দৈনন্দিন বাৰ্তা সেৱা, গেলেকীঃ ৰাজ্যত পোহৰলৈ আহিছে এটাৰ পিছত আনটো দুৰ্নীতি। অসমত নিযুক্তি কেলেংকাৰী অব্যাহত। শিৱসাগৰ জিলা আবকাৰী বিভাগৰ কনিষ্টবল পদত যোগদান কৰিবলৈ অহা বহিঃৰাজ্যৰ এগৰাকী লোক গ্ৰেপ্তাৰ হোৱা ঘটনাই অঞ্চলজুৰি তীব্ৰ চাঞ্চল্যৰ সৃষ্টি কৰিছে। ভুৱা নিযুক্তি পত্ৰ হাতত লৈ চাকৰিত যোগদান কৰিবলৈ আহি পশ্চিমবংগৰ কোচ বিহাৰৰ যুৱকজন শিৱসাগৰ সদৰ আৰক্ষীৰ জালত পৰে।

প্ৰসেনজিৎ বৰ্মন নামৰ যুৱকজনে ভুৱা নিযুক্তি পত্ৰখন লৈ শিৱসাগৰলৈ আহিছিল আবকাৰী বিভাগত যোগদান কৰিবলৈ। আবকাৰী আয়ুক্তৰ স্বাক্ষৰ সম্বলিত নিযুক্তি পত্ৰৰে কৰ্মত যোগদানৰ কৰিবলৈ আহিছিল প্ৰসেনজিৎ বৰ্মনে। ইফালে শিৱসাগৰ জিলা আবকাৰী অধীক্ষকৰ নিযুক্তি পত্ৰত সন্দেহ ওপজাত খবৰ দিয়ে সদৰ আৰক্ষীক। তাৰ পিছতে ঘটনাস্থলীত আৰক্ষী উপস্থিত হৈ গ্ৰেপ্তাৰ কৰে প্ৰসেনজিৎ বৰ্মনক। সম্প্ৰতি আৰক্ষীৰ তদন্তত সন্মুখলৈ আহিছে ভয়ানক তথ্য।

দুধনৈৰ পৱন বৰা নামৰ এটা দালালে গুৱাহাটীৰ এখন হোটেলত কৰ্মৰত বৰ্মনক ধনৰ বিনিময়ত প্ৰদান কৰিছিল উক্ত নিযুক্তি পত্ৰখন। ৪৮ হাজাৰ টকাৰ বিনিময়ত প্ৰসেনজিৎ বৰ্মনে লাভ কৰিছিল আবকাৰী বিভাগৰ নিযুক্তি পত্ৰখন। বৰ্তমান শিৱসাগৰ সদৰ আৰক্ষী থানাৰ লক আপত আছে যুৱকজন। আবকাৰী বিভাগৰ এজাহাৰৰ ভিত্তিত শিৱসাগৰ সদৰ আৰক্ষীয়ে গোচৰ ৰুজু কৰি ঘটনা সন্দৰ্ভত তদন্ত আৰম্ভ কৰিছে।

দৈনন্দিন বাৰ্তা সেৱা, জামুগুৰিহাটঃ আদৰ্শ অবিহনে এটা জাতি জীয়াই থাকিব নোৱাৰে। অসমীয়া জাতিক সেই আদৰ্শ মহাপুৰুষ শ্ৰীমন্ত শংকৰদেৱ-শ্ৰী শ্ৰী মাধৱদেৱে দি থৈ গৈছে। আমি মাথোন সেই আদৰ্শৰে আগবাঢ়ি গ’লেই জাতিৰ সংকট বহুখিনি দূৰ হ’ব। – এই মন্তব্য অসমীয়া সাহিত্য সন্মিলনীৰ প্ৰধান সম্পাদক মিংকু কলিতাৰ।

