নলবাৰী ১৮ নৱেম্বৰ : নলবাৰী বালিলেচাত শ্ৰী শ্ৰী কালি দেৱালয় সন্মুখত উত্তপ্ত পৰিস্থিতি । বনবিভাগৰ গাড়ী আটক কৰিলে ৰাইজে । ঘটনা অনুসৰি বিগত বহু মাহ ধৰি বালিলেছা পথেৰে টেক্টৰ , ডাম্পাৰ আদিয়ে অবৈধ ভাৱে পাগলদিয়া নদীৰ বালি কঢ়িয়াই থকাত পৰিলক্ষিত হৈছে । বিনা চালান বিহীন ভাবে অবৈধ ভাৱে মাটি কঢ়িওৱা এই গাড়ী বিলাকৰ বাবে স্হানীয় ৰাইজে যাতায়তৰ লগতে দিনে দিনে বৃদ্ধি হোৱা ধূলি বাবে বহুত অসুবিধা সন্মুখীন হৈ আছে । বহদিন ধৰি স্থানীয় ৰাইজে নলবাৰী বনবিভাগক লিখিত ভাৱে দৰ্খাস্ত প্ৰদান কৰাৰ পিছত ও আজিলৈ কোনো ব্যৱস্থা নকৰা বুলি ৰাইজে অভিযোগ উত্থাপন কৰিছে । এনে সময়তে আজি এখন ট্ৰেক্টৰে অবৈধ ভাৱে বালি কঢ়িয়াই অনি থকাৰ সময়ত স্থানীয় বনবিভাগক খবৰ দিয়ে ।  কিন্তু বনবিভাগৰ দল এটি ঘটনাস্থলীত উপস্থিত হয় গোপন বুজা বুজিৰে ট্ৰেক্টৰে যাব দিয়া বুলি ব্যাপক অভিযোগ উত্থাপন কৰি স্থানীয় ৰাইজে বনবিভাগৰ গাড়ী খন আটক কৰে । প্ৰায় দুই ঘন্টা ধৰি ৰাইজৰ হাতত আৱদ্ধ হৈ থকাৰ পিছত বনবিভাগৰ লোকে ভৱিষ্যতে অবৈধ ভাৱে বালি কঢ়িওৱা টেক্টৰৰ ওপৰত বিহিত ব্যৱস্থা লোৱা প্ৰতিশ্ৰুতি দিয়াৰ পিছত হে স্থানীয় ৰাইজে বনবিভাগৰ গাড়ী খনক যাব দিয়ে । উল্লেখ্য যে বালিলেচাৰ সমীপৰ নামদোঙাত থকা পালগদিয়া ঘাটত বালি মাফিয়া হামিদ আলীয়ে বহুত দিন ধৰি অবৈধ ভাৱে মাটি কাটি থকা বুলি স্থানীয় ৰাইজে অভিযোগ উত্থাপন কৰে ।

টংলা,১৮ নৱেম্বৰ : বি টি চিত এতিয়া নিৰ্বাচনৰ বতাহে আকাশ বতাহ কঁপাই তুলিছে। টংলা উচ্চতৰ মাধ্যমিক বিদ্যালয় খেল পথাৰত বি টি চিৰ পাঁচটা সমষ্টিৰ ৰাইজৰ সহযোগত অনুষ্ঠিত হোৱা ইউ পি পি এলৰ পৰিৱৰ্তন জনসভাত ইউ পি পি এলৰ সভাপতি প্ৰমোদ বড়োয়ে অংশগ্ৰহণ কৰি ৰাইজৰ আগত বক্তব্যত কয় যে দুই মহৰ যুদ্ধত বিৰিণাৰ মৰণ হয় যদিও আমি বিৰিণা নহয়, সেয়েহে আমাৰ মৰণ নাই। ১৭ বছৰে দুখেৰে পাৰ কৰিলোঁ, এতিয়া ভাল দিন আহিছে । আমাৰ সমাজত সকলোৰে ভাষা সংস্কৃতি, ৰীতি-নীতি জীয়াই থাকিব লাগিব । বি টি আৰত  এতিয়া পৰিৱৰ্তনৰ ঢৌ উঠিছে। আমি প্ৰতিশোধ লব লাগিব, প্ৰতিশোধ মানে হিংসা নহয় , প্ৰতিশোধ মানে গণতান্ত্ৰিক আন্দোলন । বি টি আৰ চুক্তিত সকলো আছে কিন্তু এটাই নাই সেইটো হল দুৰ্নীতি বুলি কয়। লগতে হাগ্ৰামাই সকলো জনগোষ্ঠীক থগিছে , দুখীয়াৰ টকা খাইছে বুলি অভিযোগ কৰে তেওঁ। লগতে কয় যে বি টি আৰত আমি শান্তি সম্প্ৰতি গঢ়ি  বি টি আৰ চুক্তিৰ নীতিৰ আধাৰত সকলোয়ে সমান সুবিধা লাভ কৰিব, মাটি বাৰীৰ অধিকাৰ লাভ কৰিব। সভাত তেওঁ ব্যক্ত কৰি কয় যে ইউ পি পি এল চৰকাৰ আহিলে হাতী আৰু মানুহ সংঘাত ৰোধ কৰাৰ ব্যৱস্থা কৰা হব। লগতে কয় যে বি টি আৰ অঞ্চলত প্ৰত্যিক জাতি জনগোষ্ঠীৰ ভাষা সংস্কৃতি,ৰীতি নীতি জীয়াই ৰখা দায়িত্ব ইউ পি পি এল চৰকাৰ থাকিব । দুৰ্নীতি কৰা লোকক বিচাৰি আনি আইনগত ভাবে শাস্তি দিয়া হব, ইয়াত বড়ো অনাবড়ো বিভেদ নচলিব, গণতন্ত্ৰ দেশত সকলো সমান, আমি সমাজৰ কাৰণে ৰাজনীতি কৰিছোঁ দুৰ্নীতিৰ কাৰণে নহয়, ইউ পি পি এলে কৰ্ম সংস্কৃতিক আকোঁৱালী লৈ আহিছে, ভাৰত তথা অসম চৰকাৰে আমাক নিৰাপত্তা দিব লাগিব, আমাৰ চৰকাৰ আহিলে বি টি আৰত সকলো জাতি জনগোষ্ঠীৰ উন্নয়ন কাৰণে উন্নয়ন পৰিসদ গঠন কৰি দিয়া হব লগতে সাহিত্যৰ ক্ষেত্ৰত অনুদান আগবঢ়োৱা হব বুলি ঘোষণা কৰে । উক্ত পৰিৱৰ্তন জনসভাত পাঁচটা সমষ্টি ক্ৰমে খালিংদুৱাৰ, মুদৈবাৰী, খৈৰাবাৰী, ভেৰগাওঁ আৰু নোনাই ছেফাফাং সমষ্টিৰ প্ৰায় ২০ হাজাৰতকৈ অধিক ৰাইজে আহি জনসমুদ্ৰত পৰিণত কৰা উক্ত অনুষ্ঠান খনৰ আদৰণি ভাষণৰ প্ৰসংগত ইউ পি পি এলৰ প্ৰতিষ্ঠাপক সভাপতি ইউ জি ব্ৰহ্মই কয় যে এতিয়া ঘৰে ঘৰে ইউ পি পি এল হৈ গল । আমাৰ মঞ্চত জাতি জনগোষ্ঠীৰ নৃত্য প্ৰদৰ্শন হয় । বি টি আৰ অঞ্চলত