দৈনন্দিন বাৰ্তাৰ সেৱা, খাৰুপেটিয়া, ৮ নৱেম্বৰঃ দৰং জিলাৰ খাৰুপেটিয়া আৰক্ষীৰ বৃহৎ সফলতা। ১০ লাখ টকাৰ জাল নোট সহ এজন যুৱকক গ্ৰেপ্তাৰ কৰিবলৈ সক্ষম হৈছে খাৰুপেটিয়া আৰক্ষীয়ে। এক গোপন সূত্ৰৰ পম খেদি খাৰুপেটিয়া আৰক্ষী থানাৰ ভাৰপ্ৰাপ্ত বিষয়া অভিজিৎ কাকতিৰ নেতৃত্বত যোৱা আৰক্ষীৰ দলে শ্যামটিলাৰ পৰা জব্দ কৰে জালনোট খিনি। শ্যামটিলাৰ আব্বাছ আলীয়ে বিক্ৰী কৰিবলৈ অনা দহ লাখ টকাৰ জাল নোট  জব্দ কৰে আৰক্ষীয়ে।

জালনোট সৰবৰাহ কাৰী যুৱকজন ধুলা আৰক্ষী থানাৰ অন্তৰ্গত মৌছিঠা গলন্ধী হাবি গাঁৱৰ বুলি জানিব পৰা গৈছে। দুষ্ট চক্ৰটোৱে অঞ্চলখনত পূৰ্বৰ পৰাই চলাই আহিছিল জাল নোট সৰবৰাহকাৰী কাৰ্য্য। ধৃত আব্বাছ আলীক খাৰুপেটিয়া আৰক্ষী থানাত 484/20 নং কেছ ৰুজু কৰি ভাৰতীয় দণ্ডাধীশ আইনৰ 489A/ 489D ধাৰা অনুযায়ী মঙ্গলদৈ জেল হাজতলৈ প্ৰেৰণ কৰে।ইউছুফ আলী নামৰ যুৱকজনক পকেট মাৰাৰ অভিযোগত আটক কৰি জেল হাজোতলৈ প্ৰেৰণ কৰে খাৰুপেটিয়া আৰক্ষীয়ে।

দৈনন্দিন বাৰ্তাৰ সেৱা, কাকজান, ৮ নৱেম্বৰঃ সদৌ চুতীয়া জাতি সন্মিলন অসমৰ উদ্যোগত  যোৰহাট জিলা  আৰু তিতাবৰ  চুতীয়া জাতি সন্মিলনৰ যৌথ উদ্যোগত টীয়কৰ কাকজান কৃষ্টি কেন্দ্ৰ প্ৰাংগণত আজি  ৰাজ্যিক ৰাজনৈতিক জাগৰণ অভিৱৰ্তন অনুষ্ঠিত কৰা হয়। চুতীয়া জাতি সন্মিলনৰ জেষ্ঠ কৰ্মকতা গোপী শইকীয়াই পুৱা বন্তি প্ৰজ্বলনেৰে  শুভাৰম্ভ কৰা অনুষ্ঠানটিত পতাকা উত্তোলন কৰে সদৌ চুতীয়া জাতি সন্মিলন অসমৰ  সভাপতি অমিয় কুমাৰ বৰা আৰু যোৰহাট জিলা চুতীয়া জাতি সন্মিলনৰ সভাপতি দিলীপ বৰুৱাই। কাকজান কৃষ্টি কেন্দ্ৰত অনুষ্ঠিত এই সভাখনিত  এটি বৰগীতেৰে সভাখনি আৰম্ভ কৰা হয়। লগতে সদৌ চুতীয়া জাতি সন্মিলন অসমৰ সভাপতি অমিয় কুমাৰ বৰাৰ সভাপতিত্বত এখনি মুকলি সভা অনুষ্ঠিত কৰা হয়।

