জামুগুৰিহাট,১৪ ডিচেম্বৰ: শোণিতপুৰ জিলাৰ জামুগুৰিহাটৰ একমাত্ৰ উচ্চ শিক্ষানুষ্ঠান ঐতিহ্যমণ্ডিত ত্যাগবীৰ হেমবৰুৱা মহাবিদ্যালয়ত মহাবিদ্যালয়খনৰ জন্মলগ্নৰে পৰা বৰ্তমানলৈকে কাৰ্যভাৰ গ্ৰহণ কৰা সাধাৰণ সম্পাদক সকল একগোট হৈ পুৰণি দিনক সোঁৱৰি গভীৰ নষ্টালজিত বুৰ গ’ল। উল্লেখযোগ্য যে যোৱা ১১ ডিচেম্বৰত ত্যাগবীৰ হেম বৰুৱা মহাবিদ্যালয়ৰ ছাত্ৰ একতা সভাৰ উদ্যোগত মহাবিদ্যালয়ৰ প্ৰাক্তন সাধাৰণ সম্পাদক সকলৰ এখনি ব্যতিক্ৰমী সন্মিলন অনুষ্ঠিত হৈ যায়৷মহাবিদ্যালয়খনৰ শিক্ষা বিভাগৰ মুৰব্বী অধ্যাপক তথা ড: দীনেশ চন্দ্ৰ দাসৰ সভাপতিত্বত মহাবিদ্যালয়ৰ সন্মিলন কক্ষত অনুষ্ঠিত এই সভাখনত ১৯৬৭-৬৮ চনৰ সাধাৰণ সম্পাদক জগত শইকীয়াই বিগত সময়বোৰত পৰলোকপ্রাপ্তি ঘটা মহাবিদ্যালয়খনৰ প্ৰাক্তন সাধাৰণ সম্পাদক সকলক উদ্দেশ্য কৰি স্মৃতিতৰ্পণ কাৰ্যসূচীৰ জৰিয়তে সভাৰ শুভ আৰম্ভণি কৰে। উচ্চতৰ মাধ্যমিক ২ য় বৰ্ষৰ ছাত্ৰী অকুণ্ঠিতা গাৰ্গৰ এটা বৰগীতেৰে আৰম্ভ হোৱা সভাখনৰ উদ্দেশ্য ব্যাখ্যা কৰে বৰ্তমানৰ ছাত্ৰ একতা সভাৰ সাংস্কৃতিক সম্পাদক ৰাজেশ হেমৰমে। সাধাৰণ সম্পাদক মানসজ্যোতি শৰ্মাই আদৰণি ভাষণ দিয়া বিশেষ সভাখনত মহাবিদ্যালয়খনৰ অধ্যক্ষ ড° অজিত হাজৰিকাই উপস্থিত সমূহ প্ৰাক্তন সাধাৰণ সম্পাদকলৈ শ্ৰদ্ধা জনাই মহাবিদ্যালয়ৰ উন্নয়নৰ দিশত তেখেতসকলৰ দিহা-পৰামৰ্শৰ আহ্বান জনায়। মহাবিদ্যালয়খনৰ ছাত্ৰ বিতোপন বৰাৰ সুমধুৰ বাঁহী বাদনেৰে সকলোকে আপ্লুত কৰা সভাখনত জগত শইকীয়া, তুলসী বৰা, আনন্দ ভূঞা, অশ্বিনী কুমাৰ ডেকা, জ্যোতি ভট্টকে আদি কৰি প্ৰাক্তন সাধাৰণ সম্পাদকসকলে মহাবিদ্যালয়খনত সাধাৰণ সম্পাদক হিচাপে কাৰ্যনিৰ্বাহ কৰা অতীতৰ অভিজ্ঞতাবোৰ পুনৰস্মৰণ কৰি আৰু মহাবিদ্যালয়ৰ উত্তৰোত্তৰ উন্নয়ন কামনা কৰে । সভাত মহাবিদ্যালয়খনৰ শিক্ষকসকলৰ হৈ ড° খঞ্জন কুমাৰ দাসে এটি চমু ভাষণ প্ৰদান কৰে। সভাত মহাবিদ্যালয়ৰ জন্ম (১৯৬৩-৬৪) চনৰ পৰা বিগত বৰ্ষ (২০১৯) লৈকে ছাত্ৰ একতা একতা সভাৰ সাধাৰণ সম্পাদক হিচাপে কাৰ্যগ্ৰহণ কৰা সম্পাদক সকলৰ এখনি নামফলক উন্মোচন কৰে ১৯৭১-৭২ বৰ্ষৰ সাধাৰণ সম্পাদক তুলসী বৰাই । সভাখনত বিগত সময়বোৰত ছাত্ৰ একতা সভাৰ কাৰ্যভাৰ গ্ৰহণ কৰা সম্পাদ সকলৰ লিখনি সন্নিৱিষ্ট এটি সংকলন প্ৰকাশ কৰাৰ সিদ্ধান্ত গ্ৰহণ কৰে ।
