দৈনন্দিন বাৰ্তা ডেস্ক : কংগ্ৰেছক পুনৰুজ্জীৱিত কৰাৰ চেষ্টাৰে শুকুৰবাৰে সৰ্বভাৰতীয় সংগঠনটো বৃহৎ সালসলনি কৰে কংগ্ৰেছৰ সভানেত্ৰী ছোনীয়া গান্ধীয়ে ৷ এইবাৰ দলৰ সাধাৰণ সম্পাদকৰ পদত বৃদ্ধতন্ত্ৰৰ ভাৰ কমোৱা হৈছে ৷ গুলাম নবী আজাদ, মল্লিকাৰ্জুন খাৰ্গে, অম্বিকা ছোনী, মতিলাল ভোৰা, লুইজিনো ফালেৰিৱৰ দৰে বৰ্ষীয়ান নেতাসকলক আঁতৰ কৰি নবীনক ঠাই দিছে কংগ্ৰেছ সভানেত্ৰীয়ে ৷ আনহাতে সংগঠন শক্তিশালী কৰিবলৈ বিভিন্ন ৰাজ্যৰ দায়িত্বত নতুন এআইচিচিৰ সাধাৰণ সম্পাদক নিয়োগ কৰিছে ছোনীয়া গান্ধীয়ে ৷ তদুপৰি দল পৰিচালনাৰ কামত তেওঁক সহায় কৰিবলৈ ছজনীয়া সদস্যৰ এক বিশেষ কমিটি গঠন কৰা হৈছে ৷ উল্লেখ্য যে নেতৃত্ব পুনৰ গঠন আৰু পূৰ্ণ পৰ্যায়ৰ নতুন সভাপতিৰ দাবী জনাই কংগ্ৰেছৰ ২৩জন নেতাই ছোনীয়া গান্ধীলৈ চিঠি লিখিছিল ৷ ইয়াকে লৈ কংগ্ৰেছত তোলপাৰ লাগিছিল৷ সংগঠনৰ সালসলনি কৰি পত্ৰ প্ৰেৰকক বাৰ্তা দিলে কংগ্ৰেছৰ সভানেত্ৰীয়ে৷ এআইচিচিৰ নতুন সাধাৰণ সম্পাদকৰ দায়িত্ব দিয়া হৈছে ৰণদীপ সিং সুৰজেৱালা, জীতেন্দ্ৰ সিং আৰু অজয় মাকেনক৷ দল পৰিচালনাৰ ছজনীয়া কমিটিত আহমেদ পেটেল, এ কে এণ্টনী, অম্বিকা ছোনীৰ দৰে ছোনীয়া গান্ধীৰ পুৰণা আস্থাভাজনৰ লগতে দিয়া হৈছে ৰাহুল গান্ধীৰ দুই আস্থাভাজনক ৷ তেওঁলোক হ’ল কে চি বেণুগোপাল আৰু ৰণদীপ সিং সুৰজেৱালা ৷ নতুন সভাপতি নিৰ্বাচন পৰ্যন্ত এই কমিটিয়ে ছোনীয়া গান্ধীক সহায় কৰিব ৷ আগন্তুক দিনত সাংগঠনিক নিৰ্বাচন আৰু সদস্য ভৰ্ত্তি অভিযানৰ ইংগিত দি মধুসুদন মিস্ত্ৰিৰ নেতৃত্বত দলৰ নতুন কেন্দ্ৰীয় নিৰ্বাচনৰ কৰ্তৃপক্ষ গঠন কৰিছে ছোনীয়া গান্ধীয়ে ৷ এই ক্ষেত্ৰত ৰাহুল গান্ধীৰ চীল মোহৰ আছে বুলি জানিব পৰা গৈছে ৷ ইয়াৰ উপৰি এই কমিটিত আছে ৰাজেশ মিশ্ৰ, কৃষ্ণ গৌডা, এছ জ্যোতিমানি, অৰবিন্দ সিং লাভলি ৷ উল্লেখ্য যে ছোনীয়া