দুলীয়াজান

এফালে মহামাৰী ক’ৰোনা ভাইৰাছৰ আতংকত সমগ্ৰ বিশ্ব শংকাত ভুগিছে, আনহাতে নিশা বহিঃৰাজ্যৰ পৰা অহা এখন বাছ দুলীয়াজানত প্ৰৱেশ কৰাক লৈ দুলীয়াজানবাসীৰ মনত এতিয়া বিভিন্ন ধৰণৰ প্ৰশ্ন উদয় হয় ৷ উল্লেখযোগ্য যে শুকুৰবাৰে নিশা দুলীয়াজানত এখন বৰ্হিঃৰাজ্যৰ বাছ প্ৰৱেশ কৰাক লৈ সমগ্ৰ দুলীয়াজানবাসী ৰাইজৰ মাজত চাঞ্চল্যৰ সৃষ্টি হৈছে। দিল্লীৰ পৰা অহা এমএইচ ৬৯ ডি ৫৩৫০ নম্বৰৰ বিলাসী বাছখনে দুলীয়াজানৰ লগতে যোৰহাট আৰু তিনিচুকীয়াৰ কেইবাগৰাকী যাত্ৰী কঢ়িয়াই আনিছিল। চৰকাৰে দিয়া অনুমতি লাভ কৰাৰ পিছত যাত্ৰীসকলে দিল্লীৰ পৰা অসমলৈ যাত্ৰা কৰিছিল। বাছখন দুলীয়াজানত প্ৰৱেশ কৰাৰ আগতে গুৱাহাটী, যোৰহাট আদি ঠাইত যাত্ৰী নমাই আহি নিশা প্ৰায় ৮ বজাত দুলীয়াজানত উপস্থিত হৈছিল৷ কৰ্ত্তব্যৰত থকা  অইল নিৰাপত্তাৰ বিভাগৰ বিষয়া গোপাল বৰাই বাছখনত অহা যাত্ৰীসকলৰ ভিতৰত থকা দুলীয়াজানৰ চাৰিগৰাকী লোকক অইল চিকিৎসালয়ত স্বাস্থ্য পৰীক্ষা কৰাৰ বাবে আনে। অইল চিকিৎসালয়ৰ চিকিৎসকে দিল্লীৰ পৰা অহা লোকসকলক স্বাস্থ্য পৰীক্ষা কৰি তেওঁলোকক নিজৰ ঘৰতে কোৱাৰেণ্টাইন থাকিবলৈ অনুমতি দিয়ে। প্ৰাপ্ত বাতৰিৰ মতে বাছখন অহা দুলীয়াজানৰ ব্যক্তিসকল ক্ৰমে সিদ্ধাৰ্থ ওজা, স্বাগত বৰুৱা, অমৃত কুমাৰ শৰ্মা, এনিশা বৰা অইল ইণ্ডিয়া বিষয়া আৱাসিক এলেকাৰ বাসিন্দা বুলি জানিব পৰা গৈছে৷ পিছত দিল্লীৰ পৰা যাত্ৰী কঢ়িয়াই অনা বিলাসী বাছখনে আন তিনিগৰাকী যাত্ৰীক লৈ তিনিচুকীয়াৰ অভিমুখে ৰাওনা হয়।