বি পি এফৰে মিত্ৰতা ভংগ বিজেপিৰ; বিজেপিৰ নতুন মিত্ৰ দল ইউপিপিএল : ভাৰতীয় জনতা পাৰ্টিৰ ৰাষ্ট্ৰীয় সাধাৰণ সম্পাদক তথা সাংসদ দিলিপ শইকীয়া মন্তব্য
নলবাৰী, ১৪ ডিচেম্বৰ : নলবাৰী চহৰৰ সমীপৱৰ্তী জাপাৰকুছিত আজি নলবাৰী উন্নয়ন প্ৰাধিকৰণৰ অধীনত চহৰাঞ্চলত প্ৰধানমন্ত্ৰী আৱাস যোজনাৰ শুভাৰম্ভণী অনুষ্ঠানৰ আয়োজন কৰা হয় । নলবাৰী উন্নয়ন প্ৰাধিকৰণৰ অধীনত নলবাৰী চহৰৰ সীমামূৰীয়া গাওঁ সমূহ সামৰি ৰূপায়ণ কৰিবলগা এই অভিলাষী আচনিখনৰ শুভাৰম্ভ কৰে ভাৰতীয় জনতা পাৰ্টিৰ ৰাষ্ট্ৰীয় সাধাৰণ সম্পাদক তথা সাংসদ দিলীপ শইকীয়াই । গাওঁখনৰ তিনিটি দৰিদ্ৰ পৰিয়ালৰ ঘৰত প্ৰধানমন্ত্ৰী আৱাস যোজনাৰ গৃহৰ শিলান্যাস কৰে বিজেপি নেতা গৰাকীয়ে । শিলান্যাস কৰি ৰাষ্ট্ৰীয় সাধাৰণ সম্পাদক গৰাকীয়ে ইউপিপিএলৰে হোৱা মিত্ৰতা সন্দৰ্ভত কয় যে আগন্তুক ২০২১ ৰ বিধানসভা নিৰ্বাচনত বিপিএফৰে বিজেপিৰ মিত্ৰতা নাথাকে । নিৰ্বাচনৰ সময়লৈকে মিত্ৰতা অব্যাহত থাকিব বুলি মন্তব্য কৰি কেন্দ্ৰীয় নেতৃত্বই বিচাৰিলে আকৌ মিত্ৰতা হ’ব পাৰে বুলি কয় লগতে ইউপিপিএল বিজেপিৰ নতুন মিত্ৰ দল বুলিও সাংসদ গৰাকীয়ে ব্যক্ত কৰে । যিহেতু বিপিএফ পুৰণা মিত্ৰ দল সেইবাবে বিধানসভা নিৰ্বাচনলৈ বি পি এফ দলক ৰাষ্ট্ৰীয় সাধাৰণ সম্পাদক গৰাকীয়ে বিজেপিৰে মিত্ৰতা ভালদৰে চলাই নিবলৈ আহ্বান জনায় । উল্লেখ্য যে নলবাৰী উন্নয়ন প্ৰাধিকৰণৰ অধীনত নলবাৰী চহৰৰ সমীপৱৰ্তী ২২ খন গাওঁ সামৰি ৰূপায়ণ কৰা হ’ব প্ৰধানমন্ত্ৰী আৱাস যোজনা(চহৰাঞ্চল)আচনি । ইতিমধ্যে আচনিখনৰ অধীনত ৭৩৮ টা দৰিদ্ৰ পৰিয়ালৰ নামত প্ৰধানমন্ত্ৰী আৱাস যোজনাৰ গৃহ আৱন্টন কৰিছে নলবাৰী উন্নয়ন প্ৰাধিকৰণ কৰ্তৃপক্ষই । আজিৰ এই অনুষ্ঠানত নলবাৰী সমষ্টিৰ বিধায়ক অশোক শৰ্মা,নলবাৰী উন্নয়ন প্ৰাধিকৰণৰ অধ্যক্ষ বনদ্বীপ ডেকা, ভাৰতীয় জনতা পাৰ্টিৰ বিষয়ববীয়া প্ৰমুখ্যে বহু কেইজন বিশিষ্ট ব্যক্তি উপস্থিত থাকে ।
