নগাঁও, ১৮ নবেম্বৰ : ” বিজেপি চৰকাৰৰ দিনতেই অধিক দুৰ্নীতি হৈছে ৷ সকলো বস্তুটোৰে মূল্যবৃদ্ধি হৈছে ৷ আনকি বিজেপি চৰকাৰৰ দিনতেই চিণ্ডিকেট আৰু মাফিয়াৰাজ অধিক চলিছে ৷ এইবোৰত বিজেপিৰ বহু নেতা জড়িত ৷ সেয়ে এইবোৰৰ বিৰুদ্ধে বিজেপি নেতাই মাত নামাতে ৷ কিন্তু কংগ্ৰেছে মাত মাতি আহিছে এইবোৰৰ বিৰুদ্ধে ৷” এই মন্তব্য কলিয়াবৰ লোকসভাৰ সাংসদ গৌৰব গগৈৰ ৷ নগাঁও জিলাৰ বটদ্ৰৱা সমষ্টিৰ অন্তৰ্গত ৰাইদঙীয়াত বুধবাৰে দলংঘাট আৰু বটদ্ৰৱা ব্ল’ক মহিলা কংগ্ৰেছৰ উদ্যোগত আয়োজিত বিশাল কৰ্মীসভাত অংশগ্ৰহন কৰি সাংসদগৰাকীয়ে লগতে কয় যে–বৰ্তমান অসমত অন্যায়ৰ বিৰুদ্ধে, অসাধু চক্ৰৰ বিৰুদ্ধে মাত মতাৰ বাবেই সাংবাদিকক হত্যা কৰা হৈছে ৷ কিন্তু এনে অন্যায়-দুৰ্নীতি নিৰ্বিঘ্নে চলি থকাৰ পিছতো মুখ্যমন্ত্ৰী সৰ্বানন্দ সোনোৱালে কেৱল গাদী ৰক্ষাৰ স্বাৰ্থতহে ব্যস্ত হৈ আছে ৷ ক্ষমতাশালী মন্ত্ৰী ড° হিমন্ত বিশ্ব শৰ্মাৰ নাম উচ্চাৰণ নকৰাকৈ সাংসদ গৌৰব গগৈয়ে মন্ত্ৰীগৰাকীক কটাক্ষ কৰি কয় যে–এই গৰাকী মন্ত্ৰীয়ে আছু, কংগ্ৰেছৰ দৰে সৰ্বানন্দ সোনোৱালকো বিশ্বাসঘাতকতা কৰিব ৷ অসম প্ৰদেশ কংগ্ৰেছৰ সম্পাদিকা শিৱামনি বৰাই উদ্দেশ্য ব্যাখ্যা আগবঢ়োৱা সভাখনিত সাংসদ গৰাকীয়ে এতিয়া নতুন চিন্তাৰ ৰাজনীতিৰ দৰকাৰ বুলি উল্লেখ কৰি কয় যে– শান্তি আৰু সম্প্ৰীতি থাকিলেহে উন্নয়ণ সম্ভৱ ৷ এই উন্নয়ণৰ বাবে প্ৰয়োজনীয় শান্তি আৰু সম্প্ৰীতি আনি দিব পৰা দল হৈছে কংগ্ৰেছ ৷ দলংঘাট আৰু বটদ্ৰৱা ব্ল’ক মহিলা কংগ্ৰেছৰ বিভিন্ন মণ্ডলৰ পৰা অহা সহস্ৰাধিক মহিলা কৰ্মীৰ অংশগ্ৰহনেৰে অনুষ্ঠিত হোৱা সভাখনত প্ৰাক্তন মন্ত্ৰীদ্বয় গৌতম বৰা আৰু ৰকিবুল হুছেইনেও ভাষণ প্ৰদান কৰে ৷ নগাঁও জিলা মহিলা কংগ্ৰেছৰ সভাপতি ৰূপালী শইকীয়াৰ পৌৰহিত্যত অনুষ্ঠিত হোৱা সভাখনিত অসম প্ৰদেশ কংগ্ৰেছৰ সাধাৰণ সম্পাদিকা ৰেহেনা নেৱাজ, অসম প্ৰদেশ যুৱ কংগ্ৰেছৰ সাধাৰণ সম্পাদক অভিজিৎ বৰা, দলংঘাট ব্ল’ক কংগ্ৰেছৰ সভাপতি মঞ্জুল বৰদলৈ, বটদ্ৰৱা ব্ল’ক কংগ্ৰেছৰ সভাপতি নুৰুল আমিন, শিক্ষাবিদ ৰাণা প্ৰকাশ বৰাকে প্ৰমুখ্য কৰি বহুকেইজন বিশিষ্ট ব্যক্তিৰ  উপস্থিত থাকে ৷ 

নলবাৰী, ১৮ নৱেম্বৰ : ইমানুৱেল মুছাহাৰী, বিশ্বজিৎ দৈমাৰীয়ে নহয় বি পি এফৰ আৰু বহু বিধায়ক-নেতাই বিজেপিত যোগদানৰ বাবে কৰিছে যোগাযোগ । এই মন্তব্য বিজেপিৰ ৰাজ্যিক সভাপতি ৰঞ্জিত দাসৰ । আজি নলবাৰী জিলাৰ নাট্যমন্দিৰত অনুষ্ঠিত ভাৰতীয় জনতা পাৰ্টিৰ সাংগঠনিক সভাত উপস্থিত হৈ ৰঞ্জিত দাসে বি পি এফৰে মিত্ৰতা সন্দৰ্ভত মত প্ৰকাশ কৰি কয় যে প্ৰথমতে মিত্ৰতা ভংগ কৰিছে বি পি এফে । পঞ্চায়ত নিৰ্বাচনত আমাৰ লগত আলোচনা নকৰাকৈ অকলশৰীয়াকৈ অৱৰ্তীণ হৈছিল নিৰ্বাচনত । তদুপৰি নলবাৰী জিলাৰ অন্তৰ্গত নলবাৰী, ধৰ্মপুৰ আৰু বৰক্ষেত্ৰী বিধান সভা সমষ্টিয়ে বিজেপিৰ জয়ৰ ইংগিত বহন কৰা বুলি কৈ এই আটাইকেইটা সমষ্টিত বিজেপিৰ প্ৰাৰ্থী জয়ী হোৱা মানে ৰাজ্যত বিজেপিয়ে চৰকাৰ গঠন কৰাটো নিশ্চিত বুলিও সভাপতি গৰাকীয়ে সংবাদ মাধ্যমৰ আগত মন্তব্য  প্ৰকাশ কৰে । আজিৰ এই অনুষ্ঠানত মন্ত্ৰী চন্দ্ৰ মোহন পাটোৱাৰী, ভাৰতীয় জনতা পাৰ্টিৰ ৰাষ্ট্ৰীয় সাধাৰণ সম্পাদক তথা সাংসদ দিলীপ শইকীয়া, ৰাজ্যিক বিজেপিৰ উপ সভাপতি জয়ন্ত মল্ল বৰুৱা, বিধায়ক অশোক শৰ্মা প্ৰমুখ্যে বহু কেইজন ভাৰতীয় জনতা পাৰ্টি বিষয়ববীয়াৰ লগতে কৰ্মী সকল উপস্থিত থাকে ।

নলবাৰী ১৮ নৱেম্বৰ : নলবাৰী বালিলেচাত শ্ৰী শ্ৰী কালি দেৱালয় সন্মুখত উত্তপ্ত পৰিস্থিতি । বনবিভাগৰ গাড়ী আটক কৰিলে ৰাইজে । ঘটনা অনুসৰি বিগত বহু মাহ ধৰি বালিলেছা পথেৰে টেক্টৰ , ডাম্পাৰ আদিয়ে অবৈধ ভাৱে পাগলদিয়া নদীৰ বালি কঢ়িয়াই থকাত পৰিলক্ষিত হৈছে । বিনা চালান বিহীন ভাবে অবৈধ ভাৱে মাটি কঢ়িওৱা এই গাড়ী বিলাকৰ বাবে স্হানীয় ৰাইজে যাতায়তৰ লগতে দিনে দিনে বৃদ্ধি হোৱা ধূলি বাবে বহুত অসুবিধা সন্মুখীন হৈ আছে । বহদিন ধৰি স্থানীয় ৰাইজে নলবাৰী বনবিভাগক লিখিত ভাৱে দৰ্খাস্ত প্ৰদান কৰাৰ পিছত ও আজিলৈ কোনো ব্যৱস্থা নকৰা বুলি ৰাইজে অভিযোগ উত্থাপন কৰিছে । এনে সময়তে আজি এখন ট্ৰেক্টৰে অবৈধ ভাৱে বালি কঢ়িয়াই অনি থকাৰ সময়ত স্থানীয় বনবিভাগক খবৰ দিয়ে ।  