কলিয়াবৰৰ মহকুমাৰ পূৱথৰীয়া মৌজাৰ মাধতাৰি কিচামতৰ বিস্তৃত কৃষিভূমিৰ দাঁতিত অৱস্থিত জৈৱ-বৈচিত্ৰৰে ভৰপূৰ, দেশী-বিদেশী পৰিভ্ৰমী পক্ষীৰ অন্যতম বিচৰণ ভূমি তথা ৰাজ্যখনৰ অন্যতম উল্লেখনীয় বিশাল আদ্ৰভূমি জয়সাগৰ দলনি। মাগুৰ-শিঙি, কাৱৈ-গৰৈ, শ’ল-কান্ধুলিকে ধৰি থলুৱা মাছৰে পৰিপূৰ্ণ এক জৈৱ-বৈচিত্ৰৰে ভৰ-পূৰ এক জলাশয়। প্ৰাকৃতি নান্দনিক শোভাৰে সুশোভিত জয়সাগৰ দলনিলৈ শীতৰ আগমনৰ লগে লগেই দেশী-বিদেশী পক্ষীৰ আগমন ঘটে আৰু বিভিন্ন প্ৰজাতিৰ পক্ষীৰ কলৰৱত জলাশয়ৰ লগতে দাঁতিকাষৰীয়া অঞ্চলটো মুখৰিত হৈ পৰে। কিন্তু বৰ্তমান জয়সাগৰ দলনিৰ পাৰ্শ্বৱৰ্তী কৃষিভূমি আৰু পথসমূহ এতিয়া একাংশ দুষ্কৃতিকাৰীৰ ৰম‍্যভূমিলৈ পৰ্যবসিত হোৱা পৰিলক্ষিত হৈছে৷
এই বিশাল জলাশয়টোৰ চৌপাশে থকা শিলঘাট, কামাখ্যা গাঁও, সোণাৰী গাওঁ, মিৰিভেটি, বৰভকতি, দুলাল মাধৱ, দলিবাৰী, পোৰাভেটি, মাধতাৰি, পূৱথৰীয়া, ভিঞাৰী গাঁও, শান্তিপুৰ, বালিটিকা, শেনচোৱা, বাঘৰচুক, চামধৰা আদিৰ কৃষিজীৱী ৰাইজে খেতি কৰি জীৱন নিৰ্বাহ কৰি আহিছে। কিন্তু পৰিতাপৰ কথা যে, বন‍্যহস্তীৰ লগতে এতিয়া একাংশ দুষ্কৃতিকাৰীয়ে এই বৃহত্তৰ অঞ্চলৰ কৃষিজীৱী ৰাইজলৈ কঢ়িয়াই আনিছে অশনি সংকেত।বৃহত্তৰ অঞ্চলটোৰ ৰাইজৰ সুবিধাৰ্থে কৃষি-পথাৰৰ মাজেদি বিভিন্ন অঞ্চলক সংযোগ কৰি নাবাৰ্ডৰ সহযোগত এটা পকী পথৰ নিৰ্মাণ কৰিছে যাতায়তৰ সুব‍্যৱস্থাৰ বাবে। লগতে পথাৰৰ ধান পকিবৰ সময়ত সোণাৰী-কামাখ‍্যা পাহাৰৰ পৰা নামি অহা বনৰীয়া হাতীৰ পৰা খেতি-পথাৰ ৰক্ষাৰ বাবে যাতে বন বিভাগৰ যাতায়ত সুগম হয়। পক্ষী দৰ্শনৰবাবে ইচ্ছুক দৰ্শনাৰ্থীৰ বাবে পথছোৱা অতি গুৰুত্বপূৰ্ণ বুলি চিহ্নিত হৈছে।
ফলস্বৰূপে কৃষক ৰাইজৰ সুবিধা হ’ল যদিও পক্ষীৰ কলৰৱত মুখৰিত জলাশয় অঞ্চলটো এতিয়া পূৱাৰ পৰা নিশালৈকে একাংশ উশৃংখল যুৱক-যুৱতী, দুষ্কৃতিকাৰীৰ অবাধ বিচৰণ ভূমিলৈ ৰূপান্তৰিত কৰাত সাধাৰণ ৰাইজৰ এতিয়া স্বাধীনতা আৰু নিৰাপত্তা নোহোৱা হৈ পৰিছে বুলি সচেতন ৰাইজে অভিযোগ উত্থাপিত কৰিছে। বিশেষকৈ যোৱা বৰ্ষত দলিবাৰীৰ পৰা সোণাৰী গাঁও আৰু বৰভকতি গাঁৱৰ পৰা জয়সাগৰলৈ, ভৰালী বৰুৱা পুখুৰীৰ লগতে বৃহত্তৰ কৃষিভূমিৰ মাজেৰে নিৰ্মাণ কৰা পথ আৰু পথাৰৰ মাজত থকা জলসিঞ্চনৰ পানীৰ নলাসমূহ এতিয়া একাংশ উশৃংখল যুৱকে বেলি মাৰ যোৱাৰ লগে লগেই সুৰা আৰু জুৱাৰ আড্ডাথলীলৈ ৰূপান্তৰিত কৰাৰ লগতে সুৰাৰ বটলসমূহ কৃষিভূমিত পেলোৱাৰ ফলত কৃষকসকল আগন্তুক বিপদৰ বাবে চিন্তিত হোৱা বুলিও কৃষকসকলে ক্ষোভ ব্যক্ত কৰে।
কৃষিভূমিৰ পৰা সুৰাৰ বটলসমূহ পথৰ দাঁতিত তুলি একাংশ কৃষকে ক্ষোভেৰে কয় যে, একাংশ মুখা পিন্ধা ভদ্ৰলোক আৰু সমাজৰ একাংশ তথাকথিত অভিজাত পৰিয়ালৰ সন্তানে মুৰৰ ঘাম মাটিত পেলাই জীৱন-নিৰ্বাহ কৰা কৃষকসকলৰ দুখ-কষ্টৰ কথা কি উপলব্ধি কৰিব নোৱাৰাৰ ফলতেই এনে বিপজ্জনক কাম কৰিবলৈ কুণ্ঠাবোধ নকৰে।। তদুপৰি পূৰ্বে নিৰিবিলি পৰিৱেশত বিৰাজ কৰা দেশী-বিদেশী বিভিন্ন প্ৰজাতিৰ পক্ষীসমূহ এতিয়া জন-কোলাহল, বিশেষকৈ মটৰচাইকেল, চাৰিচকীয়া বাহনৰ বাবে জলাশয়টোৰ পূৱ প্ৰান্তলৈ কমকৈ আহিবলৈ ধৰিছে। যদি এনেদৰে বৃহৎ জলাশয় অঞ্চলটোত একাংশ লোকৰ বাবে পৰিবৰ্তন হৈ থাকে, তেতিয়া হ’লে, ভবিষ্যতে এই অঞ্চলৰ নান্দনিক শোভাৰ বিলুপ্তি ঘটাতো নিশ্চিত বুলিও সচেতন ব্যক্তি আৰু কৃষক ৰাইজে উদ্বেগ প্ৰকাশ কৰে।
একাংশ দুষ্কৃতিকাৰীয়ে জয়সাগৰ দলনিত আজি কিছুদিনৰ পৰা সৃষ্টি কৰা উশৃংখল পৰিস্থিতিৰ সম্পৰ্কে একাংশ সচেতন ৰাইজ আৰু কৃষকে অভিযোগ উত্থাপিত কৰাৰ পাছতো কলিয়াবৰ আৰক্ষীয়ে ঘটনাস্থলীত উপস্থিত হোৱা পাছতে মদৰ বটলৰ একাংশ ভাঙি হাল বায় থোৱা মাটিত পেলাই সমগ্ৰ পৰিৱেশটো অধিক বিপজ্জনক কৰি তুলিছে বুলি একাংশ কৃষকে অভিযোগ তুলিছে। এনে ক্ষেত্ৰত স্থানীয় বিধায়ক তথা কেবিনেট মন্ত্ৰীগৰাকীৰ লগতে আৰক্ষী প্ৰশাসনে কঠোৰ পদক্ষেপ গ্ৰহণ কৰি জয়সাগৰ দলনিত গঢ়ি উঠা উশৃংখল পৰিৱেশ ৰোধ কৰি খাটি-খোৱা কৃষকসকলৰ লগতে নিৰিবিলি পৰিৱেশত বিচৰণ কৰা পক্ষীসমূহৰ অনুকূল পৰিৱেশ সুৰক্ষাৰ বাবে যথোচিত ব্যৱস্থা গ্ৰহণ কৰিবলৈ ৰাইজে দাবী জনাইছে।

