কাকপথাৰ

  মৰাণ জাতীয় মহিলা পৰিষদৰ কেন্দ্ৰীয় সমিতিৰ সভানেত্ৰী আৰু সম্পাদিকা ক্ৰমে দীপা শইকীয়া বড়া আৰু হেমা মৰাণে বাতৰি কাকতলৈ দিয়া এক বিবৃতি যোগে জনাইছে যে অইল ইণ্ডিয়াই কৰ্দৈগুৰি অঞ্চলৰ বাঘজান গাঁৱত দীৰ্ঘদিন ধৰি  স্থানীয় লোকসকলৰ লগতে অঞ্চলটোৰ পৰিৱেশত কোনো হানি বিঘিনিৰ প্ৰতি তিলমানো ভ্ৰুক্ষেপ নকৰি বিজ্ঞানসন্মত পৰিকল্পনা অবিহনে খনন কাৰ্য চলাই অহাৰ ফলশ্ৰুতিতে বৰ্তমানে ভয়াবহ পৰিস্থিতিৰ সৃষ্টি হোৱাৰ অভিযোগ তুলিছে৷বাঘজান তৈলক্ষেত্ৰৰ পৰা গেছ আৰু তেল নিৰ্গত হৈ স্থানীয় লোক সকলৰ লগতে গছ গছনি আৰু পক্ষীকুলৰ প্ৰতি ভাবুকি সৃষ্টি কৰা কাৰ্যত মৰাণ জাতীয় মহিলা পৰিষদে তীব্ৰ গৰিহনা দিছে।অতিশ্ৰীঘ্ৰে খাদটোৰ পৰিস্থিতি নিয়ন্ত্ৰণ কৰি সম্পূৰ্ণ বিজ্ঞান সন্মত পদ্ধতিৰে খনন কাৰ্য চলাবলৈ দাবী জনায় ৷ লগতে ক্ষতিগ্ৰস্ত লোকসকল ক্ষতিপূৰণ দিয়াৰ লগতে জীৱকুল আৰু পৰিৱেশৰ নিৰাপত্তা নিশ্চিত কৰিবলৈ দাবী জনায় ৷ বাঘজান তেলখাদৰ সমস্যা সমাধান নোহোৱা পৰ্যন্ত মৰাণ জনজাতি অধ্যুষিত অঞ্চলৰ তেলখাদ সমূহ বন্ধ ৰাখিবলৈ দাবী জনায় ৷ অন্যথা তীব্ৰ প্ৰতিবাদী কাৰ্যসূচী গ্ৰহন কৰাৰো হুংকাৰ দিয়ে।ইফালে চুতীয়া ছাত্ৰ সন্থাৰ তিনিচুকীয়া জিলা সমিতিৰ সভাপতি ৰতন বড়াই প্ৰেছ বিবৃতিত উল্লেখ কৰা অনুসৰি অতি সোনকালে যদি বাঘজান ৫ নং খাদৰ পৰা অহৰহ নিৰ্গত হৈ থকা গেছ আৰু তেল ওলোৱা বন্ধ নকৰে , তেতিয়া হলে অঞ্চলটোৰ বহু ক্ষয় ক্ষতি হোৱাৰ লগতে ডাঙৰী নদীৰ মাছ-কাছ, মটাপুং মাগুৰি বিলৰ দুষ্প্ৰাপ্য শিহু আৰু ভিন্ন প্ৰজাতিৰ মাছ পানীত মৰাৰ ওপৰিও গছ গছনি  হোৱাৰ অনিষ্ট হ’ব৷ গতিকেএইক্ষেত্ৰত জিলা প্ৰশাসন, বনবিভাগৰ লগতে অইল কৃৰ্তপক্ষক যথোপযুক্ত ব্যৱস্থা গ্ৰহনৰ দাবী জনাইছে।