চৰাইদেউ জিলাৰ বাণিজ্য শিক্ষাৰ অন্যতম উচ্চ শিক্ষাৰ অনুষ্ঠান সোণাৰি কমাৰ্চ কলেজত আজি প্ৰাক্তন ছাত্ৰ-ছাত্ৰীসকলৰ এখন বিশেষ সভা অনুষ্ঠিত হয়। মহাবিদ্যালয়খনৰ অধ্যক্ষ ড° বিপুল দে’ৰ পৌৰহিত্যত অনুষ্ঠিত সভাখনত শিক্ষানুষ্ঠান খনৰ প্ৰবক্তা মণ্ডলীৰ লগতে প্ৰাক্তন ছাত্ৰ-ছাত্ৰীসকল উপস্থিত থাকে। সভাত বিশেষকৈ আগন্তুক দিনত মহাবিদ্যালয়খন পৰিদৰ্শন তথা মূল্যায়নৰ বাবে “NAAC” ৰ বিষয়ববীয়া সকলৰ আগমণ তথা প্ৰাক্তন ছাত্ৰ-ছাত্ৰী সকলৰ কৰণীয় সন্দৰ্ভত বিশেষভাৱে আলোচনা কৰা হয়।

আনহাতে “NAAC”ৰ সদস্য আগমণৰ আগমূহুৰ্তত ইতিমধ্যে শিক্ষা সাং কৰি মহাবিদ্যালয়খনৰ পৰা ওলাই বিভিন্ন ক্ষেত্ৰত জড়িত হৈ থকা প্ৰাক্তন ছাত্ৰ-ছাত্ৰীসকলৰ এটা ডাটাবেছ প্ৰস্তুত কৰা সন্দৰ্ভত আলোচনা কৰা হয়। ইফালে অহা এক মে’ দেওবাৰে প্ৰাক্তন ছাত্ৰ-ছাত্ৰীসকলৰ এখন সতীৰ্থ সন্মিলন তথা সেই অনুষ্ঠানতে “সোণাৰি কমাৰ্চ কলেজৰ প্ৰাক্তন ছাত্ৰ-ছাত্ৰী সন্মিলন”ৰ সমিতিখন নতুনকৈ গঠন কৰা সন্দৰ্ভতো আলোচনা কৰা হয়।

২০২১ বর্ষত ছত্তীশগড়ৰ বিজাপুৰত নক্সালবাদীৰ ভয়াবহ আক্ৰমণত শ্বহীদ হোৱা গোৱালপাৰা জিলাৰ দুধনৈৰ নিকটৱৰ্তী দামৰা পাটপাৰাৰ  চিআৰপিএফ কোব্ৰা বেটেলিয়েনৰ বীৰ জোৱান শ্বহীদ বাবলু ৰাভাৰ আজি প্ৰথম বার্ষিক শ্ৰদ্ধাঞ্জলি অনুষ্ঠানৰ আয়োজন কৰা হয়। এই উপলক্ষে শ্বহীদ জোৱান বাবলু ৰাভাৰ আজি প্ৰতিমূৰ্তি উন্মোচন কৰা হয় ৷ দুধনৈৰ নিকটৱৰ্তী দামৰা-পাটপাৰাত শ্বহীদ গৰাকীৰ নিজা বাসগৃহত উন্মোচন কৰা হয় প্ৰতিমূৰ্তিটো I শ্বহীদৰ মাতৃ আৰু চি.আৰ.পি.এফৰ সহ কামাণ্ডাৰ সুনীতা শৰ্মাই উন্মোচন কৰে বাবলু ৰাভাৰ প্ৰতিমূৰ্তি। দেশৰ হকে প্ৰাণ আহুতি দিয়া শ্বহীদ গৰাকীৰ স্মৃতিৰ অনুষ্ঠানতে সকলোৱে উচুপি উঠে।

বাবলু ৰাভাৰ শ্বহীদ হোৱা এবছৰীয়া পূণ্যতিথি হিচাপে শ্বহীদৰ স্মৃতিত অনুষ্ঠিত হোৱা অনুষ্ঠানত বীৰ শ্বহীদ গৰাকীৰ স্মৃতিত প্ৰকাশ কৰা ‘শ্ৰদ্ধাৰ্ঘ্য’ কবিতা সংকলন উন্মোচন কৰে ষষ্ঠ অনুসূচী দাবী সমিতিৰ সভাপতি মহীধৰ ৰাভাই। উন্মোচনী অনুষ্ঠানত দামৰা অঞ্চলৰ বিভিন্ন জাতি-জনগোষ্ঠীৰ ৰাইজৰ লগতে আৰক্ষী-অৰ্ধ সামৰিক বাহিনী আৰু গোৱালপাৰা জিলা ৰাভা ছাত্ৰ সন্থাৰ সভাপতি বিৰঞ্জন ৰাভা, সম্পাদক তিলক ৰাভা,  গোৱালপাৰা জিলা ষষ্ঠ অনুসূচী দাবী সমিতিৰ সভাপতি ৰত্নেশ্বৰ ৰাভাৰ লগতে বিষয়ববীয়া সকল উপস্থিত থাকে ৷ অনুষ্ঠানটোৰ আঁত ধৰে স্থানীয় সমাজকৰ্মী শচীন পাটগিৰীয়ে। অনুষ্ঠানৰ মাজতে ৰাভা কৃষ্টিও প্ৰদৰ্শন কৰা হয়। 