এক নতুন পৰিৱৰ্তন হব গৈ আছে । অস্ত্ৰ আন্দোলন সমাধান কৰি শান্তি, আদৰ্শ, প্ৰগতিশীল সমাজ প্ৰতিষ্ঠা কৰিবলৈ গৈ আছে ইউ পি পি এল চৰকাৰে । বি টি আৰত আৰু কেতিয়াও  আন্দোলনৰ সৃষ্টি নহয় । অসমত অসমীয়া ভাষা জীয়াই থাকিব লাগিব । মই অসমীয়া ভাষাত সাহিত্য সৃষ্টি কৰিব চেষ্টা কৰি আছো। আমাক নিৰাপত্তা লাগে বুলি ব্যক্ত কৰি কয়।

জামুগুৰিহাট,১৮ নৱেম্বৰ : গুৰুজনাৰ সৃষ্টিৰাজীক প্ৰচাৰ প্ৰসাৰৰ লগতে সেই সৃষ্টিৰাজীসমুহক চৰ্চাৰ দিশত সত্ৰসমুহৰ ভূমিকা অপৰিসীম ৷ যাৰবাবে চৰকাৰেও সত্ৰসমুহৰ উন্নয়ণ তথা সৃষ্টিৰাজীসমুহ চৰ্চাৰ বাবে অনুদান আগবঢ়াই আহিছে ৷ কিন্তু চৰকাৰী এনে সাহাৰ্যৰপৰা যেন বঞ্চিত হৈ আহিছে জামুগুৰিহাটৰ প্ৰথমখন সত্ৰ হিচাপে খ্যাত শ্ৰীশ্ৰী দৌকাচাপৰি সত্ৰ ৷ ১৭১৭ চনতে স্থাপিত জামুগুৰিহাটৰ দৌকাচাপৰি সত্ৰ খনে বিগত তিনিশ বছৰে গুৰুজনাৰ সৃষ্টিৰাজীসমুহ চৰ্চাৰ দিশত বিশেষ ভূমিকা গ্ৰহণ কৰি আহিছে যদিও বাৰে বাৰে সত্ৰখন চৰকাৰী অনুদানৰপৰা বঞ্চিত হৈ অহাৰ অভিযোগ উল্থাপন হৈছে ৷ অঞ্চলটোৰ কেবাখনো সত্ৰৰ তুলনাত প্ৰথমখন সত্ৰ হিচাপে স্থাপন হোৱা শ্ৰীশ্ৰী দৌকাচাপৰি সত্ৰখনৰ চৌদিশৰ পৰিৱেশটোৱেই প্ৰকট কৰে যে কিমান কষ্ট ত্যাগ কৰি সত্ৰখন জীয়াই ৰাখিছে বৰ্তমান সত্ৰাধিকাৰৰ দায়িত্বত থকা ব্যক্তিগৰাকীয়ে ৷ বৃহৎ সত্ৰখনত চৌপাশে বাঁহৰ চোঁচ কাটি বেৰাৰে ঢাকি চৰ্চা অব্যাহত ৰাখিছে বৰ্তমানৰ সত্ৰাধিকাৰৰ দায়িত্বত থকা সত্ৰাধিকাৰ ৰাজেন গোস্বামীয়ে ৷ অন্যান্য সত্ৰই সত্ৰৰ উন্নয়নৰ বাবে চৰকাৰী সাহাৰ্য লাভ কৰাৰ বিপৰীতে জামুগুৰিহাটৰ প্ৰথমখন সত্ৰ চৰকাৰী অনুদানসমুহৰ পৰা বছৰ বছৰ ধৰি বঞ্চিত হ’ব লগীয়া হোৱাত আক্ষেপো প্ৰকাশ কৰিছে সত্ৰাধিকাৰগৰাকীয়ে ৷ পূৰ্বে প্ৰয়াত শৰৎ গোস্বামীৰ দায়িত্বত পৰিচালিত দৌকাচাপৰি সত্ৰখন গোস্বামীৰ মৃত্যুৰ পাছত চাৰিবছৰ ধৰি পৰিচালনা কৰা ভাৰপ্ৰাপ্ত