সাম্প্ৰতিক সময়ত চুতীয়া জাতিক ৰাজনৈতিক দিশত সৱলভাৱে প্ৰতিষ্ঠা কৰিবৰ বাবে এক জাগৰণ সৃষ্টি কৰাৰ প্ৰয়াসেৰে  এই জাগৰণ অভিৱৰ্তন সভা অনুষ্ঠিত কৰে। ইফালে বিৰাম হীনভাৱে ভাতৃ ভগ্নী সংগঠন চুতীয়া যুৱ সন্মিলন অসম, সদৌ চুতীয়া জাতি মহিলা সন্মিলন, সদৌ অসম চুতীয়া ছাত্ৰ সন্থাৰ লগত সহযোগিতাৰে ন্যায্য প্ৰাপ্তিৰ বাবে ধাৰাৱাহিক সংগ্ৰাম চলাই আহিছে যদিও ৰাজনৈতিক পাক চক্ৰত পৰি নিদিষ্ট সামাজিক দিশত পিছ পৰি আছে বুলি চুতীয়া জাতি সন্মিলনৰ কেইবাগৰাকী  ব্যক্তিয়ে মত ব্যক্ত  কৰে।

অভিবৰ্তন সভা খনিত  বিশিষ্ট অতিথি হিচাপে উপস্থিত থাকে  খিলঞ্জীয়া ঐক্য মঞ্চৰ অনুপ চুতীয়াই তেওঁ ভাষণ প্ৰসংগত অসমৰ অন্যতম ভূমিপুত্ৰ চুতীয়া  সকলৰ লগতে ছয়জনজাতিকৰণৰ  ক্ষেত্ৰত ছয়জনগোষ্ঠী ঐক্য বদ্ধ হলে চৰকাৰেও  জনজাতিকৰন কৰিবলৈ বাধ্য হব বুলি সভাত  মন্তব্য আগৱঢ়াই। লগতে চুতীয়া জাতি সন্মিলনৰ বিষয়ববীয়াই সংবাদ মাধ্যমৰে হোৱা  নিৰ্বাচনৰ প্ৰসংগত গৰিষ্ট সংখ্যক ভোটাৰ থকা অসমৰ কেইবাটাও সমষ্টিত চুতীয়া জনগোষ্টীক প্ৰাৰ্থীত্ব কিয় নিদিয়ে বুলি সংবাদ মাধ্যমৰ জৰিয়তে ক্ষোভ প্ৰকাশ কৰাৰ লগতে চুতীয়া জনগোষ্ঠীৰ প্ৰধান অঞ্চল সমূহত আগন্তুক  বিধান সভা নিৰ্বাচনত চুতীয়া জনজাতী লোকক প্ৰাৰ্থীত্ব দিবলৈ আহ্বান জনায়। 

দৈনন্দিন বাৰ্তাৰ সেৱা, ইটাখোলা, ৮ নৱেম্বৰঃ অসম চৰকাৰৰ ভৈয়াম জনজাতি আৰু পিছপৰা শ্ৰেণীৰ কল্যান বিভাগে গোৰ্খা উন্নয়ন পৰিষদৰ কাৰ্যবাহী সদস্যৰূপে নদুৱাৰ অঞ্চলৰ এগৰাকী কৰ্মউদ্যামী ব্যক্তি তথা সমাজ কৰ্মি মতি কুমাৰ নেৱাৰক নিযুক্তি প্ৰদান কৰা খৱৰে নদুৱাৰ অঞ্চলৰ গোৰ্খা ৰাইজৰ লগতে চতিয়া সমষ্টিবাসী উৎফুল্লিত হৈ পৰা দেখা গৈছে। একালৰ শিক্ষক তথা নদুৱাৰ শিক্ষাখণ্ডৰ শিক্ষা সমন্বয়ক নেৱাৰক কিছুদিনৰ পূৰ্বে গোৰ্খা উন্নয়ন পৰিষদৰ কাৰ্যবাহী সদস্য হিচাপে মনোনীত কৰিছিল।

