দেৰগাঁৱৰ বালিজানত দুৰ্ঘটনাত আহত ৫জন ICUত চিকিৎসাধীন। বৰ্তমানেও সংকটমুক্ত নহয় পাঁচোগৰাকী লোক। সংকটজনক অৱস্থাত JMCHত চিকিৎসাধীন ৩০গৰাকী লোক।
JMCHত চিকিত্সাধীন বালিজানত আহত ৩০ গৰাকী। সংকটজনক অৱস্থাত চিকিৎসাধীন আহতসকল। আহতসকলৰ বাবে তেজৰ প্ৰয়োজন হ’ব বুলি উল্লেখ কৰিছে চিকিৎসকে।
JMCHত চিকিৎসাধীন আহতক প্ৰয়োজনীয় তেজৰ যোগান ধৰিব অসম সেনা, যোৰহাট জিলা আছুৱে।
নিযুক্তি, পৰ্যটন, জলজীৱন মিছনকে ধৰি নানান বিষয় সামৰি মঙলবাৰে মন্ত্ৰী জয়ন্ত মল্ল বৰুৱাই এখন সংবাদমেল অনুষ্ঠিত কৰে। সংবাদমেলত মন্ত্ৰী বৰুৱাই কয় যে ডিমা হাছাওত কোনো বিৰোধী নাই। নিয়োগ বিনিময় কেন্দ্ৰত আজিৰে পৰা আকৌ ৰি ৰেজিষ্টেচন আৰম্ভ কৰা হৈছে বুলিও তেওঁ উল্লেখ কৰে। তেওঁ কয় যে পূৰ্বতে ৰেজিষ্টেচন কৰা সকলেও কৰিব লাগিব ৰি ৰেজিষ্টেচন। পূৰ্বতে কিছু নতুন নতুন বিষয়ৰ তথ্য নাছিল পৰ্টেলত।নতুন নতুন বিষয় সমূহৰ তথ্য গ্ৰহণ কৰিবৰ বাবেই এই প্ৰক্ৰিয়া আৰম্ভ কৰা হৈছে। জানুৱাৰী আৰু ফেব্ৰুৱাৰী মাহত ৰি-ৰেজিষ্ট্ৰেচন কৰিব পাৰিব ।তেওঁ কয় যে ফেব্ৰুৱাৰীৰ ২৯ তাৰিখলৈকে খোলা থাকিব সেৱা সেঁতু পৰ্টেলত এই সুবিধা। বৰ্তমানলৈ ৮৮ হাজাৰক চাকৰি দিয়া হ’ল বুলিও মন্ত্ৰী বৰুৱাই কয়। তেওঁ লগতে কয় যে কামৰূপ,দৰং,মৰিগাৱঁকে ধৰি ৪ খন জিলাত সজাগতাৰ বাবে স্কিল যাত্ৰা সম্পন্ন কৰা হৈছে। ২০২৬ চনত অসম স্কিল বিশ্ববিদ্যালয় আৰম্ভ হ’ব বুলিও তেওঁ কয়। একেদৰে আইটিআই গুৱাহাটীত এইবছৰৰ পৰাই ইয়াৰ এটা কেম্পাচ আৰম্ভ কৰা হ’ব। এইবছৰ ১০ খন জিলাত স্কিল যাত্ৰা চলিব।এইবছৰ ৬ খন ষ্টেট অফ দ্য আৰ্ট ইনষ্টিটিউত আৰম্ভ হ’ব।৩ খন আইটিআই আৰু ৩ খন পলিটেকনিকত থাকিব এই ইনষ্টিটিউট। কাৰিকৰী দক্ষতা বিকাশৰ বাবে চৰকাৰে চুক্তি কৰিছে টাটা ইলেক্ট্ৰনিক্সৰ সৈতে।অহা ২৯ জানুৱাৰীত মেগা কেৰিয়াৰ কাউঞ্চলিং এণ্ড কেৰিয়াৰ ফেয়াৰ হ’ব বুলি মন্ত্ৰী বৰুৱাই কয়।মন্ত্ৰীগৰাকীয়ে লগতে কয় যে নিযুক্তিৰ সুবিধা নথকা বিশয়সমূহ আইটিআইত বন্ধ কৰা হ’ব।
জলজীৱন মিছনৰ বিষয়ে উল্লেখ কৰি মন্ত্ৰী বৰুৱাই কয় যে জলজীৱন মিছনে অসমৰ জনসংখ্যাৰ ৭০ শতাংশ লোকক স্পৰ্শ কৰিছে। ঘৰে ঘৰে ৭০ শতাংশ লোকক জলজীৱন মিছনৰ পানী দি থকা হৈছে। মাৰ্চ মাহলৈ ইয়াক ৮০ শতাংশ কৰাৰ লক্ষ্য স্থিৰ কৰা হৈছে। ২০২৪ ত এশ শতাংশই জল জীৱন মিছন সম্পূৰ্ণ হ’ব। অসমত প্ৰথমবাৰৰ বাবে জনস্বাস্থ কাৰিকৰী বিভাগে ৭৬০০ খন ই বিলৰ জৰিয়তে অফিচলৈ নহাকৈ ২৬৭৪.