দুলীয়াজানৰ সাহিত্যৰথী জাতীয় বিদ্যালয়ৰ বিশেষ কৃতিত্ব

আজি “ডিব্ৰুগড় চৰকাৰী উচ্চতৰ মাধ্যমিক ও বহুমুখী বালিকা বিদ্যালয়”ৰ উদ্যোগত অনুষ্ঠিত ভাৰত চৰকাৰৰ বিজ্ঞান আৰু প্রযুক্তি বিদ্যা দপ্তৰৰ অন্তর্গত অন্যতম কাৰ্যসূচী “২৮ সংখ্যক ৰাষ্ট্ৰীয় শিশু বিজ্ঞান সমাৰোহ”ৰ ডিব্ৰুগড় জিলা সমাৰোহত “বহনক্ষম জীৱন যাপনৰ বাবে বিজ্ঞান” শীর্ষক বিষয়ত বিজ্ঞান প্ৰকল্প উপস্থাপন কৰি দুলীয়াজানৰ “সাহিত্যৰথী জাতীয় বিদ্যালয়ে” প্ৰথম স্থান অধিকাৰ কৰিবলৈ সক্ষম হয়। শিশু আৰু কিশােৰসকলৰ বৈজ্ঞানিক দৃষ্টিভংগী আৰু চৌপাশৰ পৰিৱেশৰ পৰা পদ্ধতিগতভাৱে বিজ্ঞান চর্চা আৰু শিকনৰ বাবে জিলা পর্যায়ত অনুষ্ঠিত এই কাৰ্যসূচীত বিদ্যালয়খনৰ বিজ্ঞান বিষয়ৰ শিক্ষক সংগীতা হাজৰিকা শইকীয়াৰ নেতৃত্বত সপ্তম শ্ৰেণীৰ ছাত্ৰ দ্বীপজ্যোতি গগৈ আৰু অনুৰণ কৃষ্ণস্তুতি দাসে “থলুৱা মৃন্ময় শৈলী ব্যৱহাৰৰ যোগেদি বতানুকুল আৱাসিক পৰিৱেশ সৃষ্টিকাৰক প্ৰযুক্তিৰ পৰিকল্পনা” বিষয়ত এই প্ৰকল্পটি উপস্থাপন কৰি গ্ৰহণ কৰি দক্ষতাৰে বিদ্যালয়খনৰ লগতে সমগ্ৰ  দুলীয়াজান অঞ্চললৈ গৌৰৱ কঢ়িয়াই আনিবলৈ সক্ষম হয় । এই প্ৰকল্প উপস্থাপন প্ৰতিযোগিতাত ডিব্ৰুগড় জিলাৰ বিভিন্ন বিদ্যালয়ৰ প্ৰায় ত্ৰিশটাতকৈও অধিক দলে অংশগ্ৰহণ কৰিছিল । উল্লেখযোগ্য যে, বিজয়ী দলটোৱে পৰৱৰ্তী পৰ্যায়ত চলিত মাহৰ  ১৮,১৯ আৰু ২০ তাৰিখে (অনলাইন যোগে) ৰাজ্যিক পৰ্যায়ত অনুষ্ঠিত হ’ব লগীয়া “ৰাজ্যিক বিজ্ঞান সমাৰোহ”ত অংশ গ্ৰহণৰ সুযোগ লাভ কৰিছে । পৰৱৰ্তী পৰ্যায়তো দলটোৱে দক্ষতাৰে পুনৰ বিদ্যালয়খনলৈ সুনাম কঢ়িয়াই আনিব বুলি বিদ্যালয়ৰ শিক্ষকসকল যথেষ্ট আশাবাদী ।