যোৱা ২৯ অক্টোবত, জামুগুৰিহাটৰ বাপুজী ভৱনত জামুগুৰিহাটৰ অন্যতম কাব্য চৰ্চাৰ অনুষ্ঠান জামুগুৰি কবি মঞ্চৰ উদ্যোগত অনুষ্ঠিত বিশিষ্ট সমাজকৰ্মী, নাট্যকাৰ-ঔপন্যাসিক নাৰায়ণপুৰ পাণবাৰীৰ নন্দেশ্বৰ শইকীয়া স্মাৰক বক্তৃতানুষ্ঠানৰ মুখ্য বক্তা হিচাপে ভাষন প্ৰদান কৰি এইদৰে মন্তব্য আগবঢ়ায়। উল্লেখ্য যে জামুগুৰি কবি মঞ্চৰ সম্পাদক কৃষ্ণকান্ত তালুকদাৰে আঁতধৰা আৰু জ্যোতি কলিতাৰ এটি ঘোষাৰে আৰম্ভ হোৱা  উক্ত বক্তৃতানুষ্ঠানত সভাপতিৰ আসন গ্ৰহণ কৰে বিশিষ্ট প্ৰবীণ কবি তথা জামুগুৰি কবি মঞ্চৰ সভাপতি তৰুণ বৰুৱাই।

সভাখনত নন্দেশ্বৰ শইকীয়াৰ প্ৰতিচ্ছবিত বন্তি প্ৰজ্বলন কৰে তেখেতৰ বোৱাৰী হেমন্তী শইকীয়াই আৰু আদৰণি ভাষণ প্ৰদান কৰে শোণিতপুৰ জিলা কবি সন্মিলনৰ সভাপতি তথা নন্দেশ্বৰ শইকীয়াৰ দ্বিতীয় পুত্ৰ ডাঃ হৰেন শইকীয়াই। ১৯১৮ চনত নাৰায়ণপুৰৰ পাণবাৰীত জন্মলাভ কৰা এইগৰাকী নন্দেশ্বৰ শইকীয়া ৩ বছৰ বয়সতে মাজুলীৰ আউনিআটি সত্ৰলৈ গৈ তাতে শিক্ষা জীৱনৰ পাতনি মেলি পৰৱৰ্তী গুৱাহাটী সোণাৰাম হাইস্কুল আৰু যোৰহাটৰ নৰ্মাল স্কুলত শিক্ষা গ্ৰহণ কৰাৰ উপৰিও হিন্দীত বিষাৰদ ডিগ্ৰী লাভ কৰে।

ইয়াৰ পাছতো তেখেতে চাকৰিমুখী নহৈ ব্যৱসায়ৰ মাজেৰে জীৱন অতিক্ৰম কৰে। ১৯৪২ ৰ স্বাধীনতা সংগ্রামৰ এগৰাকী সৈনিক শইকীয়াই অসমীয়া সাহিত্যৰ ভঁৰাললৈও যথেষ্ট অৱদান আগবঢ়াই থৈ যায়। তেখেতৰ প্ৰকাশিত  গ্ৰন্থ সমূহ ক্ৰমে গনতন্ত্র (উপন্যাস), কৰ্ণ পৰ্ব, প্ৰহ্লাদ চৰিত্ৰ, ভীষ্ম পৰ্ব (আধুনিক নাট), জৱাহৰলাল নেহৰু, ৰাম মনোহৰ লোহিয়া (জীৱনী গ্ৰন্থ) আদি।