৫ কোটি টকা দিয়া হৈছে। জলমিত্ৰ আৰু অস্থায়ী কৰ্মচাৰীৰ মাননি বৃদ্ধিৰ চিন্তা কৰিব চৰকাৰে।জানুৱাৰী মাহত ১ লাখ লোকে একাউন্টত শৌচালয় নিৰ্মাণৰ বাবে পোনপটীয়াকৈ পাব ১২ হাজাৰকৈ টকা।২০২৩ বৰ্ষতো এক লাখ লোকক দিয়া হৈছে ধন।পৰ্যটন বিভাগৰ বিষয়ে উল্লেখ কৰি মন্ত্ৰী বৰুৱাই কয় যে ২০২২ -২৩ চনত ঘৰুৱা পৰ্যটকৰ সংখ্যা ৮৩ লাখতকৈ অধিক হৈছে। ২০২৩ ৰ পৰা এতিয়ালৈকে ৬৩ লাখতকৈ অধিক ঘৰুৱা পৰ্যটক অসমলৈ আহিছে। তেওঁ লগতে কয় যে ফেব্ৰুৱাৰী মাহত বিধান সভাত পৰ্যটন আইন অনা হ’ব। ২০২৩ ত বিদেশী পৰ্যটকৰ সংখ্যা ১৫ হাজাৰতকৈ অধিক আছিল বুলিও তেওঁ কয়। মন্ত্ৰী বৰুৱাই লগতে কয় যে পৰ্যটন ক্ষেত্ৰ হিচাপে যোৰহাট আৰু কোকৰাঝাৰৰ উন্নয়ন কৰা হ’ব। কামাখ্যা,অশ্বক্লান্ত, দৌল গোৱিন্দ,আউনীআটী সত্ৰকে ধৰি ৭ টা ধৰ্মীয় স্থানক গঢ়ি তোলা হ’ব পৰ্যটন ক্ষেত্ৰ হিচাপে। সংবাদমেলত মন্ত্ৰী বৰুৱাই আলফাৰে কেন্দ্ৰ আৰু ৰাজ্য চৰকাৰৰ হোৱা চুক্তি আৰু ৬ নং দফা প্ৰসংগত কাৰো নাম উল্লেখ নকৰাকৈ আছুক উভতি ধৰে। মন্ত্ৰী বৰুৱাই কয় যে অসমৰ কথা চিন্তা কৰিয়েই এতিয়া বাস্তৱৰ বিষয়ত চিন্তা কৰিব লাগে। অসমত বাস্তৱ বহুত বেলেগ বুলি কৈ মন্ত্ৰী বৰুৱাই কয় যে আছুৱে চুক্তি কৰিবলৈ ক’লে বুলিয়েই বাংলাদেশে মানি ল’ব নেকি যে তেওঁলোকৰ মানুহ অসমত আছে । বাংলাদেশৰ সৈতে প্ৰত্যাৱৰ্তন চুক্তি কৰিবলে কোৱাটো অনৰ্থক কথা বুলিও তেওঁ কয়।
ৰাহুল গান্ধীৰ প্ৰসংগত মন্তব্য কৰি বৰুৱাই কয় যে মোৰ ৰাজনৈতিক ইতিহাসত ৰাহুল গান্ধীয়ে এতিয়ালৈ বহুবাৰ লঞ্চিং কৰিলে। কিন্তু সকলোতে তেওঁ বিফল হৈছে। এইবাৰ মণিপুৰৰ পৰা আকৌ ৰি লঞ্চিং কৰিব বিচাৰিছে।লঞ্চিং মানেই বিফল ৰাহুল গান্ধী। তেওঁ লগতে কয় যে কংগ্ৰেছে আঢ়ৈ টা চিটতহে প্ৰাৰ্থী দিবলৈ বিচাৰিব লাগে।আমি চাৰে এঘাৰটা পামেই। বিজেপিৰ প্ৰাৰ্থীয়ে ডিমা হাছাও নিৰ্বাচনত ১০০ শতাংশই জিকিব বুলি তেওঁ কয়।
গৈছিল বনভোজ খাবলৈ, হঠাতে ঘটিল অঘটনতো! সকলোবোৰ থানবান। পুৱতি নিশা দেৰগাঁৱৰ বালিজানত ভয়ংকৰ পথ দুৰ্ঘটনা। গোলাঘাট আঠখেলীয়া ভৰলুৱা গাঁৱৰ পৰা তিনিচুকীয়া তিলিঙা মন্দিৰলৈ বুলি বনভোজ খাবলৈ গৈছিল প্ৰায় ৪৫ জনীয়া এটা দল। হঠাতে মাৰ্ঘেৰিটাৰ পৰা আহি থকা এখন ট্ৰাকৰ সতে মুখামুখি সংঘৰ্ষ As 02 Ac 5083 নম্বৰৰ বাছ খনৰ ৷ ১২ জন লোকৰ মৃত্যু হৈছে বুলি জানিব পৰা গৈছে।
