নাজিৰা

 দিল্লীৰ ৰামমোহন লোহিয়া চিকিৎসালয়ৰ কোৱাৰেণ্টিনত থকা অসমৰ বিশিষ্ট ক্ৰীড়াবিদ শিৱসাগৰ জিলাৰ পাটসাঁকো অঞ্চলৰ পুষ্প বৰুৱা ক্ৰমাৎ সুস্থ হৈ উঠিছে। তদুপৰি তেওঁৰ সংস্পৰ্শলৈ অহা সহধৰ্মিনী, কন্যা আৰু ভতিজাককে ধৰি পৰিয়ালৰ কোনো এগৰাকী লোকৰ দেহতেই ক’ৰোনা ভাইৰাছ সংক্ৰমণ ঘটা নাই। ক্ৰীড়াবিদগৰাকীৰ সংস্পৰ্শলৈ অহা প্ৰতিগৰাকী ব্যক্তিৰ তেজৰ নমুনা পৰীক্ষাৰ ফলাফল ঋণাত্মক বুলি সদৰী কৰা হৈছে৷ আনহাতে যোৱা এঘাৰটাকৈ  দিন ধৰি পুষ্প বৰুৱাক কোৱাৰেণ্টিনত ৰখা হৈছে যদিও তেওঁৰ স্থাস্থ্য ক্ৰমাৎ উন্নতি ঘটিছে আৰু তিনিটা দিনৰ পাছত তেওঁৰ তেজৰ নমুনা পুনৰ পৰীক্ষা কৰা হ’ব। উল্লেখযোগ্য যে কৰ্কট ৰোগৰ চিকিৎসাৰ বাবে পত্নী আৰু কন্যাৰ লগত তেওঁ যোৱা ৩১ জানুৱাৰীতে দিল্লীলৈ গৈছিল। পাটসাঁকোৰ আখৈয়া গাঁৱৰ ব্যক্তিগৰাকীয়ে পত্নী আৰু কন্যাৰ লগত দক্ষিণ দিল্লীৰ গোবিন্দপুৰ অঞ্চলৰ এটা ভাৰা ঘৰত থাকি ইন্দ্ৰপ্ৰস্থ এপ’ল’ চিকিৎসালয়ত কৰ্কট ৰোগৰ চিকিৎসা কৰাইছিল। যোৱা ৪ ফেব্ৰুৱাৰীত অস্ত্ৰোপচাৰ কৰোৱাৰ পাছত তেওঁ পুনৰ উক্ত ভাৰাঘৰটোলৈ যায়। তাৰ পাছত এটা এটাকৈ তেওঁ এপল’ চিকিৎসালয়ত চাৰিটা কেম’ থেৰাপি লয়৷ ২৭ এপ্ৰিলৰ দিনা তেওঁ পঞ্চমটো কেম’ থেৰাপি লোৱাৰ বাবে পুনৰ চিকিৎসালয়খনত উপস্থিত হয়৷ কিন্তু চিকিৎসকে সাম্প্ৰতিক পৰিৱেশ পৰিস্থিতিৰ প্ৰতি লক্ষ্য ৰাখি তেওঁৰ ক’ভিড-১৯ ৰ পৰীক্ষা কৰাত তেওঁৰ দেহত ক’ৰোনা ভাইৰাছৰ অৱস্থিতি ধৰা পৰে। তাৰ পাছতে তেওঁক দিল্লীৰ ৰামমোহন লোহিয়া চিকিৎসালয়ৰ ১০৩ নং কোঠাত কোৱাৰেণ্টিন কৰা হয়। ইফালে তেওঁৰ পত্নী, কন্যা আৰু ভতিজাকৰ তেজ পৰীক্ষা কৰা হয় যদিও তেওঁলোকৰ দেহত ক’ৰোনা ভাইৰাছ সংক্ৰমণ ঘটা নাই বুলি চিকিৎসকে স্পষ্ট কৰি দিছে। ক্ৰীড়াবিদ পুষ্প বৰুৱাই সংবাদ মাধ্যমৰ জৰিয়তে তেওঁ বৰ্তমানলৈকে সুস্থ বুলি ব্যক্ত কৰিছে। অৱশ্যে ক’ৰোনা আক্ৰান্ত হোৱাৰ বাবে তেওঁ কেম’ থেৰাপি লোৱাৰ পৰা বঞ্চিত হৈ আছে। চিকিৎসকে তেওঁৰ স্বাস্থ্যৰ বুজ লৈ আছে যদিও কোনো ধৰণৰ সু চিকিৎসা আগবঢ়োৱা নাই বুলি আক্ষেপ প্ৰকাশ কৰিছে৷