ডবকাৰ চাংমাজি বজাৰত ভয়ংকৰ অগ্নিকাণ্ডৰ ফলত পাঁচখনকৈ ব্যাৱসায়ীক প্ৰতিষ্ঠান ভস্মিভূত
ডবকা, ১৪ ডিচেম্বৰ : হোজাই জিলাৰ ডবকা আৰক্ষী থানাৰ অন্তৰ্গত চাংমাজি বজাৰত যোৱা নিশা ভয়ংকৰ অগ্নিকাণ্ডৰ ঘটনা সংঘটিত হোৱাত আতংকিত হৈ পৰে ৰাইজে । অগ্নিকাণ্ডৰ ফলত কেইবা লক্ষ্যাধিক টকাৰ সা-সম্পত্তি ভস্মিভূত হোৱাৰ লগতে জুইত জাঁহ যায় প্রায় পাঁচখনকৈ ব্যৱসায়িক প্ৰতিষ্ঠান। অগ্নিনিৰ্বাপক বাহীনিক খবৰ দিয়াৰ পাছতো পলমকৈ উপস্থিত হোৱাত ব্যাৱসায়ীক প্ৰতিষ্ঠান কেইখন ভস্মিভূত হোৱাৰ অভিযোগ স্থানীয় ৰাইজৰ ।বহু পলমকৈ অগ্নিনির্বাপক বাহিনীৰ দলে স্থানীয় ৰাইজৰ সহযোগত জুই নিৰ্বাপিত কৰিবলৈ সক্ষম হয় ।অগ্নিকাণ্ডৰ কাৰণ বাতৰি লিখা পৰ্যন্ত জানিব পৰা হোৱা নাই। অগ্নিকাণ্ডত ক্ষতিগ্ৰস্ত হোৱাৰ পিছত বিধায়কৰ সপোন দেখা ৰাজনৈতিক নেতা ক্ৰমে ৰেজাউল কৰিম চৌধুৰী, ইনামুল কৰিম চৌধুৰী (ৰাজা) দিলোৱাৰা বেগম চৌধুৰী আৰু ৰেহান উদ্দিনে দলে বলে গৈ পৰিস্থিতিৰ বুজ লোৱা পৰিলক্ষিত হয়। আজি বিয়লিৰ ভাগতো যমুনামুখ সমষ্টিৰ প্ৰাক্তন বিধায়ক আলহাজ চিৰাজ উদ্দিন আজমলে ঘটনা স্থলীত পৰিদৰ্শন কৰে বুলি জানিব পৰা গৈছে। ঘটনা সংক্ৰান্তত ডবকা আৰক্ষীয়ে আৰাম্ভ কৰিছে তদন্ত।
পাহি-পৰী প্ৰকাশৰ গ্ৰন্থ উন্মোচনী সভা
উজনি মাজুলী, ১৪ ডিচেম্বৰঃ মাজুলীৰ ‘পাহি-পৰী প্ৰকাশন গোষ্ঠীৰ দ্বাৰা দেওবাৰে সাতখনকৈ গ্ৰন্থ উন্মোচন কৰা হয় | ফুলনি উচ্চ মাধ্যমিক বিদ্যালয়ত অনুষ্ঠিত হোৱা এই উন্মোচনী সভাখনিৰ বিশিষ্ট শিক্ষাবিদ, সাহিত্যক ডিম্বেশ্বৰ ভূঞাই সঞ্চালনা কৰে | সভাখনি বন্তি প্ৰজ্বলনেৰে শুভাৰম্ভ কৰে ফুলনি উচ্চ মাধ্যমিক বিদ্যালয়ৰ প্ৰধান শিক্ষক দ্বিজেন শইকীয়াই | নিমন্ত্ৰণিত বিশিষ্ট ব্যক্তিসকলক আদৰণি বৰণ কৰি আসনত উপবিষ্ট কৰাই প্ৰকাশনৰ কাৰ্যবাহী প্ৰকাশক কৃষ্ণা মেধিয়ে | ক্ণ্ঠশিল্পী