উজনি অসমৰ একেবাৰে পূব প্ৰান্তৰ এসময়ৰ সন্ত্ৰাসজৰ্জৰ অঞ্চল কাকপথাৰত এতিয়া নতুনকৈ সূচনা হৈছে শৈক্ষিক বিপ্লৱৰ । অঞ্চলটোৰ বহু প্ৰত্যাশিত এখন উচ্চ শিক্ষাৰ প্ৰতিষ্ঠান নৱনিৰ্মিত পদ্মনাথ গোহাঞি বৰুৱা চৰকাৰী আদৰ্শ মহাবিদ্যালয়ৰ সভা কক্ষত আজি এক আদৰণি অনুষ্ঠান অনুষ্ঠিত হৈ যায় । মহাবিদ্যালয়খনৰ অধ্যক্ষ ডঃ থানুৰাম মজিন্দাৰৰ সঞ্চলনাত অনুষ্ঠিত আদৰণি অনুষ্ঠানত উপস্থিত থাকে তিনিচুকীয়া জিলাৰ অতিৰিক্ত উপায়ুক্ত (শিক্ষা) গীতালি দুৱৰা, তিনিচুকীয়া জিলা পৰিষদৰ সভাপতি তথা পদ্মনাথ গোহাঞি বৰুৱা চৰকাৰী আদৰ্শ মহাবিদ্যালয়ৰ প্ৰস্তুতি সমিতিৰ সভাপতি ললিত মৰাণ, ডুমডুমা মহাবিদ্যালয়ৰ প্ৰাক্তন  অধ্যাপক গিৰিশ কোঁৱৰ ।

নিজৰ বক্তব্যৰ মাজেৰে অতিৰিক্ত উপায়ুক্ত (শিক্ষা) গীতালি দুৱৰাই নৱনিযুক্ত শিক্ষক আৰু ছাত্ৰ ছাত্ৰীসকলক উমৈহতীয়া যত্নৰ মাজেৰে শিক্ষাৰ ক্ষেত্ৰত পিছপৰা অঞ্চলটোক জ্ঞানৰ পোহৰেৰে আলোকিত কৰিবলৈ আহ্বান জনায়। কাকপথাৰ অঞ্চলত এখন উচ্চ শিক্ষাৰ অনুষ্ঠানৰ গুৰুত্ব আৰু মহাবিদ্যালয় প্ৰতিষ্ঠাৰ আঁৰত থকা স্থানীয় দল সংগঠন, প্ৰশাসন আৰু ৰাইজৰ সহযোগিতাৰ বিষয়ে তিনিচুকীয়া জিলা পৰিষদৰ সভাপতি তথা পদ্মনাথ গোহাঞি বৰুৱা চৰকাৰী আদৰ্শ মহাবিদ্যালয়ৰ প্ৰস্তুতি সমিতিৰ সভাপতি ললিত মৰানে বিষদভাৱে অৱগত কৰে। নৱ নিযুক্ত অধ্যাপকসকলক উদ্দেশ্যি  গিৰিশ কোঁৱৰে মানৱ সম্পদ গঢ় দিয়াই শিক্ষকৰ আটাইতকৈ পবিত্ৰ কৰ্ম বুলি উল্লেখ কৰে । অনুষ্ঠানটোত উপস্থিত বিশিষ্ট ব্যক্তিসকলক মহাবিদ্যালয়ৰ তৰফৰ পৰা একোখন মৰাণ জনগোষ্ঠীয় গামোচাৰে আদৰণি জনোৱা হয় ।  শতাধিক ছাত্ৰ ছাত্ৰীয়ে ইতিমধ্যে নামভৰ্তি কৰা মহাবিদ্যালয়খনত সদ্য নিযুক্তপ্ৰাপ্ত অধ্যাপক- অধ্যাপিকাসকলক আদৰণি জনোৱাৰ লগতে এক চিনাকি পৰ্ব অনুষ্ঠান অনুষ্ঠিত  হৈ যায়। অনুষ্ঠান সামৰণি পৰা লগে লগে তিনিচুকীয়া জিলাৰ অতিৰিক্ত উপায়ুক্ত (শিক্ষা) গীতালি দুৱৰাই বন্তি প্ৰজ্বলন আৰু তিনিচুকীয়া জিলা পৰিষদৰ সভাপতি তথা পদ্মনাথ গোহাঞি বৰুৱা চৰকাৰী আদৰ্শ মহাবিদ্যালয়ৰ প্ৰস্তুতি সমিতিৰ সভাপতি ললিত মৰাণে মহাবিদ্যালয়ৰ কেণ্টিন উদ্বোধন কৰে । 

