দৈনন্দিন বাৰ্তা ডেস্ক :
দৰিদ্ৰ বা উচ্চবিত্ত নহয়, লকডাউনৰ ফলত বেছি ক্ষতিগ্ৰস্ত হৈছে মধ্যবিত্ত ৷ এই কথা প্ৰকাশ কৰিছে চেণ্টাৰ ফৰ মণিটৰিং দ্য ইণ্ডিয়ান ইক’নমি (চিএমআইই)য়ে৷ দেশত নিবনুৱাৰ হাৰ, আয় বৈষম্য আৰু অৰ্থনীতিৰ ওপৰত লকডাউনৰ প্ৰভাৱক লৈ তথ্য সংগ্ৰহ, সমীক্ষা আৰু গৱেষণা কৰে মুম্বাইৰ এই প্ৰতিষ্ঠানে৷ প্ৰতিষ্ঠানটোৰ দাবী, লকডাউনৰ বাবে কাম হেৰুৱাইছে বা দৰমহা কমোৱাৰ কাৰণে ৩০ শতাংশৰ বেছি আয় কমিছে এই শ্ৰেণীৰ ৷ তথ্যসহ চিএমআইই-এ জনায় যি সকল পৰিয়ালৰ বাৰ্ষিক আয় ৫ লাখ, তেওঁলোকৰ অধিকাংশৰ আয় বাঢ়িছিল যোৱা বছৰত৷ কিন্তু এই বছৰ মাত্ৰ ১৫ শতাংশ আয় বৃদ্ধিৰ খবৰ দিছে৷ যি পৰিয়ালৰ বাৰ্ষিক আয় ১০ লাখৰ বেছি তেওঁলোকৰ এটা বৃহৎ অংশৰ আয় অস্বাভাৱিকভাৱে তললৈ নামিছে ৷ বাৰ্ষিক ১৫ লাখৰ বেছি আয়ৰ পৰিয়ালবোৰৰ খুউব সামান্য অংশৰ আয় বৃদ্ধি ঘটিলেও একেবাৰে বঢ়া নাই সেই সকল পৰিয়ালৰ, যাৰ আয় বাৰ্ষিক ১৮-২০ লাখ ৷ যোৱা বছৰ এই সময়ত ৬০ শতাংশৰ বেছি পৰিয়ালৰ (বাৰ্ষিক আয় ১০ লাখৰ বেছি) আয় বৃদ্ধিৰ খবৰ দিয়া হৈছিল ৷ আনহাতে বাৰ্ষিক ২৪ লাখ টকাৰ বেছি আয় যিবোৰ পৰিয়ালৰ, সেইসকলৰ আয় বাঢ়িছে এই লকডাউনত ৷ যিবোৰ পৰিয়ালৰ বাৰ্ষিক আয় ২৪-৩৬ লাখ তেওঁলোকৰ এক তৃতীয়াংশ আয় বাঢ়িছে ৷ বাৰ্ষিক ৩৬ লাখৰ বেছি আয়ৰ পৰিয়ালৰ আধাৰ আয় বৃদ্ধি ঘটিছে এই সময়ত৷ প্ৰতিবেদনত চিএমআইই-এ এই কথা জনাইছে৷ প্ৰতিটো আয় গোটৰ গড় হিচাপে ৩৩ শতাংশ পৰিয়ালৰ আয় বৃদ্ধি ঘটিছে যোৱা বছৰৰ প্ৰথম তিনি মাহত৷ ইয়াত এই বছৰ ৬.৭ শতাংশ পৰিয়ালৰ পৰা আয় বৃদ্ধিৰ খবৰ পোৱা গৈছে ৷