নগাঁও

আজি বিশ্বৰ মানৱ জাতি তথা মানৱ সভ্যতা গভীৰ সংকটত। মাত্ৰ কেইটামান মাহৰ পূৰ্বে আধুনিক বিজ্ঞান তথা তথ্য প্ৰযুক্তিৰে আকাশ চুব পৰা চীনৰ য়ুহান প্ৰদেশত আবিৰ্ভাৱ ঘটিছিল এটা অচিন ভাইৰাছৰ। মাত্ৰ এটা সপ্তাহৰ ভিতৰত  সদাব্যস্ত য়ুহানলৈ এই অচিন ভাইৰাছটোৱে  নমাই আনিলে মৰিশালীৰ নিস্তব্ধতা। যি সময়ত নভেল ক’ৰ’ণা ক’ভিড-১৯ নামৰ ভাইৰাছে চীনত নৰসংহাৰ চলাইছিল সেইখিনি সময়ত সমগ্ৰ বিশ্ববাসীয়ে সপোনতো ভবা নাছিল এই ক’ভিড-১৯ৰ আগ্ৰাসনে মাত্ৰ কেইটামান মাহৰ ভিতৰত সমগ্র বিশ্বকে স্তব্ধ কৰি দিব বুলি। অতি তীব্ৰগতিত সংক্ৰমিত বিষাক্ত ক’ভিড-১৯এ সমগ্ৰ বিশ্বৰ দুশৰো অধিক দেশত প্ৰৱেশ কৰিবলৈ সময় লাগিল মাত্ৰ চাৰিটা মাহ।আজি বিশ্বৰ গতিশীল মানৱ জাতিক লকডাউনৰ নামত পিঞ্জৰাবদ্ধ কৰিলে নভেল ক’ৰোনাই। আধুনিক বিশ্বক গতিৰুদ্ধ কৰি দিয়া ক’ভিড-১৯ৰ ভয়াবহ নৰসংহাৰৰ ওচৰত হাৰ মানিবলৈ বাধ্য হ’ল বিশ্বৰ বহু শক্তিশালী ৰাষ্ট্ৰ। দিশহাৰা তথা অসহায় হৈ পৰিছে সৌৰজগতত বিচৰণ কৰি ফুৰা আধুনিক বিজ্ঞান৷ এই বিষাক্ত ভাইৰাছটো আৰু বিশ্ব মানৱৰ জীৱনলৈ নামি অহা অভিশপ্ত এই সময়খিনিৰ পটভূমিত নগাঁৱৰ সাংবাদিক মুৰুলী বৰুৱাই লিখি উলিয়াইছে ক’ৰ’ণা সম্পৰ্কীয় প্ৰথমখন অসমীয়া গ্ৰন্থ ‘ক’ৰোনা- শ্বাসৰুদ্ধ সময়ৰ দস্তাবেজ’৷ গ্ৰন্থখন প্ৰকাশৰ বাবে আগবাঢ়ি আহিছে অসমৰ এক অভিজাত প্ৰকাশন গোষ্ঠী নগাঁৱৰ ‘ক্ৰান্তীকাল’ প্ৰকাশন৷ প্ৰায় ২৫০ পৃষ্ঠাৰ এই গ্ৰন্থখনৰ বেটুপাতৰ পৰিকল্পনা প্ৰকাশক কৈলাশ ৰাজখোৱাৰ৷ জুন মাহৰ পহিলা সপ্তাহতে গ্ৰন্থ উন্মোচিত হ’ব৷

পাভৈ

উদীয়মান যুৱ নেতা তথা পাভৈ আঞ্চলিক ছাত্ৰ সন্থাৰ সভাপতি অভিজিৎ শইকীয়াৰ আদ্যশ্ৰাদ্ধ গৃহত বুধবাৰে উপস্থিত হয় আছুৰ নেতৃত্ব। সদৌ অসম ছাত্ৰ সন্থাৰ মুখ্য উপদেষ্টা ড° সমুজ্জল কুমাৰ ভট্টচাৰ্য, সদৌ অসম ছাত্ৰ সন্থাৰ সভাপতি দীপাংক কুমাৰ নাথৰ লগতে প্ৰায় ১০ গৰাকী আছুৰ শীৰ্ষস্থানীয় নেতৃত্ব প্ৰয়াত ছাত্ৰ নেতাগৰাকীৰ পাভৈ হাতীশালস্থিত বাসগৃহত উপস্থিত হৈ শ্ৰদ্ধাঞ্জলি জ্ঞাপন কৰে। আছুৰ মুখ্য উপদেষ্টা ড° সমুজ্জ্বল কুমাৰ ভট্টাচাৰ্যই সাংবাদিকৰ আগত মন্তব্য কৰে যে মানৱীয় ধৰ্ম পালন কৰিবলৈ গৈ অকাল মৃত্যুক সাৱটি লোৱা অভিজিত শইকীয়াৰ পৰিয়ালৰ লগতে আছু সদায় সাৰথি হৈ থাকিব। আনহাতে আছুৰ কেন্দ্ৰীয় সমিতিৰ সভাপতি দীপাংক কুমাৰ নাথে অভিজিৎ শইকীয়াৰ পৰিয়ালক সমবেদনা জনাই কয় যে অভিজিৎ এজন সুদক্ষ আৰু মেধাসম্পন্ন যুৱক আছিল৷ অভিজিতৰ কৰ্মৰাজিক জীয়াই ৰাখিব লাগিব বুলি উল্লেখ কৰি আছুৰ কেন্দ্ৰীয় সভাপতিগৰাকীয়ে ছাত্ৰ সন্থাৰ মজিয়াত অভিজিতৰ পৰিয়ালটিৰ প্ৰতি এক বিশেষ স্থান সদায় থাকিব বুলিও মন্তব্য কৰে। উল্লেখযোগ্য যে যোৱা ২৩ এপ্ৰিলত বিশ্বনাথ জিলাৰ অসম-অৰুণাচল সীমান্তবৰ্তী তিনিসুঁতি, ফুলবাৰী, জিৎপুৰ, বলোদঙা আদি অঞ্চলৰ ৰাইজৰ মাজত লকডাউনৰ সময়ত সাহায্য সামগ্ৰী বিতৰণ কৰি উভতি অহাৰ পথত নপমুৱা-মিজিকাৰ সমীপত দুৰ্ঘটনাত পতিত হৈ ২৭ এপ্ৰিলৰ বিয়লি ছাত্ৰ নেতাগৰাকীয়ে দিছপুৰৰ জিএনআৰচি চিকিৎসালয়ত মৃত্যুৰে যুঁজি শেষ নিশ্বাস ত্যাগ কৰিছিল। বুধবাৰৰ শ্ৰদ্ধাঞ্জলি অনষ্ঠানত আছুৰ কেন্দ্ৰীয় সহকাৰী সাধাৰণ সম্পাদক দুলদুল বৰকটকী, সহকাৰী সাধাৰণ সম্পাদক প্ৰকাশ দাস, সাংগঠনিক সম্পাদক প্ৰজ্ঞান ভূঞা, কেন্দ্ৰীয় কাৰ্যনিৰ্বাহক সদস্য মৃদুল হাজৰিকা, নিতুল বৰা, পৰিস্মিতা বৰা, সদৌ বিশ্বনাথ জিলা ছাত্ৰ সন্থাৰ সাধাৰণ সম্পাদক ধ্ৰুৱজ্যোতি বৰা, সদৌ শোণিতপুৰ জিলা ছাত্ৰ সন্থাৰ উপদেষ্টা ভাৰত দাস, শোণিতপুৰ জিলা ছাত্ৰ সন্থাৰ সভাপতি অভিজিত নাথ, সাধাৰণ সম্পাদক মনোজ দাসৰ লগতে বিশ্বনাথ জিলাৰ বহুকেইটা দল সংগঠনৰ নেতৃত্ব উপস্থিত থাকে।

