দেশৰ স্বাধীনতাৰ ৭৫ সংখ্যক বৰ্ষপুৰ্তি ( অমৃত মহোৎসৱ) উপলক্ষে ৰাষ্ট্ৰীয় স্বয়ং সেৱক সংঘৰ ভাতৃ সংগঠন অখিল ভাৰতীয় বিদ্যাৰ্থী পৰিষদৰ বঙাইগাঁও জিলাৰ  উদ্যোগত  বঙাইগাঁও চহৰত এক ত্ৰিৰংগা যাত্ৰা উলিওৱা হয় ৷ মা বাঘেশ্বৰী মন্দিৰত দেৱীৰ চৰণত আশীষ লৈ সংগঠনটোৱে বঙাইগাঁও মহাবিদ্যালয়ৰ খেলপথাৰৰ পৰা ১০০ মিটাৰ দৈৰ্ঘ্যৰ ৰাষ্ট্ৰীয় পতাকা লৈ চহৰৰ মাজেৰে পদযাত্ৰা কৰি বৰপাৰা ৰাজহুৱা খেলপথাৰত উপস্থিত হৈ ত্ৰিৰংগা যাত্ৰা কাৰ্যসূচীৰ সামৰণি ঘটায় ৷

এই ত্ৰিৰংগা যাত্ৰাত জিলাখনৰ বিভিন্ন বিদ্যালয় আৰু মহাবিদ্যালয়ৰ ছাত্ৰ- ছাত্ৰী , সংগঠনটোৰ কৰ্মী আদিয়ে অংশগ্ৰহণ কৰে ৷ ত্ৰিৰংগা যাত্ৰা কাৰ্যসূচী আৰম্ভ হোৱাৰ পিচত বাটতে বৰষুণত দিয়াত কাৰ্যসূচীত অংশগ্ৰহণ কৰাসকলে বৰষুণৰ মাজতো তিতিয়ে নিৰ্দিষ্ট স্থানত আহি কাৰ্যসূচীৰ সামৰণি ঘটায় ৷ সংগঠনটোৱে মূলত জনসাধাৰণৰ মাজত দেশপ্ৰেমৰ ভাৱ জগাই তোলাৰ উদ্দেশ্যৰে এই ত্ৰিৰংগা যাত্ৰা কাৰ্যসূচী গ্ৰহণ কৰে ৷ উল্লেখ্য যে সংগঠনটোৱে স্বাধীনতাৰ ৭৫ সংখ্যক বৰ্ষপূৰ্তি উপলক্ষে গোটেই বছৰ জুৰি বিভিন্ন কাৰ্যসূচী ৰূপায়ণ কৰি আহিছে ৷ 

ৰাজ্যৰ সাম্প্ৰতিক কালৰ এগৰাকী বিশিষ্ট চিত্ৰশিল্পী পদ্মশ্ৰী  নীলপৱন বৰুৱাৰ ৫৬ খন ভিন্নমাধ্যমৰে অংকিত চিত্ৰৰে গটা সংগ্ৰহালয় তেজপুৰ বিশ্ববিদ্যালয়ত আজি উদ্বোধন কৰে ৰাজ্য চৰকাৰৰ মুখ্য সচিব জিঞ্চু বৰুৱাই৷উল্লেখযোগ্য যে,বিশ্ববিদ্যালয়ৰ সমাজ বিজ্ঞান আৰু মানবিকি বিদ্যা শাখাৰ অন্তৰ্গত সংস্কৃতি অধ্যয়ন বিভাগৰ উদ্যোগত আৰু বিশ্ববিদ্যালয় অনুদান আয়োগৰ বিশেষ ক্ষেত্ৰত উৎকৰ্ষ সাধন কেন্দ্ৰৰ সহযোগত আজি দিনৰ ১১ .৩০ বজাত এই সংগ্ৰহালয়টো আনুষ্ঠানিকভাৱে উদ্বোধন  কৰা হয়।এই সভাত আদৰণি ভাষণ প্ৰদান কৰে সংস্কৃতি অধ্যয়ন বিভাগৰ মুৰব্বী ড° পৰশমণি দত্তই। সংগ্ৰহালয়টো আনুষ্ঠানিক ভাৱে উদ্বোধন কৰি মুখ্য সচিব  বৰুৱাই ভাষণ প্ৰসংগত  কয় যে সমাজ আৰু সংস্কৃতিক ক্ষেত্ৰৰ উৎকৰ্ষ সাধনত বিশ্ববিদ্যালয়সমূহৰ এক বিশেষ ভূমিকা আছে। তেজপুৰ বিশ্ববিদ্যালয়ৰ এই উদ্যোগৰ  শলাগ লৈ তেওঁ ভৱিষ্যতেও এই ধাৰা অব্যাহত ৰাখিব বুলি আশা প্ৰকাশ কৰে। সভাত বিশ্ববিদ্যালয়ৰ উপাচাৰ্য অধ্যাপক বিনোদ কুমাৰ জৈনে চিপিইপিএৰ সমন্বয়ক অধ্যাপক দেৱৰ্ষি প্ৰসাদ নাথ আৰু সংগ্ৰহালয়টোৰ তত্বাৱধায়ক, সংস্কৃতি অধ্যয়ন বিভাগৰ সহকাৰী অধ্যাপক ড° মৌচুমী কন্দলীৰ প্ৰচেষ্টাৰ সলাগ লয়।

