ঢকুৱাখনা : ঢকুৱাখনা মহকুমাৰ মাজেৰে বৈ যোৱা শান্ত সমাহিত চাৰিকড়ীয়া নদীয়ে আজি হঠাৎ ভয়ংকৰ ৰূপ ধাৰণ কৰে।আজি বিয়লি প্ৰায় ২-৩০ বজাত ঢকুৱাখনা মহকুমাৰ উচ্চ শিক্ষাৰ প্ৰাণকেন্দ্ৰ স্বৰূপ ঢকুৱাখনা মহাবিদ্যালয়ৰ দক্ষিণ দিশত নদীখনে ভয়ানক খহনীয়াৰ সৃষ্টি কৰে। এই খহনীয়াত চকুৰ পচাৰতে শিক্ষানুষ্ঠানখনৰ দুজনকৈ কৰ্মচাৰীৰ দুটা আৱাস গৃহ জাহ যায়।ইয়াৰোপৰি মহাবিদ্যালয়খনৰ প্ৰায় ১ বিঘা মান  মাটি আৰু কেইবাজোপাও মূল্যবান গছ খহনীয়াৰ কবলত পৰে ।উক্ত খহনীয়া আধা ঘণ্টামান সময়ৰ  ভিতৰতে সংঘটিত হয়।ঘটনাটো দিনৰ ভাগত  ঘটাৰ বাবে আৱাস দুটাত বাস কৰা পৰিয়াল দুটাৰ ১০জনৰো অধিক সদস্যৰ প্ৰাণ দৈৱক্ৰমে ৰক্ষা পৰে যদিও দুয়োটা পৰিয়ালৰ ঘৰৰ আচবাব ,বাচন-বৰ্তন আৰু ল’ৰা-ছোৱালীৰ কিতাপ পত্ৰকে আদি কৰি বহু মূল‍্যবান সামগ্ৰী নদীৰ বুকুত জাহ যায়।ঘটনাৰ খবৰ পাইয়েই আজি সমষ্টিত উপস্থিত থকা স্থানীয় বিধায়ক তথা মন্ত্ৰী নৱ কুমাৰ দলেয়ে জল সম্পদ বিভাগৰ অধীক্ষক অভিযন্তা ,কাৰ্যবাহীঅভিযন্তা ,সহকাৰী কাৰ্যবাহী অভিযন্তা আৰু মহকুমাধিপতিক লগত লৈ খহনীয়া পৰিদৰ্শন কৰি শীঘ্ৰে খহনীয়া নিবাৰণৰ বাবে তাৎক্ষণিক কাৰ্যকৰী ব‍্যৱস্থা গ্ৰহণৰ নিৰ্দেশ দিয়ে জলসম্পদ বিভাগক।শীঘ্ৰে খহনীয়া প্ৰতিৰোধৰ ব্যৱস্থা নকৰিলে মহাবিদ্যালয়খনৰ মূল ভৱনৰ লগতে ছাত্ৰী নিৱাসো খহনীয়াৰ কবলত পৰিব।ইফালে মন্ত্ৰী দলেই দূৰ্গত পৰিয়াল দুটাৰ সাময়িক সংস্থাপনৰ বাবে নগদ দহ হাজাৰকৈ টকা আৰু চাৰি বান্দোলকৈ টিনপাত প্ৰদান কৰে।উল্লেখ্য যে বিগত দুবছৰ ধৰি চাৰিকড়িয়া নদীৰ খহনীয়াই ঢকুৱাখনা কলেজৰ পিছফালে তাণ্ডৱ চলাই আহিছিল যদিও ঢকুৱাখনা জলসম্পদ বিভাগে উপযুক্তভাৱে খহনীয়া প্ৰতিৰোধৰ আঁচনি গ্ৰহণ নকৰিলে।যোৱা বছৰ জলসম্পদ বিভাগৰ ঠিকাদাৰ, অভিযন্তাই পাকুপাইন স্থাপনৰ কেইবালাখ টকীয়া এখন আঁচনি ৰূপায়ণ কৰিছিল যদিও কামত নাহিল।জলসম্পদ বিভাগক এইবছৰো খহনীয়া অব্যাহত থকাৰ বিষয়টো কলেজৰ অধ্যক্ষই বাৰে অৱগত কৰাৰ পিছতো বিভাগটোৱে বাঁহৰ সামান্য স্পাৰ দিয়ে খহনীয়া ৰোধৰ ব্যথা চেষ্টা চলোৱাত আজি চাৰিকড়িয়াই কালৰূপ ধৰি খহাই নিলে ঘৰ-দুৱাৰ,প্ৰকাণ্ড প্ৰকাণ্ড গছ।

