অহা ২০২০–২১ বৰ্ষৰ নৱম শ্ৰেণীৰ পৰা দ্বাদশ শ্ৰেণীৰ পাঠ্যক্ৰমৰ ৩০ শতাংশ কমাইছে চিবিএছইয়ে ৷ মঙলবাৰে এই কথা ব’ৰ্ডৰ তৰফৰ পৰা জনোৱা হয় ৷ মহামাৰীৰ ফলত এই বছৰ পাঠ্যক্ৰমত হেঙাৰ সৃষ্টি হৈছে ৷ সেয়া পুৰণৰ বাবে এই পদক্ষেপ লোৱা হৈছে ৷ কেন্দ্রীয় মানৱ সম্পদ উন্নয়ন মন্ত্ৰালয়ৰ মন্ত্ৰী ৰমেশ পোখৰিয়াল নিশংকই কয় যে দেশ আৰু বিশ্বৰ অস্বাভাৱিক পৰিস্থিতিৰ বাবে চিবিএছইক পাঠ্যক্ৰম পুনৰ বিবেচনা কৰিবলৈ কোৱা হৈছিল ৷ যাতে নৱমৰ পৰা দ্বাদশ শ্ৰেণীলৈ ছাত্ৰ-ছাত্ৰীৰ ওপৰত বোজা কমে ৷ ইপিনে চিবিএছইয়ে জনায় যে পঢ়াশুনাৰ মাত্ৰাৰ গুৰুত্ব বুজি পাঠ্যক্ৰম কমোৱা হৈছে ৷ এই পাঠ্যক্ৰমত বিকল্প শিক্ষা কেলেণ্ডাৰ আৰু এনচিইআৰটিৰ কিছু বিষয় থাকিব পাৰে ৷ মন্ত্ৰীজনে লগতে জনায় যে দেশৰ ১৫০০ জন শিক্ষাবিদৰ পৰামৰ্শ আৰু আবেদন পোৱা গৈছিল ৷ যাতে এই বছৰৰ পৰিস্থিতিৰ বাবে ছাত্ৰ-ছাত্ৰীৰ সুবিধাৰ অৰ্থে আগন্তুক শিক্ষা বৰ্ষৰ পাঠ্যক্ৰম কমোৱা হয় ৷ আনকি দিল্লীৰ উপ মুখ্যমন্ত্রী মণীছ শিছোদিয়াই যোৱা এপ্ৰিলত কেন্দ্ৰীয় মন্ত্ৰীক ৩০ শতাংশ পাঠ্যক্ৰম কমাবলৈ আবেদন কৰিছিল ৷ সকলো বিবেচনা কৰি চিবিএছইক এই পৰামৰ্শ দিয়ে৷ যাৰ ফলত এই সিদ্ধান্ত লয় চিবিএছই ব’ৰ্ডে ৷
কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙে নিৰ্মাণ কৰি থকা প্ৰকল্পবোৰৰ বিষয়ে সীমান্ত পথ সংগঠনৰ মুখ্য লেফটেনেণ্ট জেনেৰেল হৰপাল সিং আৰু অন্যান্য জ্যেষ্ঠ বিষয়াসকলৰ সৈতে আলোচনা কৰে ৷ তদুপলক্ষে দক্ষিণ ব্লকত মঙলবাৰে এখন সভা অনুষ্ঠিত হয় বুলি প্ৰতিৰক্ষা মন্ত্ৰালয়ে জনাইছে ৷ লেফটেনেণ্ট জেনেৰেল হৰপাল সিঙে মন্ত্ৰী ৰাজনাথ সিঙক নিৰ্মাণ হৈ থকা পথবোৰৰ বিষয়ে চমুকৈ অৱগত কৰে ৷ এই প্ৰকল্পবোৰ চীনৰ সৈতে প্ৰকৃত নিয়ন্ত্ৰণ ৰেখা আৰু পাকিস্তানৰ সৈতে থকা নিয়ন্ত্ৰণ ৰেখাত চলি আছে ৷ সীমান্ত পথ সংগঠনৰ মুখ্য লেফটেনেণ্ট জেনেৰেল হৰপাল সিঙে আশ্বস্ত দিয়ে যে প্ৰকৃত নিয়ন্ত্ৰণ ৰেখা আৰু নিয়ন্ত্ৰণ ৰেখাত চলি থকা প্ৰকল্পবোৰ যথা সদয়ত সম্পন্ন কৰিব ৷ তেওঁ লগতে কয় যে প্ৰতিৰক্ষা, গৃহ আৰু পৰিবহণ বিভাগসহ সকলো বিভাগে সমন্বয় ৰক্ষা কৰি কাম কৰি আছে বুলি তেওঁ জনায় ৷ উল্লেখ্য যে সীমান্ত পথ সংগঠনে তিনিখন নতুন দলং নিমুৰ ওচৰত নিৰ্মাণ কৰি আছে ৷ ইয়াত ভাৰতীয় সেনাই টেংক আৰু বন্দুকসহ প্ৰকৃত নিয়ন্ত্ৰণ ৰেখাৰ পূৱ লাডাখত ভ্ৰমণ কৰি সহায় কৰিছে ৷ এই বেইলি দলংবোৰ আগতে ২৪ টনৰ যানবাহন গৈছিল ৷ এতিয়া নতুনকৈ ৭০ টনৰ কৰা হৈছে ৷ তিনি মাহৰ ভিতৰত এই কাম সম্পন্ন হয় ৷ দ্বিতীয়খন দলং নিমুৰ ওচৰৰ বাছগ’ত পুনৰ নিৰ্মাণ কৰা হৈছে ৷ গধুৰ যানবাহনৰ চলাচল কৰিব পৰা এই দলংখন সোনকালে পুনৰ নিৰ্মাণ কৰা হ’ব ৷ তৃতীয়খন দলং উলে ট’প’ত নিৰ্মাণ কৰা হৈছে ৷
