বিশেষ এককালীন অনুদান আঁচনিৰ পাৱাৰ টিলাৰৰ বাবে মাজুলীৰ অনুসূচীত জনজাতি পৰিয়ালৰ পৰা আবেদন আহ্বান আইটিডিপিৰ

অসম চৰকাৰৰ ভৈয়াম জনজাতি আৰু অন্যান্য পিছপৰা শ্ৰেণী কল্যাণ সঞ্চালকালয়ৰ দ্বাৰা ৰূপায়িত ‘বিশেষ এককালীন অনুদান’ আঁচনিৰ অধীনত ২০২০-২১ বৰ্ষত মাজুলী জিলাৰ আৰ্থিক ভাৱে পিছপৰা অনুসূচীত জাতিৰ পৰিয়াললৈ পাৱাৰ টিলাৰ বিতৰণৰ বাবে যোগ্য হিতাধিকাৰী বাচনি প্ৰক্ৰিয়া আৰম্ভ কৰা হৈছে। মাজুলীৰ ‘একীভূত জনজাতি উন্নয়ন প্ৰকল্প’ (আইটিডিপি)ই ইয়াৰ বাবে জিলাখনৰ দৰিদ্ৰ সীমাৰেখাৰ তলৰ অনুসূচীত জনজাতি পৰিয়ালৰ পৰা আবেদন পত্ৰ আহ্বান কৰিছে। আইটিডিপি, মাজুলীৰ প্ৰকল্প সঞ্চালকে এই সন্দৰ্ভত যোৱা ৫ জানুৱাৰীত মাজুলীৰ অনুসূচীত জনজাতিৰ লোকসকলৰ জ্ঞাতাৰ্থে জাৰি কৰা এক জাননী অনুসৰি এই পাৱাৰ টিলাৰ লাভ কৰিবলৈ আগ্ৰহী জিলাখনৰ আৰ্থিক ভাৱে পিছপৰা জনজাতীয় পৰিয়ালসমূহৰ মূৰব্বী সদস্যই অহা ২০ জানুৱাৰীৰ ভিতৰত গড়মূৰস্থিত প্ৰকল্প সঞ্চালকৰ কাৰ্যালয়ত আবেদন পত্ৰ দাখিল কৰিব লাগিব। আগ্ৰহী আবেদনকাৰীসকলে প্ৰকল্প সঞ্চালকৰ কাৰ্যালয়ত আবেদনৰ প্ৰ-পত্ৰ লাভ কৰিব পাৰিব। তদুপৰি, ভৈয়াম জনজাতি আৰু অন্যান্য পিছপৰা শ্ৰেণী কল্যাণ সঞ্চালকালয়ৰ ৱেবছাইট https://directorwptbc.assam.gov.inৰ পৰাও এই আবেদনৰ প্ৰ-পত্ৰ ডাউনলোড কৰি ল’ব পাৰিব আগ্ৰহী আবেদনকাৰীসকলে।