ডিৰাক সীমান্ত, ৩০ নৱেম্বৰ: অসম ফুটবল সন্থাৰ স্বীকৃতি প্ৰাপ্ত ফিল’বাৰী ক্ৰীড়া সন্থাৰ উদ্যোগত ফিল’বাৰী হাইস্কুল খেলপথাৰত অনুষ্ঠিত হৈ থকা আমন্ত্ৰণমূলক ২২ সংখ্যক “ফিল’কাপ ২০২০” ফুটবল প্ৰতিযোগীতাৰ আজি প্ৰথমখন কোৱাৰ্টাৰ ফাইনেল খেল অনুষ্ঠিত হয় টেঙাখাট এফ. চি. বনাম দিয়ামুলী এফ. চি. ৰ মাজত অনুষ্ঠিত হয় । তিব্ৰ উত্তেজনাপূৰ্ণ প্ৰথমখন কোৱাৰ্টাৰ ফাইনেলত টেঙাখাট এফ চি দলে দিয়ামলী এফ. চি. দলক ১-০ গলৰ ব্যৱধানত পৰাজিত কৰি ছেমি ফাইনেলত প্ৰৱেশ কৰে। টেঙাখাট এফ চি দলৰ হৈ ৫৬ মিনিটত বাবাই পেগুৱে গ’ল দি দলক জয়ী কৰোৱাই।অহাকাইলৈ খেল অনুষ্ঠিত হ’ব এলেভেন ট্ৰাষ্ট এফ চি মাকুম বনাম বিৰছা মুণ্ডা এফ চি ফিল’বাৰী।
সামৰণি পৰিল জামুগুৰিহাটৰ ৰাস মহোৎসৱ ; প্ৰাণভৰি উপভোগ কৰিলে শ্ৰীকৃষ্ণৰ চন্দোময় নৃত্য
জামুগুৰিহাট, ৩০নৱেম্বৰ : শৰতৰ বিতোপন নিশা চন্দ্ৰমাৰ পোহৰত উদ্ভাষিত মায়াময় পৰিৱেশত কালি উদযাপন হ’ল জামুগুৰিহাটৰ থেকেৰাগুৰিৰ ঐতিহ্যমণ্ডিত বাসুদেৱ থানৰ ৰাস মহোৎসৱ । ১৯৫৭চনৰ পৰাই ৰাস পূৰ্ণিমাৰ দিনা অবিৰত ভাৱে উদযাপন কৰি অহা এই ৰাস মহোৎসৱ এইবেলি কৰ’ণা মহামাৰীৰ পৰিপ্ৰেক্ষিতত উদযাপন সমিতিয়ে কভি’ড প্ৰটকল মানি এদনীয়া কাৰ্য্যসূচীৰে অনুষ্ঠিত কৰে। বাসুদেৱ থানৰ ৰাস মহোৎসৱ উপলক্ষ্যে পুৱাৰ পৰাই ভক্তিৰসৰে অঞ্চলটো মুখৰিত হৈ পৰাৰ লগতে এক উদুলিমুদুলি পৰিবেশো বিৰাজ কৰে মহোৎসৱ স্থালীত। ১৫নং ৰাষ্ট্ৰীয় ঘাইপথৰ কাষৰ থেকেৰাগুৰিৰ আম, জামৰে পৰিবেষ্টিত পৰিবেশত নিশা চন্দ্ৰমাৰ পোহৰ আৰু ৰং বিৰংৰ লাইটৰ সমাহাৰে সৃষ্টি কৰা মায়াবী পৰিৱেশত শ্ৰীকৃষ্ণৰ চন্দোময় নৃত্য, গোপীৰ প্ৰাণচঞ্চলা নাচে উপস্থিত সকলোৱে আকৰ্ষিত কৰে। প্ৰতিবছৰে দুদিনীয়া কাৰ্য্যসূচীৰে ৰাস মহোৎসৱ অনুষ্ঠিত হয় যদিও এইবেলি এদিনীয়া কাৰ্য্যসূচীৰে সামৰণি পৰা এই ৰাস মহোৎসৱে এইবেলি ৬৪ সংখ্যক বৰ্ষত ভৰি দিলে।
ফুলশয্যাৰ নিশা দৰাঘৰৰ পৰা ৰহস্যজনক অৱস্থাত নিৰুদ্দেশ হল ন-কইনা
নগাঁও,৩০ নবেম্বৰ : নগাঁও জিলাৰ জাজৰি আৰক্ষী চকীৰ অন্তৰ্গত হাতীচোং অঞ্চলত কালি নিশা সংঘটিত হয় এক চাঞ্চল্যকৰ ঘটনা। জানিব পৰা মতে হাতীচোং অঞ্চলৰ এহাল যুৱক যুৱতীৰ এবছৰীয়া প্ৰেমৰ অন্তত হৈছিল বিয়া। কিন্তু তাৰ পিছত ফুলশয্যাৰ নিশাই ঘটিল অঘটন। কাৰণ ফুলশয্যাৰ নিশা ৰহস্যজনক ভাবে নিৰুদ্দেশ হয় ন -কইনা। নিশা প্ৰায় ১২বজাৰ পৰা সন্ধানহীন হ’য় ন–কইনা। ইয়াৰ পাছতেই হাহাকাৰ লাগিল বিয়াঘৰত। উপায় নাপাই আৰক্ষীৰ কাষ চাপিল দৰাঘৰীয়া। অৱশেষত পুৱতি নিশা আৰক্ষীয়ে কইনাক বিচাৰি পালে মুকলি পথাৰৰ দাতিত মুমূৰ্ষু অৱস্থাত। উল্লেখযোগ্য যে যোৱা ২৭ নৱেম্বৰত হাতীচোঙ কুজীঁডাহৰ যুৱক দীপজ্যোতি বৰাৰ সৈতে বিবাহপাশত আৱদ্ধ হৈছিল একে গাঁৱৰে এগৰাকী যুৱতী। জানিব পৰা মতে, দুয়োৰে মাজত আছিল প্ৰেমৰ সম্পৰ্ক। সেই অনুসৰিয়ে অতি ধুম-ধামৰে দুয়োৰে বিবাহ সম্পন্ন হৈছিল। পিছে ৰহস্যজনকভাৱে ফুলশয্যাৰ নিশা সকলো সামাজিক পৰম্পৰা সম্পূৰ্ণ হোৱাৰ পিছত বিচাৰি নাপালে ন–কইনা গৰাকীক। ইয়াৰ পিছতে হাহাকাৰ লাগিল বিয়াঘৰত। উপায়-নাপাই দৰাঘৰৰ লোক কাষ চাপিল জাজৰি আৰক্ষীৰ। আৰক্ষীয়েও প্ৰথম অৱস্থাত বিচাৰ-খোচাৰ কৰি সন্ধান নাপালে ন–কইনাৰ। কিন্তু পুৱা জাজৰি আৰক্ষী চকীৰ ভাৰপ্ৰাপ্ত বিষয়া পুলক কুমাৰৰ নেতৃত্বত যোৱা আৰক্ষীৰ দলে পথাৰৰ দাতিত মুমূৰ্ষু অৱস্থাত উদ্ধাৰ কৰিলে ন–কইনাক। অৱশেষত আৰক্ষীয়ে তেওঁক উদ্ধাৰ কৰি ভৰ্তি কৰে নগাঁৱৰ ভোগেশ্বৰী ফুকননী অসামৰিক চিকিৎসালয়ত। বৰ্তমানেও চিকিৎসাধীন অৱস্থাতে আছে ন-কইনা গৰাকী। কিন্তু কিয় এই ঘটনা সংঘটিত হ’ল সেই বিষয়ে এতিয়াও অন্ধকাৰত সমগ্ৰ বিষয়। কাৰণ এতিয়াও সংজ্ঞাহীন অৱস্থাতে আছে ন কইনা । এতিয়া সকলোৱে কইনা গৰাক সুস্থ হোৱালৈ অপেক্ষা কৰিছে। তাৰ পিছতহে সমগ্ৰ বিষয় পোহৰলৈ আহিব । এই ঘটনাক লৈ নগাঁৱত ৰাইজৰ মাজত সৃষ্টি হৈছে ব্যাপক চাঞ্চল্যৰ।
জামুগুৰিহাটত গ্ৰন্থ উন্মোচনী সভা ; প্ৰকাশ পালে গুণ ভূঞাৰ ‘নাট সংকলন’ আৰু ৰীতা বৰুৱাৰ ‘নিৰ্বাচিত কবিতা’
জামুগুৰিহাট,৩০ নৱেম্বৰ: সমাজ, সাহিত্য সংস্কৃতিৰ উৰ্বৰ ভূমি ঐতিহ্যমণ্ডিত জামুগুৰিহাটত যোৱা ২৯ নৱেম্বৰত বাপুজী ভৱনত প্ৰথিতযশা কবি ৰীতা বৰুৱা আৰু জামুগুৰিহাটৰ বিশিষ্ট নাট্যকাৰ প্ৰয়াত গুণ ভূঞাৰ একোখনকৈ গ্ৰন্থ শুভ উন্মোচন কৰা হয়। সেই উপলক্ষে বিয়লি ২ বজাৰ পৰা অনুষ্ঠিত গ্ৰন্থ উন্মোচনী সভাখনত সভাপতিৰ আসন গ্ৰহণ কৰে আলাপৰ সভাপতি তথা জামুগুৰি উচ্চতৰ মাধ্যমিক বিদ্যালয়ৰ অৱসৰী অধ্যাপক হেমন্ত বৰাই আৰু উন্মোচকৰ আসন অলংকৃত কৰে ক্ৰমে বিশিষ্ট নাট্য শিল্পী ভবেন বৰা আৰু শিশু সাহিত্যিক, কবি দিলীপ কুমাৰ ভট্টাচার্যই। আলাপৰ সম্পাদক বিকাশ বৰাই আঁতধৰা আৰু কণ্ঠশিল্পী অকুণ্ঠিতা গাৰ্গৰ বৰগীতেৰে আৰম্ভ হোৱা