সোণতলী বিদ্যুৎস্পৃষ্ট হৈ মৃত্যু এজনৰ৷ শোকাকুল পৰিৱেশ পৰিয়ালৰ মাজত ৷

সোণতলী 

দক্ষিণ কামৰূপৰ বকো সমষ্টিৰ অন্তৰ্গত তথা সোণতলী আৰক্ষী চকীৰ এলেকাধীন ৩নং দক্ষিণ ৰাঙাপানীত আজি সংঘটিত হৈছে এই শোকাৱহ ঘটনা ৷ গাঁওখনৰ বাদশা আলী (৩০) নামৰ দৰিদ্ৰ লোকজনে প্ৰখৰ ৰদত পথাৰত ধান কাটি আহি জিৰণি লবলৈ নিজ গৃহত উপস্থিত হয় ৷ নিজ ঘৰত বিদ্যুৎ সংযোগত বিচিন্ন হৈ থকাৰ বাবে ঘৰৰ বিদ্যুৎ মেৰামতি কৰি আছিল ৷ ঠিক সেই সময়তে হঠাৎ বিদ্যুৎপৃষ্ট হৈ অচেতন হৈ পৰে লোকজন ৷ তাৰ পিছতেই ঘৰখনত সৃষ্টি হয় এক হুৱা-দুয়া পৰিৱেশৰ ৷ পিছত স্থানীয় ৰাইজে অচেতন হোৱা বাদশা আলীক ততাতৈয়াকৈ সোণতলী প্ৰাথমিক স্বাস্থ্য কেন্দ্ৰত ভৰ্তি কৰায় যদিও চিকিৎসকে মৃত বুলি ঘোষণা কৰে ৷ উল্লেখ্য যে,পৰিয়ালৰ একমাত্ৰ উপাৰ্জনকাৰী বাদশা আলীয়ে দিন হাজিৰা কৰি পৰিয়াল পোহপাল দি আহিছিল ৷  বাদশা আলীৰ এনে অনাকাংশিত মৃত্যুত পৰিয়ালৰ মাজত শোকাকুল পৰিৱেশে বিৰাজ কৰিছে ৷ মৃত্যুৰ সময়ত বাদশা আলীয়ে ৭ বছৰীয়া পুত্ৰ সন্তান, দুজনী কন্যা সন্তান আৰু নিজৰ স্ত্ৰীক ইহসংসাৰত এৰি থৈ যায় ৷ স্মৰ্তব্য যে, সোণতলী আৰক্ষীয়ে ঘটনাস্থলীত উপস্থিত হৈ মৃতদেহ আৰক্ষী চকীলৈ আনি মৰণোত্তৰ পৰীক্ষাৰ বাবে জিএমছিএইচলৈ প্ৰেৰণ কৰে ৷