লগতে তিনিচুকীয়া জিলাত চলি থকা  প্ৰতিটো তেলখাদ এই ভয়াবহ সমস্যা বন্ধ নোহোৱালৈকে তথা তৈল নিগমৰ লগত জাতীয় আৰু সামাজিক সংগঠনৰ আলোচনা নোহোৱা পৰ্যন্ত সকলো তেলখাদ আজি তাৰিখৰ পৰা বন্ধ কৰিবলৈ দাবী জনাইছে। উক্ত দাবীসমূহ সমাধান নোহোৱাৰ প্ৰৰ্যন্ত অইল ইণ্ডিয়াই তিনিচুকীয়া জিলাত কোনো খনন কাৰ্য কৰিব নোৱাৰিব। এনে সমস্যাৰ ওপৰত তিনিচুকীয়া জিলা চুতীয়া ছাত্ৰ সন্থাই আগন্তক সময়ত প্ৰতিবাদী কাৰ্যসূচীৰো গ্ৰহণ কৰাৰো সিদ্ধান্ত  লৈছে।

টুকটুকী, নগাঁও

নগাঁও জিলাৰ জুৰীয়া উন্নয়ন খণ্ডৰ অন্তৰ্গত বিভিন্ন গাঁও পঞ্চায়তত বিগত সময়ছোৱাত এম জি এনৰেগাকে প্ৰমুখ্য কৰি বহুকেইটা গুৰুত্বপূৰ্ণ আঁচনি ৰূপায়নত সংঘটিত হৈছে কেৱল দুৰ্নীতি আৰু লুণ্ঠন । আনকি এই আঁচনিবোৰৰ লগত জড়িত একাংশ চৰকাৰী বিষয়া-কৰ্মচাৰীয়ে চৰকাৰে গ্ৰহণ কৰা শূন্য সহনশীলতা নীতি পৰিহাৰ কৰি যেন চৰকাৰী ধন উদৰস্থ কৰাৰ প্ৰতিযোগিতাতহে নামি পৰিছে । কিয়নো কোনোটো পঞ্চায়তত যদিহে প্ৰধানমন্ত্ৰী আবাস যোজনাত কেলেংকাৰী হৈছে, তেন্তে আন কোনোটো পঞ্চায়তত হৈছে ভুৱা আঁচনিৰে চৰকাৰী ধনৰ হৰলুকি ৷ তদুপৰি কোনোটো পঞ্চায়তত আকৌ জৱ কাৰ্ডৰ জৰিয়তে আত্মসাৎ কৰিছে দৰিদ্ৰ হিতাধিকাৰীৰ ধন । মুঠতে চৰকাৰী বিষয়া-কৰ্মচাৰীৰ পৃষ্ঠপোষকতাত জুৰীয়া উন্নয়ণ খণ্ডৰ এলেকাধীন পঞ্চায়তসমূহত এতিয়া দুৰ্নীতিয়েই যেন হৈ পৰিছে নীতি ৷ কিন্তু শেহতীয়াভাবে এই উন্নয়ণ খণ্ডটোত সংঘটিত হোৱা এনে এক দুৰ্নীতিৰ তথ্য আৰ টি আইৰ জৰিয়তে পোহৰলৈ আহিছে । জানিব পৰা মতে, এছ অ’ পি ডি ২০১৭-১৮ বৰ্ষৰ নিৰ্মিত  ‘সৌৰশক্তিযুক্ত পোহৰ তথা পানী উত্তোলন সহ ৰাজহুৱা শৌচাগাৰ নিৰ্মান আচঁনি’ত ব্যাপক দুৰ্নীতি সংঘটিত হৈছে ৷ ইয়াৰে মুঠ আঠ লাখ টকা ব্যয়ৰে বলিকটিয়া গাওঁ পঞ্চায়তৰ অন্তৰ্গত ডুমডুমীয়া বজাৰ সংলগ্ন খেল পথাৰত এই আঁচনিৰ কাম বিগত বৰ্ষৰ অক্টোবৰ মাহত আৰম্ভ কৰা হৈছিল । প্ৰাপ্ত তথ্য মতে, এই আচঁনিখন নিৰ্মাণ কৰিবলৈ প্ৰথম কিস্তিত মুঠ ৪ লাখ টকা অনুমোদন জনোৱা হৈছিল ৷ কিন্তু ৩,৩৭,৭৬৫ টকা প্ৰথম পৰ্যায়ত উক্ত আচঁনিত ব্যৱহাৰিক হিচাপে ভূৱা বিল বনাই কাগজে পত্ৰই খৰছ কৰা দেখুৱাই সেই সময়ৰ উন্নয়ন খণ্ডটোৰ ভাৰপ্ৰাপ্ত খণ্ড উন্নয়ন বিষয়া আলতাফ হুছেইন আৰু যুটীয়া স্বাক্ষৰকাৰী প্ৰকল্প সঞ্চালক তথা নগাঁও জিলা পৰিষদৰ মুখ্য কাৰ্যবাহী বিষয়া দেৱশীষ বৈশ্যই আঁচনিৰ ধন সমুদায় হৰলুকি কৰে । অভিযোগ অনুসৰি ,বিষয়া দুজনে এক গোপন বুজাবুজিৰে নাম মাত্ৰ কাম কৰিয়েই কৌশলেৰে আঁচনিখন সম্পূৰ্ণ নহওঁতেই প্ৰথম পৰ্যায়তেই লাখ লাখ টকা আত্মসাৎ কৰে । কিন্তু দুৰ্নীতিপৰায়ণ বিষয়াদ্বয়ৰ এনে বিয়াগোম কেলেংকাৰীৰ বিষয়ে আৰ টি আইৰ জৰিয়তে বৰ্তমান উন্মোচিত হোৱাত স্থানীয় অঞ্চলজুৰি ব্যাপক চাঞ্চল্যৰ সৃষ্টি হৈছে ৷ ইফালে, এনে কেলেংকাৰীক লৈ ক্ষুভিত হৈ পৰা স্থানীয় এজন সচেতন ব্যক্তিয়ে যোৱা ১৯ মে’ত দগাঁও আৰক্ষী পহৰা চকীত উক্ত আচঁনিখনত সংঘটিত হোৱা দুৰ্নীতিৰ উচিৎ তদন্ত বিচাৰি এজাহাৰ দাখিল কৰাত দগাঁও আৰক্ষীয়ে  ভাৰতীয় দণ্ড বিধি আইনৰ অধীনত ৪২০/৪০৬ ধাৰাত ২০৩ নম্বৰত এটি গোচৰ ৰুজু কৰি বৰ্তমান তদন্ত চলাই আছে বুলি জানিব পৰা গৈছে ।

নগাঁও

 দেশৰ খাটি খোৱা ৰাইজৰ কষ্ঠোপাৰ্জিত ধন সহজে বেংকত সঞ্চয় কৰাৰ বাবে কেন্দ্ৰীয় চৰকাৰৰ নিৰ্দেশত ভাৰতীয় বেংকসমূহে দেশজুৰি প্ৰৱৰ্তন কৰিছে লাখ লাখ গ্ৰাহক সেৱা কেন্দ্ৰ চমুকৈ চি এছ পি কেন্দ্ৰ। সংশ্লীষ্ট স্থানীয় বেংক সমূহত পঞ্জীয়নভুক্ত গ্ৰাহক সেৱাৰ এই চি এছ পি কেন্দ্ৰ সমূহত সীমিত লেনদেনৰ বাবে গ্ৰামাঞ্চলৰ দৰিদ্ৰ আৰু অশিক্ষিত ৰাইজে সহজে বেংক একাউন্ট খুলি ধন সঞ্চয় কৰাৰ লগতে চৰকাৰ জন ধন আচঁনি, প্ৰধানমন্ত্ৰীৰ বীমা যোজনা, ৰন্ধন গেছ, প্ৰধানমন্ত্ৰীৰ কৃষি সন্মান নিধি আচঁনি, সংখ্যালঘু ছাত্ৰ-ছাত্ৰী বৃত্তি, জব কাৰ্ড  আদিকে ধৰি বহু আচঁনিৰ অধীনত হিচাধিকাৰীয়ে একাউন্ট খুলিছিল । একাউন্ট খোলাৰ পিছত অধিকাংশ চি এছ পিয়ে ৰাইজৰ সৰলতাৰ সুযোগ লৈ কোটি কোটি টকা সম্পদ গঢ়ি তুলি চহৰে-নগৰে বিলাসী অট্টালিকা সাজি তোলাতহে ব্যস্ত হৈ পৰিছে। প্ৰধানমন্ত্ৰী নৰেন্দ্ৰ মোদীয়ে দৰিদ্ৰ কৃষকসকলক সকাহ দিয়াৰ উদ্দেশে প্ৰধানমন্ত্ৰী