মঙলদৈ 

দৰঙত দ্ৰুত হাৰত বৃদ্ধি পাব ধৰিছে ক’ভিড আক্ৰান্তৰ সংখ্যা । দৰঙত চিকিৎসাধীন হৈ থকা ক’ভিড আক্ৰান্তৰ সংখ্যা ৩৮ জনলৈ বৃদ্ধি পালে । বৃহস্পতিবাৰে নিশা ৪ জন লোকৰ দেহত ক’ভিডৰ উপস্থিতি ধৰা পৰাৰ পিছত শুকুৰবাৰে আন ১৩ জনৰ শৰীৰত ধৰা পৰে ক’ভিডৰ উপস্থিতি । ইয়াৰ পূৰ্বে ২১ জন লোকৰ শৰীৰত ধৰা পৰিছিল ক’ভিডৰ উপস্থিতি । নতুনকৈ আক্ৰান্ত হোৱা ১৭ জন ৰোগী হ’ল- গোমঠাপাৰাৰ  দয়াৰাম দাস (২৩), আঠীয়াবাৰীৰ ৰূপম বৰ্মন (২০) মণ্ডলপাৰাৰ ওচমান গণি (২১), দলগাঁৱৰ হামিদ আলি(২২), ২ নং কৌপাটি গাঁৱৰ ৰফিক আলি (২০), নদীকাষৰ চফিকুল ইছলাম (২৩), গ্ৰেণ্ডলেণ্ড বাগিচাৰ ৰুবুল আমিল (২১), চুকাবাহীৰ মাহেজ আলি‌ (১৮), এন চি বান্দিয়াৰ ৰফিকুল ইছলাম (২২), মধুপুৰৰ চিৰাজূল  হক (২৭), নিজ গদাইমাৰৰ ওহাব আলি (২১), চুকাবাহীৰ মান্নাচ আলি (২১), কৌপাটিৰ আজিজুল হক (২২), আলিচিংগাৰ জংগলৰ নবিৰ আলি (২১), প্ৰফুল্ল নগৰৰ মুকুট ঠাকুৰ (২০), দলগাঁৱৰ মজিবুৰ ৰহমান(২৯) আৰু বৰগুলেৰ চানিদুৰ ইছলাম (২০) । ইয়াৰে দয়াৰাম দাস, ৰূপম বৰ্মন, ওচমান গণি আৰু হামিদ আলীক শুকুৰবাৰে পুৱতি নিশা মঙলদৈ অসামৰিক চিকিৎসালয়ত ভৰ্তি কৰোৱা হয়। আনহাতে বাকী ১৩ জনক কুঁৱৰীপুখুৰী আদৰ্শ চিকিৎসালয়ত ৰখা হৈছে। অৱশ্যে দৰঙত প্ৰৱেশ কৰাৰ পিছৰে পৰা এই ১৭ জন লোক কোৱাৰেণ্টাইন চেণ্টাৰত আছিল। আনহাতে মঙলদৈ অসামৰিক চিকিৎসালয়ত ভৰ্তি কৰোৱা ৪ জন আক্ৰান্তৰ ভিতৰত দুজন ছিপাঝাৰ বি এড কলেজত থকাৰ বিপৰীতে আন দুজন খাৰুপেটীয়া মহাবিদ্যালয়ৰ কোৱাৰেণ্টাইন চেণ্টাৰত থকা। একেদৰে কুঁৱৰীপুখুৰী আদৰ্শ চিকিৎসালয়ত থকা ১৩ জন আক্ৰান্তৰ ভিতৰত দুজন জৱাহৰ নৱোদয় বিদ্যালয়ৰ আৰু বাকীসকল খাৰুপেটীয়া মহাবিদ্যালয়ৰ কোৱাৰেণ্টাইন চেণ্টাৰত আছিল । ইফালে দলগাওঁ আৰু ছিপাঝাৰ ৰাজহ চক্ৰৰ অন্তৰ্গত, খাৰুপেটীয়া মহাবিদ্যালয় ছাত্র নিবাস  আৰু ছিপাঝাৰ খণ্ড প্ৰাথমিক স্বাস্থ্য কেন্দ্ৰৰ সভাকক্ষত দুজন ক’ভিড-১৯  ৰোগী চিনাক্ত হোৱাৰ পিছত সংক্ৰমণ ৰোধ তথা জনসাধাৰণক