যোৱা ১৭  ছেপ্টেম্বৰৰ পৰা সমগ্র ভাৰতবৰ্ষতে বৰ্তমান ভাৰতৰ প্ৰধান মন্ত্ৰী নৰেন্দ্ৰ মোডীৰ জন্মদিন বিভিন্ন ধৰণৰ কাৰ্যসূচীৰ মাজেৰে বি জে পি দলৰ কৰ্মকৰ্তা সকলে উলহ মালহেৰে উদযাপন কৰি আছে। যিহেতুকে এই কাৰ্যসূচী কুৰি দিনলৈ অব্যাহত থাকিব  , সেয়ে আজি মৰিগাঁও জিলাৰ লাহৰীঘাট মডেল হস্পিটেলত  অসম প্ৰদেশ বি জে পি সংখ্যালঘু মৰ্চাৰ তৰফৰ পৰা  নৰেন্দ্ৰ মোডীৰ দীৰ্ঘায়ু আৰু সু স্বাস্থ্য কামনা কৰি অৱসৰপ্ৰাপ্ত বন বিষয়া তথা বিগত বিধান সভা নিৰ্বাচনত লাহৰীঘাট সমষ্টিৰ বি জে পি দলৰ প্ৰাৰ্থী, সমাজ সেৱক কাদিৰোজ্জামান জিন্নাৰ নেতৃত্বত দিনৰ ১১ বজাত ফলমূল বিতৰণ কৰা হয়।  উল্লেখ্য যে আজিৰ এই কাৰ্যসূচী ৰূপায়নত অংশ গ্ৰহণ কৰে  আবুল কালাম, মানিক , ছমিৰ পাল, আজিজুৰ ৰহমান,পৰীক্ষিত দেবনাথ,   নিৰ্জুল আমিন আৰু আবিদা বেগম। 

বঙাইগাঁৱৰ দোলাইগাঁও প্ৰাথমিক শাখাৰ নামঘৰ প্ৰাংগণত দেওবাৰে শ্ৰীমন্ত শংকৰদেৱ সংঘ থ্ৰিফ্ট এণ্ড ক্ৰেডিট কো – অপাৰেটিভ চ’চাইটি লিমিটেডৰ বঙাইগাঁও শাখা কাৰ্যালয় উদ্বোধন কৰা হয় ৷ উল্লেখ্য যে শ্ৰীমন্ত শংকৰদেৱ সংঘৰ বিভিন্ন বহুমুখী কাৰ্যসূচীৰ লগতে নিবনুৱা সংস্থাপন আৰু সংগীসকলৰ আৰ্থিক বিকাশৰ প্ৰতি লক্ষ্য ৰাখি শ্ৰীমন্ত শংকৰদেৱ সংঘ থ্ৰিফ্ট এণ্ড ক্ৰেডিট কো- অপাৰেটিভ চ’চাইটি লিমিটেডে বিভিন্ন জিলাত শাখা স্থাপন কৰি আহিছে ৷ ইয়াৰ অংশ হিচাপে দেওবাৰে বঙাইগাঁও, কোকৰাঝাৰ আৰু বিজনী জিলা শাখাৰ সহযোগত দোলাইগাঁও প্ৰাথমিক শাখাৰ নামঘৰ প্ৰাংগণত চ’চাইটিৰ ২৫ সংখ্যক বঙাইগাঁও শাখাটো মুকলি কৰা হয় ৷ শাখা কাৰ্যালয়টো শ্ৰীমন্ত শংকৰদেৱ সংঘৰ পদাধিকাৰ কমলাকান্ত গগৈয়ে আনুষ্ঠানিকভাৱে উদ্বোধন কৰে ৷ সংঘৰ পদাধিকাৰগৰাকীয়ে সংবাদ মাধ্যমৰ আগত কয় যে শ্ৰীমন্ত শংকৰদেৱ সংঘই সদায় ৰাইজৰ কাৰণে আৰু জনগণৰ কাৰণে কাম কৰি আহিছে ৷ শ্ৰীমন্ত শংকৰদেৱ সংঘ এটা মানৱ সেৱাৰ অনুষ্ঠান ৷ সেয়ে মানৱ সেৱাত যাতে খেলিমেলি নকৰো আৰু মানৱ সেৱা যাতে সম্পূৰ্ণকৈ কৰিব পাৰো সেই