নগাঁও
লকডাউনৰ বাবে উপাৰ্জনহীন হৈ পৰা অসমৰ শিল্পীসকলক সহায় কৰিবলৈ আগবাঢ়ি আহিছে অসম চলচিত্ৰ সমাজ আৰু বেংক অৱ বৰোডা। নগাঁৱৰ খগেন মহন্ত প্ৰেক্ষাগৃহত অভিনেতা যতীন বৰা, বিশিষ্ট ছবি পৰিচালক ড° পাৰ্থজিৎ বৰুৱা, মানস বৰুৱা, কৃষ্ণমণি নাথ আদি বহু শিল্পীৰ উপস্থিতিত বুধবাৰে ৮০গৰাকী শিল্পীক প্ৰদান কৰা হয় সাহায্য। আনহাতে পৰৱৰ্তী পৰ্যায়ত অসমৰ সকলো জিলাতে এই কাৰ্যসূচী ৰূপায়ণ কৰা হ’ব বুলি তেওঁলোকে জানিবলৈ দিয়ে।
গৌৰীপুৰ
ধুবুৰী জিলাৰ গৌৰীপুৰ আৰক্ষী থানাৰ অন্তৰ্গত গেৰামাৰী পঞ্চম খণ্ড গাঁৱৰ মুখবধিৰ এজন যুৱক নিৰুদ্দেশ হোৱা ঘটনাই পৰিয়ালটোত এক শোকৰ ছাঁ পেলাইছে৷ ঘটনাৰ বিৱৰণী মতে ধুবুৰী জিলাৰ গৌৰীপুৰ আৰক্ষী থানাৰ অন্তৰ্গত আলমগঞ্জ গাঁও পঞ্চায়তৰ এলেকাধীন গেৰামাৰী পঞ্চম খণ্ড গাঁৱৰ স্থায়ী বাসিন্দা আজাদ আলীৰ ২৯ বছৰীয়া মুখবধিৰ পুত্র আজি প্ৰায় পাঁচ মাহ ধৰি নিৰুদ্দেশ হৈ আছে৷ উল্লেখ্য যে একে থানা এলেকাত থকা বালাজান গাঁৱত উক্ত যুৱকজনে মাতৃৰ লগত আলহী খাই গেৰামাৰী পঞ্চম খণ্ড গাঁৱত থকা নিজ গৃহ লৈ উভতি অহাৰ পিছ দিনা অৰ্থাৎ আঘোণ মাহৰ শেষৰ দিন দেউবাৰৰ দিনা পুনৰ বালাজান গাঁও লৈ যাত্রা কৰে যদিও আজি লৈকে উক্ত যুৱকজনৰ কোনো সন্ধান লাভ কৰিব লৈ পৰিয়ালটোৱে সক্ষম হোৱা নাই। উক্ত যুৱকজনৰ কোনো লোকে সন্ধান লাভ কৰিলে ৯৩৬৫৭১৮৬৭৭ নম্বৰত ফোন যোগে যোগাযোগ কৰিবলৈ পৰিয়ালটোৱে আহ্বান জনাইছে৷
ডিৰাক
সীমান্তসমগ্ৰ বিশ্বজুৰি ক’ৰ’ণা ভাইৰাছে ত্ৰাসৰ সৃষ্টি কৰাৰ সময়ত সমগ্ৰ বিশ্বৰ আন আন প্ৰান্তৰ লগতে অসমৰ ছাত্ৰ-ছাত্ৰীসকলৰো শিক্ষা জীৱনত যথেষ্ট ক্ষতিগ্ৰস্ত হৈছে। দেশত ল’ক ডাউনৰ ফলত মাৰ্চ মাহৰ মাজভাগৰ পৰা বন্ধ হৈ আছে ৰাজ্যৰ বিদ্যালয়বোৰ।