পুৱালী শইকীয়াৰ পৰিবেশিত এটি সু-মধুৰ বৰগীতেৰে শুভ উদ্বোধন কৰা সভাখনিৰ আদৰণি ভাষণ আগবঢ়াই প্ৰকাশনটিৰ স্বত্বাধিকাৰী, কবি জয়ন্ত হাজৰিকাই কয় যে সৃষ্টিশীল লোকসকলক বিশেষকৈ মাজুলীৰ উদ্যোগী লেখক-লেখিকাৰ সুবিধা হোৱাকৈ মানবিশিষ্ট ছপাকৰ্মৰ দ্বাৰা উপকৃত কৰাৰ মানসেৰে এই প্ৰকাশনৰ পৰা গ্ৰন্থ প্ৰকাশৰ সেৱা আগবঢ়াই অহা হৈছে | গ্ৰন্থ প্ৰকাশৰ বেলিকা ইয়াৰ ভিতৰুৱা কাৰিকৰী ছপাকাৰ্যত আপোচবিহীনভাৱে সেৱা আৰু উচিত মূল্যৰ মানবিশিষ্ট মুদ্ৰণৰ ব্যৱস্থা কৰি একোখন গ্ৰন্থ দীৰ্ঘ আয়ুস প্ৰদান কৰাও অন্যতম লক্ষ্য |’ মাজুলীত একেলগে সাতখন গ্ৰন্থ উন্মোচনৰ দিহা কৰা এয়া প্ৰথমবাৰৰ বাবে হৈছে | কবি-সংগঠক -সাহিত্যিক জয়ন্ত হাজৰিকাৰ চাৰিখন গ্ৰন্থ একেলগে উন্মোচন কৰি ইয়ো এক সুখৰ সংবাদ হ’ল- যে এজন লেখকৰ চাৰিখনকৈ গ্ৰন্থ একেলগে প্ৰকাশ বা উন্মোচন কৰাও প্ৰথমবাৰৰ বাবে হৈছে | জয়ন্ত হাজৰিকাৰ মুঠ চাৰিখন গ্ৰন্থৰ উন্মোচক সকল আছিল ক্ৰমে বিশিষ্ট সাংবাদিক-শিক্ষাবিদ বিপিন শইকীয়া, বিশিষ্ট সাহিত্যিক-কবি তথা মাজুলী মহাবিদ্যালয়ৰ অধ্যক্ষ ডঃ দেৱজিত শইকীয়া, বিশিষ্ট সাহিত্যিক-কবি, গড়মূৰ পীতাম্বৰ কনিষ্ঠ মহাবিদ্যালয়ৰ প্ৰাক্তন অধ্যক্ষ গুণমণি নাথ, বিশিষ্ট কবি গড়মূৰ পীতাম্বৰদেৱ উচ্চ মাধ্যমিক বিদ্যালয়ৰ প্ৰাক্তন প্ৰধান শিক্ষয়িত্ৰী ৰেণুমালা দত্ত | একেদৰে কবি-শিক্ষয়িত্ৰী জুনু তামুলীৰ দুখন গ্ৰন্থ উন্মোচন কৰে ক্ৰমে অসমৰ বিশিষ্ট কবি ঢকুৱাখনাৰ ৰাজীৱ তামুলী আৰু শিক্ষয়িত্ৰী-নেত্ৰী অনিমা শইকীয়াই | বিশিষ্ট নাট্যকাৰ -সংগীত সাধক তথা মাজুলী জিলা সাহিত্য সভাৰ সভাপতি ৰঞ্জিত কুমাৰ ভূঞাই লাহৰী মেধি বিহুগীতৰ সংকলন গ্ৰন্থ এখনি উন্মোচন কৰে | উন্মোচন হোৱা গ্ৰন্থ কেইখনি ক্ৰমে জয়ন্ত হাজৰিকাৰ ওপঙা মাটি ( The Floating Land), মহাৰথী সময়, ত্ৰিভাষিক বৰ্ণমালা আৰু ত্ৰিভাষিক সংখ্যা পৰিচয় | জুনু তামুলী জীৱন এষণা আৰু আইৰ মুখৰ ৰসাল বাণী ( সাধুপুথি) আৰু লাহৰী মেধি লাহৰী বিহুগীত | বিশ্ব সাহিত্যৰ আওতাৰে