উদ্দেশ্যে ইয়ালৈ আহিছো ৷ তেওঁ লগতে কয় যে যি কোনো কামতে টকা পইচাৰ দৰকাৰ হয় ৷ কিন্তু সেই টকা সদভাৱে উপাৰ্জন কৰিব লাগিব আৰু খৰচ কৰিব লাগিব ৷ লগতে সদভাৱে কাম কৰিব লাগিব ৷ শ্ৰীমন্ত শংকৰদেৱ সংঘৰ বিশ্বাস আছে আমি এই কাম কৰিব পাৰিম ৷ সংঘই ইতিমধ্যে অসমৰ বিভিন্ন জিলাত ২৪ টা শাখা মুকলি কৰিছে ৷ এইটো ২৫ নং শাখা মুকলি কৰা হৈছে ৷ এই ২৫ নং শাখাৰ যোগেদি যাতে বঙাইগাঁও , কোকৰাঝাৰ আৰু বিজনী এই তিনিখন জিলা শাখাৰ বাপ, আই মাতৃসকল বিশেষকৈ যিসকল নিবনুৱা আছে সেই নিবনুৱাসকলৰ যাতে উন্নতি হয় আৰু কৰ্মসংস্থাপন পায় তাৰ প্ৰতি গুৰুত্বাৰোপ কৰা হৈছে ৷ ইতিমধ্য ২৪ টা শাখাত ৫৪ জন কৰ্মচাৰী আছে ৷ তাৰোপৰি আঠ লক্ষ টকা ভকতে এই অনুষ্ঠান অৰ্থাৎ বেংকৰ পৰা ঋণ লৈ বিভিন্ন কামত খটুৱাইছে ,উন্নতি হৈছে ৷ সেয়ে এই তিনিখন জিলা শাখাৰ বাপ বান্ধৱসকলে কথাটো বুজি পাই তথা উপলব্ধি কৰি ইয়াত এটা শাখা খুলিছে ৷

এই শাখাৰ জৰিয়তে হাজাৰ হাজাৰ লোকৰ উন্নতি হ’ব আৰু হাজাৰ হাজাৰজনে কৰ্মসংস্থাপন লাভ কৰিব ৷ আনহাতে জনগোষ্ঠীয় লোকৰ মাজত শংকৰদেৱ সংঘ সোমাব পাৰিছে নে বুলি সোধা প্ৰশ্নৰ উত্তৰত তেওঁ কয় যে নিশ্চয় সোমাব পাৰিছে ৷ আমাৰ এই শ্ৰীমন্ত শংকৰদেৱ সংঘত জাত – পাতৰ কোনো কথা নাই ৷ আমাৰ কথা হ’ল আমি সকলো মানুহ আৰু মানুহ হিচাপে সকলোৱে মিলি থাকি মানুহৰ উন্নতিৰ কাৰণে কাম কৰিম ৷ সেইদৰে সত্ৰ আৰু নামঘৰৰ মাটি বেদখল হোৱা সন্দৰ্ভত কয় যে যিসকলে বেদখল কৰিছে তেওঁলোকে তেনে অনাহক চিন্তা যাতে নকৰে ৷ লগতে  আমি চৰকাৰক অনুৰোধ জনাইছো যে যিবিলাক সত্ৰ অনুষ্ঠান আৰু যিবিলাক নাম ঘৰ আছে সেইবোৰ বেদখলমুক্ত কৰক ৷ ইপিনে সংঘৰ অধিৱেশন সন্দৰ্ভত  প্ৰধান সম্পাদক বাবুল বৰাৰ পৰা জানিব বিচৰাত তেওঁ কয় যে ক’ভিড পৰিস্থিতিৰ বাবে যোৱা বৰ্ষত আমি শ্ৰীমন্ত শংকৰদেৱ সংঘই অধিৱেশন অনুষ্ঠিত কৰিব নোৱাৰিলো ৷ অধিৱেশনখন ডিব্ৰুগড়ে অনুষ্ঠিত কৰাৰ কথা আছিল ৷ কিন্ত এইবেলি ১২ ছেপ্টেম্বৰত ডিব্ৰুগড়ত আমি আদৰণি