স্বাস্থ্যকৰ পৰিৱেশত ৰখাৰ অৰ্থে সমগ্ৰ খাৰুপেটীয়া মহবিদ্যালয়ৰ ছাত্র নিবাস চৌহদ আৰু ছিপাঝাৰ খণ্ড প্ৰাথমিক স্বাস্থ্য কেন্দ্ৰৰ সভাকক্ষ কনটেইনমেন্ট জ’ন হিচাপে ঘোষণা কৰা হৈছে । উক্ত চৌহদলৈ তথা চৌহদৰ পৰা  কোনো লোক বা বাহন অকৰ্তৃত্বশীলভাৱে প্ৰবেশ বা প্ৰস্হান  কৰিব  নোৱাৰিব । লগতে সামাজিক দূৰত্ব বজাই ৰখাকে ধৰি আন আন নিৰ্দেশনাসমূহ এই  এলেকাত কঠোৰভাৱে মানি চলিব লাগিব৷ সুৰক্ষিত হিচাপে ঘোষণা  নকৰা পৰ্যন্ত এই আদেশ বাহাল থাকিব আৰু যদি কোনোবাই এই নিৰ্দেশনা  মানি নচলে, আইন অনুসৰি বিহিত ব্যৱস্থা গ্ৰহণ কৰা হ’ব ।

নগাঁও

বিশ্ব পৰিৱেশ দিৱসৰ দিনটোত কৰোনা ভাইৰাছ সংক্ৰমণৰ ক্ষেত্ৰত লবলগা সৱধানতা আৰু সজাগতা সৃষ্টিৰ লক্ষ্যৰে নগাঁও চহৰৰ এটি পৰিয়ালৰ কেইজনমান  সদস্যই চলোৱা ব্যতিক্ৰমী প্ৰয়াসে বহুতৰে দৃষ্টি আকর্ষণ কৰে। নগাঁও চহৰৰ চীনাপট্টি অঞ্চলৰ  বনজোৎস্না দত্ত ইছলাম আৰু তেওঁৰ স্বামীৰ লগতে একেটা পৰিয়ালৰে পাপন্না আহমেদ,ৰামিছা আখটাৰ ইছলাম নামৰ লোক কেইজনে চহৰখনৰ বিভিন্ন স্থানত থকা ৰাজহুৱা প্ৰতিষ্ঠানৰ দেৱালত চিত্ৰ অংকন কৰাৰ লগতে বিভিন্ন সজাগতা মূলক বাক্য লিখি কৰোনাৰ বিৰুদ্ধে মানুহৰ মাজত সজাগতা সৃষ্টিৰ প্ৰয়াস কৰে। বিশ্ব পৰিৱেশ দিৱসৰ দিনা বিভিন্ন ব্যক্তি আৰু দল- সংগঠনে প্ৰাকৃতিক পৰিবেশ সুস্থ ৰখাৰ ক্ষেত্ৰত বিভিন্ন কাৰ্যসূচী গ্ৰহণেৰে সমাজত সজাগতা সৃষ্টি কৰাৰ মাজতে চহৰখনৰ মধ্যবিত্ত শ্রেণীৰ এটা পৰিয়ালৰ কেইজনমান সদস্যই  ব্যক্তিগত প্ৰচেষ্টাৰে দেৱালত চিত্ৰ অংকন আৰু সজাগতা মূলক বাক্য লিখনিৰে কৰোনাৰ বিৰুদ্ধে চলোৱা সজাগতা মূলক অভিযানক নগাঁৱৰ সচেতন মহলে আদৰণি জনায় । গুৱাহাটী বিশ্ববিদ্যালয়ৰ পৰা ফাইন আৰ্টৰ ডিগ্ৰী গ্ৰহণ কৰা বনজোৎস্না দত্ত ইছলামে দেৱাল লিখন আৰু চিত্ৰ অংকন সম্পৰ্কত কয় যে  কৰোনা ভাইৰাছ সংক্ৰমণৰ ক্ষেত্ৰত বহু লোকৰ সজাগতা অভাৱ ।  