বকো সমষ্টিৰ ছমৰীয়া উন্নয়ন খণ্ডৰ অন্তৰ্গত নগৰবেৰাৰ টুপামাৰীত আজিও সুগম হৈ নুঠিল যাতায়ত ব্যৱস্থা, বিধস্ত পথে আমুৱাইছে ৰাইজক। বৃহত্তৰ টুপামাৰী অঞ্চলৰ ব্যৱসায় বাণিজ্যৰ এক মাত্ৰ প্ৰতিষ্ঠানটো হল টুপামাৰী বজাৰ আৰু টুপামাৰী বজাৰৰ পৰা ৰঙ্গেশ্বৰী পামলৈ যোৱা পথটি অতিকৈ বিধস্ত, মানুহৰ নিত্য প্ৰয়োজনীয় সামগ্ৰী ক্ৰয় কৰিবলৈ পথটিৰে বোকাৰে লুতুৰি পুতুৰি যাব লাগে টুপামাৰী বজাৰলৈ। বছৰটোৰ সৰহভাগ কাল বোকাময় হৈ থাকে পথচোৱা। পথটিৰে নিতৌ স্কুল-কলেজীয়া ছাত্ৰ ছাত্ৰী ৰোগীকে আদি কৰি যান-বাহন চলাচলত যথেষ্ট অসুবিধা হৈছে।পথটিৰে নিতৌ প্ৰায় দহ খন গাওঁৰ মানুহে আহযাহ কৰিবলগীয়া হয়,  সদাব্যস্ত ৰাজপথটো মাহৰ পিছত মাহ কদৰ্যময় হৈ থকাত ৰাইজে যাতায়তৰ নামত ভুগি আহিছে নৰক যন্ত্ৰণাত। পঞ্চায়ত প্ৰতিনিধিক বাৰাম্বাৰ আবেদন নিবেদন কৰাৰ পিছতো কানসাৰ কোনো গুৰুত্ব দিয়া নাই বুলি ৰাইজে অভিযোগ উত্থাপন কৰিছে। শীঘ্ৰে স্থানীয় দোকানী-ব্যৱসায়ীৰ লগতে ৰাইজে পথচোৱা যাতায়ৰ বাবে সুগম কৰি তুলিবলৈ পঞ্চায়ত প্ৰতিনিধি, স্থানীয় বিধায়িকা নন্দিতা দাস লগতে চৰকাৰ তথা বিভাগীয় কৰ্তৃপক্ষক দাবী জনাইছে।

ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই ” জনজাতীয় বিশ্বাস আৰু সংস্কৃতি ” শীৰ্ষক এটা নতুন বিভাগৰ জৰিয়তে  অসমৰ জনজাতীয় তথা খিলঞ্জীয়া ভূমি পুত্ৰ সকলৰ প্ৰায় হেৰাই যাবলৈ উপক্ৰম হোৱা ঐতিহাসিক সমল সমূহৰ উদ্ধাৰ আৰু সংৰক্ষণৰ ব্যৱস্থা গ্ৰহণ কৰিছে। তাৰেই অংশ হিচাপে আজি  ক্ষেত্ৰ সমুহ পৰিদৰ্শন কৰাৰ উদ্দেশ্যৰে গোলাঘাট জিলাৰ বৰপথাৰ মৌজাৰ   আলিছিগা টেঙাণীত উপস্থিত হয়হি অসম বিধান সভাৰ অধ্যক্ষ বিশ্বজিৎ দৈমাৰী সহ এক জনজাতীয় প্ৰতিনিধিৰ দল।