যোৱা ৭ নৱেম্বৰত গুৱাহাটীত আয়োজিত শপত গ্ৰহণ অনুষ্ঠানত নেৱাৰে সাৰ্বভৌমত্ব আৰু অখনণ্ডতা ৰক্ষাৰ শপত গ্ৰহণ কৰে। আনহাতে শপত গ্ৰহণ কৰি নেৱাৰে গোৰ্খা ৰাইজৰ কল্যাণৰ হকে কাম কৰি যোৱাত নিজকে সদায় সষ্টম কৰি ৰাখি কাম কৰি যোৱাৰ প্ৰতিশ্ৰুতি প্ৰদান কৰে। কাৰ্যবাহী সদস্য পদত অধিষ্ঠিত হোৱাৰ পিছতে চতিয়া সমষ্টিৰ বিভিন্ন অনুষ্ঠান-প্ৰতিষ্ঠানে মতি কুমাৰ নেৱাৰক অভিনন্দন জনাইছে।

দৈনন্দিন বাৰ্তাৰ সেৱা, চাংসাৰি, ৮ নৱেম্বৰঃ আজি বিদ্যাভাৰতী পূৰ্বোত্তৰ ক্ষেত্ৰৰ সাধাৰণ সভাখন গুৱাহাটী  চন্দ্ৰপুৰ হাজংবৰীস্হিত বহুমুখী প্ৰকল্পত অনুষ্ঠিত হয়। বন্তি প্ৰজ্বলনৰে সভাৰ কাৰ্যসূচী শুভাৰম্ভ কৰে গুৱাহাটী বিশ্ববিদ্যালয়ৰ উপাচাৰ্য ডঃ প্ৰতাপজ্যোতি সন্দিকৈয়ে। কাৰ্যসূচীৰ আৰম্ভণিতে শংকৰদেৱ বিদ্যা নিকেতন  হাজংবৰীৰ আচাৰ্য আচাৰ্যা, বিদ্যাৰ্থীসকলে বন্দনা  পৰিবেশন কৰি আধ্যাত্মিক পৰিবেশ সৃষ্টি কৰে। শ্ৰদ্ধাঞ্জলি অনুষ্ঠানত বিগত বৰ্ষত দেশ তথা সমাজৰ কল্যাণৰ হকে জীৱন উচৰ্গা কৰা ব্যক্তিসকলৰ স্মৰণ কৰি এক মিনিট মৌন প্ৰাৰ্থনা জনোৱা হয়। ইয়াৰ পাছতে মঞ্চত উপবিষ্ট বিশিষ্ট ব্যক্তিসকলৰ পৰিচয় দাঙি ধৰে বিদ্যা ভাৰতী পূৰ্বোত্তৰ ক্ষেত্ৰৰ সহ সাংগঠনিক সম্পাদক ড০ পৱন তিৱাৰীয়ে।  বিদ্যা ভাৰতীৰ অখিল ভাৰতীয় মন্ত্ৰী আৰু পূৰ্ব্বোত্তৰ ক্ষেত্ৰৰ সাংগঠনিক সম্পাদক ব্ৰহ্মাজী  ৰাওৱে আদৰণি ভাষণ প্ৰদান কৰে।

