সুধাকণ্ঠ ড° ভূপেন হাজৰিকাৰ সোঁৱৰণত ডিব্ৰুগড় জিলা ভিত্তিত দশম বৰ্ষৰ বাবে প্ৰাইজমাণি মাৰাথন দৌৰ প্ৰতিযোগিতাখনি। আয়োজন কৰা হৈছে। চিৰিংহোলা আঞ্চলিক মটক যুৱ-ছাত্ৰ সন্মিলনৰ উদ্যোগত অহা ১০ জানুৱাৰীত অনুষ্ঠিত হ’বলগীয়া প্ৰতিযোগিতাখনি চিৰিংহোলা বাপুজী যুৱক সংঘৰ প্ৰাঙ্গনত আয়োজন কৰা হৈছে। এই উপলক্ষে সন্তোষ কোঁৱৰক সভাপতি, প্ৰশান্ত দত্তক কাৰ্যকৰী সভাপতি, সীমান্ত বৰুৱাক সম্পাদক হিচাপে লৈ খেল পৰিচালনা সমিতি গঠন কৰা হৈছে। ন জানুৱাৰীত ড° ভূপেন হাজৰিকাৰ প্ৰতিচ্ছবিত মাল্যাপৰ্ণ আৰু বন্তি প্ৰজ্বলন কৰিব অৱসৰপ্ৰাপ্ত শিক্ষক সোমেধৰ বৰুৱাই, ছহিদ তৰ্পণ কৰিব চিৰিংহোলা বাপুজী যুৱক সংঘৰ উপদেষ্টা ভৱেন গগৈয়ে, বৃক্ষৰোপন কাৰ্যসূচী শুভাৰম্ভ কৰিব ঘোঁৰামৰা আৰক্ষী চকীৰ ভাৰপ্ৰাপ্ত বিষয়া জ্যোতিষ কুমাৰ নাথ, বলোৰাম কোঁৱৰ প্ৰাথমিক বিদ্যালয়ৰ প্ৰধান শিক্ষয়িত্ৰী দীপা শইকীয়া আৰু চিৰিংহোলা মধ্য ইংৰাজী বিদ্যালয়ৰ সহকাৰী শিক্ষক জিতুল গগৈয়ে, সন্ধিয়ালৈ সমুহীয়া বন্তি প্ৰজ্বলন কৰিব বলোৰাম কোঁৱৰ প্ৰাথমিক বিদ্যালয়ৰ সহকাৰী শিক্ষক যুগল কোঁৱৰে। দহ জানুৱাৰীৰ পুৱা চাৰি বজাত মাৰাথন দৌৰ প্ৰতিযোগিতা অনুষ্ঠিত হ’ব। টিংৰাই আৰক্ষী চকীৰ ভাৰপ্ৰাপ্ত বিষয়া গোলাপ গগৈ আৰু টেঙাখাত আৰক্ষী থানাৰ ভাৰপ্ৰাপ্ত বিষয়া ৰিতুলমণি দাসে ক্ৰমে ল’ৰা আৰু ছোৱালী শাখাৰ ফ্লেগ অফ কৰিব। ৭.৩০ বজাত নাহৰসাঁকো গাঁৱৰ চৰকাৰী গাঁওবুঢ়া সুব্ৰত বৰুৱাৰ সভাপতিত্বত অনুষ্ঠিত হ’বলগীয়া মুকলি সভাত মুখ্য অতিথি ৰূপে অংশ ল’ব লাহোৱালৰ বিধায়ক ঋতুপৰ্ণ বৰুৱা আৰু সদৌ অসম মটক যুৱ ছাত্ৰ-সন্মিলনৰ প্ৰাক্তন সভাপতি দিলীপ বড়াই। আনহাতে আমন্ত্ৰিত অতিথি হিচাপে সদৌ অসম মটক যুৱ-ছাত্ৰ সন্মিলনৰ উপদেষ্টা মিণ্টু বৰপাত্ৰ, সভাপতি দেভিড চেতিয়া, উপ-সভাপতি অজয় গগৈ, স্বৰূপ গোঁহাই, সাধাৰণ সম্পাদক ধৰণী গোঁহাই, ক্ৰীড়া সম্পাদক গিৰিণ চেতিয়া, তথ্য আৰু প্ৰচাৰ সম্পাদক দীপজয় শইকীয়া, সাংগঠনিক সম্পাদক ৰূপজ্যোতি বুঢ়াগোঁহাই, ডিব্ৰুগড় জিলা সমিতিৰ সভাপতি-সম্পাদক নিৰূপম দুৱৰা আৰু মুকুন্দ মাধৱ বুঢ়াগোঁহাইৰ লগতে লাহোৱাল জিলা পৰিষদৰ সদস্য ভূপেন কুমাৰ গগৈ, লাহোৱাল আৰক্ষী থানাৰ ভাৰপ্ৰাপ্ত বিষয়া ঋষিকেশ হাজৰিকা, আৰ ডি শৈক্ষিক ফাউণ্ডেচনৰ সঞ্চালক মনোজ ধানোৱাৰ, চিৰিংহোলা গাঁও পঞ্চায়তৰ সভাপতি ঋতু গোঁহাই প্ৰমুখ্যে বিশিষ্ট ব্যক্তিসকল উপস্থিত থাকিব। প্ৰতিযোগিতাখন সুচাৰুৰূপে অনুষ্ঠিত কৰাত সকলো ৰাইজৰ সহায়-সহযোগিতা আৰু উপস্থিতি কামনা কৰিছে চিৰিংহোলা আঞ্চলিক মটক যুৱ-ছাত্ৰ সন্মিলনৰ সভাপতি সঞ্জু হাজৰিকা আৰু সম্পাদক কল্পজ্যোতি কোঁৱৰে। খেলুৱৈসকলৰ সুবিধাৰ্থে ৮১৩৩৯৪২২৯২, ৭৬৩৮৮৭৪৬২১ আৰু ৭০০২৪৩১৭৯৮ নম্বৰত আগতীয়াকৈ যোগাযোগ কৰিবলৈ আহ্বান জনাইছে।

 আইদেউ জোনাকী বাটৰ সম্পাদিকা, গুৱাহাটী নিবাসী জুনু বৰাক সমাজকৰ্মী বন্দনা গীতি বৰা সোঁৱৰণী বঁটা ৫ জানুৱাৰীত পশ্চিম যোৰহাট অঞ্চলৰ ২১৫ নং ঘৰফলীয়া প্ৰাথমিক বিদ্যালয়ত নীৰদা গগৈ সভাপতিত্বত অনুষ্ঠিত হোৱা এক অনুষ্ঠানত প্ৰদান কৰা হয় । উক্ত অনুষ্ঠানতে পকামূৰা নিবাসী অৱসৰপ্ৰাপ্ত শিক্ষক হেমধৰ শৰ্মাক সম্বৰ্ধনা জনোৱা হয় । ভবেন হাজৰিকাই আঁতধৰা গোলাপ বৰবৰাই মংগলাচৰণ কৰা, জনাৰ্দন ভুঞা বৰবায়নে উদ্বোধন কৰা অনুষ্ঠানত অধ্যাপিকা ড• জ্যোতিৰেখা হাজৰিকাই বন্দনা গীতি বৰাৰ পঞ্চম মৃত্যু বাৰ্ষিকী উপলক্ষে চেতনা মহিলা আত্মসহায়ক গোট আৰু মঞ্জুলা কলা কেন্দ্ৰই আয়োজন কৰা অনুষ্ঠানত ‘নাৰী সবলীকৰণ: সাম্প্ৰতিক পৰিস্থিতিত ইয়াৰ প্ৰাসংগিকতা’ বিষয়ত বক্তৃতা প্ৰদান কৰে । পৰিয়ালবৰ্গৰ সহযোগত আয়োজিত অনুষ্ঠানত অঞ্চলটোৰ ভালেসংখ্যক লোক উপস্থিত থাকি সহযোগিতা কৰে । উল্লেখ্য, নাৰী সবলীকৰণৰ বাবে দীৰ্ঘদিন কাৰ্য ৰূপায়ন কৰি অহা জুনু বৰাই জোনাকী বাট সম্পাদনাৰ লগতে ‘লিংগ বৈষম্য’, ‘শৃংখল শিঙাৰ আহ্বান’, ‘ভিন্ন প্ৰসংগ আৰু নাৰীৰ মূল্য’ লিখি প্ৰকাশ কৰিছে ।