কলিয়াবৰ : ৰাজ‍্যত এতিয়া সক্ৰিয় অবৈধ গৰুৰ বেহা। কলিয়াবৰৰ উলুৱনী আৰক্ষীৰ জালত গৰুৰ অবৈধ সৰবৰাহকাৰী। আটক কৰা হৈছে ৩০ জন লোক। অসমৰ বিভিন্ন স্থানৰ পৰা অবৈধভাবে সৰবৰাহ কৰা ১৩ খন বাহন জব্দ। বুধবাৰে পুৱা উলুৱনী আৰক্ষী চকীৰ এক তালাচীত ৭৮ গৰু সহ ১৩ খন বাহন জব্দ কৰে। ইয়াৰে ৬৯ টা মতা, ৭ জনী মাইকী আৰু ২টা পোৱালি। ইতিমধ‍্যে, ভাৰতীয় দণ্ডবিধি আইনৰ কেইবাটাও ধাৰা সন্বিবিষ্ট কৰি উলুৱনী আৰক্ষী চকীত ৫০/২০২০ নম্বৰত এটা গোচৰ ৰুজু কৰা হৈছে। গোচৰ ৰুজু হোৱা ধাৰাকেইটা হ’ল – ৫৫/২০২০, ১২০/বি/৩৭৯/৪১১/২৮৯/১৮৬, ভাৰতীয় দণ্ডবিধি আৰ/ডব্লিউ ১১ (১)(এ), (ডি), (চি), যান-বাহন প্ৰতিৰোধী আইনৰ ধাৰা ১৯২। উলুৱনী আৰক্ষী চকীত মহিন্দ্ৰ জীতো – এ. এচ. ০২চি চি ৩৭২২, মহিন্দ্ৰ বলেৰ’ পিক-আপ – এ. এচ. ০২ চি চি ৪৯২৫, এ. এচ. ১২ বি চি ৫৫৪০, এ. এচ. ১২ এ. চি. ৯২৪৮, এ. এচ. ১২ এ. চি. ৩৯৫৭, এ. এচ. ১২ এ. চি. ৯২৪৮, টাটা এ. চ. ১২ বি. চি. ৫৪২৪, টাটা যোদ্ধা – এ. চ. ১২ বি. চি. ৬৭৭৯ নম্বৰৰ সাতখন গৰু ভৰ্তি বাহন সহ ব‍্যৱসায়ত জড়িতৰ সন্দেহত ৩০ জন লোক আকশটক হৈ আছে। আন ছখন বাহন আমবাগান আৰক্ষী চকীত আছে বুলি জানিব পৰা গৈছে। ৰাজ‍্যত অবৈধ আৰু চোৰাং গৰুৰ বেহাই বাতৰি শিৰোনাম দখল কৰাৰ সময়তে অবৈধভাবে বৃহৎ সংখ‍্যক গৰু জব্দই চাঞ্চল‍্যৰ সৃষ্টি কৰিছে। নিশা হ’লেই ট্ৰাকে ট্ৰাকে সৰবৰাহ হয় শ শ গৰু। উজনিৰ পৰা নামনি দৈনিক অবৈধভাৱে সৰবৰাহ হৈছে শ-শ গৰু। ৰাজ্যত অব্যাহত গৰুৰ অবৈধ সৰবৰাহৰ অভিযোগ সোমবাৰে পুৱতি নিশা কলিয়াবৰত জব্দ হোৱা ১৩ খনকৈ গৰু ভৰ্তি বাহনে প্ৰমাণ কৰিলে সেই কথা।

ওৰাং : ওৰাং আৰু  মাজবাটত পৃথকে পৃথকে বৃহৎ পৰিমাণৰ গাঞ্জা জব্দ। গোপন সূত্ৰৰ খবৰৰ ভিত্তিত পৃথকে পৃথকে আৰক্ষীয়ে অভিযান চলাই জব্দ কৰে গাঞ্জাখিনি। মাজবাটৰ আদৰ্শ বাহাদুৰ গাঁৱৰ পৰা ৫৫ কিলোগ্ৰাম গাঞ্জাসহ ইলিয়া দৈমাৰী নামৰ এজন লোকক আটক কৰে মাজবাট আৰক্ষীয়ে। ইফালে বুধবাৰে দিনৰ ভাগত ওৰাঙতে গাঞ্জাসহ এজন লোকক আটক ওৰাং