সমিতি গঠন কৰিছো ৷ ডিব্ৰুগড়ৰ নাহৰকটীয়াৰ নিকটৱৰ্তী ৰাঙলী পথাৰত এইবাৰ অধিৱেশ পতাৰ বাবে পূৰ্ণ প্ৰস্তুতিৰে আগবাঢ়িছো ৷ সমগ্ৰ অসমৰ ৰাইজক জনাব বিচাৰিছো যে চৰকাৰীভাৱে ক’ভিড সংক্ৰান্তীয় যি এছঅপি থাকিব বা নীতি – নিৰ্দেশনা থাকিব আৰু সেইখিনি সময়লৈকে যেনে হ’ব সেয়া মানি চলা হ’ব ৷ অৱশ্যে এইবাৰ নিশ্চিতভাৱে শ্ৰীমন্ত শংকৰদেৱ সংঘৰ অধিৱেশনৰ কিছু সীমিতকৰণৰ ব্যৱস্থা কৰা হ’ব ৷ তাত যিখিনি ব্যৱসায় – বাণিজ্য প্ৰতিষ্ঠানৰ কথা থাকে সেইখিনিও সীমিতকৰণ কৰা হ’ব আৰু কাৰ্যসূচীৰ ক্ষেত্ৰতো সীমিতকৰণ কৰিম ৷ এছঅপি সম্পূৰ্ণ মানি চলা হ’ব , ভেকচিনেচনৰ পৰা আৰম্ভ কৰি সকলো ধৰণৰ স্বাস্থ্য বিধি ৷ শ্ৰীমন্ত শংকৰদেৱ সংঘৰ এইবাৰ অধিৱেশন অনুষ্ঠিত কৰাৰ বাবে ডিব্ৰুগড়ে সাজু হৈছে ৷ অধিৱেশন মানে দ্বিতীয় বৈকুণ্ঠ ৷ লক্ষ লক্ষ মানুহে এই অধিৱেশনলৈ অপেক্ষা কৰি থাকে ৷গতিকে তেওঁলোকে আশা কৰি আছে যে অধিৱেশনখন হ’ব লাগে ৷ পূৰ্বেই ৪, ৫ আৰু ৬ ফেব্ৰুৱাৰীত তিনিদিনীয়াকৈ অনুষ্ঠিত কৰাৰ বাবে দিন ঠিৰাং কৰা হৈছিল ৷ হয়তো এদিন কমিব পাৰে বা ইফাল সিফাল হ’ব পাৰে ৷ ইয়াৰ পূৰ্বে আমি এদিন বহি সকলো পৰিস্থিতিটো পৰ্যৱেক্ষণ কৰি আলোচনা কৰিম ৷ পৰিস্থিতিৰ সপক্ষেহে আমাৰ গোটেই কাৰ্যসূচী ৷ পৰিস্থিতিক বাদ দি আমি অনুষ্ঠান কৰাৰ চিন্তা নকৰো ৷ গতিকে পৰিস্থিতি যেনেকুৱা হ’ব সেইমতে আমি অনুষ্ঠান পাতিম ৷ উল্লেখ্য যে কাৰ্যালয় উদ্বোধনৰ পিছতে অনুষ্ঠিত হয় মুকলি সভা ৷ শ্ৰীমন্ত শংকৰদেৱ সংঘ থ্ৰিফ্ট এণ্ড ক্ৰেডিট কো- অপাৰেটিভ চ’চাইটি লিমিটেডৰ সভাপতি হৰেন্দ্ৰ বৰাৰ সভাপতিত্বত অনুষ্ঠিত মুকলি সভাখন শ্ৰীমন্ত শংকৰদেৱ সংঘৰ প্ৰধান সম্পাদক বাবুল বৰাই উদ্বোধন কৰে ৷ সভাত পদাধিকাৰ কমলাকান্ত গগৈয়ে মুখ্য অতিথি হিচাপে উপস্থিত থাকি বক্তব্য ৰাখে ৷ সভাত সংঘৰ কেইবাগৰাকীও বিষয়ববীয়াৰ লগতে চ’চাইটিৰ বিষয়ববীয়া, বঙাইগাঁও, কোকৰাঝাৰ আৰু বিজনী জিলা শাখাৰ  মূলৰ সদস্য, সংঘৰ তিনিওখন জিলা শাখাৰ সভাপতি আদিও উপস্থিত থাকে ৷ উল্লেখ্য যে কাৰ্যসূচীৰ আৰম্ভণিতে পুৱা পৰিৱেশ নিকাকৰণ আৰু নাম – প্ৰসংগ অনুষ্ঠিত হয় ৷ 

