দৈনন্দিন বাৰ্তা
পুনৰ পেট্ৰল আৰু ডিজেলৰ দাম বৃদ্ধি কৰিলে কেন্দ্ৰীয় চৰকাৰে৷ দেওবাৰে প্ৰতি লিটাৰ পেট্ৰলৰ দাম ৬২ পইচা আৰু ডিজেলৰ দাম ৬৪ পইচাকৈ বৃদ্ধি কৰে৷ সকলো মিলি আঠ দিনত পেট্ৰল আৰু ডিজেলৰ দাম ক্ৰমে ৪.৫২ টকা আৰু ৪.৬৪ টকাকৈ বৃদ্ধি পালে৷ দেশজুৰি তেলৰ দাম বঢ়ালেও স্থানীয় কৰ আৰু ভেট মিলি বিভিন্ন ৰাজ্যত তেলৰ দাম বেলেগ বেলেগ৷ উল্লেখ্য যে লকডাউন শিথিল হোৱাত পথত গাড়ী চলাচল কৰিছে৷ তাৰ লগে লগে পেট্ৰল আৰু ডিজেলৰ দাম বৃদ্ধি পালে৷ ইপিনে আন্তৰ্জাতিক বজাৰত তেলৰ দাম কমিছে৷ সেয়ে দেশতো তেলৰ দাম কমাৰ কথা আছিল৷ কেন্দ্ৰই কৰৰ পৰিমাণ বৃদ্ধিৰ বাবে এনেদৰে দাম বৃদ্ধি কৰিছে বুলি বিভিন্নজনে মত প্ৰকাশ কৰিছে৷ ইয়াৰ লগে লগে বিভিন্ন সামগ্ৰীৰ দাম বৃদ্ধি পোৱাৰ সম্ভাৱনা প্ৰকট হৈ পৰিছে৷