কিন্তু বনবিভাগৰ দল এটি ঘটনাস্থলীত উপস্থিত হয় গোপন বুজা বুজিৰে ট্ৰেক্টৰে যাব দিয়া বুলি ব্যাপক অভিযোগ উত্থাপন কৰি স্থানীয় ৰাইজে বনবিভাগৰ গাড়ী খন আটক কৰে । প্ৰায় দুই ঘন্টা ধৰি ৰাইজৰ হাতত আৱদ্ধ হৈ থকাৰ পিছত বনবিভাগৰ লোকে ভৱিষ্যতে অবৈধ ভাৱে বালি কঢ়িওৱা টেক্টৰৰ ওপৰত বিহিত ব্যৱস্থা লোৱা প্ৰতিশ্ৰুতি দিয়াৰ পিছত হে স্থানীয় ৰাইজে বনবিভাগৰ গাড়ী খনক যাব দিয়ে । উল্লেখ্য যে বালিলেচাৰ সমীপৰ নামদোঙাত থকা পালগদিয়া ঘাটত বালি মাফিয়া হামিদ আলীয়ে বহুত দিন ধৰি অবৈধ ভাৱে মাটি কাটি থকা বুলি স্থানীয় ৰাইজে অভিযোগ উত্থাপন কৰে ।

টংলা,১৮ নৱেম্বৰ : বি টি চিত এতিয়া নিৰ্বাচনৰ বতাহে আকাশ বতাহ কঁপাই তুলিছে। টংলা উচ্চতৰ মাধ্যমিক বিদ্যালয় খেল পথাৰত বি টি চিৰ পাঁচটা সমষ্টিৰ ৰাইজৰ সহযোগত অনুষ্ঠিত হোৱা ইউ পি পি এলৰ পৰিৱৰ্তন জনসভাত ইউ পি পি এলৰ সভাপতি প্ৰমোদ বড়োয়ে অংশগ্ৰহণ কৰি ৰাইজৰ আগত বক্তব্যত কয় যে দুই মহৰ যুদ্ধত বিৰিণাৰ মৰণ হয় যদিও আমি বিৰিণা নহয়, সেয়েহে আমাৰ মৰণ নাই। ১৭ বছৰে দুখেৰে পাৰ কৰিলোঁ, এতিয়া ভাল দিন আহিছে । আমাৰ সমাজত সকলোৰে ভাষা সংস্কৃতি, ৰীতি-নীতি জীয়াই থাকিব লাগিব । বি টি আৰত  এতিয়া পৰিৱৰ্তনৰ ঢৌ উঠিছে। আমি প্ৰতিশোধ লব লাগিব, প্ৰতিশোধ মানে হিংসা নহয় , প্ৰতিশোধ মানে গণতান্ত্ৰিক আন্দোলন । বি টি আৰ চুক্তিত সকলো আছে কিন্তু এটাই নাই সেইটো হল দুৰ্নীতি বুলি কয়। লগতে হাগ্ৰামাই সকলো জনগোষ্ঠীক থগিছে , দুখীয়াৰ টকা খাইছে বুলি অভিযোগ কৰে তেওঁ। লগতে কয় যে বি টি আৰত আমি শান্তি সম্প্ৰতি গঢ়ি  বি টি আৰ চুক্তিৰ নীতিৰ আধাৰত সকলোয়ে সমান সুবিধা লাভ কৰিব, মাটি বাৰীৰ অধিকাৰ লাভ কৰিব। সভাত তেওঁ ব্যক্ত কৰি কয় যে ইউ পি পি এল চৰকাৰ আহিলে হাতী আৰু মানুহ সংঘাত ৰোধ কৰাৰ ব্যৱস্থা কৰা হব। লগতে কয় যে বি টি আৰ অঞ্চলত প্ৰত্যিক জাতি জনগোষ্ঠীৰ ভাষা সংস্কৃতি,ৰীতি নীতি জীয়াই ৰখা দায়িত্ব ইউ পি পি এল চৰকাৰ থাকিব । দুৰ্নীতি কৰা লোকক বিচাৰি আনি আইনগত ভাবে শাস্তি দিয়া হব, ইয়াত বড়ো অনাবড়ো বিভেদ নচলিব, গণতন্ত্ৰ দেশত সকলো সমান, আমি সমাজৰ কাৰণে ৰাজনীতি কৰিছোঁ দুৰ্নীতিৰ কাৰণে নহয়, ইউ পি পি এলে কৰ্ম সংস্কৃতিক আকোঁৱালী লৈ আহিছে, ভাৰত তথা অসম চৰকাৰে আমাক নিৰাপত্তা দিব লাগিব, আমাৰ চৰকাৰ আহিলে বি টি আৰত সকলো জাতি জনগোষ্ঠীৰ উন্নয়ন কাৰণে উন্নয়ন পৰিসদ গঠন কৰি দিয়া হব লগতে সাহিত্যৰ ক্ষেত্ৰত অনুদান আগবঢ়োৱা হব বুলি ঘোষণা কৰে । উক্ত পৰিৱৰ্তন জনসভাত পাঁচটা সমষ্টি ক্ৰমে খালিংদুৱাৰ, মুদৈবাৰী, খৈৰাবাৰী, ভেৰগাওঁ আৰু নোনাই ছেফাফাং সমষ্টিৰ প্ৰায় ২০ হাজাৰতকৈ অধিক ৰাইজে আহি জনসমুদ্ৰত পৰিণত কৰা উক্ত অনুষ্ঠান খনৰ আদৰণি ভাষণৰ প্ৰসংগত ইউ পি পি এলৰ প্ৰতিষ্ঠাপক সভাপতি ইউ জি ব্ৰহ্মই কয় যে এতিয়া ঘৰে ঘৰে ইউ পি পি এল হৈ গল । আমাৰ মঞ্চত জাতি জনগোষ্ঠীৰ নৃত্য প্ৰদৰ্শন হয় । বি টি আৰ অঞ্চলত এক নতুন পৰিৱৰ্তন হব গৈ আছে । অস্ত্ৰ আন্দোলন সমাধান কৰি শান্তি, আদৰ্শ, প্ৰগতিশীল সমাজ প্ৰতিষ্ঠা কৰিবলৈ গৈ আছে ইউ পি পি এল চৰকাৰে । বি টি আৰত আৰু কেতিয়াও  আন্দোলনৰ সৃষ্টি নহয় । অসমত অসমীয়া ভাষা জীয়াই থাকিব লাগিব । মই অসমীয়া ভাষাত সাহিত্য সৃষ্টি কৰিব চেষ্টা কৰি আছো। আমাক নিৰাপত্তা লাগে বুলি ব্যক্ত কৰি কয়।

জামুগুৰিহাট,১৮ নৱেম্বৰ : গুৰুজনাৰ সৃষ্টিৰাজীক প্ৰচাৰ প্ৰসাৰৰ লগতে সেই সৃষ্টিৰাজীসমুহক চৰ্চাৰ দিশত সত্ৰসমুহৰ ভূমিকা অপৰিসীম ৷ যাৰবাবে চৰকাৰেও সত্ৰসমুহৰ উন্নয়ণ তথা সৃষ্টিৰাজীসমুহ চৰ্চাৰ বাবে অনুদান আগবঢ়াই আহিছে ৷ কিন্তু চৰকাৰী এনে সাহাৰ্যৰপৰা যেন বঞ্চিত হৈ আহিছে জামুগুৰিহাটৰ প্ৰথমখন সত্ৰ হিচাপে খ্যাত শ্ৰীশ্ৰী দৌকাচাপৰি সত্ৰ ৷ ১৭১৭ চনতে স্থাপিত জামুগুৰিহাটৰ দৌকাচাপৰি সত্ৰ খনে বিগত তিনিশ বছৰে গুৰুজনাৰ সৃষ্টিৰাজীসমুহ চৰ্চাৰ দিশত বিশেষ ভূমিকা গ্ৰহণ কৰি আহিছে যদিও বাৰে বাৰে সত্ৰখন চৰকাৰী অনুদানৰপৰা বঞ্চিত হৈ অহাৰ অভিযোগ উল্থাপন হৈছে ৷ অঞ্চলটোৰ কেবাখনো সত্ৰৰ তুলনাত প্ৰথমখন