আমাৰ অসমীয়া সাহিত্য-সম্ভাৰ অতি চহকী হোৱাৰ বিশ্লেষণ দাঙি ধৰি পৃথিৱীৰ বিভিন্ন ভাষাত প্ৰকাশিত গ্ৰন্থসমূহৰ অনুবাদ বা মৌলিক ভাষান্তৰ হোৱাৰ সপক্ষে বক্তব্য ৰাখে বিশিষ্ট শিক্ষাবিদ তথা শ্ৰী শ্ৰী চামগুৰি সত্ৰ ৰাৱনাপাৰ আদৰ্শ উচ্চতৰ মাধ্যমিক বিদ্যালয়ৰ ইংৰাজীৰ বিষয় শিক্ষক সৰ্বানন্দ নাথে | লোকশিল্পী দিলীপ কুমাৰ বৰাই এটি লোকগীত পৰিবেশনেৰে সভাসদসকলক আমোদ প্ৰদান কৰা অনুষ্ঠানটিৰ বিশিষ্ট অতিথি ৰূপে বক্তব্য ৰাখে ক্ৰমে পূৱ মাজুলী মহাবিদ্যালয়ৰ অধ্যক্ষ ডঃ অৰূপ কুমাৰ বৰা, বিশিষ্ট সমাজ-কৰ্মী-নেতা যুগল হাজৰিকা, জ্ঞানজ্যোতি গ্ৰন্থাগাৰৰ মুখ্য পৃষ্ঠপোষক ভাস্কৰজ্যোতি বৰুৱা, কবি পাৰুল বৰা মিলি, সাংস্কৃতিক কৰ্মী ভৰত পেগু, বিশিষ্ট সমাজ-কৰ্মী ৰোহিত কলিতাই | সভাখনিত ৰঙাচাহী মহাবিদ্যালয়ৰ সহযোগী অধ্যাপিকা লখিমী বৰুৱা, সদৌ মাজুলী ছাত্ৰ সন্থাৰ সম্পাদক বিতোপন শৰ্মা, কবি ৰজনী কান্ত বৰদলৈ, প্ৰৱন্ধকাৰ ভৱানন্দ হাজৰিকা, নিবন্ধ লেখক কুশদ্বীপ হাতীমতা, শঙ্কৰচাপৰী জনজাতি উচ্চ মাধ্যমিক বিদ্যালয়ৰ প্ৰধান শিক্ষক দিগন্ত বৰুৱা, হৰেন শৰ্মা, ইন্দিৰাম নাথ, শিক্ষয়িত্ৰী কৰুণা বৰা শইকীয়া, বিষয় শিক্ষয়িত্ৰী লক্ষ্যহীৰা দত্ত, শিক্ষয়িত্ৰী-কবি কল্পনা দেৱী, কবি-প্ৰৱন্ধকাৰ মীনা নাথ, বিশিষ্ট সাহিত্যিক-কবি অমিয়া দেবী বৰঠাকুৰ, সাহিত্যিক সুৰ শইকীয়া হাজৰিকা, কৌশল্যা বৰা বায়ন, সংগঠক-কবি শোভ্ৰা পেগু দলে, বিশিষ্ট শিক্ষক যাদৱ বৰা, সংগীত পৰিচালক- গীতিকাৰ-সুৰকাৰ ৰুণমণি শইকীয়া,হৰিধন ডেকা, চন্দ্ৰমা বেজ, সাংবাদিক গৌতম শইকীয়া, পৱন শইকীয়া, ৰাজীৱ পেগু, সঞ্চিত শইকীয়া, কল্পজ্যোতি, পাপু ভট্ট, মনোজ বৰা আৰু ৰাইজিং দলে, দেৱ মেধি, সংগীত শিল্পী পিংকুমণি বৰা, বিশ্বনাথ মেধি, লোহিত নাথ, দীপালী গায়ন, ৰঞ্জু শইকীয়া, জিনা বৰা, নৱজিতা ৰাজখোৱা বৰা, অঞ্জনা (সৰুমাই) বৰা, পাৰুল দেৱী, বিজয়া ভূঞা, ৰিজু শইকীয়া, ৰাজেন হাজৰিকা, জুৰী বেজ , পুতলা ওজা, কল্পনা নাথ, পুতুল বৈৰাগী প্ৰমুখ্যে বিশিষ্ট ব্যক্তিসকল উপস্থিত আছিল |
