দৈনন্দিন বাৰ্তা সেৱা চিলাপথাৰ,৬ জানুৱাৰীঃ নিখিল ৰাভা সাহিত্য সভা, নিখিল ৰাভা ছাত্ৰ সন্থা, নিখিল ৰাভা জাতীয় পৰিষদ, ৰাভা উন্নয়ণ পৰিষদ দাবী সমিতি আৰু নিখিল ৰাভা মহিলা পৰীষদৰ ধেমাজি জিলা সমিতিৰ উদ্যোগত চমকং নাৰায়পূৰ ৰাভা গাঁওত এখন জন জাগৰণ সভা অনুষ্ঠিত কৰা হয় । নিখিল ৰাভা সাহিত্য সভাৰ ধেমাজি জিলা সমিতিৰ সভাপতি পানীৰাম ৰাভাই সভাপতিত্ব কৰা সভাৰ আদৰণি ভাষনৰ লগতে তাৎপৰ্য ব্যাখ্যা আগবঢ়াই ৰাভা উন্নয়ন দাবী সমিতিৰ সাধাৰণ সম্পাদক বকুল ৰাভাই কয় ৰাভা হাচং স্বায়ত্তশাসিত পৰিষদৰ আওতাৰ বাহিৰৰ ৰৈ যোৱা ৰাভা সকলে আজিও ৰাজনৈতিক, আৰ্থ-সামাজিক, শৈক্ষিক, সাংস্কৃতিকভাৱে পিছপৰি আছে।
ৰাভা হাচং স্বায়ত্তশাসিত পৰিষদৰ আওতাৰ বাহিৰৰ অসমৰ ভূমিপুত্ৰ জনজাতি ৰাভা সকলৰ সৰ্বাঙ্গীণ উন্নয়ন আৰু বিকাশৰ বাবে ৰাভা উন্নয়ন পৰিষদ গঠনৰ বিকল্প নাই বুলি উল্লেখ কৰি চৰকাৰক শীঘ্ৰে ইয়াৰ ব্যৱস্থা হাতত ল’বলৈ দাবী জনায়। সভাত আমন্ত্ৰিত অতিথি হিচাপে উপস্থিত থাকি নিখিল ৰাভা ছাত্র সন্থাৰ সভাপতি নৃপেন খাণ্ডাই কয় ভূমিপুত্ৰ জনজাতি ৰাভা সকলে স্বৰাজোত্তৰ পয়সত্তৰ বছৰৰ পাছতো কোনো উন্নয়নৰ মুখ দেখিবলৈ সক্ষম হোৱা নাই বুলি বক্তব্য ৰাখি দীঘলীয়া সংগ্ৰামৰ ফলত এটা নিৰ্দিষ্ট সীমাৰ ভিতৰত ৰাভা স্বায়ত্তশাসিত পৰিষদ গঠন কৰি দিছে যদিও বৃহৎ সংখ্যক ৰাভা ৰাইজৰ ইয়াৰ বাহিৰত ৰৈ গৈছে। ৰাভা পৰিষদৰ বাহিৰৰ ৰাভা সকলৰ উন্নয়ন নিশ্চিত কৰিবলৈ বিকল্প প্ৰশাসনিক ব্যৱস্থাৰ প্ৰয়োজন অতি দৰকাৰ বুলি কৈ এইক্ষেত্ৰত জনগোষ্ঠীটোৰ সৰ্বতো শ্ৰেণীৰ ৰাইজক সজাগ দৃষ্টিভংগী ৰাখিবলৈ আহ্বান জনায়। সভাত নিখিল ৰাভা জাতীয় পৰিষদৰ সভাপতি বাবুল চন্দ্ৰ ৰাভা, নিখিল ৰাভা সাহিত্য সভাৰ মুখ্য সম্পাদক ৰাজকুমাৰ ৰাভা, নিখিল ৰাভা মহিলা পৰিষদৰ সভানেত্ৰী কবিতা ৰাভাই স্বকীয় সাংবিধানিক অধিকাৰ প্ৰাপ্তিৰ বাবে ৰাভা জনগোষ্ঠীৰ সচেতন ব্যক্তি, মহিলা, পুৰুষ, যুৱক-যুৱতী, কৃষক সকলোকে উমৈহতীয়া চিন্তা আৰু জাতীয় চেতনাৰে আগবাঢ়ি আহিবলৈ উদাত্ত ভাষন আগবঢ়ায়।অনুষ্ঠানত নিখিল ৰাভা ছাত্র সন্থাৰ সাধাৰণ সম্পাদক প্ৰদীপ ৰাভা,সাংগঠনিক সম্পাদক জয়চন্দ্ৰ ৰাভা, কোষাধ্যক্ষ দেৱেশ ৰাভা, নিখিল ৰাভা জাতীয় পৰিষদৰ সাধাৰণ সম্পাদক গোবিন্দ ৰাভা,ৰাভা উন্নয়ন পৰিষদ দাবী সমিতিৰ সাংগঠনিক সম্পাদক দিগন্ত ৰাভা প্ৰমুখ্যে ৰাভা জাতীয় সংগঠনৰ কেন্দ্ৰীয় আৰু ধেমাজি জিলা সমিতিৰ বিষয়ববীয়া সকল উপস্থিত থাকে