ইয়াৰোপৰি তেখেতে তেখেতৰ ‘শইকীয়া ব্ৰাদাৰ্চ বুকষ্টল’ৰ পৰা বহুসংখ্যক মূল্যবান গ্ৰন্থও প্ৰকাশ কৰিছিল। আজিৰ সভাখনত মুখ্য বক্তা মিংকু কলিতাৰ উপৰিও বাপুজী ভৱন নাট্য সমাজৰ সভাপতি জনাৰ্দন ভূঞা, ৰাষ্ট্ৰীয় পুৰস্কাৰ প্ৰাপ্ত কৃতী শিক্ষক তথা বিশিষ্ট সাহিত্যিক মহেশ্বৰ বৰা আৰু জটাধাৰী উপন্যাসৰ বাবে সাহিত্য অকাডেমিৰ যুৱ সাহিত্যিক বঁটা প্ৰাপক তথা নন্দেশ্বৰ শইকীয়াৰ নাতিনী প্ৰাৰ্থনা শইকীয়াই স্মৃতিচাৰণ কৰে।

ভাষণ প্ৰসংগত প্ৰাৰ্থনা শইকীয়াই কয় যে ইতিহাস চেতনাৰ অভাবে নতুন প্ৰজন্মক সমাজৰ পৰা আঁতৰাই আনিছে। আনহাতে সভাখনত শিল্পী বাণীকান্ত দাসৰ গীত আৰু বৰ্ষীয়ান কবি নগেন কলিতাৰ স্বৰচিত কবিতা পাঠে সভাখন সতেজ কৰি তোলে।

জামুগুৰিহাটৰ বাপুজী ভৱনত অনুষ্ঠিত উক্ত সভাখনত অঞ্চলটো বিশিষ্ট ব্যক্তিসকল ক্ৰমে প্ৰেম নাৰায়ণ গোস্বামী, ফুল হাজৰিকা, নাৰায়ণ শইকীয়া, ৰেবতী মোহন হাজৰিকা, নিৰ্মালী দেৱী, কবিতা শৰ্মা, চক্ৰপাণী শৰ্মা, গুৰু প্ৰসাদ উপাধ্যায়, গিৰীন কুমাৰ নাথ, নগেন বৰা, হেম বৰুৱা, ইন্দ্ৰ প্ৰসাদ নাথ, জ্যোতি ভট্টাচার্য, নীলকমল হাজৰিকা, কৰ্পূৰমঞ্জুৰী তালুকদাৰ, উৎপল শৰ্মা প্ৰমুখ্যে অৰ্দ্ধশতাধিক সাহিত্যানুৰাগী উপস্থিত থাকে।

আনহাতে মঞ্চৰ পত্ৰিকা সম্পাদক গীতা শইকীয়াই অহা ১৫ নবেম্বৰত কাব্যালোচনী ‘ঢৌ’ উন্মোচন হ’ব বুলি সভাক অৱগত কৰে। সভাখনৰ সফল ৰূপায়নৰ বাবে সকলোলৈকে উদ্যোক্তাসকলে ধন্যবাদ জ্ঞাপন কৰে।

দৈনন্দিন বাৰ্তৰ সেৱা, শুৱালকুছিঃ সদৌ অসম কৰ্মচাৰী পৰিষদৰ উদ্যোগত আৰু গুৱাহাটী জিলা কৰ্মচাৰী পৰিষদৰ সহযোগত অহা এক নবেম্বৰত গুৱাহাটীত কেন্দ্ৰীয় ভাবে কৰ্মচাৰী শ্বহীদ দিৱস উদযাপন কৰা হব। দৈনন্দিন বাৰ্তাক গুৱাহাটী জিলা পৰিষদৰ সম্পাদক হেমন্ত লহকৰে জানিব দিয়া অনুসৰি গুৱাহাটীস্থ শ্ৰীমন্ত শংকৰদেৱ আন্তৰ্জাতিক প্ৰেখ্যাগৃহত এক নবেম্বৰত  পুৱা ৯ বজাত পৰিষদৰ পতাকা  উত্তোলন। ৯-১৫ বজাত  ছহীদ বেদীত বন্তি প্ৰজ্বলন ও পুস্পাঞ্জ্যলী। ৯-৩০ বজাত  সৰ্বধৰ্ম প্ৰাৰ্থনা। ১০ বজাত স্মৃতি চাৰণ সভা। দিনৰ ১২ বজাত গুৱাহাটী জিলাৰ প্ৰাক্তন বিষয় ববীয়াৰ সম্বৰ্ধনা অনুষ্ঠান আৰু ১ বজাত গ্ৰন্থ উম্নোচন কৰা হব।

