দৈনন্দিন বাৰ্তা ডিজিটেল ডেস্কঃ বলিউড অভিনেতা সুশান্ত সিং ৰাজপুত মৃত্যুক লৈ নহয় চি বি আই তদন্ত। সামাজিক মাধ্যমত বিগত প্ৰায় এমাহ ধৰি সুশান্তৰ অনুৰাগীসকলে কৰি অহা চি বি আই তদন্তৰ দাবী নস্যাৎ কৰিলে মহাৰাষ্ট্ৰৰ গৃহমন্ত্ৰী অনিল দেশমুখে। ৰাষ্ট্ৰীয় সংবাদ মাধ্যমত প্ৰকাশিত খবৰ অনুসৰি, গৃহমন্ত্ৰী গৰাকীয়ে চি বি আই তদন্তৰ দাবী খাৰিজ কৰিছে। প্ৰকাশিত খবৰৰ মতে, গৃহমন্ত্ৰী অনিল দেশমুখে সুশান্তৰ আত্মহত্যাৰ প্ৰসংগত কয়, সুশান্তৰ আত্মহত্যাক লৈ চি বি আই তদন্তৰ প্ৰয়োজন নাই। মুম্বাই আৰক্ষীয়ে সকলো দিশৰ পৰা তদন্ত কৰিছে। যথাসময়ত মুম্বাই আৰক্ষীয়ে সকলো তথ্য ৰাজহুৱা কৰিব। গতিকে আমি ভাৱো এই কেছৰ তদন্তৰ বাবে মুম্বাই আৰক্ষী সক্ষম।

দৈনন্দিন বাৰ্তা ডিজিটেল ডেস্কঃ হঠাৎ সুৰ সলনি কৰিলে মাৰ্কিন ৰাষ্ট্ৰপতি ডনাল্ড ট্ৰাম্পে। কিছুদিনৰ আগতে চীন-ভাৰতৰ মাজত যদিহে সংঘৰ্ষ হয়, আমেৰিকা সদায়েই ভাৰতৰ কাষত থিয় দিব বুলি কোৱা ট্ৰাম্পে দিন বাগৰাৰ লগে লগে কথাও সলনি কৰিছে। শেহতীয়াকৈ মাৰ্কিন ৰাষ্ট্ৰপতিগৰাকীয়ে কৈছে যে, মই ভাৰতীয় সকলকো ভাল পাও আৰু চীনৰ সকলকো সমানেই ভাল পাও। পোনপতীয়াকৈ নকলেও মাৰ্কিন ৰাষ্ট্ৰপতিৰ এই ভাষ্যই পুনৰ প্ৰমাণ কৰিলে ট্ৰাম্পৰ দুমুখীয়া স্থিতি। কিছুদিনৰ আগলৈকে ভাৰতৰ পক্ষত থকা ট্ৰাম্পে আওপকীয়াকৈ চীনক সমৰ্থন কৰি এই মন্তব্য কৰিছে বুলি সংবাদ মাধ্যমৰ সন্মুখত সদৰি কৰিছে হোৱাইট হাউছৰ চেক্ৰেটৰী কলেঘ মেকে। মাৰ্কিন ৰাষ্ট্ৰপতিয়ে ট্ৰাম্পে লগতে চীন ভাৰতৰ মাজত সংঘাত অন্ত পেলাই শান্তি স্থাপনৰ কামনা কৰিছে বুলিও সদৰি কৰে হোৱাইট হাউছৰ চেক্ৰেটৰী কলেঘ মেকে সংবাদ মাধ্যমক জানিবলৈ দিয়ে।

দৈনন্দিন বাৰ্তা ডিজিটেল ডেস্কঃ দুটাকৈ ই-মেইল যোগে মুখ্যমন্ত্ৰীক হত্যাৰ ভাবুকি। মুখ্যমন্ত্ৰীক ভাবুকি, সময় থাকোতেই শুধৰণি হওক, নহলে হেৰুৱাব লাগিব প্ৰাণ। বৃহস্পতিবাৰে এনেদৰে ইমেইল যোগে ঝাৰখণ্ডৰ মুখ্যমন্ত্ৰী হেমন্ত চোৰেনক প্ৰাণে মৰাৰ ভাবুকি প্ৰদান কৰিছে । ভাবুকিৰ পাছতে মুখ্যমন্ত্ৰীৰ নিৰাপত্তাক লৈ অধিক চিন্তিত হৈ পৰিছে ৰাজ্যখনৰ প্ৰশাসন, তদন্তৰ সম্পূৰ্ণ দায়িত্ব অৰ্পণ কৰা হৈছে চি আই ডিক। মুখ্যমন্ত্ৰী হেমন্ত চোৰেনৰ নিৰাপত্তাৰ দায়িত্বত থকা সকলো নিৰাপত্তাৰক্ষীক অধিক সষ্টম হৈ থাকিবলৈ নিৰ্দেশ প্ৰদান কৰিছে।

দৈনন্দিন বাৰ্তা ডেস্ক :