সভাখনত বিশিষ্ট অতিথি হিচাপে অংশ লয় সদৌ অসম ছাত্ৰ সন্থাৰ প্ৰাক্তন সহকাৰী সম্পাদক তথা নৱ নিৰ্বাচিত উপ সভাপতি দুলদুল বৰকটকীয়ে। উল্লেখ্য যে সভাৰ প্ৰাক ক্ষণত অসমৰ প্ৰাক্তন মুখ্য মন্ত্ৰী তৰুণ গগৈৰ মৃত্যুত শোক প্ৰস্তাৱ গ্ৰহণ কৰা হয়। স্মৰণ যোগ্য যে ৬০ ৰ পৰা ৮০ দশকত জামুগুৰিহাটৰ নাট্য আন্দোলনৰ অন্যতম কাণ্ডাৰী আছিল নাট্যকাৰ গুণ ভূঞা। সেই সময়ত পৰিবহন বিভাগৰ জামুগুৰিহাটৰ বাচ আস্থানত কৰ্মৰত এইগৰাকী নাট্যকাৰে এহাতে যাত্ৰীৰ বাবে টিকট আৰু আনহাতে কলম লৈ লিখি উলিয়াইছিল ইখনৰ পিছত সিখন নাটক। সেইসময়ত অসমৰ বিভিন্ন মঞ্চত অনুষ্ঠিত একাংশ নাট প্ৰতিযোগিতাত শ্ৰেষ্ঠতাৰ বিভিন্ন সন্মান লাভ কৰিবলৈ সক্ষম হোৱা এইগৰাকী নাট্যকাৰৰে অন্য এক কৃতিত্ব পূৰ্ণাংগ নাটসমূহ। প্ৰায় একুৰিৰো অধিক একাংক নাট আৰু দহখনকৈ পূৰ্ণাংগ নাট ৰচনাৰে অসমৰ নাট্য সাহিত্য লৈ বিশেষ অৱদান আগবঢ়োৱা গুণ ভূঞাৰ পাঁচখন নাট সন্নিবিষ্ট কৰি তেখেতৰ জীয়ৰী বিশিষ্ট কবি ৰীতা বৰুৱাই সম্পাদনা কৰা “গুণ ভূঞাৰ পাঁচখন নাটকৰ সংকলন” উন্মোচন কৰে বিশিষ্ট নাট পৰিচালক, চিন্তাবিদ ভবেন বৰাই। আনহাতে একেখন সভাতে অসমৰ সাম্প্রতিক সময়ৰ এগৰাকী অগ্ৰণী কবি ৰীতা বৰুৱাৰ “নিৰ্বাচিত কবিতা” উন্মোচন কৰে বিশিষ্ট কবি আৰু সমালোচক দিলীপ কুমাৰ ভট্টাচাৰ্যই। ৰীতা বৰুৱাৰ নিৰ্বাচিত কবিতা নামৰ সংকলনটো উন্মোচন কৰি তেখেতে বক্তব্যত কয় যে, ছাত্ৰ অৱস্থাৰ পৰাই কবিতা ৰচনাত হাত দিয়া ৰীতা বৰুৱা জনপ্ৰিয় সাহিত্য আলোচনী প্ৰান্তিকৰ এগৰাকী নিয়মীয়া কবি হিচাপে অসমৰ কাব্য জগতৰ জনপ্ৰিয়। ইতিমধ্যে পাঁচখনকৈ কবিতা সংকলন প্ৰকাশ কৰা ৰীতা বৰুৱা সম্প্ৰতি ৰাজ্যখনৰ এক বহুল চৰ্চিত কবি। তেওঁৰ সাম্প্ৰতিক কবিতা ” আৰু কোনো নাৰী গান্ধাৰী ন’হবা”ই ৰাজ্যৰ বিদ্বৎ মহলত বহুলভাবে সমাদৰ লাভ কৰিছে। এক গাম্ভীর্য পূৰ্ণ পৰিবেশত অনুষ্ঠিত সভাখনত বিশিষ্ট অতিথি দুলদুল বৰকটকীৰ উপৰিও শুভেচ্ছা মূলক বক্তব্য আগবঢ়াই অভিযন্তা ৰুণ কুমাৰ বৰুৱা, বাপুজী ভৱন নাট্য সমাজৰ সভাপতি জনাৰ্দন ভূঞা, সাংবাদিক, লেখক ৰাতুল ভূঞা, প্ৰবীণ সমাজকৰ্মী নগেন কলিতা আদিয়ে। একোটাকৈ গীত পৰিবেশনেৰে সভাখন সতেজ কৰি তোলে বিশিষ্ট কণ্ঠশিল্পী খনীন্দ্ৰ ডেকা আৰু গীতা ভূঞাই। আনহাতে একেখন সভাতে জামুগুৰি উচ্চতৰ মাধ্যমিক বিদ্যালয়ৰ ১৯৭৬ বৰ্ষৰ গোটৰ তৰফৰ পৰা কবি ৰীতা বৰুৱাক বিশেষভাৱে সম্বৰ্ধনা জনোৱা হয়। সভাখন সফল কৰি তোলাত সহযোগিতা আগবঢ়োৱা সকলোলৈকে ধন্যবাদ জ্ঞাপন কৰিছে আলাপৰ উপ সভাপতি বিশিষ্ট সাংবাদিক বেদব্ৰত বৰা, যুটীয়া সম্পাদক ৰবীন ভূঞা প্ৰমুখ্যে উদ্যোক্তা সকলে।
