সমগ্ৰ শিক্ষা, মাজুলী শিক্ষাখণ্ডৰ উদ্যোগত আলিমূৰ দক্ষিণপাট কৈৱৰ্ত্ত প্ৰাথমিক বিদ্যালয়ত দিনজোৰা কাৰ্যসূচীৰে বিশ্ব ব্ৰেইল দিৱস উদযাপন কৰে I বিশ্ব ব্ৰেইল দিৱসৰ লগত সংগতি ৰাখি সৰ্বাত্মক খেল-ধেমালি পুৱা ৯:০০ বজাৰ পৰা ছাত্ৰ-ছাত্ৰীসকলৰ মাজত অনুষ্ঠিত কৰা হয় I

বিশেষভাৱে সক্ষম ছাত্ৰ-ছাত্ৰীসকলেও প্ৰত্যেক খেল-ধেমালিত অংশগ্ৰহণ কৰি পূৰ্ণ সহযোগিতা আগবঢ়ায় I দুপৰীয়া ১২:০০ বজাৰ পৰা খণ্ড প্ৰাথমিক শিক্ষা বিষয়া আৰু খণ্ড মিছন সমন্বয়ক সৌৰভ বৰফুকনৰ সভাপতিত্ব সম্বৰ্দ্ধনা আৰু পুৰস্কাৰ বিতৰণী সভা অনুষ্ঠিত হয় I

সভাৰ উদ্দেশ্য ব্যাখ্যা কৰে সৰ্বাত্মক শিক্ষা,মাজুলী শিক্ষাখণ্ডৰ ব্যক্তি ৰমেন বৰুৱাই I বিশিষ্ট অতিথি ক্ৰমে- বুনিয়াদী প্ৰশিক্ষণ কেন্দ্ৰ,ৰাৱনাপাৰৰ অধ্যক্ষ তপন শইকীয়া , খণ্ড সমল ব্যক্তি অৰিন্দম শইকীয়া, মণ্ডল সমন্বয়ক মনোজ্যোতি ৰেগন,ডম্বৰুধৰ নাথ আৰু আলিমূৰ কৈৱৰ্ত্ত প্ৰাথমিক বিদ্যালয়ৰ প্ৰধান শিক্ষক বুবুল শইকীয়াই উপস্থিত থাকি বক্তব্য প্ৰদান কৰে I

সভাত সমল ব্যক্তি ক্ৰমে – সুনিল শইকীয়া , বিশ্বজিৎ দত্ত,মহেন্দ্ৰ বৰা আৰু ১৬৯ নং কুলি চাপৰি প্ৰাথমিক বিদ্যালয়ৰ প্ৰধান শিক্ষক অমূল্য টায়ে উপস্থিত থাকে I বিশ্ব ব্ৰেইল দিৱসৰ লগত সংগতি ৰাখি সৰ্বাত্মক শিক্ষাৰ বিশেষ প্ৰয়োজন সম্পন্ন শিশুসকলক আগবঢ়াই নিয়াৰ ক্ষেত্ৰত বিভিন্ন দিশত সহযোগিতা আগবঢ়াই অহা মাজুলী শিক্ষাখণ্ডৰ মণ্ডল সমল কেন্দ্ৰ সমন্বয়ক সকলৰ ভিতৰত শ্ৰেষ্ঠ মণ্ডল সমল কেন্দ্ৰ সমন্বয়ক হিচাপে মনোজ্যোতি ৰেগন আৰু শ্ৰেষ্ঠ প্ৰধান শিক্ষক হিচাপে অমূল্য টায়েক মানপত্ৰ ,গামোচা আৰু কিতাপৰ টোপোলাৰে সম্বৰ্দ্ধনা জনায় I

ইয়াৰ পিছতে পুৰস্কাৰপ্ৰাপ্ত ছাত্ৰ-ছাত্ৰীসকলক পুৰস্কাৰ প্ৰদান কৰে I সভাপতিৰ মন্তব্যৰ পিছতে জাতীয় সংগীত পৰিৱেশন কৰি সভা ভংগ ঘোষণা কৰে I

ৰহাত বিজেপিৰ অনুসূচীত জাতি মৰ্চাৰ পদযাত্ৰা কাৰ্যসূচী। যোৱা ২৭ডিচেম্বৰৰ পৰা বিজেপিৰ অনুসূচীত জাতি মৰ্চাই ৰাজ্যজুৰি চলোৱা পদযাত্ৰাৰ অংশস্বৰূপে ৰহাতো দুদিনীয়াকৈ এই পদযাত্ৰা অনুষ্ঠিত কৰে।