বিহাৰত এখন দলঙৰ সলিল সমাধি ঘটিছে৷ এই দলংখন বিহাৰৰ মুখ্যমন্ত্ৰী নীতিশ কুমাৰে উদ্বোধন কৰিছিল৷ উদ্বোধনৰ পাছত এমাহো নগ’ল দলংখন৷ উল্লেখ্য যে যোৱা ১৬ জুনত গণ্ডক নদীৰ ওপৰৰ সাত্তাৰঘাট নামৰ সেতুখন বিহাৰৰ মুখ্যমন্ত্ৰী নীতিশ কুমাৰে উদ্বোধন কৰিছিল৷ বৰ্তমান বাৰিষাত নদীখন ফেনেফুটুকাৰে বাঢ়িছে৷ বিহাৰৰ বহু জিলা পানীৰ তলত আছে৷ তাৰ মাজতে ২৬৪ কোটি টকাৰে নিৰ্মাণ কৰা এই দলংখনৰ এটা অংশ নদীৰ পানীত ভাঙি পৰি উটি যায়৷ এইখন দলঙে গোপালগঞ্জৰ সৈতে চম্পাৰণ, ছিৱান আৰু ছৰণ জিলাৰ লগত সংযোগ স্থাপন কৰিছিল৷ কিন্তু বুধবাৰে দলংখনৰ সলিল সমাধি ঘটে৷ এই ঘটনাত কংগ্ৰেছ আৰু আৰজেডিয়ে কঠোৰ ভাষাৰে সমালোচনা কৰিছে ৷

দৈনন্দিন বাৰ্তা ডিজিটেল ডেস্কঃ

অচিৰেই আউটডেটেড হৈ পৰিব পাৰে 4G ইণ্টাৰনেট ! গুগলৰ হাতত ধৰি ভাৰতত 5G সেৱা আৰম্ভ কৰিবলৈ ওলাইছে আম্বানিৰ ৰিলায়েন্স জিঅ’ই। ৪৩ সংখ্যক বাৰ্ষিক সাধাৰণ সভাত 4G ইণ্টাৰনেট তথ্য-প্ৰযুক্তিৰ ক্ষেত্ৰত বিপ্লৱৰ সৃষ্টি কৰা প্ৰতিষ্ঠানটোৰ অধ্যক্ষ মুকেশ আম্বানিয়ে অহা ২০২১ বৰ্ষৰ পৰা পূৰ্ণগতিত 5G সেৱাৰ কাম আৰম্ভ কৰাৰ কথা আনুষ্ঠানিকভাৱে ঘোষণা কৰে। আম্বানিয়ে লগতে 5G সেৱাৰ পৰীক্ষামূলক কাম আৰম্ভ কৰিবৰ বাবে প্ৰয়োজনীয় অনুমতি বিচাৰি চৰকাৰৰ সংশ্লিষ্ট বিভাগলৈ অনুমতি জনোৱাৰ কথাও সদৰী কৰে।

4G তকৈ 5Gৰ বিশেষত্বসমূহ কি কিঃ
গুগলৰ হাতত ধৰি জিঅ’ই ভাৰতত আগন্তুক ২০২১ বৰ্ষৰ পৰা আৰম্ভ কৰিবলৈ ওলোৱা 5G সেৱা বৰ্তমানৰ সকলো 4G সেৱাতকৈ বহু বেছি গুণে শক্তিশালী হ’ব। ডাউনলোড বা সন্ধানৰ ক্ষেত্ৰত সুবিধাজনক হ’লেও 5G ইণ্টাৰনেট প্ৰযুক্তিৰ অসুবিধা নোহোৱাও নহয়। বেয়া বতৰেও 5G সেৱাক বহু পৰিমাণে বিঘ্নিত কৰিব পাৰে বুলিও আশংকা প্ৰকাশ কৰি বিজ্ঞানীসকলে 5G ইণ্টাৰনেটৰ তৰংগদৈৰ্ঘ্য ৩০০ মিটাৰতকৈ অধিক দূৰলৈ নাযায় বুলি উল্লেখ কৰে লগতে দূৰলৈ নেটৱৰ্ক পোৱাৰ ব্যৱস্থা কৰিবলৈ একাধিক ট্ৰান্সমিটাৰ বহুওৱাৰ প্ৰয়োজন হ’ব বুলি কয় । জানিব পৰা মতে জিঅ’ প্লেটফৰ্মৰ ৭.৭ শতাংশ অংশীদাৰিত্ব গুগলে ক্ৰয় কৰিছে৷ গুগলৰ সৈতে সম্পন্ন হোৱা চুক্তিৰ ফলত জিঅ’ত বিনিয়োগৰ পৰিমাণ বৃদ্ধি পাই ১৫২,০০০ কোটি টকা হৈছেগৈ। উল্লেখ্য কৰিব পাৰি যে, গুগলৰ পূৰ্বে ফেচবুকে জিঅ’ প্লেটফৰ্মৰ ৯.৯৯ শতাংশ শ্বেয়াৰ ক্ৰয় কৰিছে।