শিৱসাগৰ জিলাৰ ডিমৌ বন খণ্ড বিষয়া কাৰ্যালয়ৰ অন্তৰ্গত বাম ৰজাবাৰীত আজি পুৱাৰ ভাগত দুটাকৈ অজগৰ উদ্ধাৰ হোৱাক লৈ ৰাইজম মাজত তীব্র চাঞ্চল্য সৃষ্টি কৰে। পুৱাৰ ভাগতে বাম ৰজাবাৰীৰ এক অঞ্চলত ৰাইজে প্ৰত্যক্ষ কৰে এটা প্ৰকাণ্ড অজগৰ আৰু আনটো পোৱালী অজগৰ। স্হানীয় কেইজনমান প্ৰকৃতিপ্ৰেমীয়ে দুয়োটা অজগৰ ধৰি বন বিভাগক সুৰক্ষিতভাৱে গটাই দিয়ে। পুৱাৰ ভাগত অজগৰ চাবলৈ অগনন লোকে সেই স্হানত ভীৰ কৰা পৰিলক্ষিত হয়।

৪ ডিচেম্বৰ সোমবাৰে গুৱাহাটী গ্ৰন্থমেলাত উন্মোচন কৰা হয় কবি ড° বিজিত তালুকদাৰৰ কাব্যগ্ৰন্থ “কুকুহা ডেউকা” ৷ গ্ৰন্থমেলাত সন্ধিয়া বান্ধৱৰ বিপনীৰ সম্মুখত অনুষ্ঠিত এক বিশেষ অনুষ্ঠানত গ্ৰন্থখন আনুষ্ঠানিক ভাবে উন্মোচন কৰে বিশিষ্ট লেখক-সমালোচক অধ্যাপক অভিজ্ঞান অনুৰাগে । গ্ৰন্থ উন্মোচনী অনুষ্ঠানটোত বিশিষ্ট অতিথিৰূপে উপস্থিত থাকে জনপ্ৰিয় গল্পকাৰ ইমৰান হুছেইন । অনুষ্ঠানত কবি দেৱৰাজ কলিতা, শশীন্দ্ৰ ফুকন, দিগন্ত কলিতা প্ৰমুখ্যে ভালেমান বিশিষ্ট ব্যক্তি উপস্হিত থাকে । অনুষ্ঠানৰ আঁত ধৰে সাংবাদিক প্ৰণৱজ্যোতি নদীয়ালে। ৰাজ্যৰ আগশাৰীৰ কাকত আলোচনীকে ধৰি বিভিন্ন মাধ্যমত মননশীল কবিতাৰ প্ৰকাশেৰে ইতিমধ্যে ব্যাপক জনপ্ৰিয়তা অৰ্জন কৰা ড° বিজিত তালুকদাৰৰ “কুকুহা ডেউকা” প্ৰথমখন প্ৰকাশিত কাব্য সংকলন। গ্ৰন্থখনি প্ৰকাশ কৰি উলিয়াইছে মহানগৰীৰ বিশিষ্ট প্ৰকাশন প্ৰতিষ্ঠান ডঁৰিয়লি প্ৰকাশে ।

 অসমীয়া সাহিত্য সন্মিলনীৰ ২০২১-২৩ বৰ্ষৰ সভাপতি হিচাপে নিৰ্বাচিত হৈছে খাগৰিজান মহাবিদ্যালয় অৱসৰী অধ্যক্ষ তথা বিশিষ্ট সাহিত্যিক নগাঁৱৰ ড০ সাগৰ বৰুৱা। সন্মিলনীৰ সভাপতি লোকনাথ গোস্বামী, কাৰ্যকৰী সভাপতি অধ্যাপক ড০ মুকুল চক্ৰৱৰ্তী আৰু প্ৰধান সম্পাদক মিংকু কলিতাই কাকতলৈ দিয়া এক প্ৰেছ বিবৃতিত এই কথা সদৰি কৰে। উল্লেখ্য যে  Non-cooperation Movement in Assam  