আৰক্ষীয়ে। গোপন সূত্ৰৰ খবৰৰ ভিত্তিত অভিযান চলাই ওৰাং আৰক্ষীয়ে জব্দ কৰে ৩০ কিলোগ্ৰাম গাঞ্জা। অভিযান কালত ৬ পেকেট গাঞ্জা সহ আতক কৰে ৰুবুংচা বড়ো নামৰ এজন লোকক। AS 01 DN 5657 নম্বৰৰ এখন বিলাসী বিলেনু বাহনৰ পৰা জব্দ কৰে গাঞ্জাখিনি। ওৰাং আৰক্ষীয়ে আটক কৰা লোকজন ওদালগুৰিৰ ১ নম্বৰ সাপকাতিৰ বুলি জানিব পৰা গৈছে। গাঞ্জাসহ দুজন লোকক আটক কৰা ঘটনাৰ সন্দৰ্ভত ওৰাং আৰু মাজবাট আৰক্ষীয়ে ৰজু কৰিছে গোচৰ।  ইফালে মাজবাট আৰক্ষীয়ে ইলিয়া দৈমাৰীৰ লগত গাঞ্জা সৰবৰাহত জড়িত থকাৰ সন্দেহত মাজবাটৰ নাও হৰুৱা গাঁৱৰ বিলিয়ন দৈমাৰী নামৰ আন এজন লোককো আটক কৰিছে।

নগাঁও : অগপৰ বটদ্ৰৱা সমষ্টিৰ সভানেত্ৰী মামনি বৰাৰ বিৰুদ্ধে ক্ষোভ উজাৰিছে একাংশ অগপ কৰ্মীয়ে। উল্লেখযোগ্য যে ২০১৬ চনৰ বিধান সভা নিৰ্বাচনত অগপ কৰ্মী-সমৰ্থকৰ সহায়ত বটদ্ৰৱা সমষ্টিৰ পৰা বিজেপি প্ৰাৰ্থী আঙুৰলতা ডেকা বিজয়ী হৈছিল। শেহতীয়াকৈ সমষ্টিটোৰ অগপ শিৱিৰ বিসম্বাদত আক্ৰান্ত হোৱাৰ ফলত কংগ্ৰেছ আৰু বিজেপি শিৱিৰ লাভান্বিত হোৱাৰ সম্ভাৱনা প্ৰকটহৈ পৰিছে। অগপৰ একাংশ নেতা-কৰ্মীয়ে বটদ্ৰৱা সমষ্টিৰ অগপ নেত্ৰী তথা সমষ্টি সমিতিৰ সভানেত্ৰীৰ বিৰুদ্ধে মুকলিভাবেই ক্ষোভ উজাৰিছে। বটদ্ৰৱা সমষ্টিৰ অন্তৰ্গত জামগুৰি-কুজীডাঁহ আঞ্চলিক সমিতিৰ সভাপতি নবীন চন্দ্ৰ মেধিয়ে সংবাদ মাধ্যমলৈ প্ৰেৰণ কৰা এখন পত্ৰত সমষ্টি সমিতিৰ সভানেত্ৰী মামনি বৰাৰ একনায়কত্ববাদত তেওঁলোক অতীষ্ঠ হৈ পৰা বুলি উল্লেখ কৰিছে। ইতিমধ্যে এই সম্পৰ্কত জামগুৰি-কুজীডাঁহ আঞ্চলিক সমিতিৰ সভাপতিজনে অগপৰ নগাঁও জিলা সমিতিৰ সভাপতি-সম্পাদকলৈ পত্ৰ প্ৰেৰণ কৰিছে। পত্ৰখনত উল্লেখ থকা মতে বটদ্ৰৱা সমষ্টি সমিতিৰ সভানেত্ৰী গৰাকীয়ে নিজৰ ময়মতালি-খামখেয়ালি স্বভাৱৰে একনায়কত্ব দেখুৱাৰ বাবেই অগপৰ বহু কৰ্মীয়ে দল ত্যাগ কৰিছে নাইবা বহু সংখ্যক কৰ্মী নিস্ক্ৰীয়হৈ ঘৰত বহি আছে। অন্যহাতেদি বটদ্ৰৱা সমষ্টি সমিতিয়ে যোৱা ১২ জুলাইত জামগুৰি-কুজীডাঁহ-নমাটি আঞ্চলিক সমিতিখন জিলা সমিতিৰ অজ্ঞাতে আৰু জিলা সমিতিৰ লগত কোনো ধৰণৰ আলোচনা