ৰহাতো বিজেপি চৰকাৰৰ উন্নয়নমূলক কাম-কাজ তথা আঁচনিসমূহ ৰাইজৰ মাজলৈ নিয়াৰ উদেশ্যে মৰ্চাৰ ৰাজ্যিক সভানেত্ৰী মুন স্বৰ্ণকাৰৰ নেতৃত্বত চলোৱা এই পদযাত্ৰাৰ শেষত বৃহস্পতিবাৰে ৰহা পুৰণা চাৰিআলিত অনুষ্ঠিত কৰা হয় এক জনসভা।

জনসভাত অংশগ্ৰহণ কৰে বিজেপিৰ ৰাজ্যিক সভাপতি ভৱেশ কলিতাই। জনসভাখনত ভাষণ দি ৰাজ্যিক সভাপতিগৰাকীয়ে বিজেপি চৰকাৰৰ দিনত হোৱা দেশ তথা অসমৰ উন্নয়নৰ এক খতিয়ান দাঙি ধৰাৰ লগতে চৰকাৰৰ আঁচনিসমূহৰ বিবৰণো দাঙি ধৰে।

আগন্তুক লোকসভা নিৰ্বাচনত নগাঁও লোকসভা সমষ্টিত বিজেপিৰ প্ৰাৰ্থীয়ে বিপুল ভোটত জয় হ’ব বুলি মন্তব্য কৰি এইবাৰ লোকসভা নিৰ্বাচনত সমগ্ৰ ভাৰততে বিজেপিয়ে ইতিহাস ৰচিব বুলিও মন্তব্য কৰে। ডিমা হাচাও স্বায়ত্ত পৰিষদৰ নিৰ্বাচনতো বিজেপিয়ে আটাইকেইখন আসন লাভ কৰিব বুলি দাবী কৰে ৰাজ্যিক বিজেপিৰ সভাপতিগৰাকীয়ে।

জনসভাখনত সমাজৰ বিভিন্ন ক্ষেত্ৰত অৱদান আগবঢ়োৱা ৰহা সমষ্টিৰ ২৫গৰাকী ব্যক্তিক সম্বৰ্ধনা জনোৱা হয়। এই জনসভাতে অসম জাতীয় পৰিষদৰ অৰ্ধ শতাধিক কৰ্ম-কৰ্তাই ৰাজ্যিক সভাপতিৰ উপস্থিতিত বিজেপিত যোগদান কৰে।

পৰিৱেশৰ মনোমোহা কথাৰে সজোৱা কাহিনীবোৰ পঢ়ি আমি ভাল পাওঁ। সংৰক্ষণৰ কথাবোৰ পঢ়ি ভাল নম্বৰ লৈ জীৱনত সফল হওঁ যদিও প্ৰায়ে সেই সংৰক্ষণ আৰু দায়িত্বৰ কথাবোৰ পাহৰি থাকোঁ। ইয়াৰ মূলতে হ’ল আমাৰ দায়বদ্ধ গুণৰ বিষয়ে জানিলেও ইয়াৰ কাৰ্যকৰী জ্ঞান নথকাটো। ধৰক আপোনালোকৰ গাঁওখনৰ মাজলৈ পথ হেৰুৱাই হঠাতে কেইটামান পহু আহিল।

হঠাতে অহা এই পহুকেইটাক দেখা পালে আমি বাৰু কি কৰিম? কেপচাৰ মায়’পেথি নামৰ কাৰকবিধে এইক্ষেত্ৰত ভয়ংকৰভাৱে ক্ৰিয়া কৰিব পাৰে। তেন্তে ইয়াৰ বাবে আমি কি কৰা উচিত? পৰিবেশ সুৰক্ষাৰ বাবে আমি বহুত কথা ক’লোঁ। বহু ভাষণ দিলোঁ। এতিয়া কাম কৰাৰ সময়। এই কাম আমি কেনেদৰে কাৰ সৈতে কৰিব পাৰিম? ঢকুৱাখনাৰ ঐতিহ্যমণ্ডিত চাৰিকড়ীয়া নদীৰ পাৰৰ জীৱ বৈচিত্ৰ্য সুৰক্ষাৰ ক্ষেত্ৰত কেনেদৰে কাম কৰি আছে মানস, বিমান, ৰণ্টু, ধ্ৰুৱ, ধৰ্মেশ্বৰ সৈতে? কি শিকিবলগীয়া আছে তেওঁলোকৰ পৰা? মানুহ প্ৰকৃতিৰ উপাসক। প্ৰকৃতিৰ সৈতে জড়িত হৈ থাকে এটা জাতীৰ স্বকীয়তা, জাতীয় পৰম্পৰা। এই পৰম্পৰাই গঢ় দিয়ে লোকসাংস্কৃতিক ঐতিহ্য।