আলিছিগা টেঙাণীস্হিত  সপ্তম-অষ্টম শতিকাৰ কছাৰী ৰজাদিনীয়া ৰাজহাউলি, পুখুৰী, মন্দিৰ আদিকে প্ৰমুখ্য কৰি অঞ্চলটোৰ বিভিন্ন প্ৰত্ন-তাত্বিক স্থান তথা সমল সমুহ উক্ত জনজাতীয় প্ৰতিনিধিৰ দলটোৱে পৰিদৰ্শন কৰে।এই জনজাতীয় প্ৰতিনিধিৰ দলটোত অসম বিধান সভাৰ অধ্যক্ষ বিশ্বজিৎ দৈমাৰীৰ উপৰিও অসম বিধান সভাৰ উপাধ্যক্ষ ড° নুমল মৌমিন, বিধায়ক ভূপেন বড়ো  আৰু বিধায়িকা নন্দিতা গাৰ্লোচা উপস্থিত আছিল। পৰিদৰ্শন কালৰ শেষত সাংবাদিকক বিধান সভাৰ অধ্যক্ষজনে জনায় যে,অসমৰ মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত অসম চৰকাৰে ” জনজাতীয় বিশ্বাস আৰু সংস্কৃতি ” শীৰ্ষক এক নতুন বিভাগ খুলিছে আৰু এই বিভাগৰ বাবে বৰ্তমান ১০০ কোটি টকা ধাৰ্য কৰা হৈছে। যাৰ জৰিয়তে অসমত থকা বিভিন্ন ঐতিহাসিক স্থান সমুহ বিধান সভাৰ অধ্যক্ষ,উপাধ্যক্ষ,বিধায়ক সকলে পৰিদৰ্শন কৰিব।শেষত তেঁও জনায় যে,পৰিদৰ্শন কালৰ মুলতে হ’ল অসমৰ খীলঞ্জীয়াৰ ভাষা,সাহিত্য,কৃষ্টি-সংস্কৃতি ৰক্ষাৰ ক্ষেত্ৰত গুৰুত্ব প্ৰদান কৰা। অধ্যক্ষ গৰাকীয়ে আলিচিঙা টেঙাণীৰ প্ৰত্নতাত্বিক স্থান দখৰ সংৰক্ষণ আৰু সংবৰ্ধনেৰে দেশী বিদেশী পৰ্যটকৰ আকৰ্ষণৰ কেন্দ্ৰবিন্দু হব বুলি প্ৰকাশ কৰে । উল্লেখযোগ্য যে বিশ্বজিৎ দৈমাৰী সহ দলটোক পৰম্পৰাগত সাংস্কৃতিক শোভাযাত্ৰাৰে আদৰণি জনোৱা হয়

মৰিগাঁও জিলাৰ লাহৰিঘাটৰ কাঠনিত পুনৰ বৰলুইতে ধাৰণ কৰিছে ৰুদ্ৰমূৰ্তি।প্ৰতি দিনেই খহিছে লুইতৰ পাৰ।আংত বিৰাজ কৰিছে নৈপৰীয়া কাঠনি বাসী ৰাইজৰ মাজত। কিন্তু কোনো কাণ সাৰ নাই মৰিগাঁও জিলাৰ বিয়াগোম জলসম্পদ বিভাগৰ বিষয়া অভিযন্তাৰ। বিভাগটোৰ বৰমুৰীয়া সকলৰ গাফিলতিৰ ফলতেই প্ৰত্যেক বছৰে ব্ৰহ্মপুত্ৰ বুকুত ভেটি-মাটি হেৰুৱাব লগা হয় হাজাৰ লোকে। বিষয়া অভিযন্তাই কামৰ সময়ত কাম নকৰাৰো গুৰুতৰ অভিযোগ আছে। ঠিকাদাৰ সকলৰ লগত নিজৰ অংক নিমিলা পৰ্যন্ত কোনো এটা কাম নকৰে মৰিগাঁও জিলাৰ জলসম্পদ বিভাগটোৱে।যাৰ বাবে  এতিয়া মৰিগাঁও জিলা জলসম্পদ বিভাগৰ বিষয়া অভিযন্তা ৰ ওপৰত  ক্ষুব্ধ হৈছে নৈ পৰীয়া ৰাইজ।উল্লেখ্য যে অসমৰ মুখ্য মন্ত্ৰী ডাঃ হিমন্ত বিশ্ব শৰ্মাক তথা বিভাগীয় মন্ত্ৰী পিষুজ হাজৰিকাক কাঠনি বাসী ৰাইজৰে খহনীয়াৰ স্হায়ী সমাধানৰ বাবে অনুৰোধ জনায়।।

