দৈনন্দিন বাৰ্তা ডেস্ক :

বাংলাদেশৰ পিৰোজপুৰ জিলাৰ দিঘিৰজান গাঁৱৰ এটা ২০০ বছৰীয়া শিৱ মন্দিৰ আৰু ব্যক্তিগত মালিকানাধীন মাটিৰ সীমাত থকা বাঁহৰ জেওৰা যোৱা সোমবাৰে দুৰ্বৃত্তই ধ্বংস কৰে ৷ এই ঘটনা সন্দৰ্ভত এটা ভিডিঅ’ ছচিয়েল মিডিয়াত প্ৰচাৰ হয় ৷ সেই ভিডিঅ’টোত দেখা গৈছিল যে নীলা পোচাক পৰিহিত এজন লোকে বাঁহৰ জেওৰাখন এডাল লাঠীৰে ভাঙি আছে ৷ বাংলাদেশত হিন্দুৰ ওপৰত চলা নিৰ্যাতনৰ ছবি এই ভিডিঅ’টোত স্পষ্টকৈ প্ৰকাশ পাইছে ৷ এই লোকসকল বহু বছৰ ধৰি তাত আছে কিন্তু তেওঁলোকে সেইলোক সকলৰ জেওৰা ধ্বংস কৰিছে ৷ এই দৃশ্যই আৱামী লীগ চৰকাৰৰ আইন শৃংখলা পৰিস্থিতি সম্পূৰ্ণভাৱে প্ৰকট কৰিছে ৷ এনেদৰে এজন হিন্দু লোকে ক্ষোভ প্ৰকাশ কৰিছে ৷ আন এজন লোকে কয় যে ভাঙিচিঙি এয়া ‘লুটপাট কাম’ কৰিছে আৰু তেওঁলোকৰ অনুভূতিত আঘাত কৰাৰ চেষ্টা চলাইছে ৷ প্ৰাপ্ত তথ্য মতে সেই অঞ্চলৰ প্ৰভাৱশালী মাটি দখলদাৰীয়ে হিন্দু সম্পত্তিৰ মাটিত চকু দিছে ৷ তালৈ তেহছিলদাৰ মহম্মদ ছাহজাহান শ্বেখ, মহম্মদ হেদায়েট শ্বেখ আৰু মহম্মদ কামৰুল শ্বেখ আহি বেআইনীভাৱে মাটি দখলৰ বাবে বাঁহৰ বেৰা ধ্বংস কৰিছিল ৷ উল্লেখ্য যে এই সম্পত্তিটোৰ গৰাকী হ’ল শ্বাহিদ জাননী কলেজৰ অধ্যক্ষ দ্বীপেন মজুমদাৰৰ ৷ উল্লেখ্য যে মজুমদাৰ হিন্দু-বৌদ্ধ-খ্ৰীষ্টান ইউনিটি কাউন্সিলৰ উপ সভাপতি৷ তথ্য মতে শিৱ মন্দিৰৰ নামত ১০ শতাংশ আৰু মজুমদাৰৰ পৰিয়ালৰ মাটিৰ নামত ১১ শতাংশ বাঁহ আৰু বাৰবেদ ৱায়াৰেৰে বেৰা আছে ৷ চৰকাৰী তথ্য মতে মাটি আৰু মন্দিৰ তেওঁৰ পৰিয়ালৰ নামত আছে৷ এই এলেকাটো নাজিপুৰ আৰক্ষী থানাৰ অৰ্ন্তগত ৷ 

দৈনন্দিন বাৰ্তা ডেস্ক :