ৰাওৱে তেওঁৰ ভাষণত  বিদ্যা ভাৰতীৰ পৰিচয় দাঙি ধৰাৰ লগতে প্ৰয়াত শিক্ষাবিদ শান্তনু ৰঘুনাথ শেন্দে সোৱৰনী বঁটা ২০২০ বৰ্ষৰ বাবে  কাঞ্চিকামকোটি বিদ্যা ভাৰতী বিদ্যালয় শ্বিলঙৰ শেখৰৰঞ্জন দাস আৰু একল বিদ্যালয় অভিযান ভাগ  কোকৰাঝাৰ মধু নাৰ্জাৰীক প্ৰদান কৰা হয়। বঁটাত দুয়োকে প্ৰশস্তিপত্ৰ সহ নগদ ২৫০০০ টকাকৈ প্ৰদান কৰা হয়। ইয়াৰ পিছতেই বিদ্যা ভাৰতী পূৰ্বোত্তৰ ক্ষেত্ৰৰ আনুষ্ঠানিক ৱেবছাইট মুকলি কৰা হয়। ড০ জয়কান্ত শৰ্মাৰ সঞ্চালনা অনুষ্ঠিত সভাত  বিশিষ্ট অতিথি সুনিল দেশপাণ্ডে, ড০ পি জে সন্দিকৈয়ে বক্তব্য ৰাখে। আজি সভাত মূখ্য অতিথিৰ বক্তব্য ৰাখি  অখিল ভাৰতীয় সহ সাংগঠনিক সম্পাদক ড০ গোবিন্দ চন্দ্ৰ মহন্তই নতুন শিক্ষা আৰু উত্তৰ পূৰ্বাঞ্চলত বিদ্যাভাৰতীৰ অগ্ৰগতি ওপৰত বিশ্লেষণাত্মক মন্তব্য ৰাখে। নতুন শিক্ষা নীতি ভাৰত কেন্দ্ৰীক শিক্ষা নীতি। এই ভাৰত কেন্দ্ৰীক মূল্যবোধ শিক্ষাৰ জৰিয়তে বিদ্যা ভাৰতীৰ পূৰ্বোত্তৰ চলি থকা সকলো বিদ্যালয়তে চলাবলৈ আজিৰ সভাতেই প্ৰস্তাৱ গৃহীত কৰাৰ বাবে মত পোষণ কৰে।

ইয়াৰ লগতে পূৰ্বোত্তৰৰ  সকলো চৰকাৰৰ লগত আলোচনাৰ মাজৰে এই শিক্ষা নীতি সফল ভাৱে আগবঢ়াই নিবলৈ সক্ষম হব বুলি মন্তব্য কৰে। এই শিক্ষা নীতিৰ জৰিয়তে কৌশল বিকাশৰ মাধ্যমৰে দেশক আত্মনিৰ্ভৰ কৰিব পৰা  যাব। শেষত দেশক এটি সুন্দৰ শিক্ষা নীতি উপহাৰ দিয়া বাবে ভাৰত চৰকাৰক ধন্যবাদ জ্ঞাপন কৰে। বালিকা শিক্ষাৰ ওপৰত বক্তব্য ৰাখি অনিমা শৰ্মাই নাৰী শক্তিৰ উত্থানেই বিদ্যা ভাৰতীৰ অন্যতম মূল লক্ষ্য আৰু মাতৃশক্তিক স্বনিৰ্ভৰশীল কৰা বাবে কৰ্মৰত হৈ আছে বুলি উল্লেখ কৰে। ইয়াৰ লগতে পূৰ্বোত্তৰ ক্ষেত্ৰ বিদ্যা ভাৰতীৰ  বাৰ্ষিক হিচাপ নিকাচ গৃহিত কৰাৰ লগতে আন আন প্ৰস্তাৱ সমূহ আলোচনাৰ অন্তত গৃহিত কৰা হয়। সভাৰ শেষত পূৰ্বোত্তৰ ক্ষেত্ৰৰ সম্পাদক চাঞ্চীৰাম পায়েঙে শলাগৰ শৰাই আগবঢ়ায়।

দৈনন্দিন বাৰ্তাৰ সেৱা, ভূৰাগাওঁ, ৮ নৱেম্বৰঃ শুকুৰবাৰে ৰাজ্য চৰকাৰৰ প্ৰভাৱশালী মন্ত্ৰী হিমন্ত বিশ্ব শৰ্মাই ৰাজহুৱা সভা এখনত সকলোকে দিলে নিজৰ মোবাইল নম্বৰ। পিছে মামাই ফোন কৰিবলৈ নহয়, হোৱাটছ আপ কৰিবলৈহে দিছিল নিজৰ মোবাইল নম্বৰ। কিন্তু এতিয়া মোবাইল নম্বৰ দি বিপদত পৰিছে মামা মানে মন্ত্ৰী হিমন্ত বিশ্ব শৰ্মা।