তাৰ মাজত শিশু আৰু বৃদ্ধও আছে বুলি জানিব পৰা গৈছে ৷ বগী বিলত বনভোজ খাবলৈ বুলি গৈছিল দলটো। গুৰুতৰ ভাৱে আহত ৩২ জন লোকক যোৰহাট চিকিৎসা মহাবিদ্যালয়লৈ পেৰণ কৰা হৈছে। জানিব পৰা মতে বহু কেইজন যাত্ৰী বৰ্তমান সংকটজনক অৱস্থাত।
কাছাৰৰ কাটিগড়াত পথ দুৰ্ঘটনা। বনভোজ খাই উভতাৰ পথত বনভোজ দলৰ বাহন দুৰ্ঘটনাগ্ৰস্ত।
দুৰ্ঘটনাত আহত ৫গৰাকী লোক। পথৰ কাষত ৰখাই থোৱা ট্ৰাকত খুন্দা বাহনখনৰ।
শিলচৰ মেডিকেল কলেজ হাস্পতালত ভৰ্তি দুৰ্ঘটনাগ্ৰস্তক। এজনৰ অৱস্থা সংকটজনক।
অৱশেষত জামিন লাভ কৰিলে এপিএছচিৰ প্ৰাক্তন মুখ্য পৰীক্ষা নিয়ন্ত্ৰক নন্দবাবু সিনহাই। এপিএছচি কেলেংকাৰী গোচৰত প্ৰাক্তন মুখ্য পৰীক্ষা নিয়ন্ত্ৰক নন্দবাবু সিনহাই জামিন লাভ কৰিছে। এছআইটিয়ে তেতিয়াৰ মুখ্য পৰীক্ষা নিয়ন্ত্ৰকজনক বিগত বৰ্ষৰ ডিচেম্বৰ মাহত গ্ৰেপ্তাৰ কৰিছিল। বিশেষ আদালতে নন্দবাবু সিনহাক জামিন প্ৰদান কৰে যদিও এপিএছ শ্বাহজাহান সৰকাৰৰ জামিন অস্বীকাৰ কৰে। ২০১৩ আৰু ২০১৪ চনত সংঘটিত এপিএছচি কেলেংকাৰী সন্দৰ্ভত অসম আৰক্ষীৰ বিশেষ অনুসন্ধানকাৰী দলে (এছআইটি) যোৱা বছৰ ডিচেম্বৰত সিনহাক শিলচৰৰ বাসগৃহৰ পৰা আটক কৰিছিল।
নন্দা বাবু সিনহাক এপিএছচিৰ প্ৰাক্তন অধ্যক্ষ ৰাকেশ পালৰ ঘনিষ্ঠ সহযোগী বুলি জনা যায়। এপিএছচিৰ প্ৰাক্তন মুখ্য পৰীক্ষা নিয়ন্ত্ৰকজনক এছআইটিয়ে জেৰাৰ বাবে গুৱাহাটীৰ চিআইডি কাৰ্যালয়লৈ আনিছিল। সিনহাৰ বিৰুদ্ধে ৰাকেশ পালৰ নিৰ্দেশত এপিএছচিৰ প্ৰাম্ভিক আৰু মুখ্য পৰীক্ষাৰ প্ৰায় ৪৫,০০০ উত্তৰ বহী জ্বলাই দিয়াৰ অভিযোগ উত্থাপিত হৈছে৷ ইয়াৰ উপৰি নন্দ বাবুয়ে তেওঁৰ কন্যা মিনাৰ্ভা দেৱীক অনৈতিক উপায়েৰে এচিএছ পদত নিযুক্তি দিয়া বুলিও অভিযোগ উঠি আহিছে। মিনাৰ্ভা দেৱীক ইতিমধ্যে জেৰাৰ বাবে মতাও হৈছে।
নৱজাতক বা সৰু শিশুৰ বাবে মালিচ অতি প্ৰয়োজনীয়। সুস্থ হাড় আৰু পেশীৰ বিকাশৰ উত্তম উপায় হ’ল শিশুক দৈনিক ৩-৪ বাৰ ভালদৰে মালিচ কৰা। মালিচে ৰক্ত সঞ্চালন উন্নত কৰে। ইয়াৰ উপৰিও পেশী শিথিলতা আৰু গাঁঠিৰ নমনীয়তাত সহায় কৰে। আটাইতকৈ আমোদজনক কথাটো হ’ল আপুনি মালিচৰ বাবে ব্যৱহাৰ কৰা তেলৰ ধৰণটোৱেই আটাইতকৈ গুৰুত্বপূৰ্ণ। কিন্তু ইয়াৰ প্ৰত্যক্ষ প্ৰভাৱ হাড়ৰ বৃদ্ধিত নপৰে। কিন্তু শিশুৰ সমগ্ৰ শাৰীৰিক বিকাশত প্ৰভাৱ পেলায়।
শিশুৰ বাবে মালিচ কিয় গুৰুত্বপূৰ্ণ জানেনে?