নকৰাকৈ ভংগ কৰি দিয়ে আৰু আহ্বায়ক সমিতি গঠন কৰি দিয়ে। এই কাৰ্যত আঞ্চলিক সমিতিয়ে আশ্চৰ্য প্ৰকাশ কৰি জিলা সমিতিক দাবী জনায়। অন্যথা আঞ্চলিক সমিতিৰ কাৰ্যনিৰ্বাহকৰ সদস্য সকলৰ লগতে ভাতৃ-ভগ্নী সংগঠনৰ আঞ্চলিক সমিতিৰ সদস্যসকলে পদবীৰ পৰা পদত্যাগ কৰি ভৱিষ্যতেও কোনো ধৰণৰ পদবীত নথকাৰ সিদ্ধান্ত গ্ৰহণ কৰিব বুলি জামগুৰি-কুজীডাঁহ-নমাটি আঞ্চলিক সমিতিখনৰ ভাৰপ্ৰাপ্ত সভাপতি নবীন চন্দ্ৰ মেধিয়ে জিলা সভাপতি-সম্পাদকলৈ প্ৰেৰণ কৰা পত্ৰখনত উল্লেখ আছে। তাৎপৰ্যপূৰ্ণ যে অগপৰ বটদ্ৰৱা সমষ্টি সমিতিৰ বৰ্তমানৰ সভানেত্ৰী মামনি বৰাই ২০০৫ চন আৰু ২০১১ চনত বটদ্ৰবা বিধানসভা সমষ্টিৰ পৰা অগপৰ টিকটত প্ৰতিদ্বন্দিতা কৰিছিল যদিও পৰাজিত হৈছিল। ২০১৬ চনত সমষ্টিটোত অগপ-বিজেপিয়ে যৌথভাবে প্ৰতিদ্বন্দিতা কৰিছিল আৰু বিজয়ী হৈছিল বিজেপি প্ৰাৰ্থী আঙুৰলতা ডেকা। পুনৰ ২০২১ চনৰ বিধান সভা নিৰ্বাচনত অগপনেত্ৰী মামনি বৰাই অগপৰ দলীয় টিকতত প্ৰতিদ্বন্দিতা কৰাৰ সপোন দেখি কুচকাৱাজ আৰম্ভ কৰিছে। মামনি বৰাৰ অনুগত সকলৰ মতে বটদ্ৰৱা বিধান সভা সমষ্টিত বৰ্তমান বিধায়িকা আঙুৰলতা ডেকাৰ স্থিতি শক্তিশালী নহয়। সমষ্টিটোৰ পৰা বিজেপি দলৰ টিকটত আঙুৰলতা ডেকাই প্ৰতিদ্বন্দিতা কৰিলে বিজয়ী হোৱাৰ সম্ভাৱনা কম বুলিও অগপ শিৱিৰে কব বিচাৰে। সেয়ে ২০২১ চনৰ বিধান সভা নিৰ্বাচনত অগপ-বিজেপিৰ মিত্ৰতাৰ সূত্ৰে সমষ্টিটোৰ পৰা অগপ প্ৰাৰ্থীয়েহে প্ৰতিদ্বন্দিতা কৰিব বুলি আশা কৰিছে তেওঁলোকে। সেইবাবেই বটদ্ৰৱা সমষ্টিৰ পৰা বহু কেইজনে অগপ দলৰহৈ প্ৰাৰ্থিত্ব বিচাৰিব। সেয়ে অগপৰ ভিতৰ চ’ৰাত আৰম্ভ হৈছে বিসম্বাদ।ঐতিহ্য মণ্ডিত বটদ্ৰৱা সমষ্টিৰ অগপৰ ভিতৰ চ’ৰাত আৰম্ভ হোৱা বিসম্বাদৰ পূৰ্ণ সুযোগ গ্ৰহণ কৰিব কংগ্ৰেছ আৰু বিজেপি শিবিৰে।যোৱা চাৰিটা বছৰত বটদ্ৰৱা সমষ্টিটো বিজেপি বিধায়িকা আঙুৰলতাৰ দখলত থকাৰ পৰিপ্ৰেক্ষিতত বহু অগপ কৰ্মী বিজেপিলৈ ঢাপলি মেলিছিল। হতাশাগ্ৰস্ত আন একাংশ অগপ কৰ্মী কংগ্ৰেছলৈ ঢাপলি মেলিছিল। এনেক্ষেত্ৰত অগপ শিবিৰত পুনৰ বিসম্বাদ হোৱাত কংগ্ৰেছ-বিজেপিয়েই লাভান্বিত হ’ব।