সত্ৰাধিকাৰ ৰাজেন গোস্বামীয়ে উচুপি উচুপি কয় যে প্ৰতিবাৰেই সত্ৰখনৰ উন্নয়নৰ বাবে চৰকাৰে আগবঢ়োৱা অনুদানৰ তালিকাত নাম সন্মিবিষ্ট হোৱা বুলি খৱৰ পাঁও যদিও শেষত কি কাৰণত বঞ্চিত হঁও আমিবোৰ সেই বিষয় লৈ অজ্ঞ ৷ অৱশ্যে ২০০৯ বৰ্ষত জিলা পৰিষদৰ ফালৰপৰা ৩৫ হাজাৰ আৰু ২০১৬ চনত বিধায়ক পুঁজিৰপৰা ২৫ হাজাৰ টকাৰ এক অনুদান লাভ কৰিছে বুলিও জানিব দি সেয়া বৰ্তমান সময়ত অন্যান্য সত্ৰসমুহে লাভ কৰা চৰকাৰী অনুদানসমুহৰ তুলনাত  তেনেই নগন্য বুলিও ব্যক্ত কৰে ভাৰপ্ৰাপ্ত সত্ৰাধিকাৰ ৰাজেন গোস্বামীয়ে ৷ এতিয়া প্ৰশ্ন হয় চৰকাৰে সত্ৰসমুহৰ সৰ্বাঙ্গিন উন্নয়নৰ  বাবে আগবঢ়োৱা অনুদান লাভৰ দিশতো দেৰি কৰে নেকি কোনো লোকে৷ জামুগুৰিহাটৰ প্ৰথমখন সত্ৰ এই শ্ৰীশ্ৰী দৌকাচাপৰি সত্ৰখনে সত্ৰসমুহৰ উন্নয়নৰ বাবে চৰকাৰে আগবঢ়োৱা অনুদান লাভ কৰিবলৈ সক্ষম হ’বনে ? উল্লেখ্য যে ১৬৬২ চনতে নগাঁৱৰপৰা নাঁওৰে আহি এই সত্ৰই প্ৰথমে ভৰলীপাৰত স্থিতি লৈছিল যদিও ভৰলীৰ পানী, গৰাখহনীয়া আদিৰ বাবেই ১৭১৭ চনত দৌকাচাপৰীত এইখন সত্ৰই স্থিতি লৈছিলহি ৷ প্ৰণিধানযোগ্য যে শ্ৰীশ্ৰী দৌকাচাপৰি সত্ৰৰ ভাগৱতভাগ বৰ্তমান শ্ৰীমন্ত শংকৰদেৱ কলাক্ষেত্ৰত সংৰক্ষণ কৰি ৰখাৰ লগতে তেজপুৰ সংগ্ৰহালয়ত এইখন সত্ৰৰে পালকি আৰু সত্ৰাধিকাৰ ঘনশ্যাম দেও, চক্ৰপানী দেও আদিয়ে ব্যৱহাৰ কৰা দোলাখনৰ কিছু অংশ সংৰক্ষণ কৰি ৰখা হৈছে ৷

নগাঁও, ১৭ নৱেম্বৰ : নগাঁও চহৰৰ ঐতিহ্যমণ্ডিত শিক্ষানুষ্ঠান নগাঁও চৰকাৰী উচ্চতৰ মাধ্যমিক বালক বিদ্যালয়ৰ আজি ১৫৫ সংখ্যক প্ৰতিষ্ঠা দিৱস উদযাপন কৰা হয়।আজি পুৱা বিদ্যালয় পৰিচালনা আৰু উন্নয়ন সমিতিৰ সভাপতি গংগাবল্লভ গোস্বামীয়ে পতাকা উত্তোলন কৰি প্ৰতিষ্ঠা দিৱসৰ কাৰ্যসূচীৰ শুভাৰম্ভ কৰে।ইয়াৰ পিছতেই স্মৃতি তৰ্পন কৰে বিদ্যালয় খনৰ প্ৰাক্তন অধ্যক্ষ বিমল বৰাই।