মধ্যপ্রদেশৰ উজ্জয়িনীৰ এটা মন্দিৰৰ পৰা গ্ৰেপ্তাৰ হোৱা গেংষ্টাৰ বিকাশ ডুবেক আৰক্ষীয়ে কানপুৰলৈ আনিছিল ৷ কিন্তু কানপুৰ পোৱাৰ আগেয়ে শুকুৰবাৰে আৰক্ষীৰ সৈতে হোৱা সংঘৰ্ষত বিকাশৰ মৃত্যু হয় ৷ এই সংঘৰ্ষক লৈ ইতিমধ্যে বিভিন্ন প্ৰশ্ন উদয় হৈছে৷ আৰক্ষীয়ে দাবী কৰা মতে ৰাষ্ট্ৰীয় ঘাইপথেৰে যোৱাৰ সময়ত আৰক্ষীৰ কনভয়ৰ যি গাড়ীত বিকাশ আছিল সেই গাড়ীখন দুৰ্ঘটনাত পতিত হৈ বাগৰি উল্টা হৈ পৰে ৷ তেতিয়া এজন আৰক্ষীৰ পিষ্টল টানি আনি বিকাশে পলায়নৰ চেষ্টা কৰে৷ আৰক্ষীয়ে তেতিয়া বিকাশক আত্মসমৰ্পণ কৰিবলৈ কয় ৷ কিন্তু আত্মসমৰ্পণৰ পৰিৱৰ্ত্তে বিকাশে গুলী চালনা কৰে৷ আত্মৰক্ষাৰ বাবে আৰক্ষীয়েও গুলী চলায় বুলি আৰক্ষীয়ে দাবী কৰে ৷ কানপুৰ আৰক্ষীৰ শীৰ্ষ বিষয়া এজনে জনোৱা মতে গাড়ী দুৰ্ঘটনা হওঁতেই পিস্তল লৈ পলাবলৈ চেষ্টা কৰে বিকাশ ডুবেয়ে ৷ আৰক্ষীয়ে বিকাশক আত্মসমৰ্পণ কৰিবলৈ কৈছিল ৷ কিন্তু অপৰাধীটোৱে গুলী চালনাহে কৰে৷ বাধ্য হৈ আৰক্ষীয়ে গুলী চলাব লগা হয় ৷ আৰক্ষীৰ গুলীত গুৰুতৰভাৱে আহত হোৱাৰ পাছত বিকাশক চিকিৎসালয়লৈ নিয়া হয় ৷ তাতেই অপৰাধীটোক চিকিৎসকে মৃত ঘোষণা কৰে ৷ আনহাতে কানপুৰৰ আৰক্ষী মহাপৰিদৰ্শক মোহিত আগৰৱালাই জনায় যে এই সংঘৰ্ষত চাৰিজন আৰক্ষী আহত হয় ৷ উল্লেখ্য যে যোৱা সপ্তাহত কানপুৰৰ কাষৰ ভিকৰু গাঁৱত বিকাশ ডুবেক ধৰিবলৈ যাওতে এজন ডিএছপিসহ আঠজন আৰক্ষীৰ মৃত্যু হৈছিল ৷ তাৰ পাছত কানপুৰৰ ডনক গ্ৰেপ্তাৰ কৰিবলৈ চলিছিল এক নাটক ৷ অৱশেষত বৃহস্পতিবাৰে উজ্জয়িনীৰ মহাকাল মন্দিৰৰ পৰা অপৰাধীটোক গ্ৰেপ্তাৰ কৰে ৷ গ্ৰেপ্তাৰৰ পাছত উত্তৰ প্ৰদেশলৈ ঘূৰাই অনাৰ সময়তে এই ঘটনা ঘটে৷ ইপিনে বিকাশৰ গ্ৰেপ্তাৰৰ পাছত বিভিন্ন মহলত বহু প্ৰশ্ন উত্থাপন হৈছিল ৷ আৰক্ষীৰে সংঘৰ্ষত মৃত্যু হোৱাৰ পাছত আন বহু প্ৰশ্ন উত্থাপন হৈছে ৷ কি দৰে বিকাশ থকা গাড়ীখনে দুৰ্ঘটনা কৰিলে সেয়া জানিব পৰা নাই ৷ অপৰাধীটোক হাতকেয়াৰ লগোৱা নাছিল নেকি ? সেই কথা জানিব পৰা নাই ৷ ইয়াৰ পাছত বিকাশৰ মৃত্যুক লৈ উত্তৰ প্ৰদেশৰ চৰকাৰক লক্ষ্য কৰি বিৰোধী পক্ষই বিভিন্ন টুইট কৰিছে ৷ সমাজবাদী পাৰ্টিৰ নেতা অখিলেশ যাদৱে লিখিছে, আচলতে এই গাড়ী উল্টা হোৱা নাই ৷ এই গাড়ী উল্টি খাই নোযোৱা হ’লে চৰকাৰেই উল্টি খালেহেতেন ৷ কংগ্ৰেছ নেতা দিগ্বিজয় সিঙে লিখিছে, আমি যিটো সন্দেহ কৰিছিলো সেইটো ঘটিল ৷ বিকাশ ডুবেৰ সৈতে কোনো ৰাজনৈতিক নেতা বা আৰক্ষী বিষয়া জড়িত আছিল সেয়া জনা নহ’ব ৷

