ওদালগুৰি জিলাৰ বৃহত্তৰ ৰৌতা অঞ্চলক কালান্তক ক’ভিডৰ দ্বিতীয় পৰ্যায়ৰ ঢৌৱে বাৰুকৈয়ে স্পৰ্শ কৰিছে  । কাৰণ প্ৰতিদিনে ৰেপিড এন্টিজেন টেষ্টত ক’ভিডত আক্ৰান্তৰ সংখ্যা বৃদ্ধি পাই অহা পৰিলক্ষিত হৈছে । শেহতীয়াকৈ ৰৌতা আৰক্ষী থানাৰ অন্তৰ্গত  গাঁওবোৰৰ  লগতে ৰৌতা   চাৰিআলি আৰু ৰৌতাষ্টেচনত আক্ৰান্তৰ সংখ্যা দ্ৰুতগতিত বৃদ্ধি পাই অহাৰ পিছত গণ সংক্ৰমণৰ সম্ভাৱনা প্ৰবল হৈ পৰিছে ।  বিশ্বৰ কাল ক’ভিডৰ ৰোগে  সমগ্ৰ ৰৌতা অঞ্চলত মহিলা, পুৰুষ, শিশু  আদিকে ধৰি  শতাধিক লোকক  অতিক্ৰম কৰিছে । বৰ্তমান ৰৌতা চাৰিআলি চহৰ আৰু ৰৌতা ষ্টেচনৰ দোকানীকে ধৰি কেইবাজনো ক’ভিডত আক্ৰান্ত লোক গুৱাহাটী চিকিৎসা মহাবিদ্যালয় হাস্পাতাল, গুৱাহাটীৰ ব্যক্তিগত খণ্ডৰ চিকিৎসালয়, তেজপুৰ চিকিৎসা মহাবিদ্যালয় হাস্পাতাল, ওদালগুৰি জিলা অসামৰিক চিকিৎসালয়,ৰৌতা আদৰ্শ চিকিৎসালয়কে ধৰি কেইবাখনো ক’ভিড চিকিৎসালয়ত চিকিৎসাধীন অৱস্থাত আছে ।ৰৌতা অঞ্চলত হোম আইছ’লেছনত থাকিও বহুতো লোকে লৈ আছে ক’ভিড ৰোগৰ চিকিৎসা । ক’ভিডত আক্ৰান্ত ঘটি বৰ্তমানলৈ  ৰৌতা অঞ্চলত  মৃত্যু ঘটিছে  তিনিজন । তথাপি চৰকাৰে কঠোৰ ভাৱে বান্ধি দিয়া সামাজিক দূৰত্ব ধোঁৱাচাঙত তুলি থৈ জুম পাতি থকা, মাস্ক ব্যৱহাৰ নকৰাকৈ ঘুৰি ফুৰাৰ দৃশ্য ৰৌতা চাৰিআলি চহৰখনৰ লগতে অধিক সংখ্যক গাঁৱতে সুলভ হৈ থকা দেখা যায় । ইয়াৰ পিছতো হোম আইছ’লেছনত থকা লোকৰ পৰিয়ালৰ সদস্যই বাধাহীনভাৱে ওলাই দোকান বজাৰত মুকলিকৈ অহা-যোৱা কৰাৰ ভীষণ অভিযোগ পোৱা গৈছে যদিও আজিলৈকে ৰৌতা আঞ্চলত চলি আছে ক’ভিড ৰেপিড এন্টিজেন টেষ্টৰ লগতে টিকাকৰণৰ কাৰ্যসূচী । ইফালে চৰকাৰীভাৱে ক’ভিডৰ প্ৰতিষেধকৰ কোনো পধ্য  ৰাজ্যখনত অভাৱ নাই বুলি মুখ্যমন্ত্ৰী হিমন্ত বিশ্ব শৰ্মাই কৈ থকাৰ সময়তে ৰৌতা চাৰিআলি প্ৰাথমিক বিদ্যালয় কেন্দ্ৰত এশৰ পৰা ডেৰশ জনক  ভেকচিনৰ  দি অহাৰ বিপৰীতে বহুলোকে  ভীৰ কৰে। কোনো সামাজিক ব্যৱধান  নথকাকৈয়ে ৰৌতা চাৰিআলি ভেকচিন কেন্দ্ৰৰ সম্মুখত ভেকচিনৰ বাবে অপেক্ষা কৰা ৰাইজে   চিকিৎসালয়ৰ কতৃপক্ষই  সময়মতে ভেকচিন কেন্দ্ৰ নোখোৱা বুলি ওলোটাই  ক্ষোভ প্ৰকাশ কৰে ।