ওদালগুৰি জিলা সাহিত্য সভাৰ ২য় বৰ্ষৰ প্ৰথম কাৰ্যনিৰ্বাহক সভাত  ছোৱালী উচ্চতৰ মাধ্যমিক বিদ্যালয়ত জিলাৰ সভাপতি হৰেশ্বৰ কলিতাৰ সভাপতিত্বত ১৯ছেপ্তেম্বৰত অনুষ্ঠিত হৈ যায়। ওদালগুৰি জিলা সাহিত্য সভাৰ সম্পাদক ড° পবিত্ৰ শৰ্মাই আঁতধৰা  উক্ত সভাত ভ্ৰাম্যমাণ পুথিভঁৰালটিৰ শুভাৰম্ভণিৰ সম্পৰ্কে অৱগত কৰে আৰু জিলাখনৰ ২৪ খন শাখাৰ প্ৰতিখনলৈ ৩০ খনকৈ গ্ৰন্থৰ টোপোলা বিতৰণ কৰে ৷ সম্পাদক ড° শৰ্মাই ব্যতিক্ৰমী ভ্ৰাম্যমাণ পুথিভঁড়াল সম্পৰ্কে চিন্তা-চৰ্চাৰ কথা অৱগত কৰি কিদৰে আগবঢ়াই নিব পাৰি এই সন্দৰ্ভত জিলা-শাখাৰ সন্মানীয় বিষয়ববীয়া আৰু সদস্য সকলকো  পৰামৰ্শ আগবঢ়াবলৈ  আহ্বান জনায়৷ ইয়াৰ পাছতেই ওদালগুৰি জিলা সাহিত্য সভাৰ দুবছৰীয়া কাৰ্যকালৰ সময়ত গ্ৰহন কৰা বিভিন্ন কাৰ্যসূচী সম্পৰ্কে সম্পাদক ড° শৰ্মাই সভাত  অবগত কৰে।সভাৰ সিদ্ধান্তমৰ্মে জিলাৰ ২০২০-২২ বৰ্ষৰ পূৰ্ণাঙ্গ অধিবেশনখনি কবিৰালি সাহিত্য সভাৰ আমন্ত্ৰণক্ৰমে ২০২২ বৰ্ষৰ জানুৱাৰীত কবিৰালিত অনুষ্ঠিত হব।ইয়াৰ উপৰিও হাতীগড়,ধনশ্ৰী,চুঙাখুটি শাখা সাহিত্য সভাক নতুন শাখা হিচাপে  সভাৰ জৰিয়তে স্বীকৃতি প্ৰদান কৰে। গল্প সাধনা বঁটা টংলাৰ বিশিষ্ট গল্পকাৰ জয়ন্ত চক্ৰৱৰ্তীক  বামুনজুলি শাখা সাহিত্য সভাৰ উদ্যোগত অহা ৩ অক্টোবৰত অনুষ্ঠিত হব লগা লক্ষ্মীনাথ  বেজবৰুৱাৰ জন্মদিৱসত বঁটা প্ৰদানৰ লগতে গল্প বিষয়ক আলোচনা চক্ৰ অনুষ্ঠিত কৰাৰ প্ৰস্তাৱ গ্ৰহন কৰে। ইপিনে অহা ১৭ অক্টোবৰত কবি সন্মিলন উপ সমিতিৰ সহযোগত খৈৰাবাৰীৰ ঝাৰগাওঁৰ দক্ষতা বিকাশ কেন্দ্ৰত এখনি কবি সন্মিলনৰ আয়োজন কৰা হৈছে বুলি আহ্বায়িকা ৰঞ্জি শইকীয়া ডেকাই সভাত জানিবলৈ দিয়ে।ইয়াৰ লগতে সভাত ন্যাস পূঁজি,কুঁহি,আকাশ,কবি সন্মিলন উপ সমিতি সমূহৰ আহ্বায়ক সকলে তেওঁঁলোকৰ কামৰ প্ৰতিবেদন দাঙি ধৰে।শেষত জাতীয় সংগীতেৰে সভাৰ সামৰণি পৰে।