বিলাসীপাৰাত ট্ৰেক্টৰ দুৰ্ঘটনাত নিহত চালক, এগৰাকী আহত
বিলাসীপাৰা বেলতলীত ট্ৰেক্টৰ দুৰ্ঘটনাত ট্ৰেক্টৰ চালক নিহত,আন এগৰাকী গুৰুত্ব ভাৱে আহত ।
উল্লেখ্য যে ট্ৰেক্টৰ খনত মাটি ভৰ্তি আছিল। মাটি ভৰ্তি থকা ট্ৰেক্কৰ খন চলাই থকা অৱস্থাতেই বাগৰী পৰাৰ ফলত এনে এক ভয়ংকৰ দুৰ্ঘটনা সংঘটিত হয়। চিকিৎসাৰ বাবে দুয়ো গৰাকী ব্যক্তিক বিলাসীপাৰা সহকাৰী চিকিৎসালয়ত ভৰ্তি কৰা হয় । ট্ৰেক্টৰ চালক ওমৰ ফাৰুক ব্য়স (৩৮) নামৰ ব্যক্তি গৰাকীয়ে মৃত্যু বুলি সাৱটি লয় । আৰু গুৰুতৰ ভাৱে আহত হোৱা জয়নুল হক নামৰ ব্যক্তি জন । আহত হোৱা ব্যক্তি গৰাকীক উন্নত মানৰ চিকিৎসাৰ বাবে ধুবুৰী অসামৰিক চিকিৎসালয়ত প্ৰেৰণ কৰা হয়।
সাংস্কৃতিক সংগ্ৰামৰ মহীৰোহ, বিহু সুৰক্ষা সমিতিৰ অন্যতম প্ৰতিস্থাপক জয়কান্ত গন্ধীয়াৰ মৃত্যুত ধেমাজি জিলা বিহু সুৰক্ষা সমিতিৰ শোক প্ৰকাশ
আমাৰ অসম বৰদলনিৰ প্ৰতিবেদক,১৪ ডিচেম্বৰ: বিহু সুৰক্ষা সমিতি অসমৰ মুখ্য উপদেষ্টা তথা অসমীয়া ভাষা-সাহিত্য আৰু লোকসংস্কৃতিৰ গৱেষক,বিহু বিশেষজ্ঞ জয়কান্ত গন্ধীয়াৰ বিয়োগত বিহু সুৰক্ষা সমিতি ,ধেমাজি জিলা সমিতিয়ে গভীৰ শোক প্ৰকাশ কৰে | এক শোক বাৰ্তাত জিলা সমিতিৰ সভাপতি বুদ্ধেশ্বৰ কোঁৱৰ আৰু সম্পাদক শৈল্য বুঢ়াগোহাঁয়ে কয় যে জয়কান্ত গন্ধীয়াৰ মৃত্যুৱে অসমৰ লোক সংস্কৃতিৰ পথাৰখনৰ অপূৰণীয় ক্ষতি হ’ল | অসমৰ বৰ্ণাঢ্য জাতি জনগোষ্ঠীৰ বৰ্ণময় সাংস্কৃতিক ঐতিহ্যক নজহা-নপমাকৈ জীয়াই ৰক্ষাৰ সাংস্কৃতিক সংগ্ৰামত গন্ধীয়াই ওৰেটো জীৱন ব্ৰতী হৈ আহিছিল।অসমীয়াৰ স্বাভিমান জাতীয় উৎসৱ বিহুক অতি বেছি আধুনিকীকৰণ আৰু অতি বাণিজ্যিকীকৰণৰ পৰা মুক্ত কৰি বিহু শুদ্ধ আৰু পৰম্পৰা ৰূপটোহে যাতে উপস্থাপন কৰা হয় তাৰ বাবে নিৰলস প্ৰচেষ্টা হাতত লৈ বিহু সুৰক্ষা সমিতি অসমক জন্ম দিছিল | এই অনুস্থানৰ সভাপতিৰ দৰে গুৰু দায়িত্ব গ্ৰহণ কৰি সমগ্ৰ অসমতে এক সাংস্কৃতিক সংগ্ৰামৰ জোৱাৰ আনিবলৈ সক্ষম হৈছিল |মৃত্যুৰ আগমুহূৰ্তলৈকে বিহু সুৰক্ষা