যোৰহাট জিলা টীয়ক চেলেংহাটৰ সমাজ কৰ্মী তথা বিশিষ্ট শৰীৰ চৰ্চাবিদ  তুষাৰ পাললৈ আগবঢ়োৱা হৈছে ‘ৰাষ্ট্ৰীয় সমাজ সেৱা ৰত্ন বঁটা’ । ১০ বছৰ অধিক সময় ধৰি সমাজ কৰ্মী পালে সমগ্ৰ যোৰহাট জিলাত ড্ৰাগছ আৰু সুৰাৰ বাবে বিভিন্ন অঞ্চলত সজাগতা শিবিৰ  অনুষ্ঠিত কৰি আহিছে । উল্লেখ যে এই জন সমাজ কৰ্মীয়ে মহামাৰী কৰ’না ভাইৰাছৰ সময়টো হোম কোৰাণ্টাইন হৈ থকা পৰিয়ালৰ লগতে দৰিদ্ৰ  পৰিয়ালৰ মাজতো নিজা একক প্ৰচেষ্টাৰে খাদ্য সামগ্ৰী যোগান ধৰি মহানুভৱতা দাঙি ধৰিছে। এইজন সমাজ কৰ্মী তুষাৰ পালক ড্ৰাগছ আৰু নিচা জাতীয় দ্ৰব্যৰ বিৰুদ্ধে অত্যধিক সময় সজাগতাৰ শিবিৰ কৰি অহাৰ বাবে ১৫ জুন ২০২১ তাৰিখে দিল্লীত এই ৰাষ্ট্ৰীয় সমাজ সেৱা ৰত্ন বঁটা প্ৰদান কৰিব। বৰ্তমান এই খবৰ পাই সকলোৱে ধন্যবাদ জ্ঞাপন কৰিছে তুষাৰ পালক ।

 মৰিগাঁও জিলাৰ ভূৰাগাঁও থানাৰ অন্তৰ্গত বৰালিমাৰী আৰু হয়বৰ গাঁও পঞ্চায়ত এলেকাৰ নৈপৰীয়া অঞ্চলত দীৰ্ঘদিনৰ পৰা বাহুবল আৰু মাফিয়াৰাজ চলাই সৰ্বসাধাৰণ চৰুৱা খহনীয়া গ্ৰস্ত লোকৰ মাজত প্ৰভাৱশালী লোক হিচাবে নিজকে প্ৰতিষ্ঠা কৰিবলৈ সক্ষম হোৱা আবু হানিফ উৰফে আবু ডকাইট বুলি খ্যাত অপৰাধী টোক ভূৰাগাঁও আৰক্ষীয়ে অৱশেষত গ্ৰেপ্তাৰ কৰি  যোৱা ২৯ মে’ত জেল হাজোতলৈ প্ৰেৰণ কৰি এক ইতিহাস ৰচনা কৰিলে।উল্লেখযোগ্য যে ইয়াৰ পূৰ্বে ভূৰাগাঁও থানাত আবু হানিফৰ বিৰুদ্ধে বহু গোচৰ পঞ্জিয়ন হৈছিল যদিও কোনো তদন্ত হোৱা নাছিল।আনকি আৰক্ষীয়েও গ্ৰেপ্তাৰ কৰিবলৈ সাহস কৰা নাছিল। আবু হানিফৰ নাম শুনিলেই বহু লোকে ভয় কৰিছিল। অঞ্চলটোত সংঘটিত যিকোনো অপৰাধত আবু হানিফ জড়িত হোৱা মাত্ৰকে সাধাৰণ লোকে গোচৰ তৰিবলৈকো ভয় কৰিছিল। শেহতীয়া ভাৱে বৰালিমাৰী অঞ্চলৰ এগৰাকী বিশেষভাৱে সক্ষম যুৱতীৰ ধৰ্ষণৰ গোচৰৰ সৈতে জড়িত হৈ পৰে আবু হানিফৰ নাম। ভূৰাগাঁও থানাৰ ভাৰপ্ৰাপ্ত বিষয়া মৃদুল হাজৰিকাই জনোৱা মতে, আবু হানিফে ধৰ্ষিতা যুৱতী গৰাকীক ভয় ভাবুকি প্ৰদান কৰি আৰক্ষীৰ ওচৰত গোচৰ তৰিবলৈ পৰিয়ালক বাধা প্ৰদান কৰিছিল আৰু যুৱতী গৰাকীক ১০ হাজাৰ টকাৰ ক্ষতিপূৰণ দিব বুলি প্ৰলোভন দি ধৰ্ষণকাৰী দলটোৰ সদস্য সকলক পলোৱাই পঠাইছিল। পৰোক্ষ ভাৱে আবু হানিফ জড়িত হৈ পৰিছিল ধৰ্ষণৰ গোচৰত। তদুপৰি সংবাদ মাধ্যমৰ আগত ভাৰপ্ৰাপ্ত বিষয়া মৃদুল হাজৰিকাই প্ৰকাশ কৰা মতে, ৭ – ৮ গৰাকী মহিলাক বিয়া কৰাই আবু হানিফে শাৰিৰীক নিৰ্যাতন চলোৱাৰ অভিযোগ আছে।  