নুমলীগড়তপুখুৰীত পৰি তিনি শিশুৰ সলিল সমাধিঃ অঞ্চল জুৰি শোকৰ ছাঁ ।

মুৰফুলনী

 গোলাঘাট জিলাৰ মৰঙি মৌজাৰ নুমলীগড় আৰক্ষী চকীৰ অধীনস্থ দৈগ্ৰোং চাহ বাগিচাত আজি একেটা পৰিয়ালৰে তিনিটিকৈ দেৱশিশু পুখুৰীত পৰি কৰুণ মৃত্যুক আঁকোৱালি লোৱা ঘটনাই সমগ্ৰ মৰঙিবাসীকে শোকস্তব্ধ কৰি তুলিছে। ঘটনা বিবৰণী অনুসৰি দৈগ্ৰোং চাহ বাগিচাৰ ১১ নং লাইনৰ শেৱানুজ খেৰিয়াৰ দুই পুত্ৰ তিনি বছৰীয়া ইচ্ছা খেৰিয়া  আৰু ছবছৰীয়া সঞ্জয় খেৰিয়া  লগতে শেৱানুজ খেৰিয়াৰ ভাতৃ পাটৰাজ খেৰিয়াৰ পুত্ৰ তিনিবছৰীয়া দেৱাশীষ খেৰিয়া একেলগে খেলি আছিল। আন দিনাৰ দৰে আজিও মাক দেউতাক চাহ বাগিচালৈ কামৰ বাবে যোৱাত আইতাকৰ সৈতে ঘৰতে থৈ গৈছিল শিশুকেইটিক । আইতাকে ঘৰৰ কামত আত্মনিয়োগ কৰাৰ সময়লৈকে তিনিও শিশুৱে চোতালতে উমলি আছিল। কিন্তু কিছু সময়ৰ পাছত তেওঁ লক্ষ্য কৰে যে শিশু তিনিটি  চোতালত নাই।  লগে লগে স্থানীয় লাইনৰ চৌদিশে শিশু কেইটিক বিচাৰি চলাথ কৰে। শেষত ঘৰৰ পাছফালে সমীপতে থকা এটা পুখুৰীলৈ লক্ষ্য কৰাত এটি শিশু পানীত উপঙি থকা প্ৰত্যক্ষ কৰে। তৎক্ষণাত আইতাক গৰাকীয়ে পুখুৰীত নামি আন দুটি শিশুকো পানীত ডুব যোৱা অৱস্থাৰ পৰা উদ্ধাৰ কৰে। ঘটনাক কেন্দ্ৰ কৰি বাগিচাখনত হুৱা দুৱা পৰিস্থিতিৰ সৃষ্টি হয় আৰু তিনিটি শিশুকে তাৎক্ষণিকভাৱে লেটেকুজান চাহ বাগিচা চিকিৎসালয়লৈ নিয়া হয়, কিন্তু চিকিৎসকে শিশু কেইটিৰ ইতিমধ্যেই মৃত্যু হোৱা বুলি ঘোষণা কৰে। ইয়াৰ পিছত নুমলীগড় আৰক্ষীক বিষয়টো অৱগত কৰাত ঘটনাস্থলীত আৰক্ষী উপস্থিত হৈ শিশু তিনিটিৰ মৃতদেহ  মৰণোত্তৰ পৰীক্ষাৰ বাবে গোলাঘাট কুশল কোঁৱৰ অসামৰিক চিকিৎসালয়লৈ প্ৰেৰণ কৰে।