ডিৰাক সীমান্ত

তিনিচুকীয়া জিলাৰ শদিয়া বিধানসভা সমষ্টিৰ ছৈখোৱা উন্নয়ন খণ্ডৰ অন্তৰ্গত আজোখা আৰু সোণাৰী গাঁও সংযোগী ধলা নদীৰ ওপৰত দলং লকডাউনৰ সময়চোৱাত ৰাইজৰ সমূহীয়া প্ৰচেষ্টাত সাজি উলিয়ালে ৫০ মিটাৰ দৈঘ্যৰ এখন বাঁহৰ দলং৷  চৰকাৰৰ বঞ্চনা আৰু অৱহেলাৰ বলি হোৱা অঞ্চলটোৰ ৰাইজে নিজৰ গাঁঠিৰ ধন খৰচ কৰি শ্ৰমদানেৰে নিৰ্মাণ কৰিছে উলিয়াইছে এই দলংখন৷ ৰাইজে স্থানীয় বিধায়কগৰাকীক বাৰম্বাৰ আৱেদন-নিবেদন জনাইছিল যদিও কোনো সঁহাৰি নিদিলে স্থানীয় বিধায়কগৰাকীয়ে৷ ধাৰাবাহিকভাৱে তিনিটা কাৰ্যকালৰ বাবে শদিয়াৰ বিধায়কৰ আসনখন দখল কৰা বলীন চেতিয়াই অঞ্চলটোৰ বাবে কোনো কাম নকৰাৰ অভিযোগ উত্থাপিত হৈছে৷ ৰাইজে নিৰ্মাণ কৰি উলিওৱা দলংখন বুধবাৰে সদৌ অসম ছাত্ৰ সন্থাৰ সাধাৰণ সম্পাদক লুৰীণজ্যোতি গগৈয়ে উদ্বোধন কৰি প্ৰতিগৰাকী শ্ৰমদাতালৈ কৃতজ্ঞতা জনাই স্থানীয় বিধায়কগৰাকীক ক্ষুৰধাৰ সমালোচনা কৰে৷ উল্লেখ্য যে বাৰিষা সময় চোৱাত মৰণত শৰণ দি কলৰ ভূৰত উঠি মেগেলা উচ্চ মাধ্যমিক বিদ্যালয়লৈ অহা যোৱা কৰে ছাত্ৰ-ছাত্ৰীসকলে। ভূৰত উঠি পাৰাপাৰ হ’ব লগীয়া হোৱা স্থানত আজোখা গাঁৱৰ ৰাইজৰ উদ্যোগত সোনাৰী গাঁৱৰ ৰাইজৰ সহযোগত এখন কাঠ-বাঁহৰ দলং সাজি উলিওৱাত অতি কমেও ১০-১২ খন গাঁৱৰ ৰাইজৰ বহু দিনীয়া অভাৱ পুৰণ হ’ল৷ স্মৰ্তব্য যে সোণোৱাল কছাৰী স্বায়ত্ত্বশাসিত পৰিষদৰ মেগেলা সমষ্টিৰ সদস্যগৰাকীয়ে এখন কাঠৰ টুলুঙা নাৱৰ ব্যৱস্থা কৰি দিছিল যদিও নিম্ন মানদণ্ডৰ কাঠেৰে তৈয়াৰী নাওখন মাত্ৰ কেইদিনমানতে নষ্ট হয়৷ লকডাউনৰ সময়চোৱাত আবদ্ধ হৈ পৰা ৰাইজে কাঠ-বাঁহৰ লগতে নগদ ধন সংগ্ৰহ কৰি সামাজিক দুৰত্ব বজাই ৰাখি নাহৰ কাঠৰ খুঁটা দি ওপৰত দুজাপকৈ বাঁহৰ কামি বৈ এখন মজবুট দলং সাজি উলিয়ালে৷ প্ৰায় এক লাখৰো অধিক মূল্যৰ সা-সামগ্ৰী ব্যৱহাৰ কৰি প্ৰায় ৫০ মিটাৰ দৈৰ্ঘ্যৰ এই দলংখনেৰে এতিয়া চাইকেল, মটৰচাইকেল অবাধে পাৰ হ’ব পৰা হোৱাত ৰাইজৰ বাবে বহু দীঘলীয়া বাট তেনেই চমু হৈ পৰিল৷