ছাত্ৰ-ছাত্ৰীসকল যাতে অধ্যয়নৰ পৰা আঁতৰি নাযায় বৰঞ্চ পঢ়াৰ প্ৰতি আগ্ৰহী হয় তাৰ প্ৰতি লক্ষ্য ৰাখি সদৌ মৰাণ ছাত্ৰ সন্থা, ডিৰাক আঞ্চলিক সমিতি আৰু ডিৰাক উচ্চতৰ মাধ্যমিক বিদ্যালয়ৰ যৌথ উদ্যোগত বুধবাৰে তিনিচুকীয়া জিলাৰ কাকপথাৰ শিক্ষা খণ্ডৰ অন্তৰ্গত সৰুমেচাই গাঁৱৰ প্ৰায় ৮০ শতাংশ ছাত্ৰ-ছাত্ৰীক বহী আৰু কলম প্ৰদান কৰে৷ লগতে ক’ৰ’ণা ভাইৰাছৰ সংক্ৰমণৰ পৰা কেনেদৰে হাত সাৰি থাকিব পাৰি আৰু পঢ়াৰ ক্ষেত্ৰত কেনেদৰে মনোযোগ দিব লাগে তাৰ বিষয়ে ডিৰাক উচ্চতৰ মাধ্যমিক বিদ্যালয় সহকাৰী শিক্ষক দেবেন চেতিয়াই অৱগত কৰে৷ সামাজিক দূৰত্ব বজাই ৰাখি অনুষ্ঠিত কৰা অনুষ্ঠানটি আঁত ধৰে সদৌ মৰাণ ছাত্ৰ-সন্থা, ডিৰাক আঞ্চলিক সমিতিৰ সভাপতি চৌবিক মৰাণে। অনুষ্ঠানটিত উপস্থিত থাকে বৃন্দাবন মধ্য ইংৰাজী বিদ্যালয়ৰ অৱসৰপ্ৰাপ্ত প্ৰধান শিক্ষক দ্বীপেন গোহাঁই, সহকিৰী শিক্ষক অতিষ্ঠ দহোতীয়া, গোর্খা ছাত্ৰ সন্থা, ফিল’বাৰী আঞ্চলিক সমিতিৰ সভাপতি ঘনশ্যাম ছেত্ৰী৷
গোলাঘাট
গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত মঙলবাৰে নিশা ঘটিল এক অঘটন। যোৱা ১ মে’ত বোকাখাত চিকিৎসালয়ৰ পৰা ক’ভিড-১৯ সন্দেহত মুকুল মিত্ৰ নামৰ এজন লোকক প্ৰেৰণ কৰিছিল গোলাঘাটৰ চিকিৎসালয়লৈ। কোৱাৰেণ্টাইন কক্ষত যাৱতীয় পৰীক্ষা চলি থকা লোকজন মঙলবাৰে নিশা চিকিৎসালয়খনৰ পৰা পলায়ন কৰে। জানিব পৰা মতে, পশ্চিম বংগৰ এই লোকজনৰ যোৱা ৩ মে’ত হোৱা প্ৰথমটো ক’ৰ’ণা পৰীক্ষাত নিগেটিভ ফলাফল আহিছিল যদিও আৰু পৰীক্ষা বাকী আছিল। তেনে সময়তে লোকজন চিকিৎসালয় কৰ্তৃপক্ষৰ চকুৰ আৰ হৈ এনেকৈ পলায়ন কৰা কাৰ্যত সমগ্ৰ চিকিৎসালয়খনত এতিয়া এক হুৱা-দুৱা পৰিস্থিতিৰ সৃষ্টি হৈছে।
নগাঁও
লকডাউনৰ মাজতেই নগাঁৱৰ কঠিয়াতলীৰ নেপালী খুঁটিত বন বিভাগে অভিযান চলাই মঙলবাৰে নিশা বৃহৎ পৰিমাণৰ চোৰাং কাঠ জব্দ কৰে। কাৰ্বি আংলং পাহাৰৰ পৰা হৰেন বৰা নামৰ এজন ব্যক্তিয়ে আনি মজুত ৰাখিছিল কাঠখিনি। স্থানীয় লোকৰ খবৰৰ ভিত্তিত বন বিভাগে হৰেন বৰাৰ ঘৰৰ সমীপৰ পৰা জব্দ কৰিবলৈ সক্ষম হয় কাঠখিনি। ইপিনে বন বিভাগৰ লোক উপস্থিত হোৱাত পলায়ন কৰে হৰেন বৰা। জব্দ কৃত কাঠখিনিৰ মূল্য প্ৰায় ৮০ হাজাৰ টকা হ’ব বুলি বন বিভাগৰ সুত্ৰই জানিবলৈ দিছে।
নাজিৰা