সভাত বিশিষ্ট অতিথি হিচাপে উপস্থিত থাকিব অসমৰ মুখ্যমন্ত্ৰী সৰ্বানন্দ সোণোৱাল, বিও মন্ত্ৰী হিমন্ত বিশ্ব শৰ্মা, মুখ্যমন্ত্ৰীৰ মেডিয়া উপদেষ্টা হৃষীকেশ গোস্বামী,  মুখ্য সচিব কুমাৰ সঞ্জয় কৃষ্ণ,  কৃষি মন্ত্ৰী অতুল বৰা,  অৱসৰপ্ৰাপ্ত ভাৰতীয় প্ৰশাসনীয় বিষয়া হিমাংশু শেষৰ দাস,  সদৌ অসম কৰ্মচাৰী পৰিষদৰ প্ৰাক্তন সভাপতি প্ৰদীপ কুমাৰ বৰা আৰু শ্ৰীমন্ত শঙ্কৰদেৱ সংঘৰ প্ৰধান সম্পাদক বাবুল বৰা উপস্থিত থাকিব।

উক্ত সভাতে সুদীৰ্ঘ দিন ধৰি সদৌ অসম কৰ্মচাৰী পৰিষদৰ নেতৃত্ব বহন  কৰা পৰিষদৰ  কান্দাৰী বাসৱ চন্দ্ৰ কলিতাৰ বৰ্ণিল কৰ্মজীৱনৰ আধাৰত সম্পাদনা কৰা অভিনন্দন গ্ৰন্থ অভ্ৰভেদী শুভ  উম্মোচন কৰা হব। মনোজ লহকৰৰ সম্পাদনাত উম্নোচন হবলগীয়া সভাত সদৌ অসম কৰ্মচাৰী পৰিষদৰ সভাপতি প্ৰদীপ দত্ত সম্পাদক প্ৰধান মৃণাল দাসে সদৌতিলৈ উপস্থিতি কামনা কৰিছে।

দৈনন্দিন বাৰ্তা সেৱাঃ বিগত বৰ্ষ সমূহৰ দৰে এইবেলিও ভাৰতীয় জনতা পাৰ্টীৰ গুৱাহাটী মহানগৰ জিলাই অহা ৩১ অক্টোবৰ তাৰিখে চৰ্দাৰ বল্লভ ভাই পেটলৰ জন্মদিৱস উদযাপন কৰিব৷ সেই উপলক্ষে শনিবাৰে বিজেপিয়ে একতাৰ দৌৰ কাৰ্যসূচী ৰুপায়ন কৰিব৷ ভাৰতীয় জনতা পাৰ্টীৰ মহানগৰ জিলা সমিতিৰ সভাপতি মৃগেন শৰণীয়াই সংবাদ মাধ্যমক জনোৱা অনুসৰি, স্বাধীনতাৰ পিছত দেশক একত্ৰিত কৰি ৰখাত পেটেলৰ ভূমিকা আছিল অপৰিসীম৷

সেই সময়ত চৰ্দাৰ বল্লভ ভাই পেটেলে একতাৰ বান্ধোনেৰে ধৰি ৰাখিবলৈ সক্ষম হৈছিল৷ বল্লভ ভাই পেটলৰ অখণ্ড ভাৰত নিৰ্মানত যথেষ্ট অৰিহনা আছে৷ সেয়ে বল্লভ ভাই পেটেলৰ জন্মদিন ‘একতাৰ দিন’ হিচাপে পালন কৰা হয়৷ ইয়াৰ বাবেই বিজেপিয়ে একতাৰ দৌৰ কাৰ্য্যসূচী অনুষ্ঠিত কৰিব বুলি সভাপতি মৃগেন শৰণীয়াই জনায়৷

আনহাতে সাধাৰণ সম্পাদক অমৰজ্যোতি ডেকাই জনোৱা অনুসৰি একতাৰ দৌৰ কাৰ্যসূচীত অসম চৰকাৰৰ বিত্ত, স্বাস্থ্য আদি বিভাগৰ মন্ত্ৰী তথা নেডাৰ ড° হিমন্ত বিশ্ব শৰ্মা, গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্য, সাংসদ কুইন ওজা, বিধায়ক অতুল বৰা, জিএমডিএৰ উপাধক্ষ্য মুকুতা ডেকা, বিজেপিৰ উত্তৰ পূৰ্বাঞ্চলৰ সাংগঠনিক সাধাৰণ সম্পাদক অজয় জামোৱাল, অসম প্ৰদেশৰ সাংগঠনিক সাধাৰণ সম্পাদক ফণীন্দ্ৰ নাথ শৰ্মাৰ লগতে দল আৰু চৰকাৰৰ বহু কেইগৰাকী নেতাই অংশগ্ৰহন কৰাৰ সম্ভাৱনা আছে।

ডেকাই লগতে বিজেপিৰ প্ৰায় পাঁচ শতাধিক সদস্যই অনুষ্ঠানত অংশগ্ৰহণ কৰিব বুলি অমৰজ্যোতি ডেকাই জানিবলৈ দিয়ে৷

দৈনন্দিন বাৰ্তা সেৱাঃ বিশিষ্ট চিত্ৰশিল্পী-চলচ্চিত্ৰ নিৰ্মাতা, পৰিচালক গৌৰী বৰ্মনৰ আৰু নাই। গুৱাহাটীৰ তৰুণ নগৰস্থিত নিজা বাসগৃহত বৰ্ষীয়ান শিল্পী গৰাকীৰ ৮৪ বছৰ বয়সত পৰলোকপ্ৰাপ্তি ঘটে। কেইবাখনো ছবিৰ লগতে তথ্যচিত্ৰৰো পৰিচালক, প্ৰযোজক আছিল প্ৰয়াত বৰ্মন। অপৰাজিতা, জীৱন জেউতি, হৃদয়ৰ প্ৰয়োজনৰ দৰে কেইবাখনো ছবিৰ পৰিচালনাৰ লগতে ৩০ খনতকৈ অধিক তথ্যচিত্ৰ আৰু ভালেসংখ্যক টেলিভিশ্যন ধাৰাবাহিকৰো পৰিচালক আছিল গৌৰী বৰ্মণ।

প্ৰাক্তন মন্ত্ৰী ৰমনি বৰ্মনৰ জ্যেষ্ঠ ভাতৃ গৌৰী বৰ্মন মৃত্যুত ৰাজ্যৰ মুখ্যমন্ত্ৰী সৰ্বানন্দ সোণোৱালে শোকপ্ৰকাশ কৰে। মুখ্যমন্ত্ৰী গৰাকীয়ে নিজৰ টুইটাৰত ‘যশস্বী চলচ্চিত্ৰ নিৰ্মাতা গৌৰী বৰ্মনৰ বিয়োগত মৰ্মাহত হৈছো। তেওঁৰ কৰ্মৰাজিয়ে অসমীয়া চলচ্চিত্ৰ, কলা আৰু সংস্কৃতিক চহকী কৰি থৈ গৈছে। তেওঁৰ বিদেহী আত্মাৰ সদগতি কামনা কৰাৰ লগতে মই শোক সন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছো’ বুলি প্ৰকাশ কৰে।

আনহাতে গৌৰী বৰ্মনৰ বিয়োগত অসম নাট্য সন্মিলন, গুৱাহাটী আৰ্টিষ্টছ গীল্ড আদি বিভিন্ন অনুষ্ঠান-প্ৰতিষ্ঠানেও শোক প্ৰকাশ কৰে।

দৈনন্দিন বাৰ্তা সেৱাঃ আজি লক্ষী পূজা। ক’ৰনা মহামাৰীৰ আতংকৰ মাজতে ৰাজ্যৰ স্বাস্থ্য বিভাগে নিৰ্ধাৰণ কৰা সকলো নিয়ম মানি পূজা সমিতিসমূহেও লক্ষী পূজাৰআয়োজন কৰিছে। লক্ষ্মী বন্দনা, শংখ-ধ্বনি, মন্ত্ৰোচ্চাৰণেৰে ৰাজ্যৰ ইমূৰৰ পৰা সিমূৰ এতিয়া মুখৰিত হৈ পৰিব লক্ষী মন্দিৰসমূহ।

শুক্ৰবাৰে ধন-সম্পদ, ঐশ্বৰ্য-বিভূতি, সৌভাগ্যদায়িনী দেবী মহালক্ষ্মীৰ পূজা। পঞ্জিকাৰ নিসম অনুসৰি আজি সন্ধিয়া ৫ বাজি ৩০ মিনিটৰ লক্ষ্মী পূৰ্নিমা তিথি আৰম্ভ হোৱাৰ লগতে শনিবাৰে সন্ধিয়া ৭ বজাত অন্ত পৰিব পূৰ্নিমা তিথি।

ঐশ্বৰ্যৰ আৰাধ্য দেৱীৰ পূজাক লৈ মহানগৰীতো নাই বিগত বৰ্ষসমূহৰ দৰে উছাহ। ৰাজ্যৰ বিভিন্ন প্ৰান্তত অনুষ্টুপীয়াকৈ লক্ষ্মী পূজা উদযাপন কৰা হ’ব।

দৈনন্দিন বাৰ্তা সেৱাঃ আজি অভিশপ্ত ৩০ অক্টোবৰ৷ আজিৰ পৰা ১২ বছৰৰ পূৰ্বে ২০০৮ চনৰ ৩০ অক্টোবৰৰ দিনটোতে মহানগৰীত হোৱা ধাৰাবাহিক বিস্ফোৰণ ঘটিছিল। গুৱাহাটী মহানগৰীৰ কাছাৰী, পাণবজাৰ, গণেশগুৰিত সংঘটিত বিস্ফোৰণত ক’লা ধোঁৱাৰ আৱৰণৰ মাজত ৰাজপথত পৰি ৰৈছিল তেজৰ চেকুৰা, মৃতদেহ।

উগ্ৰপন্থী সংগঠন এনডিএফবিয়ে সংঘটিত কৰা ৩০ অক্টোবৰ বিস্ফোৰণত ৮১ জন লোক নিহত হোৱাৰ লগতে প্ৰায় ৪৭০ জন লোক আহত হৈছিল৷ আজিও সেই দিনৰ ভয়ানক স্মৃতি মনত পেলাই দুৰ্বিহ দিন কটাইছে বিস্ফোৰণত আহত আৰু নিহতৰ পৰিয়ালে৷ মহানগৰীৰ গণেশগুৰিৰ লগতে ৰাজ্যৰ বিভিন্ন স্থানত নিহতলৈ শ্ৰদ্ধাঞ্জলি অনুষ্ঠান আয়োজন৷

দৈনন্দিন বাৰ্তা সেৱাঃ অসমত পুনৰ ৩৯৮ জনৰ দেহত ধৰা পৰিছে কোৰোনা। ৰাজ্যত এই ভাইৰাছত আক্ৰান্ত লোকৰ সংখ্যা ২০৫৬৩৫ জনলৈ বৃদ্ধি। আনহাতে সুস্থ হৈছে ১০৫৭ জন লোক।