নগাঁৱত গুৰু নানকৰ ৫৫১ সংখ্যক জন্মজয়ন্তী পালন
নগাঁও,৩০ নবেম্বৰ : শিখ সকলৰ ধৰ্মগুৰু গুৰু নানকৰ ৫৫১ সংখ্যক জন্মজয়ন্তী আজি নগাঁও ফৌজদাৰিপট্টিস্থিত গুৰুদ্বাৰতো পালন কৰা হয়। তদুপলক্ষে পুৱাৰ ভাগত ধৰ্মীয় কাম-কাজ সম্পন্ন হোৱাৰ পিচত জীৱন দৰ্শন সম্পৰ্কত এক চমু আলোচনা হয়। সাংসদ প্ৰদ্যুৎ বৰদলৈ, নগাঁৱৰ বিধায়ক ৰূপক শৰ্মা, প্ৰাক্তন বিধায়ক গিৰীন্দ্ৰ কুমাৰ বৰুৱা, প্ৰাক্তন বিধায়ক দুৰ্লভ চমুৱাকে ধৰি ভালে সংখ্যক বিশিষ্ট ব্যক্তি উপস্থিত থাকে। নগাঁও গুৰুদ্বাৰ প্ৰৱন্ধক সমিতিৰ সভাপতি দেৱেন্দ্ৰ সিং চেহমীয়ে বিশিষ্ট ব্যক্তি সকলক আদৰণি জনাই। ইপিনে বৰকলাটো অসমীয়া শিখ সকলে গুৰুনানকৰ জন্মজয়ন্তী পালন কৰে।
অসমৰ সিমান্ত টেঙাপানী গাঁৱত অৰুণাচল আৰক্ষীৰ তাণ্ডৱ : কাটি, ভাঙি নদীত উটুৱাই দিছিল জুবিন গাৰ্গ দলং
ডিৰাক সীমান্ত, ৩০ নৱেম্বৰ: অসমৰ একেবাৰে পূব প্ৰান্তৰ তিনিচুকীয়া জিলাৰ ডিৰাক অঞ্চলত পাহাৰীয়া খৰশ্ৰুতা নদী ন-দিহিঙৰ বুকুত অঞ্চলটোৰ ৰাইজৰ একক প্ৰচেষ্টাত নিৰ্মাণ কৰি উলিয়াইছিল ৪৯০ মিটাৰ দৈঘ্যৰ এখন বাঁহৰ দলং ৷ দলঙখনৰ নাম দিছিল জুবিন গাৰ্গ দলং ৷ চৰকাৰৰ বঞ্চনা আৰু অৱহেলাৰ বলি হোৱা অঞ্চলটোৰ ৰাইজে নিজৰ গাঁঠিৰ ধন খৰছ কৰি শ্ৰমদানেৰে নিৰ্মান কৰিছে উলিয়াইছে সীমান্ত টেঙাপানী গাঁও সংযোগী এই দলংখন ৷ ১৯৯২ চনত অহা এক প্ৰলয়ংকাৰী বানে সীমান্ত টেঙাপানী গাঁৱক বিচিন্ন কৰি দিছিল অসম সংস্পৰ্শ ভূখণ্ডৰ পৰা ৷ তেতিয়াৰে পৰা চামিল হৈ পৰিছিল অৰুণাচলৰ ভূখণ্ডৰ সতে ৷ কিন্তু সকলো কাম কাজ অসম সৈতে, ভোটাধিকাৰো অসমতে । সেই ফলস্বৰূপে তেওঁলোকে নাপাই অৰুণাচল চৰকাৰৰ পৰাও কোনোধৰণৰ সা-সুবিধা । ক্ৰমে অৱহেলিত হৈ পৰিল অসম চৰকাৰৰ পৰাও ৷ দিনক দিনে গাঁওখনে চৰকাৰৰ সা-সুবিধা, পঞ্চায়তি সুবিধা আদিৰ পৰা বঞ্চিত হবলৈ ধৰিলে ৷ বৰ্তমান ১০৩ টা ঘৰ থকা এই গাঁৱৰ জনসংখ্যা ৭৪৯ জন ভোটাৰৰ সংখ্যা ২৮৩ জন ৷ কিন্তু বিগত ২৯ বছৰে ইয়াৰ জনসাধাৰণে বিপদ সংকুলভাবে যাতায়ত কৰি আহিছে টুলোঙা নাৱেৰে ৷ প্ৰতি বছৰে ভৰ বাৰিষা বহুদিনৰ ধৰি গাঁওখন সংযোগ বিছিন্ন হৈ পৰে বহি: জগতৰ লগত ৷ কিন্তু কাণ সাৰ নাই চৰকাৰৰ ৷ অৱশেষত ১নং সৰুডিৰাক গাঁৱৰ এজন সচেতন যুৱক বুলবুল মাউটৰ পৰিকল্পনাত এই খৰশ্ৰুতা নদীখনৰ উপৰত ৰাইজে এখন দলং নিৰ্মানৰ সপোন দেখিলে ৷ এক সহমতত উপনিত হৈ গঁঞা ৰাইজৰ শ্ৰম আৰু দান বৰঙণিৰে নিৰ্মান কৰা সেতুখন সম্পূৰ্ণ হোৱাৰ পাছত যুৱ প্ৰজন্মৰ হাৰ্টথ্ৰ’ব গৰাকীয়ে নিজে আহি উদ্ধোধন কৰাৰ কথা আছিল যদিও মুৰকত শাৰীৰিক অসুস্থতাৰ বাবে সেইয়া হৈ নুঠিল ৷ সীমান্তৰ টেঙাপানীবাসীৰ শ্ৰম আৰু আৰ্থিক অনুদানেৰে নিৰ্মিত সেতুখন আছিল গাঁৱবাসীৰ আশাৰ সেতু। স্থানীয় ৰাইজে বাৰিষাৰ সময়ত টেঙাপানীৰ বাবে দেখা দিয়া এই সমস্যা সমাধানৰ বাবে পথ সমূহ উন্নয়নৰ লগতে বিজ্ঞানসন্মতভাৱে এখন দলং নিৰ্মান কৰিবলৈ অসম চৰকাৰক আহ্বান জনাইছে। স্মতব্য যে, লকডাউনৰ গইনা লৈ চলিত বৰ্ষৰ ১৬ এপ্ৰিল তাৰিখে অসমৰ প্ৰশাসন, গাঁওবাসীক কোনো ধৰণৰ জাননী প্ৰদান নকৰাকৈ অৰুণাচল আৰক্ষীয়ে গুণ্ডাবাহিনী লগত লৈ অসমৰ মাটিত আহি দলঙখন এটা অংশ কাটি নদীত উটুৱাই দিছিল । ৰাইজৰ হেঁচাত আৰু অসম চৰকাৰৰ হস্তক্ষেপত অৰুণাচল চৰকাৰে লকডাউন খোলাৰ পিচত সেতুখন পুনৰ নিৰ্মাণ কৰি দিয়াৰ প্ৰতিশ্ৰুতি দিছিল । কিন্তু লকডাউন খোলাৰ পিছতো আজি পৰ্যন্ত কোনো ধৰণৰ দলঙৰ কাম আৰম্ভ কৰা দেখা নগল ? এই কাৰ্যক সদৌ মৰাণ ছাত্ৰ সন্থা, কেন্দ্ৰীয় সমিতিৰ নৱ নিৰ্বাচিত সহকাৰী সাধাৰণ সম্পাদক চৌবিক মৰানে ক্ষোভ প্ৰকাশ কৰাৰ লগতে অতি শ্ৰীঘে কাৰ্যকৰী কৰিবলৈ অৰুণাচল প্ৰশাসনক দাবী জনাইছে । এই ক্ষেত্ৰত অসম প্ৰশাসনে কেনেধৰণৰ প্ৰদক্ষেপ গ্ৰহণ কৰিব সেয়া লক্ষণীয় হব । সকলোৰে আশাৰ দলঙখন হ’বনে নহয় এতিয়া এক ডাঙৰ প্ৰশ্ন ।
ঐতিহ্যমণ্ডিত কুঁঁজীডাহ যুৰীয়া নামঘৰত বৰ্ণাঢ্য ৰূপত উদযাপিত ৯৬ বছৰ গৰকা ৰাসোৎসৱ
নগাঁও, ৩০ নৱেম্বৰঃ শৰৎ কালৰ ৰাত্ৰি অতি বিতোপন / ৰাস ক্ৰীড়া কৰিতে কৃষ্ণৰ ভৈলা মন..দেওবাৰে ৰাস পূৰ্ণিমা। মহাপুৰুষ শ্ৰীমন্ত শংকৰদেৱে শ্ৰী কৃষ্ণৰ প্ৰেম তথা ভক্তি ৰসৰ ওপৰত ভিত্তি কৰি ৰচনা কৰা কেলি গোপাল অংকীয়া ভাওনা সমগ্ৰ অসমতে আজি অভিনীত হয়। গুৰুজনাৰ এই অন্যবদ্য সৃষ্টি কেলী গোপালত মথুৰাৰ গোপী সকলে বৃন্দাবনত শ্ৰীকৃষ্ণৰ সৈতে নৃত্য কৰি শ্ৰীকৃষ্ণৰ ভক্তিপূৰ্ণ প্ৰেম ৰসত বিলীন হৈ যোৱাৰ কাহিনী উল্লেখ আছে । গুৰুজনাৰ এই সৃষ্টি কেলি গোপাল নাট সম্ভবতঃ পাঁচশ বছৰ ধৰি অসমত অভিনীত হৈ আহিছে । কিন্তু সময় অতিক্ৰম কৰাৰ পিচতো সম্প্ৰতি আধুনিকতাৰ ধামখুমীয়াৰ মাজতো অসমৰ প্ৰায় সকলো স্থানতে এই নাট ভক্তি ভাবৰে মঞ্চস্থ কৰা হয়।