সম্প্ৰতি ক’ৰ’ণাতংক তথা লকডাউনৰ আতংকময় পৰিস্থিতিৰ মাজতেই নাজিৰা মহকুমাবাসী জনগণক পদে পদে খেদিছে শাক-পাচলি তথা নিত্য ব্যৱহাৰ্য সামগ্ৰীৰ মূল্য বৃদ্ধিৰ আতংকই৷ চৰকাৰ তথা মহকুমা খাদ্য আৰু অসামৰিক যোগান বিভাগৰ চূড়ান্ত অসহায়তাৰ মাজতেই নাজিৰা মহকুমাৰ সাধাৰণ ৰাইজৰ বাবে ক’ৰ’ণা মহামাৰীতকৈ অধিক ভাবুকি আৰু আতংকৰ কাৰণহৈ পৰিছে একাংশ শাক-পাচলি আৰু নিত্য ব্যৱহাৰ্য সামগ্ৰীৰ ব্যৱসায়ী।আলু, পিয়াঁজ, দাইল, চেনি, মিঠাতেল, আটা, ময়দাৰ মূল্য যাতে লকডাউনৰ সময়ছোৱাত কোনো কাৰণতেই যাতে মূল্য বৃদ্ধি নাপায় তাৰ বাবে চৰকাৰ-প্ৰশাসনে যি দৰে তৎপৰতা প্ৰদৰ্শন কৰি আহিছে, তাৰ বিপৰীতে একাংশ ব্যৱসায়ীক নিয়ন্ত্ৰণৰ বাবে কঠোৰ ব্যৱস্থা গ্ৰহণ নকৰাৰ বাবেই বৰ্তমান নাজিৰা মহকুমাত এনে ভয়াবহ পৰিস্থিতিৰ উদ্ভৱ হৈছে। জনা মতে, শিৱসাগৰ জিলা প্ৰশাসনৰ তৰফৰ পৰা বৰ্তমানলৈকে দুবাৰকৈ শাক-পাচলিৰ মূল্য নিৰ্ধাৰণেৰে এখন তালিকা ৰাজহুৱা কৰা হ’ল যদিও একাংশ পাচলি ভেণ্ডৰে ৰেড জ’নৰ স্থানৰ পৰা কম মূল্যত শাক-পাচলি আনি নাজিৰা মহকুমাটোৰ প্ৰান্তে প্ৰান্তে নিজৰ খেয়াল খুচিমতে মূল্য নিৰ্ধাৰণ কৰি মুনাফা আদাৰ কৰাৰ লগতে সৰ্বসাধাৰণ জনগণক এক প্ৰকাৰে লুণ্ঠন অব্যাহত ৰাখিছে। যি সময়ত লকডাউনৰ বাবে সাধাৰণ শ্ৰমজীৱী জনগণৰ উপাৰ্জন বন্ধহৈ পৰাৰ ফলত এক হাহাকাৰময় পৰিস্থিতিৰ সৃষ্টি হৈছে, সেই সময়ত নাজিৰা মহকুমাত শাক-পাচলি আৰু নিত্য ব্যৱহাৰ্য সামগ্ৰীৰ প্ৰতি কেজি মূল্য প্ৰশাসে নিৰ্ধাৰণ কৰা তালিকাতকৈ তিনিগুণ বেছি হোৱাত সৰ্বসাধাৰণ জনগণৰ চকু কপালত তুলিছে৷ এই ক্ষেত্ৰত মহকুমা প্ৰশাসন তথা নাজিৰা মহকুমা খাদ্য আৰু অসামৰিক যোগান বিভাগৰ কৰ্তৃপক্ষই নিৰ্বিকাৰ ভূমিকা পালত কৰাত প্ৰান্তে প্ৰান্তে জনগণে ক্ষোভ উজাৰিছে৷ তদুপৰি শাক-পাচলি আৰু নিত্য ব্যৱহাৰ্য সামগ্ৰীৰ মূল্য নিয়ন্ত্ৰণ আৰু অসাধু লুণ্ঠনকাৰী ব্যৱসায়ীৰ বিৰুদ্ধে ব্যৱস্থা গ্ৰহণৰ বাবে তাৎক্ষণিক টাস্ক ফ’ৰ্চ গঠন কৰিবলৈ সচেতন ৰাইজে দাবী জনাইছে৷
ডিমৌ