শনিবাৰে এই কথা আমিনগাঁৱত ৰাজুহুৱাকৈ জনালে মন্ত্ৰী শৰ্মাই। মন্ত্ৰী গৰাকীয়ে ‘মোবাইল নম্বৰ দি এতিয়া বিপদ হৈ গ’ল। খুলিব নোৱাৰা হলো।  ২২ হাজাৰ মেচেজ আহিছে, খুলিব পৰা নাই। কি কৰিম ভাবিয়ে পোৱা নাই, আহিয়েই আছে। বিজেপিৰ প্ৰতি এয়া মৰম। ডেকা ল’ৰা ছোৱালীয়ে ভিডিঅ’ কল কৰি আছে।’

দৈনন্দিন বাৰ্তাৰ সেৱা, ভূৰাগাওঁ, ৮ নৱেম্বৰঃ পৰিৱৰ্তনৰ আশাত ৰাইজে ভোট দান কৰি ক্ষমতাৰ গাদীত বহোৱা বিজেপি নেতৃত্বাধীন চৰকাৰৰ দিনতো বাট-পথৰ জৰাজীৰ্ণ অৱস্থাই লগ এৰা নাই লাহৰীঘাট বাসীৰ।উল্লেখযোগ্য যে লাহৰীঘাট সমষ্টিৰ কুশতলি গাঁও পঞ্চায়তৰ অন্তৰ্গত তথা লাউভূৰুঙ্গা মধ্য ইংৰাজী বিদ্যালয়ৰ পৰা শান্তিপুৰ হৈ গৰাপাৰৰ জে জি কে পি গড়কাপ্তানি পথ সংযোগী তিনি কিলোমিটাৰ পথ যাতায়তৰ বাবে আজিও সুচল হৈ নুঠিল।

এজাক বৰষুণ হলেই স্কুল-কলেজৰ ছাত্র ছাত্ৰী সকলকে গাঁওবাসীয়ে অহা যোৱা কৰিব নোৱাৰা অৱস্থা হৈ পৰে। আনকি এতিয়াও পথটোৰ এটা ভগ্ন অংশত পানী আছে আৰু এই পানীৰে গৰাপাৰ, শান্তিপুৰ,লাউভূৰুঙ্গা গাঁও বাসীকে ধৰি বৃহত্তৰ অঞ্চলবাসীয়ে যাতায়ত কৰিব লগা হৈছে।ইফালে এই গুৰুত্বপূৰ্ণ পথটোৰ এটা মূৰত দুখনকৈ বিদ্যালয় আৰু আনটোৰ মূৰত এখন খেল পথাৰ আৰু দুখনকৈ বিদ্যালয় আছে যদিও চৰকাৰ তথা স্থানীয় পঞ্চায়তেও পথটো উন্নীতকৰণৰ ক্ষেত্ৰত কোনো গুৰুত্ব নিদিয়া অভিযোগ উঠিছে।

প্ৰণিধানযোগ্য যে উল্লিখিত পথটো উন্নীতকৰণৰ সন্দৰ্ভত চলিত বছৰৰ প্ৰথম পৰ্যায়তে মৰিগাঁও জিলাৰ তদানীন্তন উপায়ুক্ত ঋতুৰাজ বৰাৰ হাতত স্থানীয় মহিলা সকলে এখন আবেদন দিছিল যদিও আজিলৈকে স্থানীয় ৰাইজে কোনো সুফল নাপালে।একেদৰেই পথটো প্ৰধানমন্ত্ৰী গ্ৰাম চড়ক যোজনা আঁচনিৰ অধীনত এবছৰৰ পূৰ্বে মৰিগাঁও জিলা গড়কাপ্তানি বিভাগ(বৰ্তমান লোক নিৰ্মাণ বিভাগ)ত পথটোৰ নাম  অন্তভুক্তৰ বাবে আবেদন কৰাৰ লগতে বৰ্তমানেও লোক নিৰ্মাণ বিভাগৰ মৰিগাঁও সংমণ্ডলত তাঁত বাটি কাঢ়ি থকা হৈছে যদিও পথটোৰ প্ৰতি বিভাগটোৱে কোনো গুৰুত্ব দিয়া পৰিলক্ষিত হোৱা নাই। এই ক্ষেত্ৰত এতিয়া স্থানীয় ৰাইজে পথটো উন্নয়নত গুৰুত্ব দিবলৈ জিলা উপায়ুক্ত গৰাকীক দাবী জনাইছে।

