ছয়গাঁও, ১২নবেম্বৰ : হিন্দু সমাজক জাগ্ৰত কৰা অতন্দ্ৰ প্ৰহৰী ৰূপী ড: সত্যৰঞ্জন বৰা আজি ছয়গাঁৱত উপস্থিত হোৱাত উৎফুল্লিত হৈ পৰে হিন্দুত্ববাদী জনসাধাৰণ। প্ৰথমে হিন্দুত্ববাদী নেতা ডঃ বৰাই ঐতিহাসিক চণ্ডিকাদেৱালয়ত উপস্থিত হৈ আইৰ আশীৰ্বাদ লৈ ৰাওনা হয় ছয়গাঁও ৰাজহ চক্ৰৰ অন্তৰ্গত মাকেলি ৰাজহ গাঁৱৰলৈ। গাওঁখনত গৈ ডঃবৰাই ছকুৰী দেওনা চুবলৈ লোৱা স্বাধীনতা সংগ্ৰামী নেত্ৰী বুধেবালা পাঠকৰ ঘৰত উপস্থিত হৈ আইতা গৰাকীৰ স্বাস্থ্যৰ বুজ লৈ তেওঁক ঠাণ্ডাৰ বাবে কিছু বস্ত্ৰ প্ৰদান কৰে। তাৰ পিছত গাওঁ খনৰ এগৰাকী মুখীয়াল লোকে বৰাক গাওঁখনৰ খোৱা পানী দিশত কিছু নজৰ দিবলৈ আহ্বান জনায়।

ইয়াৰ পিছতে নেতা গৰাকীয়ে ঐতিহাসিক চান্দ সদাগৰৰ মেৰঘৰত উপস্থিত হৈ মেৰঘৰটোৰ ভগ্নাৱশেষ বোৰৰ সংৰক্ষণৰ দায়িত্ব গ্ৰহণ কৰিবলৈ ছয়গাঁৱৰ ৰাজহ চক্ৰ বিষয়া গৰাকীক এখন স্মাৰক পত্ৰ প্ৰদান কৰে । উল্লেখ্য যে হিন্দুত্ববাদী নেতা সত্যৰঞ্জন বৰাই হিন্দু সমাজক একত্ৰিত হৈ সংঘবদ্ধ ভাবে কাম কৰি যাবলৈ আহ্বান জনায় আৰু পৰৱৰ্তী সময়ত সকলোকে তেওঁ সহায়ৰ হাত আগবঢ়োৱাৰ আশ্বাস প্ৰদান কৰে ।

হাঁহচৰা ১২ নবেম্বৰঃ অসম বিধানসভা সমাগত। অসমৰ অন্যতম এক সমষ্টি টীয়ক বৰ্তমান অগপ বিজেপি মিত্ৰজোঁটৰ অগপৰ দখলত। সমাগত নিৰ্বাচনক লক্ষ্য কৰি আসন ভাগবটোৱাৰাক লৈ জল্পনা-কল্পনা চলি থকাৰ মাজতে বৰ্তমান অগপ দলৰ দখলত থকা টীয়ক বিধান সভা সমষ্টি পুণৰ অগপক এৰি দিবলৈ সাজু নহয় বিজেপি দল। সমষ্টিটোত দীৰ্ঘদিন ধৰি সাংগঠনিক স্থিতি সৱল কৰাৰ বাবে অহোপুৰুষাৰ্থ কৰা বিজেপি দলৰ কৰ্মীসকলে ২০২১ৰ নিৰ্বাচনত সমষ্টি টো দখল কৰিবলৈ সম্পূৰ্ণ সক্ষম বুলি দাবী কৰি কোনো কাৰণতে সমষ্টিটো মিত্ৰতাৰ নামত অসম গণপৰিষদ দলক এৰি নিদিয়ে বুলি তৃণমূলৰ কৰ্মীসকলে প্ৰকাশ কৰিছে। উল্লেখযোগ্য যে, প্রথম অৱস্থাত বিজেপি দলৰ এটা সাংগঠনিক স্থিতি দুৰ্বলৰ আচিলাতে অগপ দলক এৰি দিছিল যদিও বৰ্তমান সময়ত সমষ্টি টোৰ চুকে কোনে দলীয় স্থিতি মজবুট কৰিছে দলটোৱে। কিন্তু অগপ দলৰ শক্তি আজিৰ দিনত সবল নোহোৱাৰ লগতে বিধায়িকা গৰাকীৰ বিফলতাৰ কথা এতিয়া ৰাইজৰ মুখে