চিৰাং জিলাৰ বিজনী মহকুমা আৰক্ষী আৰু এছ এছ ডি ফাউন্ডেশন নামৰ স্বেচ্ছাসেৱী সংগঠনৰ সহযোগত ৰাষ্ট্ৰীয় ড্ৰাগছ বিৰোধী দিৱস উপলক্ষে সজাগতা সমদল উলিয়াই। বিজনী থানাৰ পৰা আৰম্ভ কৰি বিজনী কাৱাটিকা হৈ সম্পূৰ্ণ বিজনী চহৰ পৰিভ্ৰমণ কৰে। সমদলত অংশগ্ৰহণ কৰে বিজনী মহকুমা আৰক্ষী বিষয়া শ্বেখৰজ্যোতি ৰায় বিজনী থানাৰ ভাৰপ্ৰাপ্ত আৰক্ষী বিষয়া ৰূপক কুমাৰ বৰাৰ লগতে স্বেচ্ছাসেৱী সংগঠনৰ কৰ্মী সকলোৱে অংশগ্ৰহণ কৰে। ইফালে পাণবাৰী থানাৰ অন্তৰ্গত বিভিন্ন ঠাইত পাণবাৰী আৰক্ষীয়ে ড্ৰাগছকলৈ সজাগতা সভা অনুষ্ঠিত কৰে। উক্ত সজাগতা সভাত উপস্থিত থাকে পাণবাৰী আৰক্ষী চক্ৰ বিষয়া ৰফিকুল হাছান চৌধুৰীৰ লগতে পাণবাৰী থানাৰ ভাৰপ্ৰাপ্ত আৰক্ষী বিষয়া অক্ষয় নাৰায়ণ দেব ।

আজি পুৱা ৭ বজাৰ পৰা যোৰহাট জিলাৰ চেলেংহাট স্থিত কৃষক নেতা অখিল গগৈৰ বাসগৃহত এক উৎসৱ মুখৰ পৰিবেশ। সকলোবোৰ উৎকণ্ঠাৰ অন্ত পেলাই দিনৰ ১২- ১০ বজাত অসম আৰক্ষীৰ এক কনভয় সহ চেলেংহাটৰ লুখুড়াখন স্থিত বাসগৃহৰ পদূলিত উপস্থিত হয় কৃষক নেতা অখিল গগৈ। গাড়ীৰ পৰা নমাৰ লগে লগে তাত উপস্থিত থকা গুণ মুগ্ধই তেওঁক মৰমৰ উপহাৰেৰে উপচাই পেলাই। কৃষক নেতাজনে টুকিলে আবেগৰ অশ্ৰু। মৰমৰ নেতাজনক চাবলৈ ওলাই অহা বহু ৰাইজে অখিল গগৈ ছবি সম্বলিত চোলা পৰিধান কৰি মাথোঁ চিঞৰি গল আমাৰ নেতা অখিল অখিল গগৈ জিন্দাবাদ। অখিল গগৈ ভিতৰলৈ সোমাই গৈ আবেগিক হৈ মাতৃক সাৱটি ধৰে। মাতৃয়েও পুত্ৰক বহু দিনৰ মূৰত আঁকোৱালি লয়। মাতৃৰ কাষত বহি কৃষক নেতাজনে নষ্টালজিক হৈ পুৰণি দিনৰ সোঁৱৰণ কৰে। তেওঁ হালৰ পৰা আহি মাতৃৰ হাতৰ মাছৰ জোলৰ সোৱাদ লোৱাৰ দৰে আজিও মাতৃৰ হাতৰ সোৱাদ লব বুলি উল্লেখ কৰাৰ লগতে ক্ষন্তেক সময় মাতৃৰ কোলাত টোপনি যাব বুলিও উল্লেখ কৰে। সাংবাদিকে কৰা এক প্ৰশ্নৰ উত্তৰত তেওঁক নেদেখাকৈ ভোট দি প্ৰায় ৫০ হাজাৰ ভোটত জয় যুক্ত কৰাৰ বাবে শিৱসাগৰ বাসী ৰাইজক ধন্যবাদ জনোৱাৰ লগতে শিৱসাগৰক এক সুন্দৰ ৰূপ দিয়াৰ পৰিকল্পনাৰ কথাও অৱগত কৰে। আন এক প্ৰশ্নৰ উত্তৰত সদ্য পদত্যগী বিধায়ক ৰূপজ্যোতি কুৰ্মী মিছলিয়া আৰু ঠগবাজ বুলি উল্লেখ কৰি এইবাৰ কুৰ্মীক মৰিয়নিৰ ৰাইজে বিদায় দিব বুলি উল্লেখ কৰে। উল্লেখযোগ্য যে দুদিনৰ বাবে মুক্তি লাভ কৰা অখিল গগৈ পুত্ৰ আৰু পত্নীৰ লগত সময় কটোৱাৰ পিছত আজি মাতৃ প্ৰিয়দা গগৈৰ লগত নিশাটো কটাই পুৱা গুৱাহাটীলৈ ৰাওনা হব।