সমিতি অসম ৰ মুখ্য উপদেষ্টা হিচাপে দায়িত্ব বহন কৰি জাতীয় দায়বদ্ধতাৰ চানেকি দি গ’ল | বিহু সুৰক্ষা সমিতি অসমেএই গৰাকী মনিষীক সমিতিৰ সৰ্ব্বোচ্চ সন্মান লোকশ্ৰী সন্মানেৰে বিভূষিত কৰিছিল | গন্ধীয়াৰ অবৰ্তমানত বিহু সুৰক্ষা সমিতি অসম আজি অভিভাৱকহীন হ’ল বুলি উল্লেখ কৰে বিভিন্ন জনে | তেখেতৰ পবিত্ৰ আত্মাৰ সদগতিৰ বাবে আজি ধেমাজি জিলা বিহু সুৰক্ষা সমিতিয়ে শোক প্ৰকাশ কৰি শোক সন্তপ্ত পৰিয়াললৈ সমবেদনা জ্ঞাপন কৰিছে।
কমল কুমাৰ মেধিৰ কংগ্ৰেছ ত্যাগ
কংগ্ৰেছ দলৰ পৰা পদত্যাগ কমল কুমাৰ মেধিৰ । অসম কংগ্ৰেছৰ মুখপাত্ৰ, আৰটিআই বিভাগৰ অধ্যক্ষ আৰু সাধাৰণ সদস্য পদৰ পৰাও পদত্যাগ । অতি শীঘ্ৰে বিকল্প ৰাজনৈতিক দলত যোগদান কৰিব নেতাগৰাকীয়ে । পাটাছাৰকুছি সমষ্টিৰ পৰা সাম্ভাব্য প্ৰাৰ্থী আছিল কমল কুমাৰ মেধি ।
অসম কেবিনেটে চৰকাৰী সাহায্যপ্ৰাপ্ত মাদ্ৰাছা, সংস্কৃত টোল বন্ধ কৰাৰ প্ৰস্তাৱত অনুমোদন জনাইছে
দেওবাৰে (১৩ ডিচেম্বৰ) মুখ্যমন্ত্ৰী সৰ্বানন্দ সোনোৱালে সভাপতিত্ব কৰা অসম কেবিনেটে ৰাজ্যৰ সকলো চৰকাৰী মাদ্ৰাচা আৰু সংস্কৃত টোল (বিদ্যালয়) বন্ধ কৰাৰ প্ৰস্তাৱত অনুমোদন জনাইছে ।
সংসদীয় পৰিক্ৰমা বিভাগৰ মন্ত্ৰী চন্দ্ৰ মোহন পাতোৱাৰীয়ে কয় যে এই সম্পৰ্কত আগন্তুক বিধানসভাৰ শীতকালীন অধিৱেশনত বিজেপি নেতৃত্বাধীন অসম চৰকাৰে এখন বিল দাখিল কৰিব।
“মাদ্ৰাচা আৰু সংস্কৃত ট’লৰ সৈতে সম্পৰ্কিত মজুত থকা আইনসমূহ বাতিল কৰা হ’ব। বিধানসভাৰ পৰৱৰ্তী অধিৱেশনত এখন বিল প্ৰৱৰ্তন কৰা হ’ব,” অসম চৰকাৰৰ মুখপাত্ৰ পাটোৱাৰীয়ে কয়।
অসম বিধান সভাৰ শীতকালীন অধিবেশন ২৮ ডিচেম্বৰৰ পৰা আৰম্ভ হ’ব।
অক্টোবৰত অসমৰ শিক্ষা আৰু বিত্ত মন্ত্ৰী হিমন্ত বিশ্ব শৰ্মাই ঘোষণা কৰিছিল যে ৰাজ্য চৰকাৰে পৰিচালনা কৰা সকলো মাদ্ৰাছা আৰু সংস্কৃত টোল (বিদ্যালয়) বন্ধ কৰাৰ সিদ্ধান্ত লৈছে কিয়নো অসম চৰকাৰে ধৰ্মীয় শাস্ত্ৰ শিকাবলৈ ৰাজহুৱা পুঁজি ব্যৱহাৰ কৰা সম্ভৱ নহয়।