দৰং জিলাৰ লক্ষীমপুৰ গাওঁ পঞ্চায়তৰ সভানেত্ৰী দুলুৰানী ডেকাই যোৱানিশা গুৱাহাটী চিকিৎসা মহাবিদ্যালয়ত শেষ নিশ্বাস ত্যাগ কৰে৷ সভানেত্ৰী দুলুৰানী ডেকাই  দুৰাৰোগ্য ৰোগত আক্ৰান্ত হৈ চিকিৎসাধীন হৈ আছিল৷ কেইবাখনো চিকিৎসালয়ত চিকিৎসা কৰিছিল যদিও শেষ মূহূৰ্তত গুৱাহাটী চিকিৎসা মহাবিদ্যালয়ত চিকিৎসা কৰি থকা মূহূৰ্তত যোৱানিশা প্ৰায় ৯-৩০ মান বজাত  ৫১ বছৰ বয়সত শেষ নিশ্বাস ত্যাগ কৰে৷ অসম গন পৰিষদৰ পৰা নিৰ্বাচন খেলি লক্ষীমপুৰ গাওঁ পঞ্চায়তৰ সভানেত্ৰী নিৰ্বাচিত হোৱা দুলুৰানী ডেকাই সৰুৰে পৰা বিভিন্ন অনুষ্ঠান প্ৰতিষ্ঠানৰ সৈতে জড়িত হৈ থকা দুলুৰানী ডেকাই দলংঘাট শাখা ছাত্ৰ সন্থাৰ সম্পাদিকা,দলংঘাট মিলন হাইস্কুলৰ সম্পাদিকা,অসম গন পৰিষদ লক্ষীমপুৰ আঞ্চলিকৰ সভানেত্ৰীৰ লগতে জিলা সমিতিৰো বিষয়বাব অলংকৃত কৰাৰ লগতে দৰংজিলা মাষ্টাৰ্ছ এথলেটিকছ সন্থাৰ হৈ মৰানকে ধৰি জিলা খনৰ হৈ বিভন্ন ঠাইত প্ৰতিনিধিত্ব কৰিছিল৷

দৰং জিলাৰ বিভিন্ন অনুষ্ঠান প্ৰতিষ্ঠানৰ সৈতে জড়িত হৈ থকা সভানেত্ৰী গৰাকীৰ মৃত্যুৰ বাতৰি পোৱাৰ লগে লগে কলাইগাঁও উন্নয়ন খণ্ডৰ খণ্ড উন্নয়ন বিষয়া ৰবীন বৰুৱা, লক্ষীমপুৰ গাওঁ পঞ্চায়তৰ সদস্য সদস্যা তথা কৰ্মচাৰী সকল, সচিব অমৃত চন্দ্ৰ ডেকা, দৰংজিলা ছাত্ৰ সন্থাৰ বিষয়ববীয়া, মহলীয়াপাৰা আঞ্চলিক ছাত্ৰ সন্থা, দলংঘাট শাখা ছাত্ৰ সন্থা, অসম গন পৰিষদ লক্ষীমপুৰ আঞ্চলিক সমিতি, দলংঘাট মিলন হাইস্কুলৰ লগতে অঞ্চলটো বিভিন্ন অনুষ্ঠান প্ৰতিষ্ঠানৰ আৰু বিশিষ্ট ব্যক্তি সকলে নিজ গৃহত উপস্থিত হৈ শেষ শ্ৰদ্ধাঞ্জলি জ্ঞাপন কৰে৷ মৃত্যুৰ সময়ত সভানেত্ৰী দুলুৰানী ডেকাই স্বামী দুগৰাকী পুত্ৰ কন্যা সহ আত্মীয় স্বজনক ইহ সংসাৰত এৰি থৈ যায়৷

ডিমৌ আৰক্ষী  থানাৰ অন্তৰ্গত দুটা স্হানত কালি নিশাৰ ভাগত ডিমৌ আৰক্ষীয়ে চলোৱা গোপন অভিযানত দুই গভাইত চোৰ গ্ৰেপ্তাৰ কৰি ডিমৌ থানালৈ লৈ আনে। ডিমৌ আৰু দাঁতিকাষৰীয়া বিভিন্ন স্থানত সঘনাই পানী মটৰ , চাইকেল, ডিমৌ কেন্দ্রীয় বজাৰৰ দোকানৰ তলা ভাঙী চুৰি কৰাৰ লগতে মটৰ চাইকেল চুৰি কৰিও সন্ত্রাস সৃষ্টি কৰি আৰক্ষী আৰু জনসাধাৰণৰ নিদ্রা হৰণ কৰি অহা দুই গভাইত চোৰ ক্ৰমে হৈছে দিচাং দিৰৈৰ প্ৰদীপ মুণ্ডা আৰু ৰিংকু আহমেদ শইকীয়া। প্ৰদীপ মুণ্ডাই  মটৰচাইকেল চুৰি কৰি আটক হোৱাৰ লগতে  ৰিংকু আহমেদ শইকীয়া নামৰ চোৰটোৱে চাইকেল চুৰ কৰি আটকাধীন হবলগীয়া হয়।