সত্ৰ হিচাপে স্থাপন হোৱা শ্ৰীশ্ৰী দৌকাচাপৰি সত্ৰখনৰ চৌদিশৰ পৰিৱেশটোৱেই প্ৰকট কৰে যে কিমান কষ্ট ত্যাগ কৰি সত্ৰখন জীয়াই ৰাখিছে বৰ্তমান সত্ৰাধিকাৰৰ দায়িত্বত থকা ব্যক্তিগৰাকীয়ে ৷ বৃহৎ সত্ৰখনত চৌপাশে বাঁহৰ চোঁচ কাটি বেৰাৰে ঢাকি চৰ্চা অব্যাহত ৰাখিছে বৰ্তমানৰ সত্ৰাধিকাৰৰ দায়িত্বত থকা সত্ৰাধিকাৰ ৰাজেন গোস্বামীয়ে ৷ অন্যান্য সত্ৰই সত্ৰৰ উন্নয়নৰ বাবে চৰকাৰী সাহাৰ্য লাভ কৰাৰ বিপৰীতে জামুগুৰিহাটৰ প্ৰথমখন সত্ৰ চৰকাৰী অনুদানসমুহৰ পৰা বছৰ বছৰ ধৰি বঞ্চিত হ’ব লগীয়া হোৱাত আক্ষেপো প্ৰকাশ কৰিছে সত্ৰাধিকাৰগৰাকীয়ে ৷ পূৰ্বে প্ৰয়াত শৰৎ গোস্বামীৰ দায়িত্বত পৰিচালিত দৌকাচাপৰি সত্ৰখন গোস্বামীৰ মৃত্যুৰ পাছত চাৰিবছৰ ধৰি পৰিচালনা কৰা ভাৰপ্ৰাপ্ত সত্ৰাধিকাৰ ৰাজেন গোস্বামীয়ে উচুপি উচুপি কয় যে প্ৰতিবাৰেই সত্ৰখনৰ উন্নয়নৰ বাবে চৰকাৰে আগবঢ়োৱা অনুদানৰ তালিকাত নাম সন্মিবিষ্ট হোৱা বুলি খৱৰ পাঁও যদিও শেষত কি কাৰণত বঞ্চিত হঁও আমিবোৰ সেই বিষয় লৈ অজ্ঞ ৷ অৱশ্যে ২০০৯ বৰ্ষত জিলা পৰিষদৰ ফালৰপৰা ৩৫ হাজাৰ আৰু ২০১৬ চনত বিধায়ক পুঁজিৰপৰা ২৫ হাজাৰ টকাৰ এক অনুদান লাভ কৰিছে বুলিও জানিব দি সেয়া বৰ্তমান সময়ত অন্যান্য সত্ৰসমুহে লাভ কৰা চৰকাৰী অনুদানসমুহৰ তুলনাত  তেনেই নগন্য বুলিও ব্যক্ত কৰে ভাৰপ্ৰাপ্ত সত্ৰাধিকাৰ ৰাজেন গোস্বামীয়ে ৷ এতিয়া প্ৰশ্ন হয় চৰকাৰে সত্ৰসমুহৰ সৰ্বাঙ্গিন উন্নয়নৰ  বাবে আগবঢ়োৱা অনুদান লাভৰ দিশতো দেৰি কৰে নেকি কোনো লোকে৷ জামুগুৰিহাটৰ প্ৰথমখন সত্ৰ এই শ্ৰীশ্ৰী দৌকাচাপৰি সত্ৰখনে সত্ৰসমুহৰ উন্নয়নৰ বাবে চৰকাৰে আগবঢ়োৱা অনুদান লাভ কৰিবলৈ সক্ষম হ’বনে ? উল্লেখ্য যে ১৬৬২ চনতে নগাঁৱৰপৰা নাঁওৰে আহি এই সত্ৰই প্ৰথমে ভৰলীপাৰত স্থিতি লৈছিল যদিও ভৰলীৰ পানী, গৰাখহনীয়া আদিৰ বাবেই ১৭১৭ চনত দৌকাচাপৰীত এইখন সত্ৰই স্থিতি লৈছিলহি ৷ প্ৰণিধানযোগ্য যে শ্ৰীশ্ৰী দৌকাচাপৰি সত্ৰৰ ভাগৱতভাগ বৰ্তমান শ্ৰীমন্ত শংকৰদেৱ কলাক্ষেত্ৰত সংৰক্ষণ কৰি ৰখাৰ লগতে তেজপুৰ সংগ্ৰহালয়ত এইখন সত্ৰৰে পালকি আৰু সত্ৰাধিকাৰ ঘনশ্যাম দেও, চক্ৰপানী দেও আদিয়ে ব্যৱহাৰ কৰা দোলাখনৰ কিছু অংশ সংৰক্ষণ কৰি ৰখা হৈছে ৷