মহানগৰীৰ খাৰঘূলিত সংঘটিত হৈছে ভয়ংকৰ অগ্নিকাণ্ড। এই অগ্নিকাণ্ডত জীৱন্তে অগ্নিদগ্ধ হৈছে এগৰাকী ৮৭ বছৰীয়া বৃদ্ধা । মৃত মহিলাগৰাকীৰ নাম ধনমায়া বিশ্বকৰ্মা বুলি জানিব পৰা গৈছে । জুইত জাহ গ’ল মহিলাগৰাকীৰ ঘৰটো । ঘটনাস্থলীত আৰক্ষী, অগ্নিনিৰ্বাপক বাহিনীৰ লোক উপস্থিত হৈ জুই নিৰ্বাপন কৰে ।

বিগত বিধানসভা নিৰ্বাচনত কংগ্ৰেছ চৰকাৰখনে ৰোধ কৰিব নোৱাৰা ধাৰাবাহিক গঁড় হত্যাক নিৰ্বাচনী ইছ্যূ হিচাপে লৈছিল বৰ্তমানৰ শাসকীয় দল বিজেপিয়ে। তেতিয়া বনমন্ত্ৰীৰ দায়িত্বত থকা বৰ্তমানৰ চামগুৰিৰ বিধায়ক ৰকিবুল হুছেইনৰ কাৰ্যকালত ব্যাপক হাৰত হোৱা গঁড় হত্যাই ক্ষোভিত কৰি তুলিছিল অসমৰ ৰাইজক। চোৰাং চিকাৰীয়ে নিৰ্মম ভাৱে ব্যাপক হাৰত এশিঙীয়া গঁড় হত্যা কৰি কাটি নিছিল খৰ্গ। ২০১১চনৰ পৰা ২০১৮ চনলৈকে মুঠ ৬৪টা গঁড় হত্যা কৰা হৈছিল নগাঁও জিলাৰ অধীনষ্ঠ কাজিৰঙা ৰাষ্ট্ৰীয় উদ্যানৰ বুঢ়াপাহাৰ আৰু বাগৰি ৰেঞ্জত। ইয়াৰে প্ৰায় অৰ্ধশতাধিক গঁড় হত্যাৰ ঘটনা সংঘটিত হৈছিল প্ৰাক্তন মন্ত্ৰী ৰকিবুল হুছেইনৰ কাৰ্যকালত। মুখ্যমন্ত্ৰী সৰ্বানন্দ সোণোৱালে কঠোৰ হাতেৰে চোৰাং চিকাৰীক দমন কৰাৰ বাবে নিৰ্দেশ দিছিল। শেহতীয়াভাৱে ৰাজ্যবাসীৰ বাবে ভালখবৰটো হৈছে একেৰাহে দুটা বছৰ কাজিৰঙা ৰাষ্ট্ৰীয় উদ্যানৰ অন্তৰ্গত তথা নগাঁও জিলাৰ অধীনষ্ঠ বাগৰি আৰু বুঢ়াপাহাৰ ৰেঞ্জত এটাও গঁড় হত্যা কৰিব পৰা নাই চোৰাং চিকাৰীয়ে। নগাঁও আৰক্ষী অধীক্ষক অভিজিৎ গৌৰৱ, কলিয়াবৰ মহকুমা আৰক্ষী বিষয়া মৃন্ময় দাস আৰু জখলাবন্ধা আৰক্ষী চকীৰ ভাৰপ্ৰাপ্ত বিষয়া নিপু কলিতাৰ নেতৃত্বত নগাঁও আৰক্ষীয়ে দেখুওৱা তৎপৰতাৰ বাবেই বৰ্তমান নগাঁও আৰক্ষীয়ে চোৰাং চিকাৰীৰ বিৰুদ্ধে লাভ কৰিছে বৃহৎ সফলতা। উল্লেখযোগ্য যে, ২০১৮চনৰে পৰা নগাঁও আৰক্ষীয়ে চোৰাং চিকাৰীৰ বিৰুদ্ধে চলাইছিল বহু সফল অভিযান। তেতিয়াৰ নগাঁৱৰ আৰক্ষী অধীক্ষক শংকৰব্ৰত ৰায়মেধি আৰু অতিৰিক্ত আৰক্ষী অধীক্ষক ৰিপুল দাসৰ নেতৃত্বত নগাঁও আৰক্ষীয়ে অভিযান চলাই জব্দ কৰিছিল বহু অত্যাধুনিক অস্ত্ৰ-শস্ত্ৰ। ৰিপুল দাসৰ নেতৃত্বত যোৱা আৰক্ষীৰ দলে নাগালেণ্ডৰ পৰাও গ্ৰেপ্তাৰ কৰিছিল কাজিৰঙাত গঁড় হত্যাৰ বাবে অহা মণিপুৰৰ কেইবাজনো দুধৰ্ষ চিকাৰীক। জখলাবন্ধা আৰক্ষী থানাৰ প্ৰাক্তন ভাৰপ্ৰাপ্ত বিষয়া দেবেন বৰাইয়ো অভিযান চলাই বহু চোৰাং চিকাৰীক গ্ৰেপ্তাৰ কৰাৰ লগতে কেইবাজনো চোৰাং চিকাৰীক সমুখ-সমৰত গুলীয়াই হত্যা কৰিছিল। ইয়াৰ পিছত জখলাবন্ধা আৰক্ষী থানাৰ দায়িত্ব লোৱা নিপু কলিতায়ো কেইবাজনো চোৰাং চিকাৰীক গ্ৰেপ্তাৰ কৰিছিল। সেয়ে ২০১৯বৰ্ষত প্ৰথমবাৰৰ বাবে এটাও গঁড় হত্যা নোহোৱাকৈ পাৰ হৈছিল। সেই সময়তো কলিয়াবৰৰ মহকুমা আৰক্ষী বিষয়াৰ দায়িত্বত আছিল মৃন্ময় দাস। মৃন্ময় দাস আৰু নিপু কলিতাৰ দৰে আৰক্ষী বিষয়াই নিষ্ঠাৰে দায়িত্ব পালন কৰাৰ বাবেই নগাঁও আৰক্ষীয়ে এই সফলতা অৰ্জন কৰা বুলিও সংবাদ মাধ্যমৰ সন্মুখত প্ৰকাশ কৰে নগাঁৱৰ আৰক্ষী অধীক্ষক অভিজিৎ গৌৰৱে।বৰ্তমানৰ চৰকাৰখনে দায়িত্ব গ্ৰহণ কৰিয়ে কাজিৰঙাৰ বান্দৰডুবি আৰু দেওচাৰচুঙত চলোৱা উচ্ছেদ অভিযানৰ পিছতে  আশ্বৰ্য্যজনক ভাৱে হ্ৰাস পাইছিল গঁড় হত্যা। কাৰণ এই দুখন গাঁৱত সন্দেহযুক্ত নাগৰিকে চোৰাং চিকাৰীক আশ্ৰয়প্ৰদান কৰাৰ অভিযোগ বহু দিনৰে পৰা আছিল। অবৈধভাৱে কাজিৰঙাৰ ভূমি বেদখল কৰা এই দুখন গাঁৱৰ সন্দেহযুক্ত নাগৰিকক উচ্ছেদ কৰাৰ পিচতে চোৰাং চিকাৰী আশ্ৰয়হীন হৈছিল। ফলশ্ৰুতিত কাজিৰঙাৰ এশিঙীয়া গঁড় হত্যা সন্তোষজনক ভাৱে হ্ৰাস পাইছে।