কোভিড প্ৰটকল মানি দিনৰ ১১ বজাত অনুষ্ঠিত মুকলি সভাত মুখ্য অতিথি হিচাপে ‌অংশগ্ৰহণ কৰি বিদ্যালয় খনৰ প্ৰাক্তন ছাত্ৰ তথা নগাঁও সদৰ সমষ্টিৰ বিধায়ক ৰূপক শৰ্মাই নগাঁও চৰকাৰী উচ্চতৰ মাধ্যমিক বিদ্যালয়ৰ শৈক্ষিক গৰিমাৰ বিষয়ে উল্লেখ কৰি কয় যে বৰ্তমান পৰিবৰ্তিত সময়ত শিক্ষাৰ্থী আৰু শিক্ষক উভয়ে আধুনিক প্ৰযুক্তিক শিক্ষাৰ এটি অবিচ্ছেদ্য অংগ কৰি ললেও পূৰ্বৰ গুৰু ছাত্ৰৰ সমন্ধ পাহৰি যোৱাটো উচিত নহব।আনহাতে এসময়ত অধ্যয়ন কৰা বিদ্যালয়খনৰ ১৫৫ সংখ্যক প্ৰতিষ্ঠা দিৱসৰ কাৰ্যসূচীত অংশগ্ৰহণ কৰি নিজকে ধন্য আৰু গৰ্বিত অনুভৱ কৰা বুলি বিধায়ক শৰ্মাই মন্তব্য কৰে।মুকলি সভাত পুবেৰুন বৰা স্মৃতি ন্যাস ,কেপ্তেইন থানেশ্বৰ শৰ্মা স্মৃতি ন্যাস ,পূৰ্ণকান্ত ৰাজখোৱা-ঘুনুচা ৰাজখোৱা স্মৃতি ন্যাস,দীপ্তি গোস্বামী স্মৃতি ন্যাস,শ‌ইকীয়া স্মৃতি ন্যাসৰ বঁটা সমূহ বিদ্যালয় খনৰ দহগৰাকী মেধাৱী আৰু দৰিদ্ৰ ছাত্ৰক প্ৰদান কৰা হয়।মুকলি সভাত বিদ্যালয় খনৰ প্ৰাক্তন ছাত্ৰ তথা বিশিষ্ট সাহিত্যিক ভদ্ৰেশ্বৰ ৰাজখোৱা, শিক্ষাবিদ সদা বৰা,অধিবক্তা কৃপাসিন্ধু অধিকাৰীয়ে অংশগ্ৰহণ কৰি ভাষণ প্ৰদান কৰে।সভাৰ আৰম্ভণিতে আদৰণি ভাষণ প্ৰদান কৰে বিদ্যালয় খনৰ অধ্যক্ষা দীপিকা লস্কৰে।সন্ধিয়া বিদ্যালয় খনৰ চৌহদত ১৫৫ গছি বন্তি প্ৰজ্বলনৰে প্ৰতিষ্ঠা দিৱসৰ কাৰ্যসূচী সামৰণি পৰে।বন্তি প্ৰজ্বলন কাৰ্যসূচীৰ শুভাৰম্ভ কৰে নগাঁও জিলা কৰ্মচাৰী পৰিষদৰ সভাপতি মিন্টু শৰ্মাই।

নগাঁও,১৭ নৱেম্বৰঃ আজি নগাঁও চহৰৰ কলংপাৰৰ সমীপত থকা মাধ্যম আন্দোলনৰ শ্বহীদ অনিল বৰাৰ সমাধি স্থলীত ছহিদ গৰাকীৰ এটি আৱক্ষ মূৰ্ত্তি উন্মোচন কৰা হয় । সদৌ নগাঁও জিলা ছাত্ৰ সন্থাৰ বিশেষ প্ৰচেষ্টাত বিশিষ্ট শিল্পী দিগন্ত মাধৱ গোস্বামীয়ে গ্লাছ ফাইবাৰৰে নিৰ্মাণ কৰি উলিওৱা এই আৱক্ষ মূৰ্ত্তিতো আজি উন্মোচন কৰে অসম সাহিত্য সভাৰ সভাপতি