ঐতিহাসিক দৰং জিলাৰ উচ্চ শিক্ষাৰ প্ৰাণকেন্দ্ৰ স্বৰূপ ১৯৫১ চনৰ ২০ ছেপ্তেম্বৰত স্থাপিত মঙলদৈ মহাবিদ্যালয়ে সাফল্যৰ ৭০ টা বৰ্ষ অতিক্ৰম কৰিলে। ক’ভিডকালীন পৰিস্থিতিৰ বাবে মহাবিদ্যালয়ত পূৰ্ণাংগ ৰূপত পাঠদান স্থগিত হৈ থকা হেতুকে অনুষ্টুপীয়াকৈ মঙলদৈ মহাবিদ্যালয় আছু গোটৰ উদ্যোগত মহাবিদ্যালয়স্থিত শ্বহীদ বেদীত বন্তি প্ৰজ্বলন কাৰ্যসূচীৰে পালন কৰা হয় প্ৰতিষ্ঠা দিৱস। অনুষ্ঠানত প্ৰথম গছি বন্তি প্ৰজ্বলন কৰে মহাবিদ্যালয়ৰ অধ্যক্ষ খগেন কুমাৰ নাথে। লগতে তেওঁক সংগ দিয়ে মহাবিদ্যালয়ৰ কেইবাগৰাকীও শিক্ষক-শিক্ষয়িত্ৰীয়ে। অনুষ্ঠানৰ আঁত ধৰে মঙলদৈ মহাবিদ্যালয় আছু গোটৰ ভাৰপ্ৰাপ্ত সভাপতি দীপাঙ্কৰ ওজাই লগতে অনুষ্ঠানত সহযোগ কৰে মঙলদৈ মহাবিদ্যালয় আছু গোটৰ সাধাৰণ সম্পাদক অনুপম ভৰদ্বাজৰ লগতে কেইবাগৰাকীও সদস্য-সদস্যাই।

অসমৰ চাহ জোনগোষ্ঠীয় লোকসকলৰ লগতে কয়লা খনিকে ধৰি অন্যান্য খণ্ডত নিয়োজিত শ্ৰমিক শ্ৰেণীৰ লোকসকলৰ দীৰ্ঘদিনীয়া সমস্যাসমূহ সমাধানৰ দাবীত আজি অসম জাতীয় পৰিষদৰ ভাতৃ সংগঠন জাতীয় শ্ৰমিক শক্তিয়ে নতুন দিল্লীৰ যন্তৰ মন্তৰত ধৰ্ণা কাৰ্যসূচী ৰূপায়ন কৰে৷ নেশ্যনেল ফ্ৰন্ট অৱ ইণ্ডিয়ান ট্ৰেড ইউনিয়ন নামৰ ৰাষ্ট্ৰীয় পৰ্যায়ৰ সংগঠনটোৰ সৈতে যুটীয়াভাৱে ৰূপায়ন কৰা এই কাৰ্যসূচীত ৰাজ্যৰ বিভিন্ন চাহ বাগান এলেকাৰ পৰা যোৱা কেইবাশ জাতীয় সেৱকে অংশগ্ৰহণ কৰে৷জাতীয় শ্ৰমিক শক্তিৰ সভাপতি ইজৰাইল নন্দৰ নেতৃত্বত প্ৰতিবাদীসকলে ‘চাহ উদ্যোগ বচাওক, শ্ৰমিক বচাওক’, ‘কয়লা খনি লীজত দিয়া বন্ধ কৰক’, ‘কয়লা শ্ৰমিকৰ গ্ৰেচুইটিৰ ধন মোকলাই দিয়ক’, ‘কাছাৰ আৰু জাগীৰোড কাগজ কল পুনৰ আৰম্ভ কৰক’, ‘চাহ বাগিচাৰ মাটি অন্য কামত ব্যৱহাৰ বন্ধ কৰক’, ‘চাহৰ আমদানি নিষিদ্ধ কৰি ৰপ্তানিত জোৰ দিয়ক’, ‘চাহ শ্ৰমিকৰ মজুৰী কমেও ৩৫১ টকালৈ বৃদ্ধি কৰক’, ‘নামৰূপ সাৰ কাৰখানাৰ চতুৰ্থটো গোট সোনকালে নিৰ্মাণ কৰক’ আদি দাবীৰে শ্লোগান দিয়ে৷