শীৰ্ষক গৱেষণা গ্ৰন্থৰ বাবে  ডিব্ৰুগড় বিশ্ববিদ্যালয়ৰ পৰা ডক্টৰেট ডিগ্ৰী লাভ কৰা বৰুৱাৰ ৫০ খনতকৈয়ো অধিক গৱেষণা পত্ৰ প্ৰকাশ পোৱাৰ লগতে প্ৰকাশিত গ্ৰন্থ সমূহ ক্ৰমে -ভাৰতৰ স্বাধীনতা আন্দোলনত অসম – ১ম, ২য় খণ্ড, ইতিহাস চৰ্চা, ইতিহাস আৰু ঐতিহাসিক, ইতিহাস অনুসন্ধান, কুৰি শতিকাৰ অসম আৰু লক -ডাউন, History of No- Coopeation Movement, Migration from East Bengal to Assam, Responses and Reaction, কাব্য সংকলন – তোমাৰ বাতৰি পাওঁ, নদীখনৰ পাৰলৈ যাওঁ, মন পথাৰৰ আকুলতা আদি। তদুপৰি তেখেতে Study of History in the  Twenty – First Century আৰু  Historical Studies in the Context of Globalization নামৰ গ্ৰন্থ দুখনো সম্পাদনা কৰিছে। আনহাতে একেটা বিবৃতিতে উল্লেখ কৰা অনুযায়ী সন্মিলনীৰ ২০১৯ -২০২০ বৰ্ষৰ সন্মিলনীৰ মহেশ্বৰ নাথ সোঁৱৰণী যুৱ সাহিত্য বঁটাৰ বাবে নিৰ্বাচন কৰা হৈছে সাম্প্রতিক অসমৰ বহু চৰ্চিত নাম হিমাংশু প্ৰসাদ দাসক। ১৯৮২ চনৰ ১ জানুৱাৰীত জন্মগ্রহণ কৰা হিমাংশু একেধাৰে কবি, নাট্যকাৰ, চলচ্চিত্রৰ কাহিনী, পৰিচালনা, নিৰ্মাতা হিচাপে বিশেষ ভাৱে পৰিচিত। NSD ৰ স্নাতক ডিগ্ৰীধাৰী হিমাংশু বৰ্তমানলৈকে প্ৰকাশিত কাব্যগ্রন্থ সমূহ ক্ৰমে প্ৰেম আৰু বিদ্ৰোহৰ দিনলিপি, জীৱন জিন্দাবাদ, আকৌ লগ পাম, এই ছোৱালী এবাৰ ভালপাই চাবানেকি, নাটক – মিচ ৰুক্মিণী হৰণ, মিৰাবাই, হেংদাং ফৰ চেল আদি, চাকিৰা আহিব বকুল তলৰ বিহুলৈ, গৰু আদিৰ চলচিত্রৰ কাহনীকাৰ হিমাংশু প্ৰসাদ দাসে ২০০৩ চনতে ‘কটন কলেজ’ শীৰ্ষক দূৰদৰ্শন ধাৰাবাহিকৰ চিত্র নাট্য, সংলাপ আৰু সহ: পৰিচালক হিচাপে খোজ পেলাই পৰৱৰ্তী সময়ত বকুলতলৰ আদালত (ধাৰাবাহিক), চাকিৰা আহিব বকুল তলৰ বিহুলৈ, গৰু  (চলচিত্ৰ) পৰিচালনা কৰাৰ লগতে কুৰিখনৰো অধিক চিনেমা, ধাৰাবাহিকত অভিনয়, সহ: পৰিচালক, কাহিনী আদিৰ মাজেৰে নতুন প্ৰজন্মৰ হৃদয় স্পর্শ কৰিবলৈ সক্ষম হৈছে। কালি ৩ জানুৱাৰীত গুৱাহাটী পাণবজাৰস্থিত বুৰঞ্জী আৰু পুৰাতত্ব বিভাগৰ সভাগৃহত অনুষ্ঠিত সন্মিলনীৰ বিশেষ কাৰ্য্যনিৰ্বাহ সভাত ড০ সাগৰ বৰুৱাক সন্মিলনীৰ পৰৱৰ্তী সভাপতি আৰু হিমাংশু প্ৰসাদ দাসক যুৱ সাহিত্য বঁটাৰ বাবে নিৰ্বাচন সমিতিৰ পৰামৰ্শ ভিত্তত  মনোনিত কৰা হয় বুলি প্ৰধান সম্পাদক মিংকু কলিতাই জানিবলৈ দিয়া। অহা ৫, ৬, ৭ ফেব্রুৱাৰীত গোলাঘাটৰ দৈয়াংত অনুষ্ঠিতব্য অসমীয়া সাহিত্য সন্মিলনীৰ দ্বি-বাৰ্ষিক অধিবেশনত হিমাংশু প্ৰসাদ দাসক উক্ত বঁটা প্ৰদান কৰা হ’ব বুলি বিবৃতিটোত উল্লেখ কৰিছে।

হোজাইত ব্যৱসায়ীসকলৰ সমস্যা সমাধানৰ বাবে অসম চেম্বাৰ অব কমাৰ্চ হোজাই জিলা শাখা আৰু বিধায়ক শিলাদিত্য দেৱৰ সৈতে দেওবাৰে এক আলোচনা হৈ যায়। হোজাই চহৰৰ নিৰ্মিয়মান ৰে’লৱে উৰণীয়া সেতুৰ মেইন ৰোডৰ শেষৰ ফালে ৱাল গাৰ্ড দিয়াৰ পৰিবৰ্ত্তে পিলাৰ দিয়াৰ দাবিৰে এক আলোচনাৰ আয়োজ কৰা হয়।

হোজাইৰ ব্যৱসায়ী সকলে আশংসা ব্যক্ত কৰে যে চহৰৰ নিৰ্মিয়মান উৰণীয়া সেতুৰ শেষৰ ফালে ৱাল গাৰ্ড দিলে চহৰৰ অতি ব্যস্ত বজাৰৰ দুয়োফালে থকা ব্যৱসায়ী সকল বেয়াকৈ প্ৰভাবিত হ’ব। উলেখ্য যে হোজাই সদা ব্যস্ত পুৰণা বজাৰ মেইন ৰোডত  নিৰ্মিয়মান হৈ থকা উৰণীয়া সেতুৰ শেষৰ ফালে নেতাজী মাৰ্কেটতকে আদি কৰি বহু দুকান, হোটেল আদি থকাৰ ওপৰিও বিপৰীত দিশে চহৰৰ মাছ বজাৰ অৱস্থিত। গতিকে ৱাল গাৰ্ড দিলে দুয়োফালৰ ব্যৱসায়ী তথা জনসাধাৰনৰ বাবে বিভিন্ন সমষ্যা সৃষ্টি কৰিব। এনে আশংকা ব্যক্ত কৰি অসম চেম্বাৰ অব কমাৰ্চ সন্থাৰ হোজাই জিলা শাখাৰ উদ্যোগত এক আলোচনাৰ জৰিয়তে বিধায়ক শিলাদিত্যক এখনি স্মাৰক প্ৰদান কৰা হয়। সভাত শিলাদিত্যই হোজাই বাসীৰ স্বাৰ্থত সকলো পদক্ষেপ লোৱা হ’ব বুলি আস্বাস প্ৰদান কৰে। আলোচনাত সন্থাৰ হোজাই শাখাৰ সভাপতি সম্পাদক তথা অনান্য ব্যৱসায়ী সকল অংশ গ্ৰহণ কৰে।