ডঃ কুলধৰ শইকীয়াই । গায়ন-বায়ন , খোল-তালৰ মাংগলিক ধ্বনিৰ মাজত বন্তি প্ৰজ্বলন কৰি , শ্বহীদ অনিল বৰাৰ আৱক্ষ মূৰ্ত্তিতো উন্মোচন কৰা হয় । এই উপলক্ষে অনুষ্ঠিত হোৱা সীমিত পৰিসৰৰ উন্মোচনী সভাত অসম সাহিত্য সভাৰ সভাপতি গৰাকীৰ লগতে বহু কেইগৰাকী বিশিষ্ট ব্যক্তি উপস্থিত থাকে । আৱক্ষ মূৰ্ত্তি উন্মোচন কৰি অসম সাহিত্য সভাৰ সভাপতি ডঃ কুলধৰ শইকীয়াই অসমীয়া ভাষা , সাহিত্য , সংস্কৃতি ৰক্ষাৰ যুঁজত সাহিত্য সভাৰ লগতে সকলো জাতীয় দল-সংগঠনক সন্মিলিতভাৱে সহযোগিতা আগবঢ়াবলৈ আহ্বান জনায় । নিজৰ ভাষণত অসম সাহিত্য সভাৰ সভাপতি ডঃ কুলধৰ শইকীয়াই কয়,”ছহিদ অনিল বৰাৰ আৱক্ষ মূৰ্তিটো উন্মোচন কৰিবলৈ পাই আজি মই সুখ অনুভৱ কৰিছো। ছাত্ৰ সন্থাৰ উদ্যোগত ইয়াত ছহিদ গৰাকীৰ আৱক্ষ মূৰ্ত্তিটো প্ৰতিষ্ঠা কৰাত আমি সুখ পাইছো এই কাৰণেই যে সময়ৰ যি বিধ্বংসী ৰূপ,সময়ৰ বিধ্বংসী প্ৰৱাহত আমি তাৰ বহু কথাই পাহৰি যাও। কিন্তু এনেকুৱা কিছুমান কাৰ্যসূচীয়ে সেই স্মৃতি সজীৱ কৰি তোলে। অসম সাহিত্য সভাৰ প্ৰসঙ্গত শইকীয়াই কয়,”অসম সাহিত্য সভাৰ লগত এই খন ৰাজ্যৰ শুভ চিন্তা কৰা প্ৰত্যেক জন ব্যক্তি জড়িত হ’ব পাৰে। তেওঁ লোকৰ বাবে সাহিত্য সভাৰ দুৱাৰ খোলা আছে।”তেওঁ আৰু কয়,”নৱ প্ৰজন্মই সাহিত্য সভা খন আগুৱাই নিব লাগিব। কিয়নো নতুন প্ৰজন্মই অসমীয়া ভাষা, সাহিত্য, সংস্কৃতি নাচালে এটা জাতি জীয়াই থাকিব নোৱাৰে। সেয়েহে নৱ প্ৰজন্মক সাহিত্য সভাৰ লগত জড়িত কৰাৰ প্ৰয়াস কৰা হৈছে।” অসমৰ জাতীয় সংগঠন সমূহক জীয়াই ৰাখিব নোৱাৰিলে আমি ভাৰাক্ৰান্ত হ’ম বুলি মন্তব্য কৰি শইকীয়াই আৰু কয়,”জাতীয় সংগঠন সমূহে অসমীয়া ভাষা সংস্কৃতিৰ বাবে সমূহীয়াকৈ সংগ্ৰাম কৰিব লাগিব।” ছহিদ অনিল বৰাৰ আৱক্ষ মূৰ্তি উন্মোচন অনুষ্ঠানত ছহিদ অনিল বৰাৰ ভ্ৰাতৃ অপূৰ্ব বৰা,অসম সাহিত্য সভাৰ প্ৰাক্তন প্ৰধান