অথচ কৰোনা ভাইৰাছৰ সংক্ৰমণ দিনক দিনে বৃদ্ধি পাব ধৰিছে । তেনেক্ষেত্রত মানুহে মাস্ক পৰিধান কৰাৰ লগতে সামাজিক দূৰত্ব বজাই ৰখাটো নিতান্তই প্রয়োজন । সেয়ে জনসাধাৰণৰ হিতৰ প্ৰতি লক্ষ্য ৰাখি এই প্ৰচেষ্টা গ্ৰহণ কৰা বুলিও তেওঁ মন্তব্য কৰে । আনহাতে আজি নগাঁও মহাবিদ্যালয় চৌহদৰ দেৱালত আৰম্ভ কৰা সজাগতা মূলক চিত্ৰ অংকন কাৰ্যসূচী  চহৰখনৰ বিভিন্ন স্থানত সম্পন্ন কৰাৰ পৰৱৰ্তী পৰ্যায়ত কলিয়াবৰ পৰ্যন্ত এই কাৰ্যসূচী চলাই যাব বুলিও তেওঁ  জানিবলৈ দিয়ে।

নগাঁও

আৰক্ষীৰ প্ৰহাৰত চিকিৎসাধীন অৱস্থাতে মৃত্যুক সাৱতি লোৱা জাজৰিৰ গাঁওৰক্ষী বাহিনীৰ সম্পাদক ফণীধৰ বৰাৰ হত্যাৰ উচিত শাস্তিৰ দাবীত আজি বন্ধ ৰখা হয় জাজৰি বজাৰ। উল্লেখযোগ্য যে সদৌ অসম ছাত্ৰ সন্থাৰ হাতীচোং আঞ্চলিক শাখাৰ প্ৰাক্তন সভাপতিৰূপে কাৰ্যনিৰ্বাহ কৰা প্ৰয়াত বৰাই জাজৰি ব্যৱসায়ী সন্থাৰো সভাপতিৰ দায়িত্ব বহন কৰিছিল। ইতিমধ্যে নগাঁও আৰক্ষীয়ে সমগ্ৰ ঘটনা সন্দৰ্ভত তদন্ত অব্যাহত ৰখাৰ লগতে অভিযুক্ত আৰক্ষীৰ জোৱান পৰেশ শৰ্মা আৰু আটাউৰ ৰহমানৰ বিৰুদ্ধে ২৪১/২০ নম্বৰৰ এক গোচৰ ৰুজু কৰি দুয়োকে গ্ৰেপ্তাৰ কৰিছে। আৰক্ষীয়ে লগতে জাজৰি আৰক্ষী থানাৰ ভাৰপ্ৰাপ্ত বিষয়া মলয় আচাৰ্যকো আৰক্ষীৰ মুখ্য কাৰ্যালয়লৈ শাস্তিমূলক বদলি কৰিছে। কিন্তু জাজৰি তথা বৃহত্তৰ অঞ্চলৰ এগৰাকী সৰবৰহী ব্যক্তি ৰূপে পৰিচিত ফণীধৰ বৰাৰ মৃত্যুৰ ঘটনাক সহজে ল’ব পৰা নাই শোকস্তব্ধ অঞ্চলবাসীয়ে। অঞ্চলটোৰ ৰাইজৰ অভিযোগ গাঁওৰক্ষী বাহিনীৰ সম্পাদক প্ৰয়াত ফণীধৰ বৰাই জাজৰি থানাত নৱনিৰ্মিত শিৱমন্দিৰৰ নামত সংঘটিত হোৱা দূৰ্নীতি উন্মোচন কৰাৰ বাবেই এইদৰে নিমৰ্ম ভাৱে প্ৰহাৰ কৰি হত্যা কৰা হ’ল তেঁওক। আনকি জাজৰি আৰক্ষী থানাত পূৰ্বে কৰ্মৰত তৰণী এগৰাকীয়েও সংবাদ মাধ্যমৰ সন্মুখত মুকলিকৈ জাজৰি আৰক্ষীৰ কু-কীৰ্তিৰ বিষয়ে বৰ্ণনা কৰে। ইপিনে ফণীধৰ বৰাৰ বাসগৃহত আজি পুৱাই কংগ্ৰেছ বিধায়িনী দলৰ উপদলপতি তথা বিধায়ক ৰকিবুল হুছেইন  প্ৰাক্তন মন্ত্ৰী গৌতম বৰা আৰু কংগ্ৰেছ নেত্ৰী শিৱামণি বৰা উপস্থিত হৈ শোকস্তব্ধ পৰিয়ালবৰ্গক সান্তনা দিয়াৰ লগতে ঘটনাটোৰ উচিত তদন্তৰ দাবী তোলে। দিনৰ প্ৰায় ১বজাত ফণীধৰ বৰাৰ গৃহত আহি উপস্থিত হয় অতিৰিক্ত আৰক্ষী সঞ্চালক প্ৰধান জি পি সিং। জ্যেষ্ঠ আৰক্ষী বিষয়া গৰাকীয়েও পৰিয়ালটোক সমবেদনা জ্ঞাপন কৰাৰ লগতে ১লাখ টকাৰ এককালীন সাহাৰ্যও প্ৰদান কৰে। আৰক্ষী বিষয়া গৰাকীয়ে ১৫দিনৰ ভিতৰত অভিযোগনামা দাখিল কৰিবলৈ নগাঁৱৰ অতিৰিক্ত আৰক্ষী অধীক্ষক মোহনলাল মীনাক নিৰ্দেশ দিয়াৰ লগতে গোচৰৰ বিচাৰ প্ৰক্ৰিয়া ফাষ্ট ট্ৰেক আদালতত চলোৱাৰ বাবে চেষ্টা কৰাৰো প্ৰতিশ্ৰুতি দিয়ে। উল্লেখযোগ্য শেহতীয়া ভাৱে নগাঁও জিলাত বৃদ্ধি পোৱা অপৰাধ নিয়ন্ত্ৰনত ব্যৰ্থ হোৱা নগাঁও আৰক্ষীৰ দুগৰাকী জোৱানৰ এনে কাৰ্যক সকলোৱে একেমুখে ধিক্কাৰ দিছে। যোৱা ১৭ মাৰ্চত নগাঁও চহৰৰ ম’হখুলিত আৰক্ষী বিষয়াক মাৰ-পিট কৰি পিষ্টল কাঢ়ি নিয়া ড্ৰাগছ মাফিয়াইমতিয়াজ আলীক আজিও গ্ৰেপ্তাৰ কৰিব পৰা নাই আৰক্ষীয়ে। ইয়াৰ উপৰিও বৰঘাট বাইপাছত আৰক্ষীৰ বাহনত আক্ৰমণ, বটদ্ৰৱাত আৰক্ষীক আক্ৰমণ, কৰৈয়ণীত অগ্নিদগ্ধ কৰি মহিলাক হত্যা কৰা, মৰিকলঙত বাহনসহ অগ্নিদগ্ধ কৰি অঘৰী ব্যক্তিক কৰা নৃশংস হত্যাৰ অন্তৰালত থকা জঘণ্য অপৰাধীক কৰায়ত্ত কৰাত সম্পূৰ্ণৰূপে ব্যৰ্থ হৈছে নগাঁও আৰক্ষী। সেয়ে জাজৰিত নিৰপৰাধী ব্যক্তিৰ ওপৰত আৰক্ষীয়ে বীৰত্ব প্ৰদৰ্শন কৰা কাৰ্যক সকলোৱে গৰিহণা দিছে । ইপিনে জাজৰি আৰক্ষীৰ দানৱীয় অত্যাচাত মৃত্যু হোৱা ফণিধৰ বৰাৰ মৃতদেহ বাসগৃহত আহি পোৱাৰ লগে লগে এক শোকাকুল পৰিবেশৰ সৃষ্টি হয় । হাতীচোং আঞ্চলিক ছাত্ৰ সন্থা, জাজৰি শ্ৰমিক সন্থা, গাঁওৰক্ষী বাহিনী আৰু জাজৰি প্ৰেছ ক্লাৱৰ তৰফৰ পৰা শেষ শ্ৰদ্ধাঞ্জলি জ্ঞাপন কৰে স্বৰ্গীয় ফনীধৰ বৰাক।

মঙলদৈ পৰা অজয় ডেকা

এখন বৃহৎ নেমু বাগিচা মুকলি কৰি দৰং জিলা প্ৰশাসনে শুকুৰবাৰে বিশ্ব পৰিৱেশ দিৱস উদযাপন কৰে । শালৈপাৰা প্ৰাথমিক বিদ্যালয়ৰ চৌহদৰ প্ৰায় ৩ বিঘা জোৰা মাটিৰ ১৬৫ জোপা নেমুগছৰ এই বাগানখনৰ মুকলি কৰে মঙলদৈ সমষ্টিৰ বিধায়ক গুৰুজ্যোতি দাসে৷ অনুষ্ঠানটিত উপস্থিত