নলবাৰী :

সমগ্ৰ বিশ্বজুৰি এতিয়াও অব্যাহত আছে কৰণা ভাইৰাচৰ সন্ত্ৰাস । এনে মহামাৰীৰ সন্ত্ৰাস চলি থকাৰ সময়তে বৰ্তমান  ভাৰতবৰ্ষৰ চুবুৰীয়া দেশ চীন সৈতে যুদ্ধ সংকুল বাতাবৰণৰ সৃষ্টি হয় আছে । তেনে সময়তে লাডাখৰ চীন ভাৰতৰ সীমান্তত ভাৰতীয় সেনাবাহিনী আৰু চীনৰ সেনাবাহিনীৰ মাজত সংঘটিত হোৱা তুমুল সংঘৰ্ষত নিহত হোৱা ভাৰতীয় সেনাৰ প্ৰতি শ্ৰদ্ধা জনাই নলবাৰীত হিন্দু যুৱ ছাত্ৰ পৰিষদ নলবাৰী সমিতিয়ে চীনা সামগ্ৰী বৰ্জনৰ দাবীত প্ৰতিবাদ সাব্যস্ত কৰে । জিলা খনৰ হৰিমন্দিৰ চকৰ সমীপত ৰূপায়ণ কৰা এই প্ৰতিবাদী কাৰ্যসূচীত চীনৰ ৰাষ্ট্ৰপতিৰ লগতে চীনৰ দেশৰ পতাকা দাহণ কৰি হিন্দু যুৱ ছাত্ৰ পৰিষদ জিন্দাবাদ,চীন দেশ হায় হায়,চীনা সামগ্ৰী বৰ্জন কৰক আদি প্ৰতিবাদী শ্লগান দি চহৰৰ পৰিবেশ উত্তাল কৰি তোলে । হিন্দু যুৱ ছাত্ৰ পৰিষদে সংবাদ মাধ্যমৰ জৰিয়তে অসম তথা সমগ্ৰ ভাৰতবৰ্ষৰ ৰাইজক চীনা সামগ্ৰী বৰ্জন কৰিবলৈ আহ্বান জনাই । তদুপৰি যেতিয়া লৈকে এই চীন পৰা অহা সামগ্ৰী সৰ্বস্তৰৰ ৰাইজে বৰ্জন নকৰে তেতিয়ালৈকে হিন্দু যুৱ ছাত্ৰ পৰিষদ নলবাৰী সমিতিয়ে প্ৰতিবাদী কাৰ্যসূচী হাতত লৈ থাকিব বুলি মন্তব্য কৰে । আজিৰ এই প্ৰতিবাদী কাৰ্যসূচীত হিন্দু যুৱ ছাত্ৰ পৰিষদ নলবাৰী সমিতিৰ উপ -সভাপতিদ্বয় নৱজিত দাস আৰু ৰাকেশ ডেকা,সম্পাদক ডিম্বেশ্বৰ কলিতা সহ বহু কেই হিন্দু যুৱ ছাত্ৰ পৰিষদৰ কাৰ্মকৰ্তা সকল উপস্থিত থাকে ।

নামখলা:

ৰূপকোঁৱৰ জ্যোতিপ্ৰসাদ আগৰৱালাৰ জন্ম দিনটোতেই দক্ষিণ কামৰূপ উন্নয়ন সমিতিৰ উদ্যোগত এক অভিনন্দন তথা সম্বৰ্দ্ধনা অনুষ্ঠান অনুষ্ঠিত কৰে৷ ৰঙামাটি হাইস্কুলৰ পৰা সুখ্যাতিৰে উত্তীৰ্ণ হোৱা ১৩ গৰাকী ছাত্ৰক সম্বৰ্দ্ধনা জ্ঞাপন কৰে উন্নয়ন সমিতিয়ে ৷  বিদ্যালয়ৰ প্ৰেক্ষাগৃহত  অনুষ্ঠিত হোৱা সভাত সভাপতিত্ব কৰে বিদ্যালয়ৰ প্ৰধান ৰমেন চন্দ্ৰ দাসে৷ সভা উদ্ধোধন কৰি বিশিষ্ট সমাজ সেৱক তথা জনতা পাৰ্টিৰ অনুসুচীত জাতি মৰ্চাৰ উপসভাপতি কুশলজ্যোতি মালাকাৰে  ছাত্ৰসকলক বিভিন্ন গঠনমূলক পৰামৰ্শৰ লগতে এজন দক্ষ মানৱ সম্পদ গঢ়াৰ বাবে পৰামৰ্শ আগবঢ়ায়৷ উন্নয়ন সমিতিৰ সভাপতি তথা বিশিষ্ট সমাজ সেৱক ৰাজেন দাসে ১৩ গৰাকী ছাত্ৰক সামান্যতম আৰ্থিক অনুদান,  অভিনন্দন প্ৰত্ৰ, গামোছা আৰু মাস্ক প্ৰদান কৰি কয় যে এয়া এক প্ৰেৰণাৰ উৎস ৷ সভাত অৱসৰী শিক্ষকৰ লগতে অভিভাৱক সকলেও ছাত্ৰসকলক উদেশ্যি ভাষণ প্ৰদান কৰে৷ সভাত উপস্থিত থাকে শিক্ষক হৰমোহন কলিতা, অৱসৰী শিক্ষক ফণী কলিতা আৰু বিশিষ্ট ব্যৱসায়ী হৰেন দাস৷