অকল ইমানেই নহয় সমগ্ৰ বৰালিমাৰী আৰু হয়বৰ গাঁও অঞ্চলৰ তেওঁ একছত্ৰী জুৱাৰ সম্ৰাট। নৈপৰীয়া অঞ্চলটোত চলা সৰহ সংখ্যক জুৱাৰ ঘাটিৰেই পৃষ্ঠপোষক আবু হানিফ। হাজৰিকাই জনোৱা মতে, আবু হানিফৰ অপৰাধৰ তালিকাখন বহু দিঘলীয়া। নৈপৰীয়া অঞ্চলটোৰ বহু অপৰাধ আবু হানিফৰ বিছাৰ শালতে মীমাংশা হয়। যাৰ বাৰে বহু নিৰ্যাতিতা মহিলাই নৈপৰীয়া অঞ্চলটোত হেৰুৱাইছে নিম্নতম অধিকাৰ। উল্লেখযোগ্য যে এইজন আবু হানিফ আছিল এ আই ইউ ডি এফৰো স্হানীয় নেতা। সেই সোবাদতে এ আই ইউ ডি এফৰ পৰা টিকট লৈ বিগত দিনত হয়বৰ গাঁও পঞ্চায়তৰ সভাপতিৰ পদতো জয়লাভ কৰিছিল। প্ৰায় ২০ – ২৫ বছৰ ধৰি নৈপৰীয়া অঞ্চলটোত উঠিৰজা বহিৰজা হৈ একছত্ৰী সম্ৰাট হৈ পৰা আবু হানিফ অৱশেষত ভূৰাগাঁও থানাৰ ভাৰপ্ৰাপ্ত বিষয়া মৃদুল হাজৰিকাৰ বলিষ্ঠ পদক্ষেপত ৰঙা ঘৰৰ আলহী হব লগা হ’ল। আজি ভূৰাগাঁও থানাত ৮৫/ ২১ নম্বৰত ধৰ্ষণ আৰু অন্যান্য বহু অভিযোগত এটি গোচৰ পঞ্জিয়ন কৰি ভূৰাগাঁও আৰক্ষীয়ে আবু হানিফক প্ৰেৰণ কৰিলে জেল হাজোতলৈ।

কৰ’ণাই  স্তব্ধ  কৰা জনজীৱনৰ মাজতে  গোলাঘাটত চলিছে  বিভিন্ন অবৈধ ব্যৱসায়। সান্ধ্য আইনৰ সময়তো গোলাঘাট  বগীজানৰ পৰা দৈনিক পাৰ হৈছে অবৈধ কাঠভৰ্তি বাহন। দেওবাৰে পুৱা এখন অবৈধ  নাম্বাৰ প্লেট বিহীন কাঠ ভৰ্তি  বলে’ৰ পিক আপ  ভান  জব্দ কৰে গাঁওৰক্ষী বাহিনী আৰু স্থানীয় ৰাইজে । পলাবলৈ খোজা  অবৈধ কাঠভৰ্তি বাহনখন খেদি খেদি জব্দ কৰে স্থানীয় ৰাইজ আৰু গাঁওৰক্ষী বাহিনীয়ে । প্ৰায় ১.৫ লাখ টকাৰ অবৈধ কাঠ আছিল গাড়ী খনত ।গাওঁবাসীৰ অভিযোগ অনুসৰি  দীৰ্ঘদিনৰ পৰা কাৰ্বি আংলংৰ পৰা মুৰফুলনী হৈ সৰবৰাহ হৈ আছিল অবৈধ কাঠ  । ইফালে গাড়ী খনৰ চালক আৰু হেণ্ডিমেনৰ স্বীকাৰোক্তিৰ  ভিত্তিত কাঠ সমূহ জনৈক দেৱজিত গগৈৰ বুলি জানিব পৰা গৈছে । স্থানীয় ৰাইজৰ ভাষ্য অনুসৰি   বগীজান আৰক্ষী থানা আৰু   মুৰফুলনী খণ্ড বন কাৰ্যালয় সমীপেৰে দৈনিক এনে অবৈধ কাঠ ভৰ্তি ট্ৰাক পাৰ হৈ যায় । কিন্তু ৰহস্যজনক ভাৱে  নিদ্ৰামগ্ন হৈ থাকে  বন বিভাগ আৰু  আৰক্ষী ।ৰাইজৰ সন্দেহ যে বন মাফিয়াৰ সৈতে বৃহৎ ধনৰ লেনদেনেৰে গোপন মিতিৰালি কৰি এনেদৰে অবৈধ কাঠ ভৰ্তি ট্ৰাক সমূহ পাৰ কৰিবলৈ সুবিধা কৰি  দিয়ে বন বিভাগ আৰু আৰক্ষীয়ে ।