তেনে লোক পৰম্পৰাৰ সৈতে সম্পৰ্ক থাকে নদী, পাহাৰ, জলপ্ৰপাত আদিৰ…। এনে কি পৰম্পৰাৰে গঢ় লৈ উঠিছে চিৰকি জলপ্ৰপাতৰ ঐতিহ্য জানিবলৈ মন নাযায়নে? নাৰী প্ৰকৃতিৰ দৰে। প্ৰকৃতিৰ দৰে নাৰীও আমাৰ উপাস্য। পৃথিৱীৰ বহু ঠাইত নীৰৱে পৰিৱেশ সংৰক্ষণৰ হকে কেনেদৰে কাম কৰি আছে?

অসমত পক্ষী অধ্যয়নৰ ঐতিহ্য আৰু পৰম্পৰাৰ কথাবোৰ জানিবলৈ মন নাযায়নে? প্ৰথমজন অসমীয়া পক্ষীবিদ বুলিলে আমি প্ৰফুল্ল দত্ত গোস্বামীৰ কথা বুজোঁ। কিন্তু তেওঁৰ অধ্যয়নৰ কোনবোৰ দিশ পৰ্যবেক্ষণ কৰি এই অভিধা দিয়া হৈছে? চিঁয়া নাহৰ।

লখিমপুৰৰ দুলুঙৰ ঐতিহ্য স্বৰূপ চিঁয়া নাহৰৰ বৈজ্ঞানিক নামৰ সৈতে জড়িত হৈ আছে অসমৰ নাম। মেচুৱা আচামিকা নামেৰে সৰ্বজনবিদিত এই নাহৰৰ অতীত বুৰঞ্জীৰ বিষয়ে জানিবলৈ আমি জানিব লাগিব লখিমপুৰৰ বন বৈচিত্ৰ্যৰ কথা। শগুন। প্ৰকৃতিৰ জমাদাৰস্বৰূপ এই পক্ষীবিধ সংৰক্ষণৰ বাবে কেনেদৰে কাম হৈ আছে। কেনেদৰে অসমৰ লোকপৰম্পৰাৰ সৈতে জড়িত হৈ আছে ভাৰতীয় সাংস্কৃতিক বৈচিত্ৰ্য। পৰিৱেশ চেতনাবোধ আৰু সংৰক্ষণৰ এনে বহু কথাৰ মাজত বিচৰণ কৰিবলৈ আৰু জানিবলৈ আপুনি হাতত তুলি ল’ব লাগিব এখন কিতাপ। যিখন কিতাপৰ নাম হ’ল- ‘কোলাহল আৰু নীৰৱতাৰ সিপাৰে’।

পাঞ্চজনে বুকছে প্ৰকাশ কৰা এই গ্ৰন্থখন লিখিছে মানস প্ৰতিম দত্তই। অসমৰ পৰিৱেশ-প্ৰকৃতি সংৰক্ষণৰ হকে নিৰবিচ্ছিন্নভাৱে কাম কৰি থকা লেখক দত্তই নৱতম গ্ৰন্থ ‘কোলাহল আৰু নীৰৱতাৰ সিপাৰে’ সম্পৰ্কে কয় যে, ইয়াত পৰিৱেশ সাহিত্যৰ নব্যধাৰা ইক’ট্ৰেভেল’জিৰ সম্যক ধাৰণা দিব পৰাকৈ মনোৰম কাহিনীৰ কেইবাটাও ট্ৰেভেল ষ্ট’ৰী অন্তৰ্ভুক্ত কৰাৰ লগতে বন্যপ্ৰাণী উদ্ধাৰৰ বহুতো প্ৰত্যক্ষ অভিজ্ঞতাৰ ইতিবাচক কাহিনী সংকলিত হৈছে।’ ইক’ট্ৰেভেল’জিৰ লগতে ইয়াত সংযোজিত সৌম্যদ্বীপ দত্ত, ড° নৱ কুমাৰ চমুৱা, যুগল সন্দিকৈ আৰু হীৰেণ দত্তৰ তথ্যসমৃদ্ধ আৰু বাস্তৱজ্ঞান সমৃদ্ধ সাক্ষাৎকাৰ কেইটিয়ে গ্ৰন্থখনক সোণত সুৱগা চৰাইছে। গ্ৰন্থখনৰ মূল্য ২৫০ টকা। এই মূল্যৰ বিপৰীতে পাঠকে পাব অনেক মূল্যবান আৰু পৰিৱেশ দায়িত্ববোধৰ নৈতিকতাৰ সম্ভাৰ।