প্ৰধানমন্ত্ৰী আৱাস-গ্ৰামীণ আঁচনি আদি ৰূপায়ণত বৰপেটা জিলাৰ বৃহৎ সফলতা

বৰপেটা, ২৬ নবেম্বৰ : পঞ্চায়ত আৰু গ্ৰামোন্নয়ন বিভাগৰ বিভিন্ন আঁচনি ৰূপায়ণৰ ক্ষেত্ৰত ৰাজ্যখনৰ ভিতৰতে বৰপেটা জিলাই অগ্ৰণী ভূমিকা গ্ৰহণ কৰা পৰিলক্ষিত হৈছে । যোৱা ১৮ নবেম্বৰত পঞ্চায়ত আৰু গ্ৰামোন্নয়ন বিভাগৰ ৰাজ্যিক পৰ্যায়ৰ পৰ্যালোচনা সভা গুৱাহাটীৰ শংকৰদেৱ কলাক্ষেত্ৰৰ প্ৰেক্ষাগৃহত অনুষ্ঠিত হয় । ৰাজ্যিক পৰ্যায়ত হোৱা পৰ্যালোচনাত এমজি এনৰেগা, ‘প্ৰধান মন্ত্ৰী আৱাস-গ্ৰামীণ’ আঁচনি আদি ৰূপায়ণত বৰপেটা জিলাই বৃহৎ সফলতা কঢ়িয়াই সুনাম অৰ্জন কৰে । চতুৰ্দশ বিত্তীয় আয়োগৰ আঁচনিৰ ক্ষেত্ৰত ২০১৬-১৭, ২০১৭-১৮, ২০১৮-১৯ বৰ্ষৰ আচনিৰ পুঁজিৰ ‌‌‌১০০ শতাংশ ব্যয় কৰিবলৈ জিলা মুখ্য কাৰ্যবাহী বিষয়া আৰু খণ্ড উন্নয়ন বিষয়া সকলে তৎপৰতা অৱলম্বন কৰা‌ পৰিলক্ষিত হৈছে । জানিব পৰা মতে, জিলাখনত ২০১৬-১৭, ২০১৭-১৮ বিত্তীয় বৰ্ষত ‘প্ৰধান মন্ত্ৰী আৱাস-যোজনা’ আঁচনিৰ ১৪২৫৭টা গৃহৰ ভিতৰত ১৩৬৭৯টা (৯৬শতাংশ), ২০১৯-২০ বিত্তীয় বৰ্ষত ১১১৮১টা গৃহৰ ভিতৰত ৪৮৯৩ টা গৃহ নিৰ্মাণ ইতিমধ্যে সম্পূৰ্ণ হৈছে । একেদৰে ১৯২০-২১ বিত্তীয় বৰ্ষৰ ৫২৭৭৬টা গৃহ নিৰ্মাণৰ কাম ইতিমধ্যে আৰম্ভ হোৱা বুলি জানিব পৰা গৈছে ৷ একেদৰে জিলাখনৰ মন্দিয়া উন্নয়ন খণ্ডত ২০১৭-১৮ বিত্তীয় বৰ্ষত ২৭৮৮ টা গৃহৰ ভিতৰত ২৭৫৩টা (৯৯শতাংশ), ২০১৯-২০বৰ্ষত ৩৮৭৪টা গৃহৰ ভিতৰত ১৭৩৪টা গৃহ নিৰ্মাণৰ কাম সম্পূৰ্ণ হোৱাৰ লগতে ২০২০-২১বৰ্ষত ৩৭৮১৬টা গৃহ নিৰ্মাণৰ কাম চলি আছে বুলি জানিব পৰা গৈছে ৷ মন্দিয়া উন্নয়ন খণ্ডৰ খণ্ড উন্নয়ন বিষয়া নৱৰত্ন পাটোৱাৰীয়ে দুৰ্গম ঠাইবোৰতো আঁচনিবোৰ সঠিক ৰূপায়নত বিশেষ গুৰুত্ব প্ৰদান কৰি অহা কাৰ্যক সচেতন ৰাইজে শলাগ লৈছে ৷ উল্লেখ্য যে বৰপেটা জিলা পৰিষদৰ মুখ্য কাৰ্যবাহী বিষয়া হিচাবে যোগদানৰ এদিন পিছতে ইমনোজ কুমাৰ চিকাৰিয়াই বৰপেটা জিলাৰ এঘাৰটা উন্নয়ন খণ্ডৰ খণ্ড উন্নয়ন বিষয়াৰ উপৰি বিভিন্ন পৰ্যায়ৰ বিষয়া-কৰ্মচাৰীক আহ্বান কৰি গ্ৰামোন্নয়নৰ কাম-কাজৰ পৰ্যালোচনা কৰে ।