সম্পাদক পদুম ৰাজখোৱা, গল্পকাৰ শিবানন্দ কাকতি,সদৌ অসম ছাত্ৰ সন্থাৰ কেন্দ্ৰীয় সাংগঠনিক সম্পাদক ৰন্টু শৰ্মা, আছুৰ কেন্দ্ৰীয় কাৰ্যনিৰ্বাহ সদস্য মৃদুল হাজৰিকা,সদৌ নগাঁও জিলা ছাত্ৰ সন্থাৰ সভাপতি গৌৰী শংকৰ শইকীয়া,আছুৰ নগাঁও জিলা সমিতিৰ সাধাৰণ সম্পাদক অমৰ জ্যোতি ফুকন,সাহিত্যিক ৰতিমোহন নাথ,অসম সাহিত্য সভাৰ নগাঁও আঞ্চলিক কাৰ্য্যালয়ৰ সহকাৰী সম্পাদক মৃণাল হাজৰিকা,আনন্দৰাম ঢেকিয়াল ফুকন মহাবিদ্যালয়ৰ অধ্যক্ষ ডঃ সুৰজিৎ কুমাৰ ভাগৱতী, নগাঁও জিলা সাহিত্য সভাৰ সভাপতি পৰাণ কুমাৰ বৰুৱা, প্ৰাক্তন বিধায়ক গিৰীন্দ্ৰ কুমাৰ বৰুৱা আদিয়ে অংশগ্ৰহণ কৰে।

মদাৰখাত ১৭ নৱেম্বৰ : অসমৰ সৰ্বাংগীন বিকাশ সাধন হ’লেহে অসমীয়া জাতিৰ উত্তৰণ সম্ভৱপৰ হ’ব। বিভিন্ন ভাষা-ভাষী তথা জনগোষ্ঠীৰ ঐক্যৱদ্ধ আৰু আপোচহীন চিন্তাই অসমীয়া জাতিক জগতত চিনাকি কৰাই দিব। অসমৰ প্ৰতিটো ক্ষুদ্ৰ বৰ জাতি-জনগোষ্ঠীৰ সুকীয়া বৈশিষ্ট্যতাই অসমৰ সামাজিক, সাংস্কৃতিক দিশত এক নতুন মাত্ৰা প্ৰদান কৰি আহিছে। অসমৰ সাতামপুৰুষীয়া পৰম্পৰা আৰু সংস্কৃতিত কোনো অপশক্তিয়ে যাতে প্ৰভাৱ বিস্তাৰ কৰিব নোৱাৰে তাৰ প্ৰতি সকলোৱে সদা সচেতন হৈ থাকিব লাগিব। অসমৰ জাগ্ৰত প্ৰহৰী ৰূপে অভিভাৱকৰ ভূমিকাত ৰাইজক অৱতীৰ্ণ হ’বলৈ আহবান জনাই সদৌ অসম ছাত্ৰ সন্থাৰ সাধাৰণ সম্পাদক লুৰীণজ্যোতি গগৈয়ে। আজি লাহোৱাল আঞ্চলিক ছাত্ৰ সন্থাৰ নৱ নিৰ্মিত কাৰ্যালয় শ্বহীদ ভৱন শুভ উদ্বোধন কৰি সভাত অংশ লৈ ছহিদসকলৰ ত্যাগক সোঁৱৰি সেই ত্যাগক কেতিয়াও অথলে নাযায় বুলি বক্তব্যত উল্লেখ কৰে। ভাষণ প্ৰসংগত নৱ নিৰ্মিত শ্বহীদ ভৱনৰ মজিয়াত সাহিত্য, সংস্কৃতিৰ নতুন নতুন পৰিৱেশ, চিন্তা আৰু অনুশীলনে জাতিৰ পৰিকাঠামো সুদৃঢ় কৰাত সহায়ক হ’ব বুলি আশা প্ৰকাশ কৰে। জাতিৰ জটিল সন্ধিক্ষণত লাহোৱাল আঞ্চলিক ছাত্ৰ সন্থাই অগ্ৰণী ভূমিকা