তেওঁ কয় যে এনে এটা আধুনিক চিত্ৰকলাৰ সংগ্ৰহালয়ে বিশ্ববিদ্যালয়ৰ সামগ্ৰিক পৰিৱেশটো এক বিশেষ মাত্ৰাৰ সংযোগ ঘটাব।আনহাতে অধ্যাপক নাথে ভাষণ প্ৰসংগত চিপিইপিএ ৰ কাৰ্যাৱলী সম্পৰ্কে সবিশেষ প্ৰকাশ কৰাৰ উপৰি ড° কন্দলীয়ে সংগ্ৰহালয়টো নিৰ্মাণৰ আঁৰৰ সবিশেষ ব্যক্ত কৰে। মানবিকি বিদ্যাৰ ডীন অধ্যাপক ফাৰহীনা দন্তা আৰু শোণিতপুৰ জিলাৰ নৱনিযুক্ত উপায়ুক্ত দেৱ কুমাৰ মিশ্ৰয়ো সভাত উপস্থিত থকি মন্তব্য আগবঢ়ায়। নীলপৱন বৰুৱাৰ পৰিয়ালৰ হৈ সুনীল পৱন বৰুৱা আৰু শিল্পী সমাজৰ হৈ মুনীন্দ্ৰ নাৰায়ণ ভট্টাচাৰ্য‌ই অনুষ্ঠানত মন্তব্য আগবঢ়ায়। বাঁহীবাদন আৰু নীলপৱন বৰুৱাক বিষয় হিচাপে লৈ কবি নীলমণি ফুকন আৰু বিপুলজ্যোতি শ‌ইকীয়াই ৰচনা কৰা দুটি কবিতাৰ পাঠেও অনুষ্ঠানটোত এক বিশেষ মাত্ৰা প্ৰদান কৰে।  শলাগৰ শৰাই আগবঢ়াই সংস্কৃতি অধ্যয়ন বিভাগৰ সহকাৰী অধ্যাপক ড° জুৰি গগৈ কোঁৱৰে। সভাৰ আঁত ধৰে সংস্কৃতি অধ্যয়ন বিভাগৰ গৱেষক ছাত্ৰ কৌস্তভ জ্যোতি গোস্বামী আৰু বৰ্ষা নায়কে। সভাত প্ৰতিজন বক্তাই প্ৰথমবাৰৰ বাবে এগৰাকী শিল্পীৰ জীৱনকালতে এনে এটা সংগ্ৰহালয় নিৰ্মাণৰ অভিনৱ প্ৰচেষ্টাক প্ৰশংসা কৰে।

