তামুলপুৰ : তামুলপুৰ মহকুমাৰ নাগ্ৰীজুলি আৰক্ষী চকীৰ অন্তৰ্গত ভাৰত-ভূটান সীমান্তৰ গুৱাবাৰীত বুধবাৰে নিশা নাগ্ৰীজুলি আৰক্ষী আৰু গুৱাবাৰী এছএছবিয়ে অভিযান চলাই বৃহৎ পৰিমাণৰ গাঞ্জা জব্দ কৰাৰ লগতে এ এছ-১২ কে-২৮৭৮ নম্বৰৰ এখন চাৰিচকীয়া বাহনসহ কৃষ্ণ বসুমতাৰী নামৰ এজন লোকক আটক কৰিবলৈ সক্ষম হয়। নাগ্ৰীজুলি আৰক্ষী চকীৰ ভাৰপ্ৰাপ্ত বিষয়া কৈলাশ মালাকৰে সংবাদ মাধ্যমৰ আগত প্ৰকাশ কৰা মতে এক গোপন সূত্ৰৰ পৰা আৰক্ষীয়ে ভাৰত-ভূটান সীমান্তৰ গুৱাবাৰী অঞ্চলত এখন গাড়ীৰে বৃহৎ পৰিমাণৰ গাজা লৈ অহাৰ খবৰ লাভ কৰিছিল। সেই খবৰৰ ভিত্তিত নাগ্ৰীজুলি আৰক্ষীয়ে গুৱাবাৰীৰ এছএছবিৰ সৈতে গুৱাবাৰীৰ এক ভিতৰুৱা অঞ্চলত অভিযান চলাই গোবিন্দ বচনেট নামৰ এটা পৰিয়ালৰ ঘৰৰ চোতালত থকা বাহন খনৰ পৰা প্ৰায় ৯ কিলো ৫০০ গ্ৰাম গাজাসহ চাৰি চকীয়া বাহনখন জব্দ কৰে আৰু কৃষ্ণ বসুমতাৰী নামৰ এজন লোকক আটক কৰিবলৈ সক্ষম হয়। আৰক্ষীয়ে জানিবলৈ দিয়া মতে কৃষ্ণ বসুমতাৰীৰ ঘৰ ওদালগুৰি জিলাৰ কুৰুৱাবাহীত। বৰ্তমান আটকাধীন যুৱকজনক নাগ্ৰীজুলি আৰক্ষী চকীত আৰক্ষীয়ে জেৰা চলাই আছে। গাঞ্জা ব্যৱসায়ৰ সৈতে আৰু অধিক লোক জড়িত থকাৰ সন্দেহ কৰিছে আৰক্ষীয়ে। কৃষ্ণ বসুমতাৰীৰ জেৰাৰ অন্তত আৰু অধিক লোক আৰক্ষীৰ হাতত আটক হোৱাৰ সম্ভাৱনা আছে।

নগাঁও,৭অক্টোবৰ : নগাঁও আৰক্ষীয়ে অভিযান চলাই আজি আটক কৰিবলৈ সক্ষম হয় ধিংত সংঘটিত হোৱা চাঞ্চল্যকৰ হত্যাকাণ্ডৰ মূল অভিযুক্তক। বিগত ২৫ চেপ্টেম্বৰত ধিঙৰ ডুমুডুমীয়া লাঙিয়াৰ নবী হুছেইন নামৰ এজন লোকক দিন দুপৰতে শূণ্য দূৰত্বৰ পৰা গুলীয়াই হত্যা কৰিছিল দুই দুৰ্বৃত্তই। নিজৰ কিশোৰী কন্যাক বিয়া দিবলৈ অমান্তি হোৱাৰ বাবেই নবী হুছেইনক গুলীয়াই হত্যা কৰাৰ অভিযোগ উত্থাপন হৈছিল। ঘটনা সন্দৰ্ভত ৰুজু হোৱা গোচৰৰ ভিত্তিত নগাঁও জিলা আৰক্ষী অধীক্ষক অভিজিৎ গৌৰব আৰু অতিৰিক্ত আৰক্ষী অধীক্ষক মোহন লাল মীনাৰ তৎপৰতাত নগাঁও আৰক্ষীয়ে আটক কৰিবলৈ সক্ষম হয় হত্যাকাণ্ডৰ মূল অভিযুক্ত আনাৰুল ইছলামক। আজি নগাঁৱৰ ধূপগুৰিৰ পৰা আৰক্ষীয়ে আটক কৰে মূল অভিযুক্ত আনাৰুলক। ধৃত আনাৰুলৰ পৰা আৰক্ষীয়ে এটা কাৰখানাত নিৰ্মিত পিষ্টলৰ লগতে ৭.৬৫ এম এম পিষ্টলৰ দুই জাই সজীৱ গুলীও জব্দ কৰিবলৈ সক্ষম হয়।

নগাঁও, ৭ অক্টোবৰ : নগাঁও সদৰ সমষ্টিৰ অন্তৰ্গত কাছমাৰী অঞ্চলত আজি তিনিটাকৈ উন্নয়ন মূলক আচঁনিৰ কামৰ শুভ উদ্ধোধন কৰে সমষ্টিটোৰ বিধায়ক ৰূপক শৰ্মাই । বিধায়ক শৰ্মাই আজি পলাশতল কাছমাৰী উচ্চ মাধ্যমিক বিদ্যালয়ৰ নৱ নিৰ্মিত অতিৰিক্ত কোঠা আৰু সমূহীয়া ভৱনৰ লগতে কাছমাৰী মজলীয়া বিদ্যালয়ৰ চাৰিসীমা বেৰৰ উদ্ধোধন কৰে। ইয়াৰ উপৰি বিধায়ক গৰাকীয়ে কাছমাৰী ক্ষুদ্র স্বাস্থ্য কেন্দ্ৰৰ নাৰ্চৰ বাবে নতুনকৈ নিৰ্মাণ কৰি উলিওৱা তিনিটা আৱাসগৃহও মুকলি কৰি দিয়ে । আজি মুকলি কৰা এই আৱাসগৃহ তিনিটাই ক্ষুদ্ৰ স্বাস্থ্য কেন্দ্ৰটোত কৰ্মৰত নাৰ্চসকলৰ দীৰ্ঘদিনীয়া এক অভাৱ পূৰণ কৰে বুলি বিধায়ক গৰাকীয়ে মত প্ৰকাশ কৰে । আনহাতে আজি উদ্ধোধন কৰা উন্নয়নমূলক আচঁনি সমূহৰ জৰিয়তে অঞ্চলটোৰ ৰাইজ উপকৃত হব বুলি বিধায়ক শৰ্মাই আশা প্ৰকাশ কৰে । উদ্ধোধনী অনুষ্ঠানত কাছমাৰী জিলা পৰিষদৰ সদস্য কাঞ্চন বৰদলৈৰ লগতে ভালে কেইগৰাকী পঞ্চায়তৰ প্ৰতিনিধি উপস্থিত থাকে ।