দেশত নাৰীজনিত অপৰাধৰ ঘটনা উদ্বেগজনক হাৰত বৃদ্ধি পোৱাৰ সময়তে এগৰাকী বিদেশী মহিলাক ৰাজপথত অশালীন আচৰণ কৰি লজ্জানত কৰিছে দুই দুৰ্বৃত্তই। দক্ষিণ কোৰিয়াৰ এগৰাকী মহিলা ইউটিউবাৰক অনলাইন লাইভ ষ্ট্ৰিমৰ সময়তে মুম্বাইৰ ৰাজপথত এগৰাকী লোকে অশালীন ব্যৱহাৰ কৰি হাৰাশাস্তি কৰে।

মঙলবাৰে নিশা সংঘটিত হোৱা এই ঘটনাৰ ভিডিঅ’ সম্প্ৰতি ভাইৰেল হৈ পৰিছে সামাজিক মাধ্যমত। টুইটাৰত প্ৰকাশ কৰা ভিডিঅ’টোত অভিযুক্ত লোকজনে কোৰিয়ান ইউটিউবাৰ গৰাকীৰ হাতত ধৰি হাৰাশাস্তি কৰাৰ লগতে লাইভত থকা অৱস্থাতে চুমা খাবলৈও চেষ্টা কৰা দেখা গৈছে।

মহিউচি ইন নামৰ ইউটিউবাৰ গৰাকীয়ে নিজৰ টুইটাৰ একাউণ্টৰ পৰা ভিডিঅ’টো শ্বেয়াৰ কৰি লিখিছে, “যোৱা নিশা লাইভ ষ্ট্ৰীমত এগৰাকী যুৱকে মোক হাৰাশাস্তি কৰিছিল। মই পৰিস্থিতিৰ অধিক বেয়া নকৰিবলৈ যৎপৰোনাস্তি চেষ্টা কৰিলোঁ আৰু তেওঁ বন্ধুৰ লগত থকাৰ বাবে মই আঁতৰি আহিলো। আৰু কিছুমান মানুহে মোৰ অত্যধিক বন্ধুত্বপূৰ্ণ আৰু কথা-বতৰাৰ দ্বাৰা মই নিজেই ইয়াৰ আৰম্ভণি কৰিছো বুলি ক’ব খোজে। ষ্ট্ৰীমিংৰ কথা আকৌ এবাৰ ভাবিবলৈ বাধ্য কৰিছে।”

১ মিনিটৰ এই ভিডিঅ’টোত অভিযুক্তই মহিলা ইউটিউবাৰ গৰাকীক অস্বস্তিকৰভাৱে হাতত ধৰি লিফ্টৰ প্ৰস্তাৱ দিয়া দেখা গৈছে। মহিলাগৰাকীয়ে বহিবলৈ অমান্তি হোৱাত অভিযুক্তই ডিঙিত হাত থৈ গালত চুম্বন কৰিবলৈ চেষ্টা কৰে।

এই আতিশয্যক প্ৰতিহত কৰি মহিলাগৰাকীয়ে লাইভ ষ্ট্ৰিমত “এতিয়া ঘৰলৈ যোৱাৰ সময়” বুলি কৈ আঁতৰি যাবলৈ চেষ্টা কৰে। কিন্তু দুচকীয়া বাহন এখনত আন এগৰাকী ব্যক্তিৰ সৈতে উঠি অহা অভিযুক্তই যুৱতীগৰাকীৰ পিছে পিছে গৈ পুনৰ লিফ্টৰ প্ৰস্তাৱ দিয়ে। যুৱতী গৰাকীয়ে পুনৰ প্ৰস্তাৱ প্ৰত্যাখ্যান কৰি তেওঁৰ ঘৰটো ওচৰতে আৰু অকলেই যাব বুলি মন্তব্য কৰে।

দেশত প্ৰচলিত যৌতুক প্ৰথাই মহিলাৰ ওপৰত নমাই অনা ভয়াৱহ শাৰিৰীক আৰু মানসিক উৎপীড়নৰ খবৰে প্ৰায়ে সংবাদ শিৰোনাম দখল কৰে। ভাৰতীয় ন্যায় ব্যৱস্থাত যৌতুকক এক আইনী অপৰাধ হিচাপে গণ্য কৰিলেও দেশৰ সমাজ ব্যৱস্থাত এতিয়াও বৰ্তি আছে এই কু-প্ৰথা।

যৌতুক প্ৰথাই ভাৰতীয় সমাজৰ নাৰী সকললৈ নমাই অনা দুৰ্বিসহ যাতনাৰ সময়তে উত্তৰ প্ৰদেশৰ এখন আদালতে এনে এক গোচৰৰ ক্ষেত্ৰত শেহতীয়াকৈ প্ৰদান কৰা এক ৰায়ে বিশেষ নিদৰ্শন দাঙি ধৰিছে। মঙলবাৰে উত্তৰ প্ৰদেশৰ বান্দাৰ আদালতে যৌতুকৰ দাবীৰে পত্নীক হত্যা কৰাৰ অপৰাধত হত্যাকাৰী স্বামীক ১৪ বছৰৰ কাৰাদণ্ডৰে শাস্তিৰে দণ্ডিত কৰিছে।

আদালতে লগতে দোষী সাব্যস্ত হোৱা ব্যক্তিগৰাকীৰ ওপৰত ৫,০০০ টকাৰ জৰিমনাও আৰোপ কৰে। এই জৰিমনা আদায় নকৰিলে দোষীয়ে তিনি মাহৰ অতিৰিক্ত কাৰাদণ্ড খাটিব লাগিব বুলি আদালতে আদেশত উল্লেখ কৰিছে।

উল্লেখ্য যে, যোৱা ২০১৫ চনৰ ২ জুলাইত সন্দীপ চাহুৰ পত্নী কিৰণ চাহুৰ অগ্নিদগ্ধ হৈ মৃত্যু হৈছিল। ইয়াৰ পিছতে মহিলাগৰাকীৰ পিতৃয়ে সন্দীপ চাহু আৰু সন্দীপৰ পৰিয়ালৰ আন পাঁচ সদস্যৰ বিৰুদ্ধে এজাহাৰ দাখিল কৰে।

গোচৰৰ তদন্ত কৰি আৰক্ষীয়ে আদালতত দাখিল কৰা অভিযোগনামাত হত্যাৰ বলি হোৱা কিৰণ চাহুৰ স্বামী সন্দীপ চাহুক মুখ্য অভিযুক্ত হিচাপে উল্লেখ কৰাৰ বিপৰীতে আন পাঁচগৰাকী ব্যক্তিৰ নাম গোচৰৰ পৰা আঁতৰাই দিয়ে।কালি উক্ত গোচৰৰ শুনানি গ্ৰহণ কৰি অতিৰিক্ত জিলা আৰু চেচন ন্যায়াধীশ গুণেন্দ্ৰ প্ৰকাশে সন্দীপক দোষী সাব্যস্ত কৰি ১৪ বছৰৰ কাৰাদণ্ডৰ লগতে ৫ হাজাৰ টকা জৰিমনা আৰোপ কৰে।