গান্ধীলৈ পত্ৰ প্ৰেৰকৰ অন্যতম আছিল লাভলি ৷ আনহাতে আজাদক হাৰিয়ানাৰ দায়িত্বৰ পৰা আঁতৰ কৰিলেও এআইচিচিত ৰখা হৈছে ৷ স্পেচিয়েল ইনভাইটি কৰি ঠাই দিয়া হৈছে পি চিদাম্বৰমক ৷ লোকসভাৰ কংগ্ৰেছ নেতা অধীৰ চৌধুৰীক ৱৰ্কিং কমিটিত স্থায়ী ইনভাইটি পদ দিয়া হৈছে ৷ লগতে জয়ৰাম ৰমেশ, দ্বিগিজয় সিং, ছলমন খুৰশ্বিদ, প্ৰমোদ তিৱাৰীক ঠাই দিয়া হৈছে ৷ প্ৰাক্তন কেন্দ্ৰীয় মন্ত্ৰী পহনকুমাৰ বনচলক সংগঠনৰ দায়িত্ব দিয়া হৈছে ৷ উল্লেখ্য যে অ’ত দিনে গৌৰৱ গগৈ আছিল পশ্চিম বংগৰ দায়িত্ব ত৷ এইবাৰ বিক্ষুব্ধসকলৰ মাজৰ তৰুণ নেতা জিতিন প্ৰসাদক পশ্চিম বংগ আৰু আন্দামান নিকোবৰৰ দায়িত্ব দিয়া হৈছে ৷ গৌৰৱ গগৈৰ লগতে অনুগৰহ নাৰায়ণ সিং (উত্তৰাখণ্ড), আশা কুমাৰী (পাঞ্জাৱ), আৰ চি খুণ্টিয়া (তেলেংগানা)ক ৰাজ্যিক দায়িত্বৰ পৰা আঁতৰ কৰা হৈছে ৷ উল্লেখ্য যে গৌৰৱ গগৈক শেহতীয়াকৈ কংগ্ৰেছৰ লোকসভাৰ উপ নেতা হিচাপে নিৰ্বাচন কৰা হৈছিল ৷ আনহাতে যুৱ নেতা দীনেশ গুণ্ডু ৰাওক তামিলনাডু, পুডুচেৰি আৰু গোৱাৰ দায়িত্ব দিয়া হৈছে ৷ এইচ কে পাটিলক কৰ্ণাটক, ৰাজীৱ শুক্লাক হিমাচল প্ৰদেশৰ নতুন দায়িত্ব দিয়া হৈছে ৷ দিল্লীৰ যুৱ নেতা দেবেন্দ্ৰ যাদৱক উত্তৰাখণ্ডৰ দায়িত্ব দিয়া হয় ৷ আন নতুন দায়িত্ব পোৱা সকল হ’ল বিবেক বানচলক হাৰিয়ানা, মণীশ চত্ৰথক অৰুণাচল প্ৰদেশ আৰু মেঘালয়, ভক্ত চৰণ দাসক মিজোৰাম আৰু মণিপুৰ, কুলজিৎ সিং নাগৰাক ছিকিম, নাগালেণ্ড আৰু ত্ৰিপুৰাৰ দায়িত্ব দিয়া হয় ৷

দৈনন্দিন বাৰ্তা ডেস্ক : অৰুণাচলৰ পৰা নিখোঁজ হোৱা পাঁচজন যুৱকক ভাৰতৰ হাতত তুলি দিলে চীনৰ পিপুলছ লিবাৰেচন আৰ্মিয়ে ৷ শনিবাৰে এই কথা সেনাৰ সূত্ৰত প্ৰকাশ৷ ২ ছেপ্টেম্বৰত এই পাঁচজন যুৱক উচ্চ সুৱনশিৰি জিলাৰ হাবিৰ পৰা নিখোঁজ হৈছিল ৷ ইন্দো-তিব্বত সীমান্তৰক্ষী বাহিনীৰ সামগ্ৰী বহন কৰাৰ লগতে