নগাঁও : আজি নগাঁও পৌৰ সভাৰ কাৰ্য্যালয়ৰ সভা-কক্ষত নগাঁও পৌৰ সভাৰ উদ্যোগত স্বচ্ছ ভাৰত মিচন (নগৰঞ্চল) ৰ জৰিয়তে ডাষ্টবিন আৰু ট্ৰাইচাইকেল বিতৰণ কাৰ্যসূচীৰ উদ্বোধনী অনুষ্ঠান অনুষ্ঠিত হয়। উদ্ধোধনী অনুষ্ঠানত মুখ্য অতিথি হিচাপে উপস্থিত থাকে নগাঁও সদৰ সমষ্টিৰ বিধায়ক ৰূপক শৰ্মা। অনুষ্ঠানত বিধায়ক গৰাকীয়ে এই আঁচনিৰ অধীনত আনুষ্ঠানিকভাৱে পৌৰ সভাৰ এলেকাৰ বাসিন্দাক বিনামূলীয়া ডাষ্টবিন আৰু বিভিন্ন আত্মসহায়ক গোটক আৱৰ্জনা কঢ়িওৱাৰ বাবে ট্ৰাইচাইকেল বিতৰণ কৰে। বিধায়ক গৰাকীয়ে তেওঁৰ ভাষণত কয় যে, এই অভিলাষী আঁচনিৰ জৰিয়তে নগাঁও চহৰখনক চাফ-চিকুণ কৰি ৰখাৰ ক্ষেত্ৰত এক নতুন মাত্ৰা প্ৰদান কৰিব। তেওঁ লগতে নগাঁও চহৰখনক স্বচ্ছ আৰু প্ৰদূষণ মুক্ত কৰি ৰখাৰ ক্ষেত্ৰত সকলোৰে সহায় সহযোগিতা কামনা কৰে। উল্লেখযোগ্য যে, এই আঁচনিৰ জৰিয়তে নগাঁও পৌৰ সভাৰ এলেকাৰ অবাসী সকলক শুকান আৰু ভিজা আৱৰ্জনা নিষ্কাষণ বাবে দুটাকৈ বিনামূলীয়া ডাষ্টবিন পর্যায়ক্ৰমে প্ৰদান কৰা হ’ব আৰু এই ডাষ্টবিন সমূহ বিভিন্ন স্বেচ্ছাসেৱী সংগঠনৰ জৰিয়তে ব্যক্তি নিয়োগ কৰি ঘৰে ঘৰে গৈ এই ট্ৰাইচাইকেল সমূহৰ জৰিয়তে আৱৰ্জনা সমূহ সংগ্ৰহ কৰি নিষ্কাষণৰ বাবে লৈ যোৱা হ’ব। সভাত জিলা উপায়ুক্ত যাদৱ শইকীয়াও সকলোকে সজাগ সচেতন হৈ নগাঁও চহৰখন চাফ-চিকুণ আৰু প্ৰদূষণমুক্ত কৰি ৰাখিবলৈ কয়। সভাত অতিৰিক্ত উপায়ুক্ত তথা নগাঁও পৌৰ সভাৰ মুখ্য কার্যবাহী বিষয়া জয়ন্ত কুমাৰ বৰা, সহকাৰী আয়ুক্ত স্বপনীল পল প্ৰমুখ্যে বিভিন্ন বিষয়া সকল উপস্থিত থাকে।