থাকে দৰং জিলাৰ উপায়ুক্ত দিলীপ কুমাৰ বৰা, জিলা উন্নয়ন আয়ুক্ত চুইটি গগৈ কলিতা, জিলা শিক্ষা বিষয়া জোৱাহিৰা তাবাচ্চুম, কলাইগাওঁ শিক্ষা খণ্ডৰ শিক্ষা বিষয়া সমৰেন্দ্ৰ চহৰীয়া, মঙলদৈ মহকুমা প্ৰাথমিক শিক্ষক সন্মিলনীৰ সভাপতি পৱন কুমাৰ ঝা আৰু অন্যান্য শিক্ষক-শিক্ষয়িত্ৰী তথা ৰাইজ উপস্থিত থাকে । বিধায়ক গুৰুজ্যোতি দাসে অনুষ্ঠানত ভাষণ দি সকলো লোককে পৃথিৱীখন সেউজীয়া কৰি ৰখাৰ স্বাৰ্থত গছপুলি ৰোৱাৰ অভ্যাস গঢ়ি তুলিবলৈ আহ্বান জনায় । দৰং জিলাৰ উপায়ুক্ত দিলীপ কুমাৰ বৰাই কয় যে এই বাগিচাখনে বিদ্যালয়খনক এক সুন্দৰ পৰিৱেশ দিয়াৰ লগতে ছাত্ৰ-ছাত্ৰীসকলৰ দুপৰীয়াৰ আহাৰৰ লগত নেমু পৰিবেশন কৰি তেওঁলোকক ভিটামিন যোগান ধৰিবলৈ সহায় কৰিব । উল্লেখযোগ্য যে আকাংক্ষিত জিলাৰ ড’ণাৰ পুজিৰ ৫০ হাজাৰ টকাৰ আৰ্থিক সাহাৰ্যৰে  এক পাইলট প্ৰজেক্ট হিচাপে এই নেমু বাগানখন গঢ়ি তোলা হৈছে । ইফালে দৰং জিলা একলাখ বৃক্ষ ৰোপন গোটৰ উদ্যোগটো সভাপতি নিৰঞ্জন শইকীয়া আৰু মুখ্য সম্পাদক মৃদুল কলিতাৰ নেতৃত্বত আজি বিশ্ব পৰিবেশ দিৱসৰ দিনা ৰাতিপুৱাৰ পৰা মঙলদৈ জিলা কাৰাগাৰ, মঙ্গলদৈ সদৰ আৰক্ষী থানা,পাথৰিঘাট আৰক্ষী চকী, জনাৰামচৌকা কে,এন ইণ্ডাষ্ট্ৰীৰ লগতে জিলাখনৰ বহুঠাইত গছপুলি ৰোপণ আৰু বিতৰণ কাৰ্যসূচী ৰূপায়ণ কৰে। উক্ত কাৰ্যসূচী ৰূপায়নত গোটতিক সহযোগ আগবঢ়াই মঙ্গলদৈ ৰাজহ চক্ৰৰ সহকাৰী চক্ৰ বিষয়া অম্বৰীশ বৰা, জিলা কাৰাগাৰ বিষয়া , মঙ্গলদৈ সদৰ আৰক্ষী থানাৰ ভাৰপ্ৰাপ্ত আৰক্ষী বিষয়া নিৰঞ্জন বৰুৱা,পাথৰিঘাট আৰক্ষী চকীৰ ভাৰপ্ৰাপ্ত বিষয়া মহেন্দ্ৰ শৰ্মা, দৰং জিলাৰ বিশিষ্ট উদ্যোগপতি হেমপ্ৰভা দেৱী ,সদৌ দৰং জিলা ছাত্ৰ সন্থাৰ সভাপতি খনিন্দ্ৰ ৰাজবংশী, প্ৰাক্তন সভাপতি শৰৎ ডেকা, দৰং জিলাৰ জ্যেষ্ঠ সাংবাদিক দিগন্ত কুমাৰ শৰ্মা, যুৱ সাংবাদিক অজয় ডেকাৰ লগতে কেইবাগৰাকীও বিশিষ্ট ব্যক্তিৰ জৰিয়তে গছপুলি ৰোপণ আৰু বিতৰণ কৰে বৃক্ষ ৰোপণ গোটতিয়ে৷যোৱা চেপ্তেম্বৰ মাহৰ পৰাই বৃক্ষ ৰোপন গোটতিয়ে দৰং জিলাৰ বিভিন্ন ঠাইত এতিয়ালৈকে প্ৰায় ৬০ হাজাৰৰো অধিক গছপুলি ৰোপন কৰিছে৷