দৈনন্দিন বাৰ্তা প্ৰতিবেদন

অসমলৈ ঘূৰিছে বাহিৰত আবদ্ধ লোকসকল।চৰকাৰৰ মধ্যস্থতাত ৰাজস্থানৰ কোটাৰ পৰা সোতৰখন বাছেৰে আহিছিল অভিভাবকসহ চাৰি শতাধিক ছাত্ৰ-ছাত্ৰী।ইয়াৰ পিছতে তৃতীয় পৰ্যায়ৰ লকডাউনৰ সময়ত চৰকাৰৰ অনুমতি লৈ উত্তৰপূবৰ ৰাজ্যৰ পৰা কেবাহাজাৰ লোক আহিল নিজ ঘৰলৈ।ইয়াৰ পিছতে আজমেৰ দৰগাহৰ পৰা এখন বাছত প্ৰশাসনৰ চকুত ধূলি দি অহা কৰনাক্ৰান্ত এজনৰ পৰা প্ৰায় দহজনলৈ বিয়পিল প্ৰাণঘাটি ভাইৰাছ।এইবাছখনৰ আগমনে ৰাজ্যবাসীক সচকিত কৰি তুলিছে।ইয়াৰ লগতে দক্ষিণৰ মুম্বাই,গুজৰাট,হাইদৰাবাদ আদিৰ পৰাও বাছেৰে অসমলৈ মানুহ অহাৰ যাত্ৰা আৰম্ভ কৰা বুলি জিনিব পৰা গৈছে।উল্লেখ্য যে সামাজিক মাধ্যমৰ জৰিয়তে ৰাইজৰ জনপ্ৰিয় শিল্পী জুবিন গাৰ্গ পৰিয়ালসহ গুৱাহাটী অভিমুখে যাত্ৰা আৰম্ভ কৰিছে।মুম্বাইৰ পৰা অহা সকলৰ মাজত মুম্বাইত চিকিৎসাধীন ৰোগী আৰু আত্মীয় আদিও আছে।কিছুদিনৰ পূৰ্বে মন্ত্ৰী হিমন্তবিশ্ব শৰ্মাই সংবাদমেলৰ জৰিয়তে ৰাজ্যৰ বাহিৰত প্ৰায় বিছলাখ অসমৰ বাসিন্দা থকা বূলি সদৰী কৰিছিল।এইলোকসকলৰ জৰুৰী কাম নাথাকিলে এইসময়ত অসমলৈ নাহিবলৈ তেওঁ কৈছিল।চৰকাৰে তিনিমাহলৈ আৰ্থিক অনুদান দিব বুলিও কৈছিল।তথাপি একাংশই অসম অভিমুখে যাত্ৰা কৰাৰ খবৰে বিভিন্নজনৰ মাজত মিশ্ৰিত প্ৰতিক্ৰিয়াৰ সৃষ্টি কৰিছে।।।

দৈনন্দিন বাৰ্তা প্ৰতিবেদন

গুৱাহাটী চিকিৎসা মহাবিদ্যালয়ৰ সমগ্ৰ চৌহদ হৈ পৰিছে প্ৰাণঘাটক কৰ’না ভাইৰাছৰ নতুন হটস্পট।কালি চিকিৎসক ডাঃ লিথীকেশ ডি এছ কৰ’নাক্ৰান্ত হোৱাৰ পিছত একেটা চৌহদৰে আঞ্চলিক দন্ত চিকিৎসা মহাবিদ্যালয়ৰ পিজি শিক্ষাৰ্থী ডাঃ দীপা ডেকাৰ দেহত ওলাইছে কোভিড-১৯ ভাইৰাছ।কিন্তু কেনেকৈ আৰু কাৰ জৰিয়তে জিএমচিএইছত কৰ’না সংক্ৰমণ হ’ল তাকলৈ আতংকৰ সূচনা হৈছে।ইতিমধ্যে জিএমচিএইছৰ প্ৰায় চাৰিশ চিকিৎসক,নাৰ্ছ,চিকিৎসাকৰ্মীক কোৱাৰেন্টাইন কৰা হৈছে।২৫০০ জনৰ নমুনা পৰীক্ষাৰ বাবে প্ৰেৰণ কৰা হৈছে।অধীক্ষক ডাঃৰমেন তালুকদাৰ আৰু অন্য ১৮০ জনৰ নমুনাৰ ফলাফল নিগেটিভ আহিছে।আনসকলৰ ফলাফলৰ অপেক্ষা কৰা হৈছে। কন্টেইনমেন্ট কৰা হৈছে এক আৰু পাঁচ নং হোষ্টেল,দন্ত চিকিৎসা কলেজৰ ছাত্ৰীনিবাস আৰু কেন্টিনখন।ইফালে কৰনাক্ৰান্ত চিকিৎসক ডাঃ লিথিকেশ প্ৰায়ে আহিছিল দন্ত কলেজৰ কেন্টিনলৈ।ডাঃ দীপা ডেকাই জিএমচিএইছৰ কৰ’না স্ক্ৰীনিঙৰ দায়িত্বত আছিল।লগত আছিল কেবাজনো চিকিৎসক,নাৰ্ছ আদি।এনেকৈ দুই ডাক্তৰৰ দেহত কৰ’না সংক্ৰমণ হোৱাৰ ফলত বাহিৰৰ ৰোগীৰ বাবে বন্ধ কৰা হৈছে চিকিৎসালয়।এইসময়ছোৱাত ডাঃ লিথিকেশ আৰু ডাঃদীপা কিমান ৰোগী,সহকৰ্মী,নাৰ্ছ,চিকিৎসাকৰ্মী আদিৰ লগতে আন লোকৰ সংস্পৰ্শলৈ আহিছিল সেয়া এতিয়াও হিচাবৰ বাহিৰত।যাৰবাবে জিএমচিএইছত এতিয়া আতংক বিয়পি পৰিছে।।।