কৃষি সন্মান নিধি আচঁনিৰ জৰিয়তে প্ৰতি ৪ মাহৰ মূৰে মূৰে কৃষক সকলৰ বেংক একাউন্টত দুহেজাৰ টকাকৈ দিয়াৰ ব্যৱস্থা কৰিছে যদিও এই অভিলাসী আচঁনিত একাংশ বিজেপিৰ নেতা পালি নেতা আৰু একাংশ বিষয়া কৰ্মচাৰীয়ে বেংকৰ চি এছ পিৰ বাণিজ্যিক প্ৰতিনিধিৰে মিলি প্ৰকৃত কৃষকক বঞ্চিত কৰি ভুৱা কৃষকৰ নামত একাউন্ট খুলি কোটি কোটি টকা লুন্ঠন কৰাৰ অভিযোগ সৰ্বত্ৰে উঠাৰ সময়তে নগাঁও জিলাৰ গ্ৰামীণ বিকাশ বেংক ৰাইদঙীয়া শাখাৰ অধীনত থকা হাতীযুজোৱা চি এচ পিৰ  বাণিজ্যিক প্ৰতিনিধিয়ে ব্যাপক দুৰ্নীতি-অনিয়ম সংঘটিত কৰাৰ অভিযোগ উঠিছে। প্ৰথম অৱস্থাত এই চি এচ পিৰ স্বত্বাধিকাৰী আনজাৰ হুছেইন আছিল যদিও বিভিন্ন অনিয়ম-দুৰ্নীতিৰ তথ্য ধৰা পৰাত বেংক কৰ্তৃপক্ষই তেওঁৰ চি এচ পিটো কিছুদিন পূৰ্বে বন্ধ কৰি দিয়ে। পৰৱৰ্তী সময়ত বেংকৰ একাংশ বিষয়া-কৰ্মচাৰীক মেনেজ কৰি পুণৰ তেওঁৰ পত্নী ৰেজিনা বেগমৰ নামত চি এচ পিটো মুকলি কৰিবলৈ সক্ষম হয়। এই চি পিটোৰ জৰিয়তে স্বামীৰ পদাংক অনুকৰণ কৰি একেই দুৰ্নীতি অনিয়মত লিপ্ত হোৱাৰ অভিযোগ উঠিছে। উত্থাপিত অভিযোগ অনুসৰি পত্নীৰ নামত থকা চি এচ পিৰ জৰিয়তে শেহতীয়াকৈ প্ৰধানমন্ত্ৰী কৃষাণ সন্মান নিধিৰ আচনিত শ শ ভূৱা কৃষকৰ নাম সন্নিবিষ্ট কৰি লক্ষ লক্ষ টকা আনজাৰে আত্মসাত কৰিছে বুলি সৰ্বত্ৰ চৰ্চা চলিছে। নগাঁও জিলাত প্ৰধানমন্ত্ৰী কৃষাণ সন্মান নিধি আচনিত সংঘটিত কৰা দুৰ্নীতিৰ মুল নায়ক আনজাৰ হুছেইন বুলি অঞ্চলজুৰি চৰ্চা লাভ কৰিছে। অকল ইমানেই নহয়, সংখ্যালঘু ছাত্ৰ বৃত্তি, জব কাৰ্ড আদিকে ধৰি অন্যান্য আচনিতো বহু ভূৱা হিতাধিকাৰীৰ নামত ভুৱা একাউন্টৰ জৰিয়তে তেওঁ কোটিপতি হ’বলৈ সক্ষম হৈছে। যাৰ বলত তেওঁ নামে বেনামে সম্পত্তি ক্ৰয় কৰাৰ ওপৰিও বিলাসী গাড়ী ক্ৰয় কৰি দপদপাই ফুৰি গুৰু গোহাঁই নমনা হৈছে। বিভাগীয় কৰ্তৃপক্ষই সঠিক তদন্ত কৰিলেই জুলুঙাৰ মেকুৰী উলাই পৰিব বুলি  আৰ টি আই কৰ্মী  আব্দুল জলিল আকন্দ‌ই  অভিযোগ কৰিছে।