বৃন্দাবনত শ্ৰী কৃষ্ণৰ বাঁহীৰ মাত শুনি আজিও আপ্লুত হয় গোপী সকল । গুৰুজনাৰ এই নাটকৰ আকৰ্ষণে শিশু, ডেকাৰ পৰা ধৰি বৃদ্ধলৈকে মতলীয়া কৰে। সেয়ে ২০০ বছৰ গৰকা কুজীঁডাহ যুৰীয়া নামঘৰৰ ৯৬ বছৰীয়া ঐতিহ্যমণ্ডিত ৰাস উৎসৱত দেওবাৰে দেখা গ’ল ৭০ বছৰীয়া বৃদ্ধৰ পৰা শিশুলৈকে অংশগ্ৰহণ কৰাৰ বিৰল দৃশ্য। উল্লেখযোগ্য যে কভিড প্ৰটকল মানি উদযাপন কৰা এই ৰাস উৎসৱত অংশগ্ৰহণ কৰা কেইবাগৰাকী গোপীয়ে বিগত ৭ দশক ধৰি ৰাস নৃত্য কৰি আহিছে। সত্ৰীয়া সংস্কৃতিৰ বহু কেইজন ওজা শিল্পীৰ জন্মস্থান কুজীঁডাহত দেওবাৰে ৰাস নৃত্যত প্ৰতিকী অৰ্থত কভিডৰ বিৰুদ্ধে সজাগতা সৃষ্টিৰ চেষ্টা কৰা পৰিলক্ষিত হয়। পি পি ই কীট পিন্ধি, নাৰ্চৰ বেশভূষাৰে গোপী নৃত্যত অংশগ্ৰহণ কৰি বহু কেইজনে অতিমাৰী কভিড-১৯ সংক্ৰমণ ৰোধৰ ক্ষেত্ৰত সজাগতাই যে মূল মন্ত্ৰ এই সম্পৰ্কত ৰাইজক প্ৰতীকি ভাবে বুজোৱাৰ চেষ্টা কৰে ।
চীনে ব্ৰহ্মপুত্ৰ নদীৰ ওপৰত মুখ্য বান্ধ নিৰ্মাণ কৰিব, এই নিৰ্মানে প্ৰভাৱিত কৰিব অসমক
চীনে ব্ৰহ্মপুত্ৰ নদীৰ উত্তৰ-সীমাত এক মুখ্য জলবিদ্যুৎ প্ৰকল্প নিৰ্মাণৰ পৰিকল্পনা কৰিছে। প্ৰাপ্ত তথ্য মতে, চীনে দেশে পৰিকল্পনা কৰা বান্ধটো পৰৱৰ্তী বছৰত ৰূপায়ণ কৰা হ’ব। জানিব পৰা গৈছে যে চীনা চৰকাৰে ইতিমধ্যে এই বান্ধটো নিৰ্মাণৰ বাবে এটা কোম্পানী চূড়ান্ত কৰিছে।
চীনে ৰাষ্ট্ৰপতিৰ নেতৃত্বত চীনৰ নিয়ন্ত্ৰণকাৰী কমিউনিষ্ট পাৰ্টি (চিপিচি)য়ে ইতিমধ্যে কমিউনিষ্ট জাতিৰ বাবে পাঁচ বছৰীয়া পৰিকল্পনা প্ৰস্তুত কৰি আছে, লগতে ২০৩৫ চনৰ ভিতৰত দীৰ্ঘম্যাদী লক্ষ্য প্ৰস্তুত কৰি আছে।
চীনৰ পাৱাৰ কনট্ৰাকচন কৰ্পোৰেচনৰ অধ্যক্ষ ইয়ান জিয়ং-এ কয় যে চীনে “জাংবো নদীৰ তলৰ প্ৰান্তত জলবিদ্যুৎ শোষণ ৰূপায়ণ কৰিব” (ব্ৰহ্মপুত্ৰ নদীৰ বাবে তীবংগৰ নাম)। প্ৰকল্পটোৱে জল সম্পদ আৰু ঘৰুৱা সুৰক্ষা বজাই ৰখাৰ বাবে কাম কৰিব পাৰে
“ইতিহাসত কোনো সমান্তৰাল নাই। ই চীনা জলবিদ্যুৎ উদ্যোগৰ বাবে এক ঐতিহাসিক সুযোগ হ’ব,” চীন সমাজ ফৰ হাইড্ৰপাৱাৰ ইঞ্জিনিয়াৰিঙৰ ৪০ তম বাৰ্ষিকী উদযাপনৰ বাবে আয়োজিত সন্মিলনত এই কথা কোৱা হৈছিল।
