খাৰুপেটীয়াত পদপথত বহা পাচলি বজাৰত আৰক্ষীৰ অভিযান

খাৰুপেটীয়া

দৰঙৰ খাৰুপেটীয়াৰ কৃষকসকলে তেওঁলোকৰ উৎপাদিত পাচলি অনন্য দিনৰ দৰে বুধবাৰেও   খাৰুপেটীয়া নগৰৰ সমীপৱৰ্তী খেতাৰশ্বৰ গাঁৱৰ জি এন বি ৰোডৰ দুয়োকাষে পদপথত বহা বজাৰলৈ  বিক্ৰীৰ বাবে আনে। বিগত এসপ্তাহ ধৰি চলি থকা  উক্ত পদপথৰ বজাৰত সমাগত ঘটে বহু কৃষক তথা বেপাৰীৰ৷ বিভিন্ন ধৰণৰ পাচলি আৰু মাছৰে ভৰি পৰা বজাৰখনত সমাগত ঘটে বহু গ্ৰাহকৰ। উক্ত বজাৰখনত  বুধবাৰে  পুৱাতে কাৰ্যবাহী দণ্ডাধীশৰ  নেতৃত্বত খাৰুপেটীয়া আৰক্ষী আৰু অৰ্ধ সামৰিক বাহিনীয়ে হঠাতে অভিযান  চলাই পহু খেদা দিয়ে বেপাৰী আৰু স্থানীয় গ্ৰাহকসকলক। আৰক্ষী আৰু অৰ্ধসামৰিক বাহিনীৰ লাঠিৰ কোবৰ ভয়ত পদ পথতে পাচলি, মাছ, দগা-পাল্লাসকলো এৰি পলায়ন কৰে দৰিদ্ৰ কৃষক সকল। আনকি মাছ পাছলি বিক্ৰী কৰা নগদ ধনো এৰি পলাবলৈ বাধ্য হয় কৃষক আৰু বেপাৰীসকল। ফলত পদপথত পৰি থকা কুইন্টলে কুইন্টলে পাছলি আৰু সৰু-ডাঙৰ মাছ প্ৰশাসনে পৌৰ কৰ্মীৰ সহায়ত ড্ৰাম্পিং গ্ৰাউণ্ডত পেলাই ট্ৰেক্টৰৰ  সহায়ত নষ্ট কৰে হাজাৰ হাজাৰ টকাৰ মাছ আৰু পাছলি৷ ইয়াৰ ফলত শতাধিক কৃষকৰ লগতে মাছ আৰু পাছলি ব্যবসায়ীৰ লোকচান  হয় হাজাৰ হাজাৰ  টকা৷ আৰক্ষী প্ৰশাসনৰ এনে পদক্ষেপক লৈ দিশহাৰা হৈ পৰিছে কৃষকসকল৷