বিশ্বনাথত শক্তিশালী গনভিক্তি থকা অসম গন পৰিষদ শূন্যতা হোৱাৰ দিশে ৷ বিজেপিৰ মিত্ৰজোঁটত থকা অসম গন পৰিষদ বিশ্বনাথত এতিয়া বিধ্বস্ত ৷ মিত্ৰজোঁটত থাকিও অৱহেলিত বিশ্বনাথৰ অসম গন পৰিষদৰ কৰ্মীসকল ৷ আদৰ্শগতভাবে ৰাজহাড় বিহীন হৈ পৰা অসম গন পৰিষদ কৰ্মী সকল উপায়বিহীন হৈ সংগোপনে যোগদান কৰিছে বিজেপিত ৷ ইয়াৰ বিপৰীতে একাংশই অসম গন পৰিষদৰ আদৰ্শৰ ওপৰত বিশ্বাস আস্থা আৰু আনুগত্য প্ৰকাশ কৰি এতিয়াও জীয়াই ৰাখিছে জাতীয়তাবাদীৰ আঞ্চলিক ৰাজনৈতিক ভাৱধাৰা ৷ কিন্তু কিমান দিনলৈ ? ৰাজনৈতিকভাবে অগপ নিঃশেষ হোৱা বুলি বিশ্বনাথৰ বৰপথাৰ পঞ্চায়তৰ অন্তৰ্গত মাজুলিগড় চাহ বাগিছাৰ মুণ্ডালাইনত আয়োজিত অগপৰ কৰ্মী সকলৰ মাজত হোৱা সভাত বিষয়টোৱে বিশেষভাবে চৰ্চিত ৷ ইয়াৰ উপৰিও আদিবাসী চাহ জনগোষ্ঠীৰ বিভিন্ন ধৰনৰ জ্বলন্ত সমস্যা তথা দাবী সমুহৰ ওপৰত বিজেপিয়ে ঠগ প্ৰবঞ্চনা প্ৰতাৰনা কৰা কাৰ্যকো সহজ ৰূপে মানি লব পৰা নাই বিশ্বনাথৰ বৰপথাৰৰ আদিবাসী চাহ জনগোষ্ঠীৰ অসম গন পৰিষদৰ কৰ্মীসকল ৷

আনকি বিশ্বনাথৰ অগপৰ কৰ্মী সকলক নিম্নতম সা-সুবিধাৰ পৰাও বঞ্চিত কৰা হল বুলি অভিযোগ উথাপন কৰিছে একাংশ অগপৰ কৰ্মী ৷ আনকি আদিবাসী সকলৰ লগতে নদুবাৰ বাসী ৰাইজৰ ভোটত জয়লাভ কৰা এসময়ৰ চতিয়া সমষ্টিৰ বিধায়ক পদ্ম হাজৰিকাই মন্ত্ৰীত্ব লাভৰ বাবে বিশ্বনাথৰ সাধাৰুৰ দুই আদিবাসী যুৱক ৰাজু মুণ্ডা আৰু পুষ্প গোৱালাক ৰাজনৈতিক লাভালাভৰ বাবে হত্যা কৰাৰ ষড়যন্ত্ৰত লিপ্ত হোৱা বুলি সামাজিক মাধ্যমত অভিযোগ উথথাপিত হৈছে ৷ এই অভিযোগ খোদ উথথাপন কৰিছে নদুৱাৰ সমষ্টিৰ বিধায়ক পদ্ম হাজৰিকাৰ একালৰ ঘনিষ্ঠ প্ৰথম শ্ৰেণীৰ ঠিকাদাৰ মানৱ হাজৰিকাই ৷ এই হত্যাকাণ্ডৰ লগত জড়িত সমস্ত ঘটনা সমুহ পুংখানুপুংখভাবে ঠিকাদাৰ মানৱ হাজৰিকাই অৱগত কৰা তথা অসম জুৰি উক্ত বিষয়ৰ ওপৰত চৰ্চা হোৱাৰ পাছতো বিধায়ক পদ্ম হাজৰিকাৰ ওপৰত চৰকাৰে কোনো ধৰনৰ ব্যৱস্থা গ্ৰহন কৰা নাই বুলি ক্ষোভ প্ৰকাশ কৰে অগপৰ প্ৰাক্তন মন্ত্ৰী প্ৰবীন হাজৰিকাৰ ঘনিষ্ঠ বিশ্বনাথ সমষ্টি যুৱ পৰিষদৰ সম্পাদক তথা চাহ গোষ্ঠীয় নেতা বসন্ত মহানন্দই ৷ চাহ শ্ৰমিক সকলৰ বাবে দৰমহা বৃদ্ধি কৰিব নোৱাৰা , মাটি পট্টা প্ৰদানৰ নামত ভোকোভাওনা কৰা , জনজাতিকৰন কৰিব নোৱাৰা বিজেপি চৰকাৰৰ কামকাজৰ ওপৰত ক্ষোৰধাৰ সমালোচনা কৰে মহানন্দই ৷

আনকি চাহ জনগোষ্ঠী আদিবাসীৰ বাবে সাংবিধানিক ন্যায় অধিকাৰৰ বাবে গুৱাহাটীৰ বেলতলাত আদিবাসীৰ ওপৰত সংঘটিত হোৱা আক্ৰমণৰ ঘটনাৰ ওপৰতো চিবিআইৰ দ্বাৰা তদন্ত কৰা নহল বুলি সদৰি কৰে বসন্ত মহানন্দই ৷ আনকি সেই বৰ্বৰ ঘটনাৰ নিৰ্যাতিতা লক্ষ্মী ওৰাংৰ ন্যায়ৰ বাবে এতিয়াও উপেক্ষিত হৈ ৰল বুলি উল্লেখ কৰে নেতা গৰাকীয়ে ৷ এই সমস্ত ঘটনা পৰিঘটনাৰ লগতে অগপৰ নেতৃত্ব নিমাত ৷ অসমৰ জনগনৰ অধিকাৰ আৰু স্বাৰ্থ সুৰক্ষিত কৰা , আঞ্চলিক ভিক্তিত দাবী সমস্যাৰাজীৰ লগতে অসমৰ বৃহত্তৰ স্বাৰ্থত মুল দাবী সমুহক লৈ গঢ় লৈ উঠা ৰাজনৈতিক দল অসম গন পৰিষদে আনকি আদিবাসী চাহ জনগোষ্ঠীৰ জ্বলন্ত সমস্যাৰাজিৰ ওপৰতো মাত মতা দেখা নগল বুলি মতপোষণ কৰে বিশ্বনাথৰ অগপৰ চাহ জনগোষ্ঠীৰ নেতা গৰাকীয়ে ৷ এনে কেতবোৰ কাৰণত অগপৰ কৰ্মকাণ্ডৰ ওপৰত অসন্তুষ্ট হৈ বিশ্বনাথ সমষ্টি যুৱ পৰিষদৰ সম্পাদক পদৰ পৰা পদত্যাগ কৰাৰ লগতে অগপৰ বৰপথাৰ আঞ্চলিক সমিতি . বৰপথাৰ যুৱ পৰিষদ , বৰপথাৰ মহিলা সমিতি , ৱাৰ্ড সমিতি , ভোট সমিতিৰ বিষয়ববীয়া সকলেও সামুহিকভাবে অগপ দলৰ পৰা পদত্যাগ কৰে৷