মুৰফুলনী

কৃষিমন্ত্ৰী অতুল বৰাৰ গৃহ জিলাত প্ৰধানমন্ত্ৰী কৃষক সন্মান আঁচনিৰ হিতাধিকাৰীৰ তালিকাত দেখা গৈছে ব্যাপক  বিসংগতি। গোলাঘাট জিলাৰ ভিন্ন প্ৰান্তত এতিয়া ক্ষোভ উজাৰিছে কৃষক তথা স্থানীয় দল-সংগঠনে৷ জিলাখনৰ বহু প্ৰান্তত এতিয়া ব্যাপক চৰ্চা চলিছে হিতাধিকাৰীৰ তালিকাক লৈ৷ ঘোচখোৰ আৰু নিলাজ একাংশ লোকৰ বাবে গোলাঘাট জিলাৰ প্ৰায়বোৰ গাঁও পঞ্চায়তত একে নিশাতেই সৃষ্টি হৈছে বহু কৃষক। জিলাখনৰ বহু পঞ্চায়তত একাংশ পঞ্চায়ত প্ৰতিনিধি, নেতা-পালিনেতাৰ আশীৰ্বাদত অঙহী-বঙহী হৈছেগৈ কৃষক৷ বাদ পৰিল সঁচা চহা খেতিয়ক৷ জিলাখনৰ খুমটাই সমষ্টিৰ অন্তৰ্গত ঢেকিয়াল আৰু দক্ষিণ গুৰযোগনীয়া গাঁও পঞ্চায়তটো প্ৰধানমন্ত্ৰী কৃষক সন্মান নিধিৰ বৃহৎ কেলেংকাৰী প্ৰকৃত হিতাধিকাৰী বঞ্চিত এই আচঁ‌নিৰ পৰা৷ একাংশ চৰকাৰী পক্ষীয় নেতা, পালিনেতা, চৰকাৰী চাকৰিয়াল, পেঞ্চনাৰ লগতে একে পৰিয়ালৰ চাৰি পাঁচজনকৈ লোকে লাভ কৰা পৰিলক্ষিত সাহায্য। ঢেকিয়াল পঞ্চায়তৰ ৯ নং ৱাৰ্ডৰ ৱাৰ্ড সদস্যগৰাকীয়েও এই সাহায্য পোৱাক লৈও বহু লোকে আঙুলি তুলিছে৷ কিয়নো তেওঁৰ স্বামী এজন উচ্চ পৰ্যায়ৰ চৰকাৰী চাকৰিয়াল৷ লগতে একেজন ব্যক্তি নামত চাৰি পাঁচটা একাউণ্টত এই সাহায্যনিধিৰ টকা সোমোৱা দেখা গৈছে। আনফালে জিলাখনৰ ৰংবং পঞ্চায়তত এই আঁচনিৰ অধীনত বহু কৃষক বঞ্চিত হোৱাৰ লগতে একে পৰিয়ালৰ পাঁচজন পৰ্যন্ত  সদস্যই লাভ কৰিছে এই ধন। আনহাতে বহু কৃষকক ধন দিয়াৰ প্ৰলোভন দি এজনে এশ টকাকৈ সংগ্ৰহ কৰাৰো অভিযোগ উত্থাপিত হৈছে। এশ টকা দিও বহুজনে নাপালে ধন। তদুপৰি চাকৰি কৰা আৰু ধনী লোকৰ পৰিয়ালৰ সদস্যইও এই ধন লাভ কৰিছে বুলি অভিযোগ কৰিছে। ইফালে একাংশ ৰাজনৈতিক নেতাৰ অহেতুক হস্তক্ষেপত প্ৰস্তুত হোৱাৰ অভিযোগো উত্থাপিত হৈছে হিতাধিকাৰীৰ তালিকা৷ যাৰ বাবে প্ৰকৃত কৃষকৰ সলনি হিতাধিকাৰী তালিকাত স্থান পাইছে কৃষিভূমি নথকা তথা বহুতো ভূৱা কৃষকে৷ আনফালে মুৰফুলনীৰ ফুলবাৰী পঞ্চায়তৰ এগৰাকী আদৰ্শ খেতিয়কে নাপালে আঁচনিৰ ধন৷ ৰজাঘৰীয়াই দিয়া আদৰ্শ খেতিয়কৰ মানপত্ৰখন সযতনে বেৰত উলোমাই ৰাখিছে ব্যক্তিজনে। প্ৰধানমন্ত্ৰী কিষাণ সন্মান আঁচনিত বহুবাৰ আবেদন জনাইছিল৷ কিন্তু নাপালে সেই আঁচনিৰ ধন৷ আদৰ্শ খেতিয়কৰ পৰিৱৰ্তে কিন্তু  মুৰফুলনী পঞ্চায়তৰ পঞ্চায়ত সভাপতিৰ ঘৰতেই তিনিজনে পালে আঁচনিৰ ধন৷ মুৰফুলনী পঞ্চায়তৰ সভাপতিয়ে নিজে কৃষক সন্মান নিধি আঁচনিৰ ধন লোৱাৰ উপৰি নিজ পত্নীৰ নামটো ল’লে ধন। এনেদৰে এতিয়া বিশেষ ৰাজনৈতিক দলৰ আশীৰ্বাদপুষ্ট একাংশ ৰাজনৈতিক কৰ্মীয়ে পাইছে ধন৷ ভূৱা কৃষকৰ নাম হিতাধিকাৰী তালিকাত দেখি চকু কপালত উঠিছে ৰাইজৰ৷ জিলাখনৰ এই পঞ্চায়ত কেইখন এক উদাহৰণ মাত্ৰ৷ এই অনিয়ম এতিয়া জিলাখনৰ প্ৰায়বোৰ গাঁও পঞ্চায়ততেই সংঘটিত হৈছে। আছু, গোর্খা ছাত্ৰ সন্থাকে আদি কৰি বিভিন্ন দল-সংগঠনে সমগ্র বিষয়টোৰ এক উচ্চস্তৰীয় তদন্তৰ লগতে দোষীক উপযুক্ত শাস্তি প্ৰদানৰ উপৰি বঞ্চিত প্ৰকৃত চহা কৃষকসকলক এই আঁচনিৰ সুবিধা প্ৰদান কৰিবৰ বাবে চৰকাৰক আহ্বান জনাইছে৷