ৰাজ্যৰ প্ৰাথমিক বিদ্যালয়ৰ শিক্ষকসকলৰ দীৰ্ঘদিনীয়া দাবীৰ প্ৰতি চৰকাৰৰ অনীহাক অসম ৰাজ্যিক প্ৰাথমিক শিক্ষক সন্মিলনীয়ে তীব্ৰ ভাষাৰে গৰিহণা দিছে। বিশেষকৈ প্ৰাথমিক বিদ্যালয়ত আজিও প্ৰধান শিক্ষক পদ সৃষ্টি নকৰাটো আৰু সপ্তম দৰমহা আয়োগৰ পৰামৰ্শ অনুসৰি প্ৰাথমিক বিদ্যালয়ত কৰ্মৰত স্নাতক শিক্ষকৰ গ্ৰেড পে ৮৭০০ টকা আদায় দিয়াৰ পাছত আকৌ ঘূৰাই লোৱাটো আশ্চৰ্যৰ বিষয়। এই দাবীত সন্মিলনীয়ে ২২ জানুৱাৰীত মুখ্যমন্ত্ৰীৰ চৰকাৰী বাসভৱন ঘেৰাও কাৰ্যসূচী ঘোষণা কৰিছে। এই সন্দৰ্ভত ৰাজ্যৰ সকলো বিধায়কক সৱিশেষ জ্ঞাত কৰিবলৈ স্মাৰক পত্ৰ প্ৰদানৰ এক কাৰ্যসূচী ৰূপায়ণ কৰা হয়। আজি ডিব্ৰুগড় জিলা প্ৰাথমিক শিক্ষক সন্মিলনীৰ সম্পাদক পংকজ বড়া, জয়পুৰ শিক্ষাখণ্ডৰ সাংগঠনিক সভাপতি মুনিন গগৈ, জিলাৰ প্ৰাক্তন সভাপতি পদ্মেশ্বৰ ৰাইদিঙীয়াৰ নেতৃত্বত যোৱা এটি সঁজাতি দলে টিংখাঙৰ বিধায়ক বিমল বড়াক সাক্ষাৎ কৰি প্ৰাথমিক শিক্ষকৰ সমস্যাৰ সন্দৰ্ভত অৱগত কৰি স্মাৰক পত্ৰ প্ৰদান কৰে। ২০১৯ চনৰ ৩০ ডিচেম্বৰত মুখ্যমন্ত্ৰীৰে হোৱা আলোচনাত প্ৰধান শিক্ষক পদ সৃষ্টিৰ বাবে শিক্ষা আৰু বিত্ত বিভাগক নিৰ্দেশনা সত্বেও আজিপৰ্যন্ত কাৰ্যকৰী নকৰি মুখ্যমন্ত্ৰীৰ আসনৰ গৰিমা ম্লান কৰিছে বুলি সন্মিলনীয়ে অভিযোগ ঊত্থাপন কৰিছে। শেহতীয়াকৈ সন্মিলনীৰ স’তে ৫ আৰু ১৪ নৱেম্বৰত শিক্ষামন্ত্ৰীৰ আলোচনাৰ অন্তত জ্যেষ্ঠ সহকাৰী শিক্ষকৰ পদটো প্ৰধান শিক্ষকৰ পদলৈ পদোন্নতি কৰাবলৈ সিদ্ধান্ত গ্ৰহণ কৰিছে যদিও কোনো সময় সীমা নিৰ্দ্ধাৰণ নকৰাত সন্মিলনী সন্দিহান হৈ পৰিছে। স্মাৰক পত্ৰত দেশৰ কোনো