নগাঁও, ১৭ নৱেম্বৰ : নগাঁও চহৰৰ ঐতিহ্যমণ্ডিত শিক্ষানুষ্ঠান নগাঁও চৰকাৰী উচ্চতৰ মাধ্যমিক বালক বিদ্যালয়ৰ আজি ১৫৫ সংখ্যক প্ৰতিষ্ঠা দিৱস উদযাপন কৰা হয়।আজি পুৱা বিদ্যালয় পৰিচালনা আৰু উন্নয়ন সমিতিৰ সভাপতি গংগাবল্লভ গোস্বামীয়ে পতাকা উত্তোলন কৰি প্ৰতিষ্ঠা দিৱসৰ কাৰ্যসূচীৰ শুভাৰম্ভ কৰে।ইয়াৰ পিছতেই স্মৃতি তৰ্পন কৰে বিদ্যালয় খনৰ প্ৰাক্তন অধ্যক্ষ বিমল বৰাই।কোভিড প্ৰটকল মানি দিনৰ ১১ বজাত অনুষ্ঠিত মুকলি সভাত মুখ্য অতিথি হিচাপে ‌অংশগ্ৰহণ কৰি বিদ্যালয় খনৰ প্ৰাক্তন ছাত্ৰ তথা নগাঁও সদৰ সমষ্টিৰ বিধায়ক ৰূপক শৰ্মাই নগাঁও চৰকাৰী উচ্চতৰ মাধ্যমিক বিদ্যালয়ৰ শৈক্ষিক গৰিমাৰ বিষয়ে উল্লেখ কৰি কয় যে বৰ্তমান পৰিবৰ্তিত সময়ত শিক্ষাৰ্থী আৰু শিক্ষক উভয়ে আধুনিক প্ৰযুক্তিক শিক্ষাৰ এটি অবিচ্ছেদ্য অংগ কৰি ললেও পূৰ্বৰ গুৰু ছাত্ৰৰ সমন্ধ পাহৰি যোৱাটো উচিত নহব।আনহাতে এসময়ত অধ্যয়ন কৰা বিদ্যালয়খনৰ ১৫৫ সংখ্যক প্ৰতিষ্ঠা দিৱসৰ কাৰ্যসূচীত অংশগ্ৰহণ কৰি নিজকে ধন্য আৰু গৰ্বিত অনুভৱ কৰা বুলি বিধায়ক শৰ্মাই মন্তব্য কৰে।মুকলি সভাত পুবেৰুন বৰা স্মৃতি ন্যাস ,কেপ্তেইন থানেশ্বৰ শৰ্মা স্মৃতি ন্যাস ,পূৰ্ণকান্ত ৰাজখোৱা-ঘুনুচা ৰাজখোৱা স্মৃতি ন্যাস,দীপ্তি গোস্বামী স্মৃতি ন্যাস,শ‌ইকীয়া স্মৃতি ন্যাসৰ বঁটা সমূহ বিদ্যালয় খনৰ দহগৰাকী মেধাৱী আৰু দৰিদ্ৰ ছাত্ৰক প্ৰদান কৰা হয়।মুকলি সভাত বিদ্যালয় খনৰ প্ৰাক্তন ছাত্ৰ তথা বিশিষ্ট সাহিত্যিক ভদ্ৰেশ্বৰ ৰাজখোৱা, শিক্ষাবিদ সদা বৰা,অধিবক্তা কৃপাসিন্ধু অধিকাৰীয়ে অংশগ্ৰহণ কৰি ভাষণ প্ৰদান কৰে।সভাৰ আৰম্ভণিতে আদৰণি ভাষণ প্ৰদান কৰে বিদ্যালয় খনৰ অধ্যক্ষা দীপিকা লস্কৰে।সন্ধিয়া বিদ্যালয় খনৰ চৌহদত ১৫৫ গছি বন্তি প্ৰজ্বলনৰে প্ৰতিষ্ঠা দিৱসৰ কাৰ্যসূচী সামৰণি পৰে।বন্তি প্ৰজ্বলন কাৰ্যসূচীৰ শুভাৰম্ভ কৰে নগাঁও জিলা কৰ্মচাৰী পৰিষদৰ সভাপতি মিন্টু শৰ্মাই।