আৰ্দ্ৰতা আৰু মৃদু সুগন্ধিযুক্ত নাৰিকল তেল শিশুৰ মালিচৰ বাবে ভাল, আনহাতে সৰিয়হৰ তেল গৰম কৰা গুণৰ বাবে জনাজাত। শিশুৰ মালিচৰ উপকাৰিতা সকলোৱে জানে। ভাৰতবৰ্ষত বহু কাৰণত এইটো এটা বিখ্যাত প্ৰথা। বৈজ্ঞানিকভাৱে শিশুৰ মালিচে হাড়ৰ শক্তি বৃদ্ধি, টোপনি ভাল আৰু বৃদ্ধিত সহায় কৰে বুলি কোৱা হয়।
এতিয়া প্ৰশ্ন হয় নাৰিকল তেলে শিশুৰ মালিচৰ বাবে উপকাৰী নে? শিশুৰ মালিচৰ বাবে নাৰিকল তেল অন্যতম প্ৰিয় তেল। নাৰিকল তেল কোমল মইশ্ব’ৰাইজিং গুণৰ বাবে জনাজাত, যাৰ বাবে ই শিশুৰ সুক্ষ্ম ছালৰ বাবে উপযোগী। ইয়াৰ উপৰিও ই শুকানতা ৰোধ কৰিব পাৰে, ডায়েপাৰৰ ফোহা প্ৰাকৃতিকভাৱে ভাল কৰে। যাতে শিশুৰ ছালত ফোহা দেখা নাযায়।
শিশুৰ মালিচৰ বাবে সৰিয়হৰ তেল এটা উত্তম বিকল্প। ইয়াৰ উষ্ণতা প্ৰভাৱৰ বাবে জনাজাত। যিয়ে শিশুক গৰম কৰি ৰখাত সহায় কৰিব পাৰে। বিশেষকৈ ঠাণ্ডা বতৰত। ইয়াৰ উপৰিও হাড়ৰ স্বাস্থ্যৰ বাবে গুৰুত্বপূৰ্ণ কেলচিয়াম আৰু অন্যান্য খনিজ পদাৰ্থৰ উত্তম উৎস। ইয়াৰ উপৰিও সৰিয়হ তেলত ভেঁকুৰ প্ৰতিৰোধী গুণো আছে যিয়ে শিশুক বিভিন্ন ধৰণৰ বেক্টেৰিয়া আৰু ভেঁকুৰৰ সংক্ৰমণৰ পৰা ৰক্ষা কৰে।
দেশত প্ৰৱৰ্তন হোৱা নতুন পৰিবহণ আইনক লৈ দেশজুৰি উত্তাল প্রতিবাদ দেখিবলৈ পোৱা গৈছে।
এতিয়াৰে পৰা হিট এণ্ড ৰানৰ গোচৰত চালকে সন্মুখীন হ’ব কঠোৰ শাস্তিৰ। হিট এণ্ড ৰানৰ গোচৰত ১০ বছৰৰ কাৰাদণ্ডৰ লগতে ৭ লাখ টকা পর্যন্ত জৰিমনা বিহিব।
এই আইনৰ বিৰোধিতা কৰিছে ট্রাকচালক আৰু বাছচালকে। চালকসকলৰ দাবী তেওঁলোকে ইমান জৰিমনা ভৰিব নোৱাৰে। ট্রাক আৰু বাছচালকৰ প্ৰতিবাদত স্তব্ধ হৈ পৰিছে দেশ। অসমতো ব্যাপক প্রতিবাদ দেখিবলৈ পোৱা গৈছে।
উল্লেখ্য যে খবৰ অনুসৰি, ৫ আৰু ৬ জানুৱাৰীত অসমত বন্ধ থাকিব সকলো বাছ আৰু ট্রাক! অ’লা-উবেৰ-ৰেপিড’ চালকেও সাব্যস্ত কৰিব প্রতিবাদ! ট্রাকচালক, বাছচালক, ট্ৰেক্টৰচালকে সাব্যস্ত কৰিব প্রতিবাদ
ই-ৰিক্সাচালকেও বন্ধ ৰাখিব ই-ৰিক্সাৰ চলাচল! যান-বাহন আইনৰ সংশোধনী বিচাৰি এই প্ৰতিবাদ সাব্যস্ত কৰাৰ সিদ্ধান্ত। চালকৰ প্ৰতিবাদত স্তব্ধ হৈ পৰিব পাৰে দেশ!
উড়িষাৰ ৰৌৰকেলাত ২৭ ৰ পৰা ২৯ ডিচেম্বৰলৈ অনুষ্ঠিত হয় ১৯ সংখ্যক ৰাষ্ট্ৰীয় আই টি এফ টাইকোৱান-ডো চেম্পিয়নশ্বিপ ২০২৩। এই ৰাষ্ট্ৰীয় প্ৰতিযোগিতাত অসমৰ খেলুৱৈয়ে ১০ টা স্বৰ্ণসহ মুঠ ২৮ টা পদক অৰ্জন কৰি ৰাজ্যখনলৈ গৌৰৱ কঢ়িয়াই আনিছে। ভাৰতৰ বিভিন্ন প্ৰান্তৰ পৰা প্ৰায় ৩০০ সদস্যই এই চেম্পিয়নশ্বিপত অংশগ্ৰহণ কৰে। ইয়াত তত্বাৱধায়ক হিচাপে উপস্থিত থাকে ভাৰতীয় আই টি এফ টাইকোৱান-ডো ফেডাৰেচনৰ সভাপতি ছাবুম ৰাকেশ কুমাৰ বাৰ্মা আৰু ইণ্ডিয়ান আই টি এফ টাইকোৱান-ডো ফেডাৰেচনৰ সাধাৰণ সম্পাদক ছাবুম সঞ্জয় চৌহান।
ৰৌৰকেলাৰ কলিংগা টাইকোৱান-ডো এছ’চিয়েচনৰ উদ্যোগত আৰু ভাৰতৰ ভাৰতীয় আই টি এফ টাইকোৱান-ডো ফেডাৰেচনৰ দ্বাৰা পৰিচালিত হয় এই প্ৰতিযোগিতা। এই চেম্পিয়নশ্বিপত টাইকোৱান-ডো এছ’চিয়েচন, অসমৰ ৩ গৰাকী বিষয়া আৰু ১৮ গৰাকী খেলুৱৈয়ে অংশগ্ৰহণ কৰে। অসম দলৰ নেতৃত্বত টাইকোৱান-ডো এছ’চিয়েচন অসমৰ সাধাৰণ সম্পাদক ৰবিজিৎ ৰাজকুমাৰ আৰু সংগ দিয়ে ১নং ডেন ব্লেক বেল্ট অমিত সেন আৰু ব্লেক বেল্ট ১ম ডেন নিলোৎপল নিলয় ফুকনে। অসম দলটোক প্ৰশিক্ষণ প্ৰদান কৰে ডাঃ হীৰক দাস, সভাপতি, টাইকোৱান-দো সন্থা অসম (আই টি এফ), ডাঃ ৰবিজিৎ ৰাজকুমাৰ, বিনোদ বৈশ্য, অমিত সেন আৰু মি. নিলোৎপল নিলয় ফুকনে।
অসম দলে ১০টা সোণ, ৮ টা ৰূপ আৰু ১০ টা ব্ৰঞ্জকে ধৰি মুঠ ২৮ টা পদক লাভ কৰে।
এই ৰাষ্ট্ৰীয় প্ৰতিযোগিতাত অসমৰ হৈ পদক জয় কৰা খেলুৱৈসকল হ’ল
অমিত সেন, ব্যক্তিগত পেটাৰ্ণ (ছিনিয়ৰ, ব্লেক বেল্ট, পুৰুষ);
মনিগ্ৰীভ গগৈ, ব্যক্তিগত স্পাৰিং (ছিনিয়ৰ, ব্লেক বেল্ট, পুৰুষ);
ভাস্বতী দাস, ব্যক্তিগত স্পাৰিং (ছাব জুনিয়ৰ ছোৱালী);
ময়ুক জ্যোতি দত্ত, ব্যক্তিগত পেটাৰ্ণ (পুৰুষ);
তুহিন কোঁৱৰ, ব্যক্তিগত স্পাৰিং (ছাব জুনিয়ৰ ল’ৰা);
অধিৰাজ বৰদলৈ, ব্যক্তিগত স্পাৰিং (ছাব জুনিয়ৰ ল’ৰা);
ফাৰহান মাহফুজ ইছলাম,
ব্যক্তিগত স্পাৰিং (ছাব জুনিয়ৰ ল’ৰা);
মানব জ্যোতি মণ্ডল, ব্যক্তিগত স্পাৰিং (ছাব জুনিয়ৰ ল’ৰা) আৰু
কৃষ খাউণ্ড, ব্যক্তিগত স্পাৰিং (ছাব জুনিয়ৰ ল’ৰা) ।
ৰূপৰ পদক অৰ্জন কৰা খেলুৱৈসকল হ’ল
অমিত সেন, ব্যক্তিগত স্পাৰিং (ছিনিয়ৰ ব্লেক বেল্ট, পুৰুষ)
মনিগ্ৰীভ গগৈ ব্যক্তিগত পেটাৰ্ণ (ছিনিয়ৰ ব্লেক বেল্ট, পুৰুষ);
হিয়া কাকতি, ব্যক্তিগত স্পাৰিং (ছাব জুনিয়ৰ ছোৱালী);
কৃষ্ণশ্ৰী দাস, ব্যক্তিগত পেটাৰ্ণ (মহিলা);
হেমাংগ জ্যোতি দত্ত, ব্যক্তিগত স্পাৰিং (ছাব জুনিয়ৰ ল’ৰা);
দীপতাংশু জ্যোতি দত্ত, ব্যক্তিগত স্পাৰিং (ছাব জুনিয়ৰ ল’ৰা),
ময়ুক জ্যোতি দত্ত, ব্যক্তিগত স্পাৰিং ((ছাব জুনিয়ৰ ল’ৰা); আৰু কৃষ্ণশ্ৰী দাস, ব্যক্তিগত স্পাৰিং ((ছাব জুনিয়ৰ ছোৱালী) ।
আনহাতে ব্ৰঞ্জৰ পদক লাভ কৰিছে
ভাস্বতী দাস, ব্যক্তিগত পেটাৰ্ণ (মহিলা);
হিয়া কাকতি, ব্যক্তিগত পেটাৰ্ণ (মহিলা);
হেমাংগ জ্যোতি দত্ত
ব্যক্তিগত পেটাৰ্ণ (পুৰুষ);
দীপতাংশু জ্যোতি দত্ত,
ব্যক্তিগত পেটাৰ্ণ (পুৰুষ);