বাক্সা জিলাৰ মুছলপুৰত আজি আৰক্ষীয়ে চুৰি বাইকসহ দুজন যুৱকক গ্ৰেপ্তাৰ কৰে ৷ জানিব পৰামতে জিলাখনৰ মুছলপুৰ আৰক্ষী থানাৰ অধীনৰ নিকাছিত মমদ ব্ৰহ্ম নামৰ এজন যুৱকে এএছ-০১ইএফ-৪৫২৭ নম্বৰৰ এখন পালছাৰ  মটৰচাইকেল লৈ অঞ্চলটোত সন্দেহজনকভাৱে ঘূৰি থকা বুলি এক খবৰ পাই নিকাছি আৰক্ষী চকীৰ ভাৰপ্ৰাপ্ত বিষয়া ওৱাজ আলীয়ে যুৱকজনক আটক কৰে ৷ পিচত সোধ-পোচ কৰাত যুৱকজনে চলাই থকা মটৰ চাইকেলখন গুৱাহাটীৰ পৰা চুৰি কৰি অনা বুলি স্বীকাৰ কৰে ৷

ধৃত যুৱকজনৰ স্বীকাৰোক্তিৰ ভিত্তিত এই চুৰিকাণ্ডত লিপ্ত থকা আন এজন যুৱক নৱ বড়োকো আৰক্ষীয়ে আটক কৰে ৷ সোধ-পোচৰ অন্তত আবেলি দুয়োকে মটৰচাইকেল চুৰি সন্দৰ্ভত গ্ৰেপ্তাৰ কৰি আদালতলৈ প্ৰেৰণ কৰে ৷ গ্ৰেপ্তাৰ কৰা মমদ ব্ৰহ্মৰ ঘৰ লক্ষ্মীপুৰ এ ব্লকত আৰু নবীন বড়োৰ ঘৰ গোলাগাৱত বুলি আৰক্ষীয়ে জানিবলৈ দিয়ে ৷

সম্প্ৰতি ৰাজ্যখনত উজনিৰ পৰা নামনিলৈ ধাৰাবাহিকভাৱে চোৰাং কাঠৰ বেহা অব্যাহত আছে যদিও বিভাগটো এই ক্ষেত্ৰত চকু মুদা ভাঁও ধৰি অহাহে পৰিলক্ষিত হৈছে। ইতিমধ্যে কিছুমান বনদস্যুৰ কবলত পৰি বহুতো মূল্যৱান কাঠৰ লালসাত পৰি বন ধ্বংস অভিযান চলাই আছে  এচাম অসাধু ব্যৱসায়ীয়ে।অসম -অৰুণাচল সীমান্তৱৰ্তী ডিৰাক গেটৰ দিশটো এতিয়া চোৰাং কাঠৰ কৰিডৰ ৰূপে বিবেচিত হৈছে। যোৱা কিছুদিন ধৰি চোৰাং কাঠৰ বিৰুদ্ধে বাতৰি পৰিবেশন হৈ থকা সময়তে আজি তিনিচুকীয়া জিলাৰ কাকপথাৰ ডিৰাকত চোৰাং কাঠসহ এখন ট্ৰাক জব্দ কৰিছে কাকপথাৰ বন বিভাগে ।

জানিব পৰা মতে কাকপথাৰ বনাঞ্চলিক বিষয়া পানেশ্বৰ দাসৰ নেতৃত্বত যোৱা এটি বনকৰ্মীৰ দলে কাকপথাৰৰ অসম অৰুণাচল সীমান্তৱতী ডিৰাকত আজি পুৱাই চোৰাং কাঠসহ এখন ট্ৰাক জব্দ কৰে।ট্ৰাকখনৰ চালক হেণ্ডিমেনে বন বিভাগৰ লোকক দেখি ট্ৰাক খন এৰি পলাবলৈ লওতে বন বিভাগৰ কৰ্মীয়ে লোক দুজনক আটক কৰিবলৈ সক্ষম হয়।ট্ৰাকখনৰ নম্বৰ এ.এচ ০১- এইচ.চি ৯৬৭৫।  চোৰাং কাঠখিনিৰ মূল্য প্ৰায় ২.৫০ লাখ বুলি বন বিভাগে জানিবলৈ দিছে। প্ৰণিধানযোগ্য যে অসম চৰকাৰৰ বন বিভাগে এনে অবৈধ কাৰ্যকলাপ বন্ধ কৰাৰ দাবী কৰিলেও  এতিয়াও যে অবৈধ ভাৱে চোৰাং কাঠৰ ৰমৰমীয়া বেহা অব্যাহত আছে সেইটো ধ্ৰুৰূপ।