বংগোপসাগৰৰ বাংলাদেশৰ সমীপত সক্ৰিয় ঘূৰ্ণীবতাহ ধুমুহা ‘হামুন’ বিপদজনক হৈ পৰিছে। ইয়াৰ প্ৰভাৱৰ বাবে আজি দেশৰ ৫ খন ৰাজ্যত প্ৰচণ্ড বৰষুণ হ’ব পাৰে। বতৰ বিজ্ঞান বিভাগে ঘূৰ্ণীবতাহ ধুমুহা ‘হামুন’ৰ সন্দৰ্ভত এক আপডেট জাৰি কৰিছে। আগন্তুক ১২ ঘন্টাত ত্ৰিপুৰা, নাগালেণ্ড, মণিপুৰ, মেঘালয় আৰু মিজোৰামত ধাৰাসাৰ বৰষুণৰ সম্ভাৱনা আছে । বতৰ বিজ্ঞান বিভাগে জনসাধাৰণক ধুমুহাৰ বিষয়ে অৱগত হৈ থাকিবলৈ আৰু চৰকাৰী পৰামৰ্শ মানি চলিবলৈ অনুৰোধ জনাইছে। ইয়াৰ সমান্তৰালকৈ সংশ্লিষ্ট ৰাজ্য চৰকাৰসমূহক ধুমুহাৰ প্ৰতি লক্ষ্য ৰাখি প্ৰস্তুতি ৰখাৰ লগতে উদ্ধাৰ আৰু সাহায্যৰ বাবে দল সাজু কৰিবলৈ কোৱা হৈছে।
ব্যক্তিগত বতৰ ৱেবছাইট স্কাইমেটত প্ৰকাশ পোৱা তথ্য অনুসৰি, প্ৰচণ্ড ঘূৰ্ণীবতাহৰ ধুমুহা ‘হামুন’ এতিয়া উত্তৰ-পূব দিশলৈ গতি কৰিছে। ২৫ অক্টোবৰৰ বিয়লি চট্টগ্ৰামৰ দক্ষিণে বাংলাদেশৰ উপকূল অতিক্ৰম কৰিছিল। ইয়াৰ বতাহৰ গতিবেগ প্ৰতি ঘণ্টাত ৭৫ৰ পৰা ৮৫ কিলোমিটাৰৰ ভিতৰত থাকে। যোৱা ২৪ ঘণ্টাৰ বতৰৰ কথা যদি কওঁ লক্ষদ্বীপ, মণিপুৰ, মিজোৰাম, ত্ৰিপুৰা, অসম, মেঘালয় আৰু নাগালেণ্ডত সামান্য বৰষুণ হৈছিল। এই সময়ছোৱাত কেৰালাত সামান্যৰ পৰা মধ্যমীয়া বৰষুণ হৈছিল। আনহাতে আন্দামান আৰু নিকোবৰ দ্বীপপুঞ্জ আৰু গংগা পশ্চিম বংগত লঘুৰ পৰা মধ্যমীয়া বৰষুণ হৈছিল।
সংস্থাটোৰ মতে, আজি (Today Weather Update) উত্তৰ-পশ্চিম, মধ্য আৰু পূব ভাৰতৰ নূন্যতম উষ্ণতা সামান্য হ্ৰাস পাব পাৰে। যাৰ বাবে ৰাতি ঠাণ্ডাৰ অনুভৱ আৰু বৃদ্ধি পাব। উত্তৰ-পূব ভাৰত, গংগেটিক পশ্চিম বংগ, উপকূলীয় ওড়িশা, উপকূলীয় অন্ধ্ৰ প্ৰদেশ, আন্দামান আৰু নিকোবৰ দ্বীপপুঞ্জ আৰু লক্ষদ্বীপত আজি সামান্য বৰষুণৰ সম্ভাৱনা আছে। ইয়াৰ লগতে আগন্তুক ২৪ ঘন্টাত কেৰালাত মধ্যমীয়া বৰষুণৰ সম্ভাৱনা আছে।