ক’ৰ’ণা সংক্ৰমণৰ পৰা ৰক্ষা পাবলৈ সকলোৱে লৈছে বিভিন্ন সাৱধানতামূলক ব্যৱস্থা। কিন্তু বাদ পৰি ৰৈছে চাহ শ্ৰমিকসকল। সেয়ে ডিমৌত আটছাৰ উদ্যোগত প্ৰতি দিনাই নিজৰ ভাতমুঠি মোকলাবলৈ প্ৰখৰ ৰ’দত বাগানত পাত চিঙাত ব্যস্ত থকা শ্ৰমিকসকলক একোটাকৈ মাস্ক বিতৰণ কৰে সংগঠনটোৱে। লগতে ডিমৌ আটছাৰ সম্পাদক বিশ্ব নাগে শ্ৰমিকসকলৰ মাজত সজাগতাৰ উদ্দেশ্যে হাত ধুৱাৰ কৌশল, চাফ চিকুনতাৰ বিষয়ে বিতংকৈ বুজাই দিয়ে। তদুপৰি সমাজকৰ্মী শিৱ ভদ্ৰাই জানিবলৈ দিয়ে যে বাগানৰ লাইনে লাইনে ছেনিটাইজেশ্বনৰ এক প্ৰক্ৰিয়াও বুধবাৰৰ পৰা আৰম্ভ কৰা হ’ব৷
নাজিৰা
কেন্দ্ৰীয় চৰকাৰে ঘোষণা কৰা তৃতীয় পৰ্যায়ৰ লকডাউনৰ নিৰ্দশনাৱলী সন্দৰ্ভত অসম চৰকাৰে জাৰি কৰা নিয়মবোৰ মানি চলি নাজিৰা মহকুমা প্ৰশাসনে প্ৰয়োজনীয় কাৰ্য ব্যৱস্থা গ্ৰহণ কৰিছে। ভাৰপ্ৰাপ্ত মহকুমাধিপতি তথা অতিৰিক্ত উপায়ুক্ত সম্প্ৰীতি গোস্বামী, ৰাজহ চক্ৰ বিষয়া কবিতা কাকতি কোঁৱৰ, দণ্ডাধীশ ক্ৰমে অদিতি বৰ্মণ, সুজাতা গগৈ, ৰাজীৱ সোনোৱাল তথা প্ৰশাসনীয় বিষয়াসকলৰ নেতৃত্বত দুয়োখন নগৰৰ ব্যৱসায়ী প্ৰতিষ্ঠানবোৰ পদ্ধতিগতভাৱে দৈনিক এক তৃতীয়াংশকৈ খোলাৰ ব্যৱস্থা কৰি দিয়ে। সেই মৰ্মে বুধবাৰে পুৱা ১০ বজাৰ পৰা সন্ধিয়া ৫ বজালৈ নাজিৰা আৰু শিমলুগুৰি নগৰৰ দোকানবোৰ খোলাৰ ব্যৱস্থা হৈছে। ইফালে দুয়োখন নগৰতে ফাৰ্মাচী, কিতাপ আৰু গেলামালৰ দোকানবোৰ প্ৰতিদিনে পুৱা ১০ বজাৰ পৰা সন্ধিয়া ৫ বজালৈ খোলা ৰখাৰ ব্যৱস্থা কৰা হৈছে। এই ক্ষেত্ৰত জনসাধাৰণে সামাজিক দূৰত্ব আৰু চৰকাৰী নিৰ্দেশনা মানি কভিড-১৯ ক’ৰ’ণা ভাইৰাছক প্ৰতিহত কৰিবলৈ তথা নিৰ্দ্ধাৰণ কৰা সময় অনুসৰি প্ৰয়োজনীয় সামগ্ৰী ক্ৰয় কৰাৰ বাবে আৰু বিনা কাৰণত ৰাজপথত বিচৰণ নকৰিবলৈ নাজিৰা মহকুমা প্ৰশাসনৰ তৰফৰ পৰা আহ্বান জনাইছে৷ আনহাতে যোৱা সময়ছোৱাত ৰেড জ’ন হিচাপে পৰিগণিত হোৱা বঙাইগাঁও জিলাৰ পৰা আহি নাজিৰা আৰু শিমলুগুৰি নগৰ এলেকাত অৱস্থান কৰা ৯ জনকৈ লোকৰ স্বাস্থ্য পৰীক্ষা কৰা হয় আৰু এই আটাইকেইজনৰে স্বাস্থ্য পৰীক্ষাৰ ফলাফল ঋণাত্মক বুলি নাজিৰা মহকুমা প্ৰশাসনৰ হৈ মহকুমা তথ্য আৰু জনসংযোগ বিভাগৰ ভাৰপ্ৰাপ্ত বিষয়া ৰাজীৱ সোণোৱালে এক বিবৃতি যোগে সদৰী কৰিছে৷