মুখে। উল্লেখযোগ্য এনেবোৰ কাৰকৰ ফলত এতিয়া বিজেপি দলৰ বহুকেইজন নেতা টীয়ক সমষ্টিৰ পৰা দলীয় প্ৰাৰ্থীত্বৰ প্ৰবল দাবীদাৰ। প্ৰায়কেইজন প্ৰাৰ্থীত্ব প্ৰয়াসিৰে আছে নিজস্ব ভেঁটি। সমষ্টিটোত জিলা বিজেপিৰ সম্পাদক, যুৱ নেতা অমৰজ্যোতি শইকীয়া, অসীম বৰুৱা, পালিত বৰা, জিতু হাজৰিকা প্ৰমুখ্যে বহু কেইগৰাকী নেতা দলীয় প্ৰাৰ্থিত্ব প্ৰয়াসী হিচাপে থিয় দিয়াৰ সম্ভাৱনা আছে। এইসকল হল বিজেপি দলৰ পুৰণা কৰ্মী। আনহাতে দীৰ্ঘদিন ধৰি ৰাষ্ট্ৰীয় স্বয়ং সেৱক সংঘৰ বিভিন্ন স্তৰত প্ৰচাৰ বিমুখ হৈ কামকৰি থকা জ্যেষ্ঠ সংঘ সদস্য তথা তামুলিচিগা ঘনকান্ত বৰা কণিষ্ঠ মহাবিদ্যালয়ৰ সদ্য অৱসৰ প্ৰাপ্ত প্ৰৱক্তা যোগেন চন্দ্ৰ কোঁচেও বিজেপি দলৰ পৰা টীয়ক সমষ্টিৰ প্ৰাথীত্ব বিচৰাৰ সম্ভাৱনা প্ৰৱল বুলি তেওঁৰ ঘনিষ্ঠ সূত্ৰৰ পৰা জানিব পৰা গৈছে। একোৰাকী শিক্ষাবিদ তথা আৰ. আৰ এছৰ এগৰাকী সক্ৰিয় কৰ্মী টীয়ক সমষ্টিৰ লগতে ৰাজ্যৰ বিভিন্ন স্থানত কাম কৰি থকা তথা আৰ এছ এছৰ ওপৰ মহলত থকা ঘনিষ্ঠতাৰ বাবেই এতিয়া কোঁচৰ আগমণে টীয়ক সমষ্টিৰ প্ৰাৰ্থীত্বৰ সমীকৰণত আউল লগোৱাৰ সম্ভাৱনা আছে। আনহাতেদি ৰাজ্যৰ এগৰাকী বিশিষ্ট কৰ্কটৰোগ বিশেষজ্ঞ ডাঃ যদুনাথ বুঢ়াগোহাঁইয়ে বহু দিন ধৰি ৰাইজৰ মাজত স্বাস্থ্য সজাগতা শিবিৰ, বিনামূলীয়া স্বাস্থ্য শিবিৰ আৰু শেহতিয়াকৈ ক’ৰোণা সংকটকালত সমষ্টিটোৰ চুকে-কাণে আৰ্তজনক সেৱা আগবঢ়োৱা এই গৰাকী চিকিৎসক বৰ্তমান বিজেপি দলৰ শক্তিশালী প্ৰাৰ্থীত্ব প্ৰয়াসী। শেহতিয়াকৈ এই গৰাকী চিকিৎসকে ইতিমধ্যে বিজেপি দলৰ বিভিন্ন দলীয় সভা সমিতিত অংশগ্ৰহণ কৰাৰ লগতে প্ৰাৰ্থীত্ব কেন্দ্ৰিক তৎপৰতা আৰম্ভ কৰিছে। ৰাষ্ট্ৰীয় স্বয়ং সেৱক সংঘৰ সমৰ্থন লাভৰ লগতে ৰাজ্যিক বিজেপিৰ সংকেত লাভ কৰিছে বুলি ভিতৰুৱা সূত্ৰৰ পৰা জানিব পৰা গৈছে।চিকিৎসক গৰাকীয়ে জনোৱা মতে সমষ্টিটোত তেওঁ আগবঢ়াই থকা বিনামূলীয়া চিকিৎসা সেৱাৰ লগত ৰাজনীতিৰ সম্বন্ধ নাই। এনে পৰিপ্ৰেক্ষিতত বিজেপিৰ ওপৰ মহলে বিজেপিৰ প্ৰাৰ্থী প্ৰদান কৰিবনে নে পুনৰ মিত্ৰতাৰ স্বাৰ্থত অগপক পুনৰ এই আসন খন এৰি দিব ই এতিয়া এক লাখটকীয়া প্ৰশ্ন ?