যুৱককেইজন চিকাৰী ৷ জানিব পৰা মতে সেইদিনা এটা সেনাৰ ঘাঁটিত সামগ্ৰী দিয়াৰ পাচত এই হাবিলৈ গৈছিল পাঁচজন যুৱক ৷ স্থানীয় লোকৰ মতে ভেষজ বা চিকাৰৰ বাবে এই যুৱককেইজন প্ৰায়ে তালৈ যায় ৷ এই যুৱককেইজন সেই কাৰণে তালৈ গৈছিল ৷ ভুল কৰি এলএচি পাৰ হৈ চীনৰ ভূখণ্ডত তেওঁলোক সোমাই পৰে ৷ স্থানীয় লোকে দাবী কৰে যে চীনৰ সেনাই তেওঁলোকক অপহৰণ কৰিছে ৷ তাৰ পাচত চীনৰ সৈতে ভাৰতৰ হটলাইন মেছেজৰ উত্তৰ দিয়া হৈছিল ৷ জনাইছিল যে নিখোঁজ পাঁচজন যুৱক চীনৰ হাতত আছে ৷ শনিবাৰে পুৱা ৯.৩০ বজাত হস্তান্তৰ প্ৰক্ৰিয়া সম্পন্ন হয় চীনৰ ভূখণ্ডত ৷ তাৰ পাচত এঘণ্টা লাগে সীমা পাৰ হৈ দেশৰ মাটিত ভৰি দিবলৈ ৷ পাঁচজন যুৱকসহ সেনাৰ দল অৰুণাচলৰ কিবিথু সীমান্ত চকীত নিৰ্বিঘ্নে অনা হয় ৷ উল্লেখ্য যে শুকুৰবাৰে কেন্দ্ৰীয় মন্ত্ৰী কিৰেণ ৰিজিজুৱে টুইটাৰত জনাইছিল যে চীনা পিএলএয়ে ভাৰতীয় সেনাক জনাইছে অৰুণাচলৰ পাঁচজন যুৱকৰ আমাক ঘূৰাই দিব ৷

দৈনন্দিন বাৰ্তা ডেস্ক : ভাৰ্চুৱেল আদালতৰ পক্ষে মত দিলে সংসদৰ আইন আৰু বিচাৰ সংক্ৰান্তীয় স্থায়ী কমিটিয়ে ৷ অনলাইন বিচাৰ প্ৰক্ৰিয়া তুলনামূলকভাৱে সস্তীয়া আৰু দ্ৰুততৰ বুলি লক্ষ্য কৰিছে কমিটিয়ে ৷ ক’ৰোনা মহামাৰী নিয়ন্ত্ৰণ হ’লেও এই প্ৰক্ৰিয়া চলি যোৱাৰ পক্ষে মত দিছে কমিটিয়ে ৷ সংসদৰ আইন আৰু বিচাৰ সংক্ৰান্তীয় স্থায়ী কমিটিৰ প্ৰধান ৰাজ্যসভাৰ সাংসদ ভূপেন্দ্ৰ যাদৱৰ মতে সময়ৰ সৈতে সলনি হ’ব, প্ৰযুক্তি এতিয়া গেম চেঞ্জাৰ হিচাপে ধৰা দিছে ৷ কমিটিয়ে ইতিমধ্যে অন্তবর্তী ৰিপৰ্ট ৰাজ্যসভাৰ অধ্যক্ষ বেংকয়া নাইডুৰ হাতত জমা দিছে ৷ উল্লেখ্য যে আৰ্থিকভাৱে পিছপৰা মানুহৰ ন্যায় বিচাৰ পোৱাত সুবিধা হ’ব ৷ অনলাইন কৰ্ট নাগৰিকৰ বন্ধু আৰু দুৰ্বল সাক্ষীৰ সাক্ষ্য প্ৰদানৰ সুৰক্ষা নিশ্চিত কৰিব ৷ লগতে কোৱা হৈছে, আগন্তুক দিনত প্ৰযুক্তি গেম চেঞ্জাৰ হ’ব ৷ আইনী দক্ষতা আৰু জ্ঞানৰ সৈতে পৰবর্তী সময় আইনজীৱীসকলৰ প্ৰযুক্তিও সুদক্ষ হ’ব ৷ সময়ৰ দাবী মানি অনলাইন আদালতৰ প্ৰয়োজন ৷ অনলাইন আদালতৰ পৰিকাঠামোগত সীমাবদ্ধতা লৈ প্ৰশ্ন কৰিছিল বাৰ কাউন্সিলে ৷ কাউন্সিলৰ দাবী, ৫০ শতাংশ আইনজীৱীৰ লেপটপ নাই ৷ প্ৰযুক্তিত পাৰদৰ্শী নহ’লে এই ব্যৱস্থাত সফল হোৱা অসম্ভৱ ৷

দৈনন্দিন বাৰ্তা ডেস্ক : ভাৰতত যোৱা ২৪ ঘণ্টাত অৰ্থাৎ শুকুৰবাৰে অভিলেখ সংখ্যক ৯৬,৫৫১ জন লোক নতুনকৈ ক’ৰোনত আক্ৰান্ত হৈছে ৷ ইয়াৰ লগতে এই ভাইৰাছত আক্ৰান্ত হৈ ১২০৯ জন লোকৰ মৃত্যু হয় ৷ উল্লেখ্য যে দেশত ক’ভিড-১৯ত আক্ৰান্ত হোৱা মুঠ সংখ্যাই ৪৫ লাখ অতিক্ৰম কৰিলে ৷ ভাৰতত মুঠ ৪৫,৬২,৪১৫ জন লোক ক’ৰোনত আক্ৰান্ত হৈছে ৷ ইয়াৰে ভিতৰত ৯,৪৩,৪৮০ জন সক্ৰিয় ৷ তদুপৰি ৩৫,৪২,৬৬৪ জন লোক আৰোগ্য হৈছে ৷ কেন্দ্ৰীয় স্বাস্থ্য মন্ত্ৰালয়ৰ তথ্যত এই কথা প্ৰকাশ৷ আনহাতে দেশত মৃত্যুৰ মুঠ সংখ্যা হ’ল ৭৬,২৭১ জন ৷ মন কৰিব লগা যে ভাৰতত এদিনত সৰ্বাধিক ক’ভিড-১৯ত আক্ৰান্ত হৈছে যিটো আমেৰিকাতকৈ বেছি ৷ ইপিনে ১৫ এপ্ৰিলত সৰ্বাধিক ২৪৯৪ জন লোকৰ মৃত্যু হয় ৷ দেশৰ ভিতৰত সৰ্বাধিক ক’ৰোনাত আক্ৰান্ত হোৱা ৰাজ্যখন হ’ল মহাৰাষ্ট্ৰ ৷ এইখন ৰাজ্যত ২ লাখ ৫৩ হাজাৰ ১০০ জনৰ সক্ৰিয় ৷ আনহাতে ৰাজ্যখনত ৬ লাখ ৮৬ হাজাৰ ৪৬২ জন সুস্থ হৈছে আৰু ২৭,৭৮৭ জনৰ মৃত্যু হৈছে ৷ ইয়াৰ পাচতে অন্ধ্ৰপ্ৰদেশত ৯৭,২৭১ জনৰ সক্ৰিয় ৷ ৰাজ্যখনত ৪,২৫,৬০৭ জন ৰোগী আৰোগ্য হৈছে আৰু ৪৬৩৪ জনৰ মৃত্যু হৈছে ৷ দিল্লীত ২৩,৭৭৩ জনৰ সক্ৰিয় ৷ এইখন ৰাজ্যত এক লাখ ৭২ হাজাৰ ৭৬৩ জন আৰোগ্য হৈছে ৷ ৰাজ্যখনত ৪৬৩৮ জনৰ মৃত্যু হৈছে ৷ ইপিনে ইণ্ডিয়ান কাউন্সিল অব মেডিকিল ৰিচাৰ্চে জনোৱা মতে দেশত ১০ ছেপ্টেম্বৰলৈকে ১১,৬৩,৬৪২ টা নমুনা পৰীক্ষা কৰা হৈছে ৷ দেশত ৫,৪০,৯৭,৯৭৫ টা মুঠ নমুনা পৰীক্ষা কৰা হৈছে ৷