কৃষ খাউণ্ড, ব্যক্তিগত পেটাৰ্ণ (পুৰুষ);
মানব জ্যোতি মণ্ডল, ব্যক্তিগত পেটাৰ্ণ (পুৰুষ);
অহিৰ ৰাগ গোস্বামী, ব্যক্তিগত স্পাৰিং ((ছাব জুনিয়ৰ ল’ৰা);
ওম বাছফৰ, ব্যক্তিগত স্পাৰিং ((ছাব জুনিয়ৰ ল’ৰা);
দেৱৰাজ বৰদলৈ, ব্যক্তিগত স্পাৰিং ((ছাব জুনিয়ৰ ল’ৰা) আৰু
গৰিমা গৌৰাত্ৰা, ব্যক্তিগত স্পাৰিং ((ছাব জুনিয়ৰ ছোৱালী)।
দলীয় পেটাৰ্ণছ (পুৰুষ, কালাৰ বেল্ট শাখা)তো সোণৰ পদক লাভ কৰে অসমে। অসমৰ দলটোক প্ৰতিনিধিত্ব কৰে হেমাংগ জ্যোতি দত্ত, দেৱৰাজ বৰদলৈ, দীপতাংশু জ্যোতি দত্ত, ময়ুক জ্যোতি দত্ত আৰু অধীৰাজ বৰদলৈয়ে।
প্ৰতিযোগিতাৰ সময়তে ব্লেক বেল্ট পৰীক্ষাও অনুষ্ঠিত হয়। এই পৰীক্ষা পৰিচালনা কৰে ভাৰতীয় আই টি এফ টাইকোৱান-ডো ফেডাৰেচনৰ সাধাৰণ সম্পাদক ছাবুম সঞ্জয় চৌহানে। পৰীক্ষাত অসমৰ দুগৰাকী খেলুৱৈ হিয়া কাকতি আৰু ভাস্বতী দাসক ব্লেক বেল্টৰ ১ম দানেৰে সন্মানিত কৰা হয়।
গুৱাহাটীৰ লাল গণেশৰ আস্থা একাডেমীৰ সমৰ কলা কেন্দ্ৰৰ ছাত্ৰী হিয়া কাকতি। তেওঁ দিপাংকৰ কাকতি আৰু ৰেখা কাকতিৰ কন্যা। হিয়া গুৱাহাটীৰ জ্যোতিকুছিৰ জ্ঞান শিক্ষানুষ্ঠানৰ অষ্টম শ্ৰেণীৰ ছাত্ৰী। আনহাতে গুৱাহাটীৰ গণেশগুৰিৰ দিছপুৰ কলেজ সমৰ কলা কেন্দ্ৰৰ ছাত্ৰী ভাস্বতী দাস। তেওঁ দিতু কুমাৰ দাস আৰু কমলা সিং দাসৰ কন্যা তথা গুৱাহাটীৰ গীতনগৰৰ ফেকাল্টী ছিনিয়ৰ ছেকেণ্ডাৰী স্কুলৰ নৱম শ্ৰেণীৰ ছাত্ৰী। এই বাতৰি প্ৰেৰণ কৰিছে টাইকোৱানডো এছ’চিয়েচন, অসমৰ সভাপতি ডাঃ হীৰক দাসে।
বিগত ১২ সপ্তাহ ধৰি ইজৰাইলে পেলেষ্টাইনৰ গাজা ষ্ট্ৰিপত নিৰ্বিচাৰ আৰু বৰ্বৰ আক্ৰমণ চলাই আহিছে। তাৰ ফলত গাজাত মানুহৰ লগতে জীৱ-জন্তুৰ জীৱনো সংকটত পৰিছে। দক্ষিণৰ ৰাফা চহৰৰ এখন চিৰিয়াখানাতভোকাতুৰ বান্দৰ, চৰাই, সিংহ আদি জীৱ-জন্তুৱে খাদ্যৰ বাবে হুলস্থুল কৰি আছে।
গাজাত বোমা বিস্ফোৰণৰ ফলত অঞ্চলটোৰ ২৩ লাখ বাসিন্দা ঘৰৰ পৰা স্থানান্তৰিত হৈছে। বহু অঞ্চল ধ্বংসাৱশেষলৈ পৰিণত হৈছে। সকলোৱে এতিয়া দক্ষিণৰ ৰাফা চহৰৰ ফালে আগবাঢ়িছে। ফলত আশ্ৰয় শিবিৰ, পথ আৰু খালী ঠাইবোৰ মানুহেৰে ভৰি পৰে।ৰয়টাৰৰ তথ্য অনুসৰি, গাজাৰ বিভিন্ন প্ৰান্তৰ পৰা বহু লোকে ৰাফা চিৰিয়াখানাত আশ্ৰয় লৈছে। চিৰিয়াখানাত জীৱ-জন্তুবোৰৰ পিঞ্জৰাৰ কাষত প্লাষ্টিকৰ তম্বু ওলোমাই আশ্ৰয় লৈছে।তেওঁলোকে কয় যে বহু জীৱ-জন্তু অনাহাৰে মৃত্যুমুখত পৰিছে।
