ বিনিয়োগ কৰা হ’ব বুলি তেওঁ জনায় ৷ চীনৰ সৈতে উত্তেজনা আৰু ক’ৰোনা ভাইৰাছৰ বাবে লকডাউনৰ সময়ত পিচাইয়ে কৰা এই ঘোষণাই দেশৰ উন্নতিত বহু পৰিমাণে সহায়ক হ’ব ৷ ইয়াৰ লগতে নতুন কৰ্মসংস্থাপন হ’ব৷ ক’ৰোনা সংক্ৰমণ আৰু লকডাউনৰ বাবে ভাৰতৰ অৰ্থনীতিত মাধমাৰ পৰে ৷ তাৰ লগতে চীনৰ সৈতে উত্তেজনা চলাত শ্বেয়াৰ বজাৰত সমস্যাৰ সৃষ্টি হৈছিল ৷ গুগলৰ এই ঘোষণাই শ্বেয়াৰ বজাৰ উন্নতিৰ দিশত সহায়ক হ’ব ৷ প্ৰধানমন্ত্ৰী নৰেন্দ্ৰ মোডীৰ ডিজিটেল ইণ্ডিয়াক প্ৰশংসা কৰি এই বিনিয়োগৰ কথা জনাই সুন্দৰ পিচাই ৷ পৰ্যায় ক্ৰমে অহা ৫-৬ বছৰত মুঠ ৭৫ হাজাৰ কোটি টকা বিনিয়োগ কৰিব গুগলে ৷ গুগল ফৰ ইণ্ডিয়াত সুন্দৰ পিচাই জনায় যে অহা ৫-৬ বছৰত এই বিশাল অংকৰ ধন বিনিয়োগ কৰা হ’ব ৷ ইয়াৰ মূল পৰিকাঠামো প্ৰস্তুত কৰা, যৌথ উদ্যোগ, ইকুইটিৰ জৰিয়তে বিনিয়োগ কৰা হ’ব ৷ তেওঁ লগতে জনায় যে মুঠ চাৰিটা ক্ষেত্ৰত এই বিনিয়োগ কৰা হ’ব ৷ পিচায়ে জনায় যে সকলো দেশবাসীৰ ওচৰত তেওঁলোকৰ নিজস্ব ভাষাত তথ্য পোৱাই দিয়াৰ পৰিকাঠামো তৈয়াৰ কৰা, দেশবাসীৰ চাহিদা মতে বিভিন্ন পণ্য প্ৰস্তুতত জোৰ দিব গুগলে ৷ তদুপৰি ডিজিটেল প্লেটফৰ্মত ব্যৱসায় বৃদ্ধি আৰু ডিজিটেল পৰিকাঠামো তৈয়াৰত সহায় কৰা হ’ব ৷