ইয়নৰ মতে, তলৰ প্ৰান্তৰ য়াৰলিউং জাংবো নদীৰ জলবিদ্যুৎ শোষণ কেৱল কোনো জলবিদ্যুৎ প্ৰকল্প নহয় কিয়নো ই পৰিৱেশ, ৰাষ্ট্ৰীয় সুৰক্ষা, জীৱন ধাৰণৰ মানদণ্ড, শক্তি আৰু আন্তৰ্জাতিক সহযোগিতাৰ ওপৰত প্ৰভাৱ পেলাইব।
ইয়ানে কৈছিল যে নতুন জলবিদ্যুৎ কেন্দ্ৰটোৱে বাৰ্ষিক ২০ বিলিয়ন য়ুৱান (তিনি বিলিয়ন ডলাৰ) উপাৰ্জন কৰিব পাৰে।
নতুন বান্ধ নিৰ্মাণৰ বাবে চীনৰ সিদ্ধান্তই ভাৰত বেইজিংৰ প্ৰবাহ নিয়ন্ত্ৰণৰ বাবে চিন্তাৰ সৃষ্টি কৰিছে। ব্ৰহ্মপুত্ৰ ৩০০০ কিলোমিটাৰৰ অধিক ভাৰত আৰু বাংলাদেশৰ মাজেৰে বৈ আছে।
ভাৰতৰ বাবেও ব্ৰহ্মপুত্ৰ নদী গুৰুত্বপূৰ্ণ কিয়নো ইয়াৰ অৱবাহিকা হৈছে অৰুনাচল প্ৰদেশ, অসম, ছিকিম, নাগালেণ্ড আৰু পশ্চিম বংগৰ বাবে এক গুৰুত্বপূৰ্ণ জলউৎস। ব্ৰহ্মপুত্ৰ উপত্যকাই কেইবাটাও জনপ্ৰিয় সম্প্ৰদায়ৰ জীৱনসমৰ্থন কৰে ।
নগাঁৱৰ চকলাঘাট-ক’ৰচোংত একেনিশাই দুঘৰত চুৰি কাণ্ড
নগাঁও ,৩০ নৱেম্বৰঃ নগাঁও জিলাৰ জাজৰি আৰক্ষী থানাৰ অন্তৰ্গত বহুকেইটা স্থানত আজি দীৰ্ঘদিন ধৰি এক ধাৰাবাহিক চুৰি কাণ্ড সংঘটিত হৈ আহিছে ৷ আজি যোৱা নিশাও তেনে এক ধাৰাবাহিক চুৰি কাণ্ড সংঘটিত হয় পূৱ- হাতীছোং চকলাঘাট চাউলখোৱা গাঁও নিৱাসী ৰঞ্জন শইকীয়াৰ বাসগৃহত ৷ উল্লেখ্য যে,যোৱা নিশা পূৱ হাতীছোং চকলাঘাট ৰাস মন্দিৰত শ্ৰীশ্ৰীকৃষ্ণৰ মহাৰাস অনুষ্ঠিত হৈছিল আৰু উক্ত মহাৰাসত শইকীয়া পৰিয়ালৰ সমূহ সদস্য উপস্থিত থকাৰ সুযোগ গ্ৰহণ কৰিয়েই এই কুখ্যাত চুৰিকাণ্ডটি সংঘটিত হয় ৷ চুৰিকাণ্ডটিত পাঁচ-ছয় জনীয়া সদস্যৰ দলে সংঘটিত কৰা বুলি নগাঁৱৰ উপ-আৰক্ষী অধীক্ষক অনিতা হাজৰিকাৰ লগতে স্থানীয় জাজৰি আৰক্ষীৰ ভাৰপ্ৰাপ্ত বিষয়াৰ লগতে এটি দল ঘটনাস্থলীত উপস্থিত হৈ বিভাগীয় ড’গ স্কুৰ্ৱাড, হাতৰ চাপ, ভৰিৰ চাপ আদি পৰ্যবেক্ষণৰ অন্তত নিশ্চিত হয় ৷ চুৰিকাণ্ডটিত ৰঞ্জন শইকীয়াৰ গৃহৰ পৰা প্ৰায় পাঁচলক্ষ্যাধীক মূল্যৰ সোণৰ আ-অলংকাৰৰ লগতে নগদ প্ৰায় পঞ্চাশ হাজাৰ টকা লুট কৰি নিয়ে বুলি জানিব পৰা গৈছে ৷ ঠিকসেইদৰে, ক’ৰচোং অঞ্চলৰ এঘৰ লোকৰ ঘৰতো একে নিশাই তেনে এক চুৰিকাণ্ড সংঘটিত হয় ৷ দুপৰীয়া দৰা ঘৰৰ লোকে কইনাক জুৰুন পিন্ধোৱাৰ পিছত সমুলি সোণৰ আ-অলংকাৰ কইনাই নিজৰ ঘৰত সযতনে ৰখাই থোৱাৰ পিছত নিশালৈ দুই-আহৈ লক্ষ্যাধীক টকাৰ সোণৰ আ-অলংকাৰ লুটপাত কৰি নিয়ে এই দুষ্ট চক্ৰই ৷ আৰক্ষীয়ে সন্দেহ প্ৰকাশ কৰা অনুসৰি এই অঞ্চল সমূহত চুৰিকাণ্ড সংঘটিত কৰা এইটো এটা সক্ৰিয় চুৰৰ গেং ৷ ইহঁতে প্ৰথম পৰ্যায়ত গৃহস্থৰ ভিতৰৰ সকলো তথ্যপাতি যুগুত কৰি লোৱাৰ পিচত কোনো এটা নিদিষ্ট দিনত গৃহস্থ ঘৰত নথকাৰ সুযোগ গ্ৰহণ কৰি চুৰিকাণ্ড সংঘটিত কৰি আহিছে ৷ ইহঁতৰ মূললক্ষ্য বিশেষকৈ সোণৰ আ-অলংকাৰ আৰু নগদ ধন ৷ সমগ্ৰ জাজৰি আৰক্ষী এলেকাধীন অঞ্চলত আজি দীৰ্ঘদিন সন্ত্ৰাস চলাই অহা এইদুষ্ট চক্ৰটো অনতি পলমে জাজৰি আৰক্ষীয়ে জালত পেলাব পাৰিব বুলি আৰক্ষীৰ এক সূত্ৰৰ পৰা জানিৱ পৰা গৈছে ৷ উল্লেখ্য যে আজি দীৰ্ঘদিন ধৰি জাজৰি আৰক্ষী থানাৰ অন্তৰ্গত ক’ৰচোং, ৰাইডঙীয়া, চকলাঘাট, মাজ-জাজৰি, জামুগুৰি, কুজিঁদাহ, জাজৰি আদি কেইবাটাও স্থানত অতি সহজতে চুৰিকাণ্ড সংঘটিত নিৰ্ৱিঘ্নে আতঁৰি যোৱা ঘটনাই সচেতন মহলক চিন্তিত কৰি তুলিছে ৷
”মই আছুৰ উপদেষ্টা হৈ থাকিম” সমুজ্জ্বল কুমাৰ ভট্টাচাৰ্যৰ ঘোষণা
অৱশেষত আজি ৩০ নৱেম্বৰ সোমবাৰে সদৌ অসম ছাত্ৰ সন্থাৰ নতুন সমিতিখনে আছুৰ মুখ্য কাৰ্যালয়ত অনুষ্ঠিত শপতগ্ৰহণ অনুষ্ঠানত শপতগ্ৰহণ কৰিলে। জল্পনা-কল্পনাৰ অন্ত পেলাই সদৌ অসম ছাত্ৰ সন্থাৰ হৈ ৩ দশক ধৰি কাৰ্যনিৰ্বাহ কৰি থকা ডঃ সমুজ্জ্বল কুমাৰ ভট্টাচাৰ্যই সংবাদমাধ্যমৰ সন্মুখত পুনৰবাৰ আছুৰ উপদেষ্টা পদত থকাৰ কথা ঘোষণা কৰিলে ।
উল্লেখযোগ্য যে, ইয়াৰ পূৰ্বে তেওঁ দুলীয়াজানৰ অধিৱেশনলৈ আছু ত্যাগ কৰাৰ বাবে যোৱা বুলি ঘোষণা কৰিছিল। পিছে তেখেতে যেতিয়া সংগঠনৰ পৰা অৱসৰ লোৱাৰ কথা কৈছিল তেতিয়াই দুলীয়াজানৰ অধিৱেশনস্থলীত সতীৰ্থসকলৰ মাজত আৱেগিক পৰিৱেশে বিৰাজ কৰিছিল।
তাৰ পিছতে সংবাদ মাধ্যমক নেতাগৰাকীয়ে জনাইছিল যে, ”প্ৰতিনিধিসকলৰ পৰা কেৱল মই এটা অনুমতি বিচাৰিলো। মোৰ বিবেকৰ লগত কথা পতাৰ প্ৰয়োজন হৈছে। গতিকে বিবেকৰ লগত কথা পাতিবলৈ অলপ সময়ৰ প্ৰয়োজন হৈছে। গতিকে বিবেকৰ লগত কথা পাতিবলৈ মোক সময়খিনি দিবলৈ সময় দিবলৈ অনুৰোধ কৰিলো। সেই অনুমতি লৈয়েই আজিৰ সভাখনত আহ্বান কৰিলো।” বৰ্তমান ‘বিবেকৰ’ সৈতে কথা পতাৰ অন্তত নেতাগৰাকী আছুত থকাটো নিশ্চিত হৈছে।
আনহাতে একে সময়তে আছুৰ গুৰু্ত্বপূৰ্ণ বিষয়বাব ত্যাগ কৰিছে পূৰ্বৰ সাধাৰণ সম্পাদক লুৰীণজ্যোতি গগৈয়ে। উল্লেখ্য যে, গগৈয়ে আছু ত্যাগ কৰাৰ সময়ত নতুনক নেতৃত্ব দিয়াত গুৰুত্ব আৰোপ কৰা বুলি সদৰি কৰিছিল। তেনে স্থলত ভট্টাচাৰ্যৰ দৰে নেতাগৰাকীয়ে আছু ত্যাগ কৰিবলৈ আগ্ৰহ প্ৰকাশ নকৰা বিষয়টো বিভিন্ন লোকৰ মাজত চৰ্চিত হৈছে।