এখন ছবিত এজন মানুহে অতি দুৰ্বল বান্দৰ এটাক বিলাহীৰ টুকুৰা এটা হাতেৰে খুৱাবলৈ চেষ্টা কৰা দেখা গৈছে। কিন্তু বান্দৰটো নিস্তেজ হৈ আছে। গাজা চহৰৰ পৰা পলায়ন কৰা এডেল গোমাই কয়, “বহু পৰিয়াল সম্পূৰ্ণৰূপে নিঃশেষ হৈ গৈছে। এতিয়া আমাৰ গোটেই পৰিয়ালটো এই চিৰিয়াখানাতে বসবাস কৰি আছে। ইজৰাইলৰ যুদ্ধ বিমানে আকাশৰ পৰা আমাৰ ওপৰত যি গুলী চলায় তাতকৈ এই জীৱবোৰৰ মাজত জীয়াই থকাটো বহুত বেছি শান্তিপূৰ্ণ।”চিৰিয়াখানাৰ মালিক আহমেদ গোমাই কয় যে ইতিমধ্যে চাৰিটা বান্দৰৰ মৃত্যু হৈছে আৰু পঞ্চমটো এতিয়া ইমানেই দুৰ্বল যে খাদ্য পালেও খাব নোৱাৰে। সিংহৰ পোৱালি দুটাৰ বাবেও তেওঁৰ ভয় হৈছে।”
তেওঁ কয় যে সংঘাত আৰম্ভ হোৱাৰ পৰাই মাতৃ সিংহটোৰ ওজন আধা কমি গৈছে। আগতে প্ৰতিদিনে কুকুৰা দিয়া হৈছিল আৰু এতিয়া কেইবা সপ্তাহ ধৰি অনাহাৰে থকাৰ পিছতহে ৰুটি পায়।চিৰিয়াখানাত কৰ্মৰত পশু চিকিৎসক ছফিয়ান আবিদিনে কয়, “অনাহাৰ, দুৰ্বলতা, ৰক্তহীনতাৰ বাবে প্ৰতিদিনে জীৱ-জন্তু অসুস্থ হৈ মৃত্যু মুখত পৰিছে। এই সমস্যাবোৰে ব্যাপক আকাৰ ধাৰণ কৰিছে। কাৰণ খাবৰ কাৰণে খাদ্য নাই।”
উপস্থিত থাকিব কেন্দ্ৰীয় মন্ত্ৰী সৰ্বানন্দ সোনোৱাল, ডাঃ ৰনোজ পেগু, সাংস্কৃতিক অনুষ্ঠানত সুবাসনা দত্ত, সাংস্কৃতিক শোভাযাত্ৰাত অংশগ্ৰহণ কৰিব ৰিছা ছেত্ৰী,৫ আৰু ৬ জানুৱাৰীত ধেমাজি জিলা সোনোৱাল কছাৰী ছাত্ৰ সন্থাৰ নৱম দ্বি-বাৰ্ষিক অধিৱেশন
সদৌ অসম সোনোৱাল কছাৰী ছাত্ৰ সন্থাৰ ধেমাজি জিলা সমিতিৰ নৱম দ্বি-বাৰ্ষিক অধিৱেশনখন অহা ৫ আৰু ৬ জানুৱাৰী তাৰিখত বাটঘৰীয়া শিঙিমাৰী গাঁৱৰ ধনবৰচলা পথাৰত বৰ্ণাঢ্য কাৰ্য্যসূচীৰে আয়োজন কৰিছে।অধিৱেশনৰ প্ৰথমদিনা পুৱা ৮ মূল তোৰণ উদ্ধোধন কৰিব ধেমাজি জিলা সোনোৱাল কছাৰী ছাত্ৰ সন্থাৰ মুখ্য উপদেষ্টা দিপাঙ্কৰ সোনোৱালে।পুৱা ৮-৩০ বজাত স্বচ্ছতা অভিযানৰ পাছত পুৱা ৯ বজাত পতাকা উত্তোলন কৰিব ধেমাজি জিলা সোনোৱাল কছাৰী ছাত্ৰ সন্থাৰ ভাৰপ্ৰাপ্ত সভাপতি মৃদুপৱণ সোনোৱালে।পুৱা ৯-৩০ বজাত স্মৃতি তৰ্পণ কৰিব ধেমাজি জিলা সোনোৱাল কছাৰী ছাত্ৰ সন্থাৰ সাধাৰণ সম্পাদক চন্দন কছাৰী আৰু অভ্যৰ্থনা সমিতিৰ সম্পাদক দুলেন সোনোৱালে।পুৱা ১০ বজাত গছপুলি ৰোপণ কৰিব বাটঘৰীয়া গাওঁ পঞ্চায়তৰ সভাপতি পদ্ম বড়াই।পুৱা ১১ বজাৰ পৰা শিক্ষা আৰু ক্ৰীড়াৰ জৰিয়তে কেৰিয়াৰ সবলীকৰণ বিষয়ত অনুষ্ঠিত কৰা আলোচনা চক্ৰত সমল ব্যক্তিৰ ভাষণ আগবঢ়াব নৰ্থবেংক মহাবিদ্যালয়ৰ অৱসৰপ্ৰাপ্ত উপাধ্যক্ষ ড৹ লৱৰাম সোনোৱালে।