ৰাজ্যতে নোহোৱা নোপোজা ঘটনা অসমৰ প্ৰাথমিক শিক্ষা বিভাগত সংঘটিত হৈছে বুলি এক গুৰুতৰ অভিযোগ কৰিছে। অসম চৰকাৰৰ কেবিনেট আৰু ৰাজ্যপালৰ দ্বাৰা অনুমোদিত সপ্তম দৰমহা বিধিক বিভাগে নসাৎ কৰিছে। দৰমহা বিধি অনুসৰি প্ৰাথমিক বিদ্যালয়ৰ স্নাতক শিক্ষকক গ্ৰেড পে ৮৭০০ টকা সোতৰ মাহে আদায় দিয়াৰ পাছত ৭৪০০ টকালৈ অৱনমিত কৰা হয়। উল্লেখ্য যে দৰমহা বিধিয়ে ৰাজ্য চৰকাৰৰ ৩১ বিভাগৰ কৰ্মচাৰীৰ গ্ৰেড পে বৃদ্ধি কৰিছিল আৰু উদ্দেশ্যপ্ৰণোদিতভাৱে প্ৰাথমিক শিক্ষকৰ গ্ৰেড পে আঁসোৱাহ নিৰাময় সমিতিৰ যোগে কৰ্তন কৰি চৰম প্ৰতাৰণা কৰিছে। এবাৰ আদায় দিয়াৰ পাছত পুনৰ কৰ্তন কৰি শিক্ষকসকলক বঞ্চিত কৰি ক্ষোভিত কৰি তুলিছে। এনে কাৰ্য কেতিয়াও সমৰ্থনযোগ্য নহয় বুলি স্মাৰক পত্ৰত উল্লেখ কৰিছে। সন্মিলনীয়ে অতি সোনকালে ইয়াৰ কাৰ্যকৰীকৰণ কৰি প্ৰাথমিক শিক্ষকক ন্যায্য প্ৰদান কৰিবলৈ আহ্বান জনাইছে। অন্যথাই ২২ জানুৱাৰীত মুখ্যমন্ত্ৰীৰ বাসগৃহ ঘেৰাও কৰি শৈক্ষিক ক্ষেত্ৰ বাদ দি বিত্তীয় লেন দেন তথা তথ্য আদান-প্ৰদানৰ সকলো ধৰণৰ কাৰ্যৰ পৰা শিক্ষকসকল আঁতৰি থাকিব বুলি হুংকাৰ প্ৰদান কৰিছে। উক্ত কাৰ্যসূচীৰ আগতেই বিভাগে প্ৰধান শিক্ষক পদ সৃষ্টি আৰু স্নাতক শিক্ষকৰ গ্ৰেড পে পুনৰ ঘূৰাই দিয়াৰ বাবে নিৰ্দেশনা জাৰি কৰি কাৰ্যকৰী কৰিবলৈ অসম ৰাজ্যিক প্ৰাথমিক শিক্ষক সন্মিলনীয়ে আহ্বান জনাইছে। লগতে প্ৰাথমিক শিক্ষাৰ গতিশীলতাত কোনো জটিলতাৰ সৃষ্টি হ’লে প্ৰাথমিক শিক্ষক সমাজ জগৰীয়া নহ’ব বুলি সকীয়াই দিয়ে। এই সম্পৰ্কে সকলো বিধায়ক, শিক্ষা বিষয়া, মুখ্যমন্ত্ৰী তথা শিক্ষামন্ত্ৰীক ইতিমধ্যে অৱগত কৰা হৈছে। মুখ্যমন্ত্ৰীৰ বাসগৃহ ঘেৰাও কাৰ্যসূচী ৰূপায়নৰ বাবে ডিব্ৰুগড় জিলাৰ প্ৰাথমিক শিক্ষকসকললৈ আহ্বান জনাইছে ডিব্ৰুগড় জিলা প্ৰাথমিক শিক্ষক সন্মিলনীৰ সভাপতি পুষ্পধৰ তামুলী আৰু সম্পাদক পংকজ বড়াই।