বকোৰ বালিঝাৰ জামে মছজিদত ‘ৰমজান’ উপলক্ষে আৰক্ষী বিষয়া ছাদ্দাম হুছেইন আনছাৰীৰ ইফতাৰ অনুষ্ঠান….

ৰাইজৰ জীৱন আৰু সম্পত্তিৰ নিৰাপত্তাৰ দায়িত্বত থাকিও মানৱ সেৱা আৰু ধৰ্মীয় সেৱাৰ উৎকৃষ্ট নিদৰ্শন  যে দাঙি ধৰিব পাৰি সেয়া দেখুয়াই দিলে এগৰাকী আৰক্ষী বিষয়াই ৷ খাকী পোচাকৰ মাজত থাকিও ধৰ্মীয়ভাৱে উদাৰতাৰ নিদৰ্শন দাঙি ধৰা আৰক্ষী বিষয়া গৰাকী হৈছে কামৰূপ জিলাৰ বকো সমষ্টিৰ অন্তৰ্গত মন্দিৰা আৰক্ষী চকীৰ ভাৰপ্ৰাপ্ত বিষয়া ছাদ্দাম হুছেইন আনছাৰীয়ে ৷

ৰমজান মাহ উপলক্ষে সমাজৰ দৰিদ্ৰ – দুখীয়া- ধনী শ্ৰেণীৰ মাজত সদ্বভাৱ আৰু সমন্বয়-সম্প্ৰীতি  সৃষ্টিৰ লক্ষৰে আৰক্ষী বিষয়াজনে বকোৰ বালিঝাৰ জামে মচজিদত বুধবাৰে অনুষ্ঠিত কৰে এক ইফতাৰ কাৰ্যসূচীৰ ৷ আৰক্ষী বিষয়াজনে ভাতৃত্ববোধৰ নিদৰ্শন দাঙি ধৰি ৰমজানৰ ৰোজা (ব্ৰত) পালন কৰা বৃহত্তৰ বালিঝাৰ অঞ্চলৰ  ধনী-দুখীয়া ইছলাম ধৰ্মাৱলম্বী লোকক ইফতাৰ কৰাই  উৎকৃষ্ট নিদৰ্শন দাঙি ধৰিলে ৷

পৱিত্ৰ ৰমজান মাহৰ প্ৰতি সন্মান জনাই আৰক্ষী বিষয়াজনে  প্ৰায় দুই শতাধিক ৰোজাদাৰক ইফতাৰ কৰায় ৷ এই ইফতাৰ অনুষ্ঠানৰ লগত সংগতি ৰাখি বিশ্ব শান্তি আৰু ভাতৃত্ববোধ সৃষ্টিৰ উদ্দেশ্যে সমূহীয়া দোৱাও অনুষ্ঠিত হয় ৷ এই পদক্ষেপৰ বাবে বিষয়া গৰাকীক স্থানীয় ৰাইজে ভূয়সী প্ৰশংসা কৰে ৷