ডিমৌ আৰক্ষীয়ে গোপন সুত্ৰৰ পম খেদি এই দুটা চোৰৰ অন্যতম মটৰ চাইকেল চোৰ প্ৰদীপ মুণ্ডাক থাওৰা দ’লত আত্মগোপন কৰি থকা পৰা আটক কৰে আৰু ৰিংকু আহমেদ শইকীয়াক দিহাজানৰ পৰা আটক কৰে। যোৱা নিশা আটক কৰা দুয়োটা গভাইত চোৰৰ বিৰুদ্ধে পঞ্জীয়ন হৈ থকা গোচৰৰ ভিত্তিত ডিমৌ আৰক্ষী গ্ৰেপ্তাৰ কৰি  জেললৈ প্ৰেৰণৰ ব্যৱস্থা গ্ৰহণ কৰিছে   ।

আজি ৰঙিয়া জিলা কাৰাটে এছোছিয়েশ্যনৰ সহযোগত আৰু আকাশ ষ্পৰ্টচ একাডেমীৰ উদ্যোগত ৰঙিয়াৰ সমীপৰ হেমদোল প্ৰাথমিক বিদ্যালয় প্ৰাঙ্গনত এটি কাৰাটে প্ৰশিক্ষণ কেন্দ্ৰৰ শুভাৰম্ভ কৰা হয় ৷ ৰঙিয়াৰ ‘আকাশ’ নামৰ এটি অগ্ৰণী স্বেচ্ছাসেৱী অনুষ্ঠানে ক্ৰীড়াক সমাজ জীৱনৰ অংশ হিচাবে প্ৰাধান্য দিয়াৰ বাবে উদ্যোগী সংস্থা ‘আকাশ ষ্পৰ্টচ একাডেমী’ৰ উদ্যোগত আৰম্ভ কৰা কাৰাটে প্ৰশিক্ষণ কেন্দ্ৰ”এটাৰ শুভ উদ্বোধন কৰে ৰাষ্ট্ৰীয় খেলুৱৈ আৰু অসম কাৰাটে এছোছিয়েশ্যনৰ যুটীয়া সম্পাদক তথা ৰঙিয়া কাৰাটে এছোছিয়েশ্যনৰ সম্পাদক চৈয়দ মাজহাৰুল ইছলামে।

গাওঁ সমূহতকৈ চহৰত সুযোগ সুবিধা বেছি যদিও, সৰহসংখ্যক গাৱৰ পৰা যোৱা প্ৰতিভাইহে ক্ৰীড়া জগতখন উজলাই ৰাখিছে বুলি বক্তব্য ৰাখি তেখেতে শিক্ষাৰ্থীসকলক উদ্বোদ্ধ কৰে।দ্ৰাগছৰ দৰে নিচাসক্ত সামগ্ৰীয়ে সমাজৰ যুৱচামক ধ্বংস কৰিব ওলোৱা সময়ত প্ৰধানত খেলুৱৈ সকলক এনে নিচাজাতীয় সামগ্ৰীয়ে প্ৰভাৱিত কৰিব নোৱাৰে বুলি মন্তব্য ৰাখে সমাজকৰ্মী গুণমণি দাসে৷শিশু খেলুৱৈ সুৰঞ্জন কলিতাৰ কাৰাটেৰ কলাকৌশল প্ৰদশৰ্নে সমজুৱাক আপ্লুত কৰে৷সমাজ সংগঠক হেমন্ত কলিতাই আঁত ধৰা শুভাৰম্ভ অনুষ্ঠানটিত অংশগ্ৰহণ কৰে প্ৰশিক্ষক ভূপেন নমশুদ্ৰ আৰু অজন্তা দাস,”আকাশ”ৰ বিপুল কাকতি , ধ্ৰুৱজ্যোতি কলিতা,নিপন দত্ত কলিতা , প্ৰণিতা কলিতা,চুমিতা শীল,বন্দনা বৈশ্য আৰু বহুকেইজন স্থানীয় ক্ৰীড়ানুৰাগীয়ে।প্ৰশিক্ষণত নামভৰ্তিৰ বাবে ৯১০১২-৬৪২৫৬ আৰু ৯১০১১-১৫০৮৫ নম্বৰত যোগাযোগ কৰিবলৈ উদ্যোক্তাসকলে আহ্বান জনাইছে।