ৰাজ্যত সুস্থ হোৱা লোকৰ সংখ্যা ১৯৩৫৭১ জনলৈ বৃদ্ধি পাইছে। বৰ্তমান চিকিৎসাধীন হৈ আছে ১১১৩৮ জন ৰোগী।কোৰানা ভাইৰাছত আক্ৰান্ত হৈ অসমত মৃত্যু হৈছে ৯২৩ জন লোকৰ।

দৈনন্দিন বাৰ্তা সেৱাঃ পৰিয়াল অৰ্থকাৰী যোজনা আচঁনিৰ(FOIGS) অধীনত অনুসূচিত জনজাতি আৰু অন্যান্য পিচপৰা শ্ৰেণীৰ হিতাধিকাৰী সকলৰ বাবে ৰাজসাহাৰ্য যুক্ত পাৱাৰটিলা অসম চৰকাৰৰ তৰফৰ পৰা বিতৰণ কৰা ব্যৱস্থা কৰা হৈছে।কৃষকৰ বাবে উপযোগী এনে অভিলাষী আচঁনিৰ অংশ স্বৰূপ আজি নগাঁও সদৰ সমষ্টিটো প্ৰায়  ৫৮ গৰাকী কৃষকক  খুটিকটীয়াস্হিত কৃষ্টি বিকাশ সমাজৰ প্ৰাঙ্গনত পাৱাৰটিলাৰ বিতৰণ কৰে সদৰ সমষ্টিৰ বিধায়ক ৰূপক শৰ্মাই।

খুটিকটীয়াস্হিত কৃষ্টি বিকাশ সমাজৰ প্ৰাঙ্গনত কৃষকসকলক পাৱাৰ টিলা বিতৰণ উপলক্ষে অনুষ্ঠিত মুকলি সভাখনত উপস্থিত থাকি বিধায়ক ৰূপক শৰ্মাই  কয় যে প্ৰধানমন্ত্ৰী নৰেন্দ্ৰ মোডী ডাঙৰীয়াৰ সপোন ২০২২  চনৰ ভিতৰত প্ৰত্যেক জন কৃষকৰ আয় দুগুণ হ‌ওক আৰু সেই সপোনক সাৰ্থক কৰাৰ উদ্দেশ্যেই অসমৰ  মুখ্যমন্ত্ৰী সৰ্বানন্দ সোণোৱাল নেতৃত্বাধীন চৰকাৰখনে কৃষক ৰাইজৰ সুবিধাৰ্থে বিভিন্ন কৃষি উপযোগী আচঁনিৰ লগতে পাৱাৰটিলা,টেক্টৰ বিতৰন কৰি আহিছে। পৰিয়াল অৰ্থকাৰী যোজনা আচঁনিৰ(FOIGS)  আচঁনিৰ অধীনত  কৃষকসকলক আজি নিজ হাতে ৰাজসাহাৰ্য যুক্ত পাৱাৰটিলা বিতৰণ কৰি যথেষ্ট সন্তোষ্টি লাভ কৰিছো। 

আমি আশা কৰিছো এই আচঁনিৰ জৰিয়তে  পাৱাৰটিলাৰ লাভ কৰা কৃষক সকল উপকৃত হব ।আজিৰ পাৱাৰটিলা বিতৰণ অনুষ্ঠানত বিধায়ক ৰূপক শৰ্মাৰ লগতে কাছমাৰী জিলা পৰিষদৰ সদস্য কাঞ্চন বৰদলৈ, খাগৰিজান উন্নয়ন খন্ডৰ আঞ্চলিক পঞ্চায়তৰ সভানেত্ৰী দিপাঞ্জলী কোঁৱৰ,সদৰ সমষ্টিৰ বিভিন্ন পঞ্চায়তৰ সভাপতি সকলৰ লগতে বিভাগীয় বিষয়া কৰ্মচাৰী সকল উপস্থিত থাকে।