দিল্লীত ৰূপায়িত হোৱা এই ধৰ্ণা কাৰ্যসূচী সন্দৰ্ভত অসম জাতীয় পৰিষদৰ সভাপতি লুৰীণজ্যোতি গগৈয়ে আজি গুৱাহাটীত কয় যে চাহ জনগোষ্ঠীকে ধৰি অন্য সকলো খণ্ডৰ শ্ৰমিকসকল সদায়ে চৰকাৰৰ দ্বাৰা উপেক্ষিত হৈ আহিছে৷ নিজৰ দেহবল ক্ষয় কৰি দেশ মাতৃৰ প্ৰতি সেৱা আগবঢ়াই অহা শ্ৰমিক শ্ৰেণীটোৰ সমাজৰ প্ৰতি অৱদান কৰ্পোৰেট গোষ্ঠীসমূহতকৈ কোনো গুণে কম নহয়৷ অথচ চৰকাৰে কৰ্পোৰেট গোষ্ঠীসমূহৰ স্বাৰ্থ সিদ্ধিক সদায় আগস্থান দি আহিছে, কিন্তু শ্ৰমিক শ্ৰেণীটোৰ ন্যায্য প্ৰাপ্যখিনি দিয়াৰ ক্ষেত্ৰতো হুঁহকা-পিচলা কৰি আহিছে৷ এনে প্ৰক্ষাপটত শ্ৰমিক শ্ৰেণীৰ দাবী চৰকাৰৰ ওচৰত উপস্থাপন কৰাৰ ক্ষেত্ৰত জাতীয় পৰিষদ শ্ৰমিক সংগঠনসমূহৰ সৈতে সদায় থাকিব৷অসমৰ পৰা গৈ দিল্লীৰ ধৰ্ণা কাৰ্যসূচীত অংশগ্ৰহণ কৰি কেন্দ্ৰীয় চৰকাৰৰ ওচৰত শ্ৰমিক শ্ৰেণীৰ ন্যায্য দাবীসমূহ উত্থাপন কৰা জাতীয় শ্ৰমিক শক্তিৰ নেতা-কৰ্মীসকলক গগৈয়ে ধন্যবাদ জনায়৷

অসম চিকিৎসা মহাবিদ্যালয়ৰ অধ্যক্ষ ডাঃ সঞ্জীৱ কাকতীৰ অৱস্থা সম্প্ৰতি কিছু সুস্থিৰ৷জি এম চি এইচৰ অধীক্ষক ডাঃ অভিজিৎ শৰ্মাই প্ৰকাশ কৰিছে এই তথ্য৷ক’ভিডত আক্ৰান্ত হৈ গুৰুতৰভাৱে অসুস্থ হৈ পৰা ডাঃ কাকতীক অত্যন্ত সংকটজনক অৱস্থাত দিল্লীলৈ স্থানান্তৰিত কৰাৰ চেষ্টা কৰা হৈছিল৷কিন্তু স্বাস্থ্যৰ দ্ৰুত অৱনতি ঘটাত আৰু প্ৰতিকূল বতৰৰ বাবে এয়াৰ এম্বুলেন্স দিল্লীলৈ নিব নোৱৰাত তেওঁক জি এম চি এইচত চিকিৎসাধীন কৰা হয়৷তেওঁৰ স্বাস্থ্যৰ অৱস্থা কিছু সুস্থিৰ হোৱা বুলি টুইটযোগে সদৰী কৰিছে জি এম চি এইচৰ অধীক্ষক ডাঃ অভিজিৎ শৰ্মাই৷তেওঁৰ অক্সিজেন লেভেল ৯৫-৯৬ শতাংশ থকা বুলি সদৰী কৰি জি এম চি এইচৰ অধীক্ষকজনে কয় যে তেওঁ আধা জুলীয়া আহাৰ সেৱন কৰিবলৈও সক্ষম হৈছে৷তেওঁৰ শৰীৰত ঔষধে ক্ৰিয়া কৰা বুলি প্ৰকাশ কৰাৰ লগতে স্বাস্থ্য একপ্ৰকাৰ সুস্থিৰ হৈ থকা বুলি সদৰী কৰে৷তেওঁৰ ৰক্তচাপো আজি নিয়মীয়া হৈ আছে৷তেওঁ কিছু কথা পতাৰ লগতে পূৰ্বতকৈ আৰাম লাভ কৰা বুলিও কোৱা কথা ডাঃ শৰ্মাই সদৰী কৰে৷