বিশিষ্ট সাংবাদিক -সাহিত্যিক জয়ছিং টকবি অসম সাহিত্য সভাৰ আঞ্চলিক সম্পাদক মনোনীত

দেওপানী

ৰাজ্যৰ এগৰাকী বিশিষ্ট সাংবাদিক তথা সাহিত্যিক জয়ছিং টকবিক অসম সাহিত্য সভাই ২০২০-২২ বৰ্ষৰ বাবে আঞ্চলিক সম্পাদক হিচাপে মনোনীত কৰিছে৷ উল্লেখ্য যে যোৱা ৭ মে’ত অসম সাহিত্য সভাৰ গুৱাহাটীৰ প্ৰশাসনিক কাৰ্যালয় ৰাধাগোবিন্দ বৰুৱা প্ৰেক্ষাগৃহত সভাৰ সভাপতি কুলধৰ শইকীয়াৰ সভাপতিত্বত বৈদ্যুতিন মাধ্যম যোগে অনুষ্ঠিত ২০২০-২২ বৰ্ষৰ আংশিক কাৰ্যনিৰ্বাহক সভাই জয়ছিং টকবিক অসম সাহিত্য সভাৰ ডিফু আঞ্চলিক কাৰ্যালয়ৰ আঞ্চলিক সম্পাদক হিচাপে মনোনীত কৰে আৰু কভিড-১৯ আইন অনুসৰি সামাজিক দূৰত্ব বজাই যথাসম্ভব সোনকালে দায়িত্ব গ্ৰহণ কৰাৰ পৰামৰ্শ দিয়ে৷ সেই মৰ্মে সোমবাৰে বিয়লি বিশিষ্ট সাংবাদিক তথা সাহিত্যিক জয়ছিং টকবিয়ে কভিড-১৯ আইন পালন কৰি ডিফুস্হিত অসম সাহিত্য সভাৰ আঞ্চলিক কাৰ্যালয়ৰ দায়িত্ব গ্ৰহণ কৰে৷ অন্যহাতে জয়ছিং টকবি য়ে অসম সাহিত্য সভাৰ আঞ্চলিক সম্পাদক মনোনীত হোৱাৰ বাতৰিয়ে জিলা খনৰ সাংবাদিক, সাহিত্যিক আৰু সংস্কৃতিবান লোকৰ লগতে জিলাবাসীয়ে আনন্দ প্ৰকাশ কৰে৷