গেলেকী, ১২নৱেম্বৰঃ সমগ্ৰ দেশ তথা ৰাজ্যৰ চৌদিশে বহিঃৰাজ্যৰ দুস্কৃতিকাৰীয়ে হিংসা, হত্যা আৰু সন্ত্ৰাস বিয়পায় অসমৰ ভূমিত অনাসাৰে প্ৰৱেশ কৰাৰ লগতে ভূমি বে-দখল কৰি ত্ৰাস অব্যাহত ৰাখিছে । সামান্তৰাল ভাৱে নাজিৰা মহকুমা অন্তৰ্গত গেলেকী অসম-নাগালেণ্ড সীমান্তৰ সংৰক্ষিত বনাঞ্চলত আগ্ৰহী নগা বাহিনীৰ তাণ্ডৱ । গেলেকী খণ্ড বন বিভাগ আৰু আঠখেল খণ্ড বন বিভাগৰ অধীনস্ত গেলেকী সংৰক্ষিত বনাঞ্চলত নগাৰ সন্ত্ৰাসৰ বিপৰীতে ক্ৰমাৎ বে-দখল হ’ব ধৰিছে বনাঞ্চল । ব্যৰ্থ বন বিভাগ, ব্যৰ্থ সীমান্তৰ সুৰক্ষাৰ দায়িত্বত থকা মুগাপাৰা, শিঙিবিল, সোণাপুৰ আৰু দেওপানী বেটেলিয়ান চাউনীসমূহ । সম্প্ৰতি বন বিভাগ আৰু আৰক্ষীয়ে গেলেকী সংৰক্ষিত বনাঞ্চলৰ সুৰক্ষা প্ৰদানত চূড়ান্ত ভাৱে ব্যৰ্থ হোৱা প্ৰতিফলিত হৈছে । নগাৰ তাণ্ডৱ নতুবা আতংকক দীৰ্ঘদিনে প্ৰতিহত কৰাত ব্যৰ্থ হৈ আহিছে গেলেকী আৰক্ষী থানা ভাৰপ্ৰাপ্ত বিষয়া গৰাকী । যাৰ বাবে সীমান্তত তীব্ৰ উত্তেজনায় বিৰাজ কৰিছে । বিগত দুটা দিনকে ধৰি গেলেকী সংৰক্ষিত বনাঞ্চলৰ ভিতৰত অবৈধ বে-দখল কৰি নগা দুস্কৃতিকাৰীয়ে মূল্যৱান গছ কাটি তহিলং কৰে । কাঞ্চিং নতুন বস্তি আৰু এনাকি বস্তিৰ পৰা অহা নগা দুস্কৃতিকাৰীয়ে এইদৰে হিংসাত্মক কাণ্ড সংঘটিত কৰাৰ সন্দেহ প্ৰকাশ কৰিছে সীমান্তৱৰ্তী গঁঞা ৰাইজে । ঘটনা সন্দৰ্ভত খবৰ লাভ কৰি ১১ নৱেম্বৰৰ দিনা নাজিৰা মহকুমা মহকুমাধীপতি ও অতিৰিক্ত উপায়ুক্ত লখিমী দত্ত, নাজিৰা মহকুমা সীমান্তৰ দণ্ডাধীশ ৰাজীৱ সোণোৱাল, নাজিৰা মহকুমা আৰক্ষী বিষয়া প্ৰদীপ কোঁৱৰ, গেলেকী খণ্ড বন বিভাগ আৰু আঠখেল খণ্ড বন বিভাগৰ লোক সহ গেলেকী আৰক্ষী থানা ভাৰপ্ৰাপ্ত বিষয়া দ্বিপেন্দ্ৰ ছেত্ৰী নেতৃত্বৰ এটা আৰক্ষীৰ দল কাঞ্চিং ৰোডত উপস্থিত হয়গৈ । যদিও আৰক্ষী পাছে-পাছে দুস্কৃতিকাৰী আগে-আগে পলায়ন কৰে । নাজিৰা মহকুমা মহকুমাধীপতি ও অতিৰিক্ত উপায়ুক্ত লখিমী দত্ত, নাজিৰা মহকুমা সীমান্তৰ দণ্ডাধীশ ৰাজীৱ সোণোৱালে সীমান্তৰ অসমৰ এলেকাসমূহ পৰিদৰ্শন কৰি আৰক্ষীৰ সৈতে এক আলোচনাত মিলিত হোৱাৰ অন্তত তেখেতে লোকে বিঅ’পি সমূহো পৰিদৰ্শন কৰে । আনহাতে দুস্কৃতিকাৰীয়ে ধ্বংস কৰা গছৰ মূল্যৱান কাঠৰ কুণ্ডা সমূহ স্থানান্তৰ কৰাৰ বাবে বন বিভাগ এতিয়া তৎপৰ হৈ পৰিছে । প্ৰায় ১৩ জোপা গছৰ কুণ্ডা সমূহ এতিয়া গেলেকী খণ্ড বন বিভাগৰ কাৰ্যালয়লৈ অনাৰ ব্যৱস্থা কৰা হৈছে ।