তিনিচুকীয়া
মৰাণ জনজাতিক জনজাতিকৰণ আৰু ষষ্ঠ অনুসুচীভুক্ত স্বায়ত্ত শাসন চৰকাৰৰ প্ৰতিশ্ৰুতি অনুসৰি সময় মতে প্ৰদান নকৰিলে সংগ্ৰাম অধিক কঠোৰভাৱে চলাই নিয়া হ’ব। মৰাণ জনজাতিৰ স্বাধিকাৰৰ লগতে সকলো জাতি জনগোষ্ঠীৰ উন্নয়ন তথা সমন্বয় আৰু ভাতৃত্ববোধ ৰক্ষাৰ বাবে সদৌ মৰাণ ছাত্ৰ সন্থাই দৃঢ়তাৰে কাম কৰি যাব। মঙলবাৰে সদৌ মৰাণ ছাত্ৰ সন্থাৰ ৫২ সংখ্যক কেন্দ্ৰীয় প্ৰতিষ্ঠা দিৱসৰ প্ৰতাকা উত্তোলন কৰি এই মন্তব্য কৰে সন্থাৰ সভাপতি অৰুণজ্যোতি মৰাণে। জাতীয় অস্তিত্ব ৰক্ষাৰ সংগ্ৰাম অব্যাহত ৰখাৰ লগতে সকলো অন্যায়, অবিচাৰ আৰু দুৰ্নীতিৰ বিৰুদ্ধে সন্থাই জাগ্ৰত প্ৰহৰী হৈ কাম কৰি যাব বুলিও সভাপতিগৰাকীয়ে কয়। সম্প্ৰতি বিশ্বজুৰি চলি থকা মহামাৰী ক’ৰ’ণা ভাইৰাছৰ আতংকৰ বাবে সামাজিক দূৰত্ব ৰক্ষা কৰি সীমিত সংখ্যক লোকৰ উপস্থিৰে কেৱল পতাকা উত্তোলন আৰু শ্বহীদ তৰ্পন কাৰ্যসূচীৰ জৰিয়তে ঐতিহাসিক সৌমাৰ খণ্ডৰ আদিম ভূমিপুত্ৰ মৰাণ জনজাতিৰ ছাত্ৰ সংগঠনটোৰ তিনিচুকীয়াস্থিত সন্থাৰ কেন্দ্ৰীয় কাৰ্যালয় প্ৰাঙ্গনত অনুষ্টুপীয়াকৈ পালন কৰে। পুৱা ১০ বজাত সদৌ মৰাণ ছাত্ৰ সন্থাৰ সভাপতি অৰুণজ্যোতি মৰাণে পতাকা উত্তোলন আৰু সাধাৰণ সাধাৰণ সম্পাদক নৱ মৰাণে শ্বহীদ তৰ্পন কৰি কাৰ্যসূচী মুকলি কৰে। প্ৰতিষ্ঠা দিৱসৰ লগত সংগতি ৰাখি লকডাউনৰ বাবে খাদ্য সংকটত পৰা বৰগুৰি অঞ্চলৰ অৰ্ধশতাধিক দৰিদ্ৰ পৰিয়ালক কাৰ্যালয়ৰ চৌহদতেই খাদ্য সামগ্ৰী প্ৰদান কৰাৰ লগতে উপস্থিত সাংবাদিকসকলক সন্থাই একোখনকৈ মৰাণ গামোছাৰে সম্ভাষণ জনায়। সদৌ মৰাণ ছাত্ৰ সন্থাৰ উপদেষ্টা সভাপতি তৰুণ বৰুৱা মৰাণ, প্ৰাক্তন উপদেষ্টা জিতুল গোহাঁই, প্ৰাক্তন সভাপতি বিৰিঞ্চি নেওগ, পানীৰাম ডেকা মৰাণ, প্ৰাক্তন সাধাৰণ সম্পাদক দিপেন মৰাণ, হেমন্ত মৰাণ, জ্যোতিমণি মৰাণ, প্ৰৱোধ বৰুৱা, অসম মৰাণ সভাৰ উপদেষ্টা দিপন মৰাণ, সভাপতি ধৰ্মেন্দ্ৰ নেওগ, সাধাৰণ সম্পাদক দুৰ্লভ গোহাঁই, মৰাণ জাতীয় মহিলা পৰিষদৰ সভানেত্ৰী দীপা শইকীয়া বড়া, সম্পাদিকা হেমা বৰুৱা মৰাণ, মৰাণ জাতীয় কৰ্মচাৰী শৈক্ষিক বিকাশ মঞ্চৰ সম্পাদক ভাৰ্নৱ মৰাণ, মৰাণ সাহিত্য সভাৰ প্ৰধান সম্পাদক অজিত মৰাণ, অসম জাতীয়তাবাদী যুৱ-ছাত্ৰ পৰিষদৰ কণ গগৈ, সুৰজিৎ মৰাণ, অসম জাতীয়তাবাদী যুৱ পৰিষদৰ সাধাৰণ সম্পাদক উদয়ন কুমাৰ গগৈ, তিনিচুকীয়া জিলা ছাত্ৰ সন্থাৰ সম্পাদক সমৰজ্যোতি গোহাঁই, সদৌ অসম মটক সন্মিলনৰ সৰুজ গোহাঁই, সদৌ অসম মটক যুৱ-ছাত্ৰ সন্মিলনৰ সাধাৰণ সম্পাদক ধৰনী গোহাঁই, সদৌ তাই আহোম ছাত্ৰ সন্থাৰ যুটীয়া সম্পাদক মিলন বুঢ়াগোহাঁই, আটছাৰ ৰাজু কুৰ্মী, কনক কুৰ্মী, সদৌ অসম গোৰ্খা ছাত্ৰ সন্থাৰ অশোক লামা, শ্বহীদ বিনন্দ মৰাণ বঁটা প্ৰাপক প্ৰৱেশ্বৰ বৰুৱা আদিয়ে প্ৰতিষ্ঠা দিৱসৰ কাৰ্যসূচীত অংশ গ্ৰহণ কৰে।
ওদালগুৰি
মহামাৰী ক’ভিড-১৯ৰ বিৰুদ্ধে যোদ্ধাৰ ভূমিকা লোৱা দেওমৰনৈ অসামৰিক চিকিৎসালয়ৰ সকলো স্বাস্থ্য কৰ্মীক দৃষ্টি নামৰ ছ’চি মিডিয়া গ্ৰুপৰ উদ্যোগত এক বিশেষ সম্বৰ্ধনা আয়োজন কৰা হৈছিল ৷ ক’ভিড-১৯ য়ে বিশ্বত যি মহামাৰীৰ ৰূপ ধাৰণ কৰিছে সৰ্বজন বিদিত৷ এই যুদ্ধত নিজৰ জীৱন তুচ্ছ জ্ঞান কৰি বিশ্বৰ সকলো ঠাইতে সদায় সজাগ আৰু সচেতন হৈ আছে স্বাস্থ্য কৰ্মী৷ সেয়ে ক’ভিড-১৯ৰ বিৰুদ্ধে যুদ্ধত যোদ্ধাৰ ভূমিকা গ্ৰহণ কৰা দৰং জিলাৰ দেওমৰনৈ অসামৰিক চিকিৎসালয়ত কৰ্মৰত সকলো স্বাস্থ্য কৰ্মীক সম্বৰ্ধনা জনায় আৰু এই বৃহৎত্তৰ অঞ্চলবাসীক যি সেৱা আগবঢ়াই আছে তাৰ বাবে এই দৃষ্টি গ্রুপটোই দেওমৰনৈৰ অসামৰিক চিকিৎসালয়ৰ সকলো স্বাস্থ্য কৰ্মীক ধন্যবাদ জনাই আৰু এই গ্রুপটো হৈ অনিল শৰ্মাই দেওমৰনৈ চিকিৎসালয়ৰ উপাধ্যক্ষ ডাক্তৰ কমলা কান্ত শৰ্মাক সম্বৰ্ধনা জনোৱাৰ উপৰি এখনি সম্বৰ্ধনা পত্ৰ প্ৰদান কৰে আৰু সকলো স্বাস্থ্য কৰ্মীক অসমীয়াৰ জাতিৰ সন্মান এখনিকৈ ফুলাম গামোচাৰে আদৰণি জনায়৷