দৈনন্দিন বাৰ্তাৰ সেৱা, মিৰ্জা, ৮ নৱেম্বৰঃ শিক্ষাবিদ তথা সমালোচক ড০ শৈলেন্দ্ৰ নাৰায়ণ ঠাকুৰীয়াৰ প্ৰথম উপন্যাস ‘অদৃষ্টৰ খোজ’ আজি উপৰহালীৰ নিজ বাসগৃহত আয়োজন কৰা এক গ্ৰন্থ উন্মোচনী সভাত আনুষ্ঠানিকভাৱে উন্মোচন কৰা হয়। এই উপলক্ষে অৱসৰপ্ৰাপ্ত শিক্ষক ৰঞ্জিত কুমাৰ দাসৰ সভাপতিত্বত আয়োজন কৰা সভাত ‘অদৃষ্টৰ খোজ’ উন্মোচন কৰে উপন্যাসিক গৰাকীৰ মাতৃ কুসুম কুমাৰী ঠাকুৰীয়াই। এগৰাকী মাতৃ হিচাপে তেওঁ নিজৰ পুত্ৰৰ উপন্যাস এখন উন্মোচন কৰিবলৈ পাই গৌৰৱান্বিত হোৱা বুলি উল্লেখ কৰে।সভাত বিশিষ্ট অতিথি হিচাপে উপস্থিত থাকি অসমৰ কাব্য জগতৰ এগৰাকী বিশিষ্ট কবি নৰেন মজুমদাৰে নিজৰ বক্তব্যত কয় – জীৱনৰ প্ৰথম উপন্যাস ‘অদৃষ্টৰ খোজ’ স্ৰষ্টা ড শৈলেন্দ্ৰ নাৰায়ণ ঠাকুৰীয়াই সামাজিক পটভূমিত লিখা উপন্যাসখনে ভাগ্যৰ পৰিহাসত মানুহ কিদৰে অসহায় অৱস্থাত পৰে সেয়া উপস্থাপন কৰিবলৈ চেষ্টা কৰা বুলি কয়। আন এগৰাকী অতিথি সমাজকৰ্মী নৃপেন্দ্ৰ নাৰায়ণ ঠাকুৰীয়াই ভাষণ ৰাখি নিজৰ ভাতৃৰ উপন্যাসখনে ক্ষয়িস্নু সমাজৰ বাবে এক ইতিবাচক বাৰ্তা কঢ়িয়াব বুলি উল্লেখ কৰে।

সাংবাদিক পৰিষদ অসমৰ কামৰূপ জিলাৰ সাধাৰণ সম্পাদক তথা সাংবাদিক, গল্পকাৰ পবিত্ৰ কুমাৰ দাসে ভাষণ প্ৰদান কৰি ২৩৬ পৃষ্ঠাৰ এখন বৃহৎ কলেবৰৰ উপন্যাস ছয়মাহৰ ভিতৰত লিখি প্ৰকাশ কৰা কাৰ্য সহজ নহয় বুলি কয়। উপন্যাসিক ড০ শৈলেন্দ্ৰ নাৰায়ণ ঠাকুৰীয়াই লকডাউনৰ সময়খিনি এক মহৎ সৃষ্টিৰ কামত ব্যৱহাৰ কৰা বাবে তেওঁক দাসে বিশেষ ভাৱে অভিনন্দন জনায়। সভাত জ্যেষ্ঠ সাংবাদিক বলেন কলিতা, অৱসৰপ্ৰাপ্ত শিক্ষক মহেশ্বৰ ঠাকুৰীয়া, দেৱেশ্বৰ নাথ, সাংবাদিক হিতেশ কলিতা, মিলন মহন্ত, ভৱানী ঠাকুৰীয়া, অলিবন ঠাকুৰীয়া আদিয়ে ভাষণ প্ৰদান কৰি লেখক ড০ ঠাকুৰীয়াৰ পৰা ভৱিষ্যতেও নতুন গ্ৰন্থ পঢ়িবলৈ পাম বুলি আশা প্ৰকাশ কৰে। শেষত লেখক তথা অৱসৰপ্ৰাপ্ত অধ্যাপক ড০ শৈলেন্দ্ৰ নাৰায়ণ ঠাকুৰীয়াই উপন্যাসখনৰ ভিতৰত সামাজিক অৱক্ষয় আৰু মানৱতাৰ বিজয়ৰ কাহিনীৰে তেওঁৰ জীৱনৰ প্ৰথম উপন্যাস ‘অদৃষ্টৰ খোজ’ পাঠকৰ হাতত তুলি দিবলৈ পাই অভিভূত হোৱা বুলি উল্লেখ কৰে। তেওঁৰ একমাত্ৰ পুত্ৰ-নাতিনী দেৱাংগিৰ চতুৰ্থ বাৰ্ষিক জন্ম দিনলৈ ককাকৰ উপহাৰ হিচাপে উন্মমোচন কৰিবলৈ পাই সকলোৰে শলাগ লয়।