পালন কৰাৰ পোষকতা কৰে। নীলিম আকাশত অসমৰ জাতীয় জীৱনৰ শংকা, পৰিবৰ্তনশীল সমাজ ব্যৱস্থাক প্ৰগতিশীল কৰি তুলিবলৈ অংগীকাৰবদ্ধ হ’বলৈ আহ্বান জনায়। অসমৰ সম্পদৰ যি অধিকাৰ সৰ্বকালৰ বাবে খিলঞ্জীয়াৰ সপক্ষত থকাৰ বাবে যিমানেই বাধা নাহক তাক প্ৰতিহত কৰিবই লাগিব, অসমীয়া সমাজ ব্যৱস্থাক ভাঙি মষিমূৰ কৰাৰ অপশক্তিৰ যি অভিপ্ৰায় তাক সমূলঞ্চে উভালি পেলাব লাগিব বুলি উল্লেখ কৰে। ৰাজনৈতিকভাৱে অসমীয়া জাতিৰ মেৰুদণ্ড থানবান কৰাৰ যি ষড়যন্ত্ৰ তাক ওফৰাই আপোচবিহীন খিলঞ্জীয়া সত্তা এটা প্ৰতিষ্ঠাৰ হকে মত পোষণ কৰে। লাহোৱাল আঞ্চলিক ছাত্ৰ সন্থাৰ কাৰ্যালয় শুভ উদ্বোধনী সভাত সভাপতিত্ব কৰে লাহোৱাল আঞ্চলিক ছাত্ৰ সন্থাৰ সভাপতি বিদ্যুৎ সাগৰ দত্তই। সভাখনৰ আঁত ধৰে দিব্যজ্যোতি দত্ত আৰু লাহোৱাল আঞ্চলিক ছাত্ৰ সন্থাৰ ভাৰপ্ৰাপ্ত সাধাৰণ সম্পাদক উজ্জ্বল বৰুৱাই। লাহোৱাল মহাবিদ্যালয়ৰ অধ্যক্ষ জ্যোতি প্ৰসাদ দত্তই শ্বহীদ ভৱনৰ পৰাই লাহোৱালৰ ভৱিষ্যতৰ ছবি নিৰ্ধাৰণ হোৱাৰ আশা কৰি কোনোধৰণৰ অপচিন্তাই শ্বহীদ ভৱনৰ মৰ্যদা লাঘৱ নকৰে তাৰ প্ৰতি সচেতন হ’বলৈ মত প্ৰকাশ কৰে। লাহোৱাল প্ৰেছ ক্লাবৰ উপদেষ্টা তথা সাংবাদিক যাদৱ গগৈয়েও ভাষণ প্ৰদান কৰি লাহোৱাল জাতি-জনগোষ্ঠীৰ মিলনস্থলী বুলি অভিহিত কৰি ঐক্যৱদ্ধভাৱে লাহোৱালৰ উত্তৰণ হোৱাত লাহোৱাল আঞ্চলিক ছাত্ৰ সন্থাই আগ ভাগ ল’ব বুলি আশা কৰে। সভাত লাহোৱাল প্ৰেছ ক্লাবৰ উপদেষ্টা কণৌজ শইকীয়া, প্ৰাক্তন আছু কৰ্মী দিব্যজ্যোতি দত্ত আৰু সুভাষ দত্তই অংশ লয়। স্থানীয় গায়ন বায়নেৰে আছুৰ সাধাৰণ সম্পাদক লুৰীণজ্যোতি গগৈক আদৰি আনি মাংগলিক কাৰ্যসূচীৰে কাৰ্যালয় মুকলি কৰা হয়। আনুষ্ঠানিকভাৱে ফিটা কাটি কাৰ্যালয় উদ্বোধন কৰে আছু সাধাৰণ সম্পাদকগৰাকীয়ে। অনুষ্ঠানত বিভিন্ন নেতৃস্থানীয় ব্যক্তিৰ লগতে যথেষ্ট সংখ্যক স্থানীয় ৰাইজে অংশ লয়।