“আমাৰ চৰকাৰৰ নীতি আমি আগতে ৰাজ্য বিধানসভাত ঘোষণা কৰিছিলোঁ। চৰকাৰৰ পুঁজিৰ সৈতে কোনো ধাৰ্মিক শিক্ষা থাকিব নালাগে। ব্যক্তিগতভাৱে চলোৱা মাদ্ৰাচা আৰু সংস্কৃত টলৰ বিষয়ে আমাৰ একো ক’ব লগা নাই,” মন্ত্ৰী শৰ্মা ।
ইতিমধ্যে, এআইইউডিএফ প্ৰধান বদৰুদ্দিন আজমালে ৰাজ্য চৰকাৰৰ এই সিদ্ধান্ত সম্পূৰ্কত ক’য় যে, “যদি ৰাজ্য চৰকাৰে চৰকাৰী মাদ্ৰাছাবন্ধ কৰাৰ সিদ্ধান্ত লয়, তেন্তে এআইইউডিএফ দল ২০২১ চনৰ বিধানসভা নিৰ্বাচনত ক্ষমতালৈ অহাৰ পিছত এই শিক্ষানুষ্ঠান সমূহ পুনৰ খোলাৰ বাবে পদক্ষেপ ল’ব ।
বহু প্ৰতীক্ষাৰ অন্তত আজিৰ পৰা উপলব্ধ হ’ব কৰ’ণা ভেকচিন
বিশ্বজুৰি ত্ৰাসৰ সৃষ্টি কৰা কৰ’ণা মহামাৰীৰ প্ৰতিষেধকৰ বাবে অপেক্ষা কৰি আছিল বিশ্ববাসীয়ে। সকলো অপেক্ষাৰ অন্তত ব্ৰিটেন আৰু কানাডাৰ পাছতে এইবাৰ আমেৰিকা যুক্তৰাষ্ট্ৰত কৰ’ণাৰ প্ৰতিষেধক ফাইজাৰ ব্যৱহাৰৰ বাবে অনুমতি প্ৰদান কৰা হৈছে । আজিৰে পৰা আমেৰিকাৰ হাস্পতাল আৰু জৰুৰীকালীন সেৱাসমূহত উপলব্ধ হ’ব মহামাৰী কৰ’ণাৰ ভেকচিন । প্ৰথম সপ্তাহত আমেৰিকাৰ প্ৰতিখন ৰাজ্যলৈ ৩০ লাখ ড’জ প্ৰতিষেধক বিতৰন কৰা হ’ব।
ৰাজনাথ সিঙক সাক্ষাৎ কংগনা ৰানাৱটৰ, কিয় আশীৰ্বাদ বিচাৰিলে কংগনাই
জনপ্ৰিয় অভিনেত্ৰী কংগনা ৰানাৱটে প্ৰতিৰক্ষা মন্ত্ৰী ৰাজনাথ সিঙৰ সৈতে হোৱা সাক্ষাৎৰ বিষয়ে টুইটাৰযোগে জনাই । তাৰকা গৰাকীয়ে দেওবাৰে প্ৰতিৰক্ষা মন্ত্ৰী ৰাজনাথ সিঙক সাক্ষাৎ কৰে আৰু তেওঁৰ আগন্তক ছবি ‘তেজাছ’ৰ বাবে আশীৰ্বাদ বিচাৰে ।
তেওঁৰ বহু প্ৰত্যাশিত ‘থলাইভি’ৰ বিষয়ে ঘোষণা কৰাৰ এটা দিন পিছতে ৰানাৱটে তেওঁৰ পৰৱৰ্তী প্ৰকল্পৰ বাবে শ্বুটিং কৰিবলৈ সাজু হৈছে।
ৰানাৱটে তেওঁৰ পৰৱৰ্তী প্ৰকল্প ‘তেজাছ’ত ভাৰতীয় বায়ুসেনাৰ পাইলটৰ ভূমিকা ৰূপায়ন কৰিব। 2016 চনত যুদ্ধ ভূমিকাত মহিলাসকলক অন্তৰ্ভুক্ত কৰা দেশৰ প্ৰথম সশস্ত্ৰ বাহিনী আছিল ভাৰতীয় বায়ুসেনা । চিনেমাখন এই ঐতিহাসিক ঘটনাৰ পৰা অনুপ্ৰেৰণা লাভ কৰিছে । ছবিখনৰ প্ৰথম ৰূপ টো ফেব্ৰুৱাৰীত মুক্তি দিয়া হৈছিল য’ত কংগনাই ভাৰতীয় বায়ু সেনাৰ ইউনিফৰ্ম পৰিধান কৰি থকা দেখা পোৱা গৈছিল।