দৈনন্দিন বাৰ্তা ডেস্ক :

সমগ্ৰ বিশ্ব ক’ৰোনাৰ আতংকত ত্ৰস্তমান ৷ এই ভাইৰাছত বহুলোকৰ ইতিমধ্যে মৃত্যু হৈছে ৷ কিন্তু ক’ৰোনাত যিমান সংখ্যক লোকৰ মৃত্যু হৈছে তাতকৈ ভয়াৱহ দৰিদ্ৰতা আৰু ক্ষুধাত বেছি মানুহৰ মৃত্যু হৈছে ৷ ক’ৰোনাক ৰোধ কৰিবলৈ বিভিন্ন দেশে বহু পদক্ষেপ গ্ৰহণ কৰিছে৷ আনহাতে বিশ্বৰ লাখ লাখ মানুহ তীব্ৰ দৰিদ্ৰ হৈ ভোগ কৰিছে বুলি সতৰ্ক কৰি দিছে আন্তর্জাতিক খাদ্য সুৰক্ষা বিষয়ক স্বেচ্ছাসেৱী সংস্থা অক্সফামে ৷ দৰিদ্ৰ বিষয়টোক গুৰুত্ব নিদিলেও ক’ৰোনাতকৈ বেছি মানুহ অনাহাৰত মৃত্যু হৈছে বুলি আশংকা কৰিছে এই সংস্থাটোৱে ৷ সংক্রমণ ৰোধ কৰিবলৈ লকডাউন দিয়াত মানুহৰ খাদ্য সমস্যা হৈছে ৷ বিশ্বত বহু মানুহে কাম হেৰুৱাইছে ৷ আৰ্থিকভাৱে দুৰ্বল দেশবোৰত খাদ্য সৰবৰাহ ব্যাহত হৈছে ৷ ফলত তীব্ৰ খাদ্য সংকট হৈছে ৷ যুদ্ধবিধ্বস্ত য়েমেনত দুই তৃতীয়াংশ মানুহ চৰম দাৰিদ্ৰতাৰ মাজত আছে ৷ সেই দেশত কোনো অৰ্ধাহাৰ আৰু কোনো অনাহাৰত দিন কটাইছে ৷ আফগানিস্তানৰ পৰিস্থিতি দিনক দিনে বেয়াৰ দিশলৈ গৈছে ৷ এইখন দেশৰ ১০ লাখ মানুহ দুৰ্ভিক্ষৰ কৱলত পৰিছে ৷ অক্সফামৰ প্ৰতিবেদনত এই তথ্য পোহৰলৈ আহিছে ৷ যোৱা বছৰ ছেপ্টেম্বৰ মাহত আফগানিস্থানত ২৫ লাখ মানুহ দুৰ্ভিক্ষৰ কৱলত পৰিছিল ৷ এই বছৰ মে’ মাহত সেই সংখ্যা বাঢ়ি ৩৫ লাখ হয়গৈ ৷ যোৱা এপ্ৰিল মাহত বিশ্বত ক’ৰোনা ভাইৰাছত আক্ৰান্ত হৈ ১০ হাজাৰ মানুহৰ মৃত্যু হৈছিল ৷ কিন্তু ক’ৰোনাৰ পৰিস্থিতিৰ মাজতে প্ৰতিদিনে ১২ হাজাৰ মানুহ অনাহাৰত মৃত্যু হৈছে বুলি অক্সফামৰ প্ৰতিবেদনত প্ৰকাশ ৷ আনহাতে কংগু, ভেনিজুৱেলা, আফ্ৰিকাৰ ইথিওপিয়া, ছুদান, দক্ষিণ ছুদান, মধ্য প্ৰাচ্যৰ ছিৰিয়া আৰু কেৰিবিয়ান দ্বীপপুঞ্জৰ হাইতিৰ দৰে দেশ বৰ্তমান চূড়ান্ত দৰিদ্ৰতাৰ কেন্দ্ৰ বিন্দুত পৰিণত হৈছে বুলি অক্সফামে জনাইছে ৷