১৭ জানুৱাৰী,২০২৫: Jonbeel ।জোনবিল মেলা,অসমৰ এক ঐতিহাসিক উৎসৱ । যাৰ বাবে অধীৰ আগ্ৰহেৰে অপেক্ষা কৰি থাকে অসমবাসীয়ে । জোনবিল মেলাৰ আছে এক পৌৰাণিক ইতিহাস । মৰিগাঁও জিলাৰ মধ্যৱৰ্তী জাগীৰোডৰ পৰা তিনি কিলোমিটাৰ দূৰত্বত থকা এখন বিল জোনবিলৰ পাৰত অনুষ্ঠিত হয় এই জোনবিল মেলা । জোনবিল মেলাৰ আৰম্ভণি কেতিয়াৰ পৰা আৰম্ভ কৰিছিল, তাৰ ইতিবৃত্তি সঠিকভাৱে নাই যদিও তাহানিৰ গোভাৰাজ্য প্ৰতিষ্ঠা হোৱা দিনৰে পৰা এই মেলা প্ৰচলিত হোৱা বুলি গৱেষকসকলে মত পোষণ কৰিছে ।

জনশ্ৰুতি অনুসৰি, গোভা ৰাজ্যৰ প্ৰতিষ্ঠাপক গোভা ৰজাই এদিন ৰাণীৰ সৈতে নৌকা বিহাৰ কৰি ঘূৰি ফুৰোতে এখন বিলৰ কাষ পাইছিল আৰু নিশাৰ বিলৰ ফটফটীয়া পানীত জোনৰ পোহৰ পৰি উজ্জ্বলি উঠিছিল । তাকে দেখি ৰজা ৰাণীৰ মন আনন্দত উৎফুল্লিত হৈ পৰিছিল আৰু তেতিয়া ৰজাই ৰাণীক কৈছিল ‘‘এইখন জোনটোৰ দৰে বিল’’ । তেতিয়াৰ পৰাই এই বিলখনৰ নাম জোনবিল হোৱা বুলি জনবিশ্বাস ।

এই মেলাৰ প্ৰধান তাৎপৰ্য হৈছে পাহাৰত বসবাস কৰা জনজাতীয় তিৱা লোকসকলে তাত উৎপাদিত আলু , কচু আদি সামগ্ৰী ভৈয়ামত বসবাস কৰা তিৱা তথা অন্যান্য জনগোষ্ঠীয় লোকসকলে তৈয়াৰ কৰা পিঠা, সান্দহ, মাছ আদিৰ সৈতে বিনিময় কৰে । অৰ্থাৎ এই দিনটোত কিছু ঘণ্টাৰ বাবে অচল হৈ পৰে মুদ্ৰা ।

গুৱাহাটী, ১৬ জানুৱাৰী, ২০২৫: Assam Budget Session। অসম বিধানসভাৰ বাজেট অধিৱেশন ১৭ ফেব্ৰুৱাৰীৰ পৰা আৰম্ভ হ’ব। উল্লেখযোগ্য বাজেট অধিৱেশন এইবাৰ মুকলি কৰা হব বিধানসভাৰ বাহিৰত । বিধানসভা সচিবালয়ে জাৰি কৰা এক অধিসূচনা অনুসৰি অসম বিধানসভাৰ বাজেট অধিৱেশনৰ প্ৰথম দিনটো কোকৰাঝাৰৰ বডোলেণ্ড টেৰিটৰিয়েল কাউন্সিলৰ বিধানসভাত অনুষ্ঠিত হ’ব। ইয়াৰ পিছতে দিছপুৰৰ নিয়মীয়া ৰাজ্যিক বিধানসভা চেম্বাৰত অনুষ্ঠিত হ’ব অধিৱেশনৰ বাকী কেইদিনৰ কাৰ্যসূচী। অসমৰ বিধানসভাৰ ইতিহাসত প্ৰথমবাৰৰ বাবে ৰাজ্যৰ ৰাজধানীৰ বাহিৰৰ কোনো স্থানত বাজেট অধিৱেশন আৰম্ভ কৰা হ’ব। ভাৰতীয় সংবিধানৰ ১৭৪(১) অনুচ্ছেদ, বৰ্তমানলৈকে সংশোধিত ক্ষমতাৰ অধীনত এই অধিৱেশন আহ্বান কৰা হৈছে।