লংকা 

কালি বিমান যোগে কলিকতাৰ পৰা গুৱাহাটীলৈ অহা  হোজাইৰ বিধায়ক শিলাদিত্য দেবৰ পত্নী আৰু পুত্ৰ ক স্বাস্থ্য বিভাগে আজি বিধায়কজনৰ লংকাৰ জোৰাপুখুৰীস্হিত  নিজ গৃহত হোম কোবাৰেণ্টাইনত  কৰিছে  । বিধায়ক শিলাদিত্য দেৱৰ পত্নী আৰু পুত্ৰক হোম কোৱাৰেন্টাইন কৰা সন্দৰ্ভত বিধায়ক গৰাকীৰ ভাষ্য , এইটো আইনৰ কথা নহয় , ধৰ্মৰ কথা  । কাৰণ আমি অসম আৰু অসমীয়াক বচাব লাগিব । আমাৰ হিমন্ত বিশ্ব শৰ্মা আৰু সৰ্বানন্দ সোনোৱাল ডাঙৰীয়াই অসমক কৰ’ণা ভাইৰাছৰ পৰা বচাবৰ কাৰণে যি যুঁজ দিছে তাত মোৰো যুঁজ থাকিব লাগিব । মোৰ  পত্নী আৰু ল’ৰা ১৮ মাৰ্চতেই  কলকতালৈ গৈছিল আৰু ২৪ মাৰ্চ ৰ পৰা দেশত লকডাউন  আৰম্ভ হৈ গৈছিল । লকডাউন ‘ৰ মাজতে  ম‌ই  তেওঁলোকক আনিব পাৰিলোহেতেন কিন্তু অনা নাই । যিটো নিয়ম ,  সেইটো মই  পালন কৰিব লাগিব  । আঢ়ৈ  মাহৰ পিছত কলিকতাৰ পৰা যোৱা কালি বিমানৰ জৰিয়তে  তেওঁলোক গুৱাহাটী লৈ আহিল ।  তেওঁলোকৰ সকলো পৰিক্ষাৰ নমুনা সংগ্ৰহ কৰা হৈ গ’ল । নিশা হোজাইৰ ঘৰ আহি পালে আৰু  ১৪ দিনৰ হোম কোৱান্টাৰাইন তেওঁলোকে পালন কৰিব লাগিব ।  লংকাৰ জোৰা পুখুৰীৰ মোৰ নিজ  গৃহত তেওঁলোকক বৰ্তমান হোম কোৱাৰেন্টাইন কৰি ৰখা হৈছে । লগতে বিমানৰ পৰা তেওঁলোকক আনিবলৈ যোৱা চালক জনকো হোম কোৱাৰেন্ন্টাইনত ৰখা হৈছে  । সংবাদ মাধ্যমৰ সৈতে হোবা কথা-বতৰাত বহু বিতৰ্কিত  বিধায়ক জনে আৰু কয় যে  এন আৰ চিত নাম কটা যোৱা  মানুহ খিনিয়েই হোজইত ৰেলৰ চেইন টানিছে  । যিসকলে নিজক অসমীয়া বুলি নাভাবে , বিদেশী বুলি ভাবে তেওঁলোকে ধংস কৰিব বিচাৰিছে অসম খনক । নহলে তেওঁলোকে এনে অপৰাধমুলক কাম নকৰে । হোজাই লৈ কোনে আনিছে কʼৰণা ভাইৰাছ  ? এতিয়া আমি অসমত সকলোতকৈ বেছি কʼৰণা  সংক্ৰমিত ঠাই হিচাপে চিহ্নিত হৈ গৈছো । মোৰ লাজ লাগিছে  । ম‌ই আগতেই কৈ আছিলো যে অসমত বাংলাদেশী মুছলমান মানুহ আছে আমি এতিয়াহে প্ৰমাণ পাইছো ।