পুৱা ১১-৩০ প্ৰতিনিধি পঞ্জীয়ন।দুপৰীয়া ১২ বজাত প্ৰতিনিধি শিৱিৰৰ মুকলি কৰিব সদৌ অসম সোনোৱাল কছাৰী ছাত্ৰ সন্থাৰ প্ৰাক্তন প্ৰচাৰ সম্পাদক কুমুদ সাগৰ সোনোৱালে।দুপৰীয়া ১২-৩০ বজাত সোনোৱাল কছাৰী কৃষ্টি প্ৰদৰ্শন।দিনৰ ২ বজাত অনুষ্ঠিত হ’বলগা ন-পুৰণি সতীৰ্থ সন্মিলনৰ উদ্ধোধন কৰিব সদৌ অসম সোনোৱাল কছাৰী ছাত্র সন্থাৰ প্ৰাক্তন ভাৰপ্ৰাপ্তসভাপতি দিব্যজ্যোতি ডেকাবৰুৱাই। বিয়লি ৪ বজাত জিলা সমিতিৰ অন্তিম কাৰ্য্যনিৰ্বাহক সভা।সন্ধিয়া ৬ বজাত বন্তি প্ৰজ্বলন কৰিব সদৌ অসম সোনোৱাল কছাৰী ছাত্ৰ সন্থাৰ উপ সভাপতি ৰাজু সোনোৱালে।সন্ধিয়া ৬-৩০ বজাত প্ৰথমদিনাৰ সাংস্কৃতিক অনুষ্ঠানৰ উদ্ধোধন কৰিব সদৌ অসম সোনোৱাল কছাৰী ছাত্ৰ সন্থাৰ সাধাৰণ সম্পাদক পৰীক্ষিত সোনোৱালে।নিশা ৯ বজাত প্ৰতিনিধি আৰু বিষয় বাচনি সভা।দ্বিতীয় তথা ৬ জানুৱাৰীৰ পুৱা ১০ বজাত সাংস্কৃতিক শোভাযাত্ৰা আৰু জনগোষ্ঠীয় কৃষ্টি প্ৰদৰ্শন।অনুষ্ঠানত অংশগ্ৰহণ কৰিব জনপ্ৰিয় অভিনেত্ৰী ৰিচা ছেত্ৰীয়ে।দুপৰীয়া ১২ বজাত পাঁচ হাজাৰ নাচনীৰ অংশগ্ৰহণত লেচেৰী নৃত্য প্ৰদৰ্শন।দিনৰ ১ বজাৰ পৰা মৃদুপৱণ সোনোৱালৰ সভাপতিত্বত আৰম্ভ হ’বলগা মুকলি সভাত আদৰণি ভাষন ৰাখিব সোনোৱাল কছাৰী স্বায়ত্তশাসিত পৰিষদৰ মুখ্য কাৰ্য্যবাহী সদস্য টংকেশ্বৰ সোনোৱালে।মুকলি সভাত মুখ্য অতিথি হিচাপে কেন্দ্ৰীয় চৰকাৰৰ বন্দৰ, জাহাজ, জলপথ আৰু আয়ুস মন্ত্ৰালয়ৰ মন্ত্ৰী সৰ্বানন্দ সোনোৱাল, নিৰ্দিষ্ট বক্তা হিচাপে শিক্ষামন্ত্ৰী ডাঃ ৰনোজ পেগু,বিশিষ্ট অতিথি হিচাপে সাংসদ প্ৰদান বৰুৱা, সদৌ অসম সোনোৱাল কছাৰী ছাত্ৰ সন্থাৰ
সভাপতি দেবানন্দ চেলেং, জোনাইৰ বিধায়ক ভূৱন পেগু,সদৌ অসম সোনোৱাল কছাৰী ছাত্র সন্থাৰ সাধাৰণ সম্পাদক পৰীক্ষিত সোনোৱাল, সদৌ অসম সোনোৱাল কছাৰী ছাত্ৰ সন্থাৰ উপ সভাপতি ৰাজু সোনোৱাল, ধেমাজি জিলা উপায়ুক্ত অংকুৰ ভঁৰালী,ধেমাজি জিলা আৰক্ষী অধীক্ষক ৰঞ্জন ভূঞা, অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক ৰাতুল বৰগোঁহাই, টিএমপিকেৰ সাধাৰণ সম্পাদক চান পাংগিং,সোনোৱাল কছাৰী সাহিত্য সভাৰ মুখ্য সম্পাদক মৃদুল সোনোৱাল, ধেমাজি পৌৰসভাৰ সভানেত্ৰী দ্বীপৰেখা দাস বাঘ্ৰী,আছুৰ সহকাৰী সাধাৰণ সম্পাদক দিপক শৰ্মা, সোনোৱাল কছাৰী সাহিত্য সভাৰ উপ সভাপতি হেৰম্বপ্ৰসাদ দাস প্ৰমুখ্যে বিভিন্ন জাতীয়-জনগোষ্ঠীয় সংগঠনৰ নেতা, শিক্ষাবিদ, সমাজকৰ্মী উপস্থিত থাকিব। সন্ধিয়া ৬ বজাত কেৰিয়াৰ গাইডেন্সৰ ওপৰত সমল ব্যক্তি সকলৰ অংশগ্ৰহণত আলোচনা চক্ৰ। জনপ্ৰিয় কন্ঠশিল্পী সুবাসনা দত্তই গীত পৰিৱেশন কৰিব লগীয়া সন্ধিয়া ৭ বজাত অনুষ্ঠিত কৰা সাংস্কৃতিক অনুষ্ঠানৰ উদ্ধোধন কৰিব সোনোৱাল কছাৰী স্বায়ত্তশাসিত পৰিষদৰ সাংস্কৃতিক বিভাগৰ কাৰ্য্যবাহী সদস্য ৰিদিপ হাজৰিকাই।