দৈনন্দিন বাৰ্তাৰ সেৱা, হোজাই, ৮ নৱেম্বৰঃ মেগা ধাৰাবাহিক আউসীৰ জোনাক আৰু অস্ত আকাশৰ জোনৰ অভিনেতা তথা হোজাইৰ জ্যেষ্ঠ সাংবাদিক কিশলয় দেৱ গোস্বামী হঠাৎ অসুস্থ হৈ গুৱাহাটী চিকিৎসা মহাবিদ্যালয়ত চিকিৎসাধীন হৈ আছে। হোজাইৰ এখন ব্যক্তিগত শিক্ষানুষ্ঠানত শিক্ষকতা কৰা গোস্বামী যোৱা চাৰি অক্টোবৰৰ দিনা পাঠদান কৰি থকাৰ সময়তে হঠাৎ ঢলি পৰে। পিছত তেওঁক প্ৰথমে হোজাই এফ আৰ ইউ লৈ নিয়া হয় যদিও প্ৰাথমিক চিকিৎসাৰ অন্তত তেওঁক হোজাইৰ হাম হস্পিটেলত চিকিৎসা কৰোৱা হয়।

সাংবাদিক জন কিছু সুস্থ হয় যদিও কালি পুনৰ অসুস্থ হৈ পৰাত হোজাই নতুন বজাৰৰ বিশেষজ্ঞ চিকিৎসক বিজয় দেৱনাথৰ পৰামৰ্শ গ্ৰহণ কৰে। চিকিৎসক জনে সাংবাদিক জন হৃদৰোগত আক্রান্ত হোৱাৰ সন্দেহ কৰি গুৱাহাটী চিকিৎসা মহাবিদ্যালয়লৈ প্ৰেৰণ কৰে। আজি তেওঁক পৰিয়ালৰ লোকে গুৱাহাটী চিকিৎসাৰ মহাবিদ্যালয়ত ভৰ্তি কৰে। চিকিৎসকৰ প্ৰাথমিক অনুসন্ধানত বৰ্ত্তমান বিপদ মুক্ত বুলি জানিব পৰা গৈছে।

দৈনন্দিন বাৰ্তা সেৱাঃ অসমত পুনৰ ২৪৮ জনৰ দেহত ধৰা পৰিছে কোৰোনা। ৰাজ্যত এই ভাইৰাছত আক্ৰান্ত লোকৰ সংখ্যা ২০৮৬৩৭ জনলৈ বৃদ্ধি। আনহাতে সুস্থ হৈছে ৫৫৫ জন লোক।

ৰাজ্যত সুস্থ হোৱা লোকৰ সংখ্যা ২০০৯৩৬ জনলৈ বৃদ্ধি পাইছে। বৰ্তমান চিকিৎসাধীন হৈ আছে ৬৭৫৮ জন ৰোগী।কোৰানা ভাইৰাছত আক্ৰান্ত হৈ অসমত মৃত্যু হৈছে ৯৪০ জন লোকৰ।