উল্লেখ্য শেহতীয়াকৈ ৰাজ্যপালে ‘বডোলেণ্ড টেৰিটৰিয়েল ৰিজিঅ’ন কমিউনিটি ভিজন ডকুমেণ্ট’ মুকলি কৰিছে। এই আঁচনিত বিটিআৰত সম্প্ৰদায়সমূহৰ সৰ্বাংগীন উন্নয়নৰ বিষয়ত গুৰুত্ব আৰোপ কা হৈছে। ইয়াৰ লক্ষ্য হৈছে অঞ্চলটোৰ উন্নতিৰ প্ৰতি চৰকাৰৰ দায়বদ্ধতাক প্ৰতিফলিত কৰি এখন বহনক্ষম, নিৰাপদ আৰু স্মাৰ্ট বড়োলেণ্ড গঢ়ি তোলা। ইপিনে আজি কোকৰাঝাৰত অসম বিধানসভাৰ বাজেট অধিৱেশন অনুষ্ঠিত কৰাৰ প্ৰস্তুতিৰ বিষয়ে বুজ লবলৈ এখন সভাত অংশগ্ৰহণ কৰে অসম বিধানসভাৰ অধ্যক্ষ বিশ্বজিত দৈমাৰীয়ে ।

অধ্যক্ষ দৈমাৰীয়ে তেওঁৰ ফেচবুক পোষ্টত এই বৈঠকৰ বিষয়ে এনেদৰে লিখিছে- আজি কোকৰাঝাৰ বড়োলেণ্ড পৰিষদীয় বিধান সভাৰ মজিয়াত আগন্তুক হ’বলগীয়া অসম বিধান সভাৰ বাজেট অধিবেশন অনুষ্ঠিত হোৱাক লৈ বিটিচি চৰকাৰ, বিটিচি বিধানসভাৰ লগতে প্রশাসনৰ সৈতে এক গুৰুত্বপূৰ্ণ আলোচনাত মিলিত হওঁ। এই বৈঠকত অহা ১৭ ফেব্ৰুৱাৰীত হ’বলগীয়া অধিৱেশনৰ কাৰ্য্যসূচী সকলো দিশৰ পৰা নিয়াৰিকৈ সম্পন্ন কৰাৰ বাবে প্ৰয়োজনীয়তা থকা কামবোৰ একেলগে কৰি যাবলৈ সিদ্ধান্ত লয়।

এই বৈঠকত বিটিচি প্ৰধান মাননীয় শ্ৰী প্ৰমোদ বড়ো, বিটিচিৰ অধ্যক্ষ শ্ৰী কাতিৰাম বড়ো, উপাধ্যক্ষ অভিৰাম মহানায়ক, কাৰ্য্যবাহী সদস্যসকলৰ লগতে অসম আৰক্ষী মহাপৰিদৰ্শক শ্ৰী ইমদাদুল হুছেইন বৰা, বিটিএডিৰ আৰক্ষী মহাপৰিদৰ্শক শ্ৰী বিবেকৰাজ সিং ডাঙৰীয়া, কোকৰাঝাৰ জিলা আয়ুক্ত,কোকৰাঝাৰৰ আৰক্ষী অধীক্ষকৰ লগতে অসম বিধানসভা আৰু বিটিচি বিধানসভাৰ সমূহ বিষয়া-ববীয়া সকল উপস্থিত থাকে। উপস্থিত সকলোলৈ মোৰ তৰফৰ পৰা আন্তৰিক অভিনন্দন ও ধন্যবাদ জ্ঞাপন কৰিলোঁ।